رواية صبرا يا قلبي

رواية صبرا يا قلبي الجزء الأول للكاتبة روز الفياض الفصل الثاني

اقتحموا مَنْ تُحبون.
لا تنتظروا رسائلهم بل راسلوهم
اتخذوا من المناسبات حجة للحديث
اجبروهم على الثرثرة معكم
لا تتركوهم يُعانون الغرق وبأيديكم النجاة
لعلكم وقعتم في حبِ اناسٍ يمتلكون الكثير من الخجل الكثير من الحساسية المُفرطة والخوف.

وراها ب3 اسابيع يالله اتصلت ام سراج بماما حتى تعرف الجواب فكالت:
سراج عنده سفره بشغل لتركيا من يرجع راح نجيكم ونتفاهم عالتفاصيل.
سافر سراج وجنت يومية اشوف صديقه يجي ونفس النظرات لدرجة جنت اتمنى ارزله بس استحي وكلما تجي عيني بعينه لو انتبه لوجوده يدنك وميرفع راسه لو يلتفت عالجهه الثانيه.
جنت اكول بيني وبين نفسي يمكن سراج موصي يراقبني بغيابه، وهالشي ضوجني اذا بدايتها شك.

ومر هالشهر كله بنفس الروتين واني اتخيل نفسي اني وسراج مخطوبين بس مااحس بفرحه ولا لهفه بس افكر هوايه ماادري خوف من المستقبل لو هو اعجاب لو لان المفروض اول رجال بحياتي.
خلص الشهر ورجع سراج عبالك يداوم ويايه بالكليه هو وصديقه وايام سراج ميجي يجي بس صديقه اللي صار حديث بنات الكليه بس هو مبين عليه ثكيل ومؤدب ومبين ابن خير وملابسه كشخه وكل الولد يسلمون عليه شلونك سيد وهلا بالسيد..

وره فتره اتصلت ام سراج واعتذرت من ماما عالتأخير وكالت اخوها بالمستشفى وحالته تعبانه وبلكي تصبرون علينه شويه لحدما تتحسن حالته.
فاطمه:
شوفي الحب واكفلج كالمعتاد.
ذهب:
لج ياخ، حتى كرهته من وره هالحركات ديحرجني كدام الطلاب كلهم منتبهين عليه شلون يمشي ورايه ويكعد بنفس المكان اللي اكعد بي ووين مااروح الكاه.
فاطمه:.

علواه الكي واحد هيج يحبني كلما افشله يزيد حبه ويلزك اكثر ذهوبه حبيبتي صديقه محجوز إلى عفيه متخلينه يروح لوحده ثانيه وتبقى اختج فطومه التحبج تتألم وتتألم وتتألم.
ذهب:
يعني شنو اروح اكله الا تخطب صديقتي مخبله اكولج نظراته إلى مو طبيعيه وانتي تفكرين بي
فاطمه:
لا ممعقوله بعدين شهالثقه عالعندج هالايام كلنه حلوه بس احنه هم حلوين
ذهب:
عابت هاي شبيج عصبتي؟
فاطمه:
اريد اتزوج.

مرت 4 شهور عالموضوع واليوم اتصلت ام سراج حتى يجون يتفقون عالتفاصيل.
اجت هي وبناتها ( 2 ) وزوجة ابنها الجبير.
دخلت سلمت وكعدت وبدوا يسولوفون عن المقدم والمؤخر طبعا بابا كال كيفهم عيب نشترط فكالوا المقدم هلكد والمؤخر هلكد لان هو الولد معتمد على نفسه ووراه مصاريف حفلة مهر وحفلة العرس واثاث للمشتمل.

معجبني الحجي حسيت نفسي اتحجج يعني اني ماادور ماديات واي شي احتاجه بابا ميقصر اكيد ومااعترضت من كال بابا بكيفهم.
مااعرف يعني ليش بس محبيت اتساهل وياه وكلت لماما تلح بموضوع الدراسه هذا اهم شرط عندي. يمكن جنت اتحجج حتى اخربها.
بعدها اتصلوا كالوا كل شي اوكي بس حددوا يوم يجون بي الرياجيل حتى نخطب ونعد ونعقد سيد.
وبهالفتره جانت امتحانات نهاية السنه بابا كال:
ماكو هيجي شي هسه من تخلص الامتحانات وتنجح يالله.

خلصت امتحانات وانتظر النتائج وطول هالفتره اللي مرت كانت اكو ارقام غريبه تدزلي مسجات واشعار حب وغرام واغاني اكثرها اغاني هيثم يوسف مطربي المفضل وجنت اسوي حظر وثاني يوم رقم جديد بس ماارد فاطمه كلتلي:
هذا اكيد سراج حصل رقمج وديعبرلج عن مشاعره.
الصدك فرحت، يمكن جنت محتاجة يثبتلي شي بمشاعره
جنت اكعد الصبح متشوقه بس حتى اشوف شنو دازلي صاحب الرقم المجهول فرحانه بالاهتمام بس بنفس الوقت ممرتاحه.
فاطمه:.

الو وينج ادك من الصبح متجاوبين.
ذهب:
صباحوو شبيج جنت نايمه
فاطمه:
الساعه ب11 ونايمه واني كاعده من الصبح ادورلج اخبار
ذهب:
اخباريش شكو شصاير خبصتيني بعدين اني منايمه الليل كله وجه الفجر يالله صليت ونمت.
فاطمه:
اي حقج تنامين تسمعين هيثم وتكعدين تسمعين فيروز انتي والحب واني انام عالوساده الخاليه..
ذهب: هههههههههههه، اخ فطوم شعور حلو من تحسين بشخص غامض يحبج مثل الافلام.
فاطمه:.

يمه يمه صدقه مااصدك مو صديقتي انتي اللي اعرفها انتي وحده ثانيه مو معقوله ذهب واخيرا اكو احد كدر يحطم البرود العندج.
ذهب:
يابرود لج اني كتله من المشاعر بس استحي اعبر بعدين ياحب هو اكو واحد يحب شخص ميعرفه بس خليني شويه استمتع بالمسجات الحلوه وبالنهايه حرف m.
فاطمه:
اخاف هذا مؤيد؟
ذهب:
يامؤيد؟
فاطمه: بعد يامؤيد اللي بشعبتنه هو كلما يشوفج يسألج مناويه تتأهلين ههههه خرب يومه على اساس رومانسي ويلمح.

ذهب: هههههه يجوز. خرب بس لا هو صدك. الله اعلم كل شي جائز واني مستمتعه بالاشعار والاغاني الرومانسيه وبعدين انصدم يطلع هو.
فاطمه:
المهم النتائج يوم الخميس تره
ذهب:
يبوووي شبسرعه.
فاطمه:
ياسرعه غير صار شهر من خلصنه امتحانات شنو طلابه.
ذهب:
بطني ظلت توجعني من الخوف.
فاطمه:
لتخافين انتي سعياتج كلها ناجحه مو مثلي3 مواد مصخمه بيها اتوقعج ناجحه كلها تتوسطلج هسه.
ذهب:.

ياريت الله يسمع منج بس مااتصور استاذ محمد ينجحني انتي شفتي شلون شاد ويايه بس يخزر بيه وكلما شافني كلي مغروره على شنو شايفه نفسج.
فاطمه:
خل يولي هاي لانج منطيتيه مجال هيج شد وياج ميستحتي استاذ وعليه العتب ويدور بنات وعلاقات.
ذهب:
حظي الفكر يجيب عليه وين اكو واحد عاوي المهم يالله بعدين نحجي خل اكوم اتوضا راح يأذن واني حتى ممتريكه من وراج
فاطمه:
بعد فوكاها صوجي اني اواسيج وانطيج نظريات وافهمج الحياة.
ذهب:.

ياحياة هو انتي لهسه تلبسين جواريب بيض مال مدرسه.
الخميس رحت للكلية. وصلت لكيت باب القسم مسدود واكو طلاب واكفين بس مابيني وبينهم سلام او حجي، بقيت واكفه وحدي انتظر فاطمه والبنات يجون بعدين اجه ولد اسمه علاء بشعبتي هو وخطيبته اللي هي صديقتي هم بشعبتي وسلموا ووكفوا يمي ويحجون ويسولفون بصوت عالي بحيث كلها تباوع عليهم فكالت خطيبته:
بشري ماانخطبتي؟
ذهب: لا ليش عندج خطيب الي؟
كالت:.

وهذا إلى مبقى احد مسأله عنج والله خوش ولد علاء يكول لتضيعينه من ايدج شتردين اكثر من هيج؟
علاء راسا كال:
والله متلكين احسن منه فد انسان صح هو اكو فرق بالعمر بس فرق بسيط وتره الف وحده تتمناه صدكي اني اعرفه من زماان بيت خالي جيرانهم ويمدحون بي وباهله وحالتهم الماديه كلش زينه بس عود اذا صارت القسمه كليله خل يدير باله علينه من نجي نشتري سياره.

ظليت ساكته افكر بيني وبين نفسي هذول شديحجون ياسياره ياحاله ماديه؟ معقوله سراج بي كل هالمواصفات؟ بس شدعوه الف وحده تتمناه ليش اني شبيه اني هم الف واحد يتمناني بس هو الظاهر ممخلي احد يعتب عليه طاش الخبر بالكليه كلها.
نور:
السلام عليكم.
كلنه ردينه عليها وسلمنه وترخصوا احمد وخطيبته وبقينه اني ونور نسوف ونضحك
نور:
اكلج راح اكولج شي بس لاتلتفتين.
ذهب:
كولي شكو.
نور:.

اكو واحد واكف مانزل عينه منج ابد وكصج كص من فوك ليجوه هذا الممثل.
ذهب:
اهوو. غلسي مالي خلك.
اجت فاطمه ترعد من بعيد.
فاطمه:
هلووووو ياعوباتت، وبصوتها الفضيحه
سولفنه وضحكنه وتعبنه من الوكفه وشويه وفتحوا باب القسم وبدوا الطلاب يدخلون
فاطمه:
عزااا هذا جاي؟
ذهب:
منو؟
فاطمه لاتلتفتين هذا الممثل صديق خطيبج ايباااه شهالجسم شهالكشخه شهالنظاره شهالكرعه.
اني ونور متنه ضحك عليها كنالها:
اكو كرعه حلوه؟
فاطمة:.

اي هو كرعته تخبل
اجو البنات واتونسنه حيل بصراحه بيومها عبالك مشايفتهم صار سنين ولاعبالك يوميه عالواتساب نسولف. دخلت فاطمه استلمت نتيجتها مثل ماهي متوقعه ب3 مواد واكعه وعادي ولا عبالك مبتسمه وتضحك وتسولف دخلوا البنات وحده وره الثانيه.
استلمت نتيجتي واكعة بمادة وحده اللي يجينه بيها هالحقير مثلما اتوقعت.
طبعا بابا من عرف اني واكعه بماده كل لماما:.

لهذا السبب اني مجنت اريد سوالف خطوبه وماخطوبه لان اعرف بيها راح تلتهي خابري للناس كليلهم ماكو خطوبه قبل لا تمتحن وتنجح.
ماما:
على كيفك عيني شدعوه هيج تريدلك حجه عالناس هي الاستاذ هذا شاد وياها حسبي الله عليه.
بابا:
وليش شاد وياها بالله شمسويه بنتي مؤدبه متسوي شي غلط لذلك محد يتجرأ يأذيها.
ماما:.

مو هي لان مؤدبه ومتسوي شي غلط هو شاد وياها واحد ميستحي الله ينتقم منه مثل ماخله بنيتي يومها كل تبجي حتى نامت بدون اكل.
بابا:
الله يطيح حظه الا اروح اشتكي عليه بالعماده.
ماما:
لايمعود انوب يشد وياها اكثر عوفه هو يمل ويتعب ويعوفها وبس تنخطب اصلا راح يشيلها من باله.
بابا:.

الله كريم بس تره بعدني على نفس موقفي اتصلي بالناس وكليلهم تأجل الموعد عاجبهم اهلا وسهلا معاجبهم كيفهم هم احرار واحنه احرار وماكو شي بيناتهم رسمي حتى يربطنه بيهم.
ماما:
امري لله بعد شسوي يوميه مأجلينه حتى استحي احجي ويه المره.
راحت ماما اتصلت بام سراج واسمعها تكول لبابا:
والله المره ضاجت حسيتها وعصبت ويمكن راح يبطلون.
بابا:
بعد احسن كيفهم خل يبطلون.
قربة الامتحانات وبدينه ندرس.

امتحنه وكالوا النتائج بعد اسبوع او اسبوعين.
جانت المسجات مستمره كلها قصائد نزار قباني والاغاني اللي احبها واغاني ماجده الرومي وام كلثوم وعبد الحليم طول النهار والليل وكلما اسوي حضر لرقم يطلع رقم جديد بس بداخلي جنت مستمتعه بشعور الاهتمام هذا وحاسه نفسي بجو مثل الافلام والمسلسلات التركيه.
استلمنه النتائج ونجحنه والحمدلله ومبقى غير شهر عالدوام وبنفس اليوم ام سراج اتصلت كالت:.

بعد الولد ميكدر ينتظر اكثر انتظر هوايه فعلى عكب باجر يجون الرياجيل اذا ابو ذهب موجود.
ماما: ان شاءالله عيني ام سراج بس يجي ابوها ابلغه وانطيكم خبر.
ام سراج: اي والله لان الولد مستعجل يريد يخطب ويتزوج قبل لايسافر.
ماما: وين يسافر الشغل ينتظر مطاير ههه
ام سراج: هاا اي صح صح.
اجه بابا وبلغته ماما وكلها:
ان شاءالله ميخالف خل يجون فشله بعد ماعندي عذر.

فاتصلت ماما بالليل بام سراج وكتلها حياكم الله بس ام سراج كلت لامي:
من رخصتج ام ذهب سراج ذبحني يريد يحجي ويه ذهب بموضوع وهمه هسه خلص بحكم المخطوبين بس باجر وان شاءالله تصير خطيبته.
ماما:
ها اي صحيح كلامج هسه اصيحلها.
اشرتلي تعالي احجي بالتليفون لان اني اصلا كاعده يمها فاني جفلت وانصدمت كتلها
لا لا مااحجي كليلها تسبح نايمه يمها بنات.

ماقبلت ماما اخذت التليفون واشرت لماما تطلع استحي احجي وهي موجوده ضحكت وطلعت.
حسيت نفسي مااكدر اتنفس من المستحه بالكوه طلعت الالو.
سراج: الوو يااهلا وسهلا بالذهب.
اني هنا احس اذا يذبحوني ميلكون بيه قطرة دم ظليت ساكته مثل الصنم
سراج:
الوو الووو ذهب؟
ذهب:
ألوو.
سراج:
شبيج ليش هيج ساكته متردين تحجين ويايه لو مستحيه مني؟
ذهب:
لا بس ممتعوده.
سراج:.

ههههههه ادري ممتعوده تحجين ويه شباب بس انتي هسه خطيبتي وعكب باجر من نجي راح نجيب ويانه سيد حتى يعقدلنه معناها تصيرين مرتي.
ذهب:
الله كريم.
بس بكلبي حسيت لعبت نفسي من اسلوب كلامه على الرغم محجه شي غلط بس حسيته جاي حامي واني ممتعوده هيج ومااعرف اعبر وخجوله حيل محسيت بالراحة واني احجي وياه اكو شي غلط.
سراج:
ذهب؟
ذهب:
نعم؟
سراج:
اكو موضوع مهم لازم نحجي بي قبل الخطوبه واريد اعرف رأيج.
ذهب:
اي كول اسمعك.
سراج:.

اني من زماان خال ابالي ماابقى بالعراق يعني اطلع اكمل حياتي بره.
ذهب:
اي؟
سراج:
فشنو رايج؟
ذهب:
شنو رأيي بشنو؟
سراج:
نتزوج باسرع وقت ونسافر اني وياج نروح لالمانيا؟
ذهب:
تتشاقه؟!
سراج:
لا طبعا مو شقا.
ذهب:
طبعا لا شلون اسافر واني بعدلي مرحله دراسيه وماما وبابا شلون اعوفهم واسافر هم منو عدهم غيري.
سراج:.

يعني موضوع الدراسه هاي اني كدامج اتخرجت وبالكوه والف واسطه يالله اتعينت والراتب يادوب يكفي مو بعد انتي. وامج وابوج تكدرين بعد مانستقر وناخذ ال**يه تجين تزوريهم باي وقت.
ذهب:
مستحيل اولا هذا جان شرطي الاول اكمل دراستي مستحيل اترك دراستي وتعبي علمود الزواج ومستحيل اسافر واترك بابا وماما.
سراج:
اوووكي تمام براحتج.
ذهب:
ماما تسال بيش الساعه تجون عكب باجر؟
سراج:
الساعه 4.
ذهب:
اوكي يالله مع السلامه.
سراج:
باي.

نرفزني. سديت التليفون وحسيت دمي يفور هذا مو صاحي اكو واحد يحجي بهيج موضوع هسه وين جان قبل ليش ماكال اريد اسافر عالعموم الحمدلله مااعترض على كلامي ومااصر على موقفه.
بس خاف بعدين ويكول صرتي مرتي ولازم ترحين وياي؟
الصبح رحنه اني وماما للسوك اشتريت فستان وردي كيبور بصلي ومبطن قصير للركبه وردن طويله وضيقه بس مو مبطنه ومابي شي عالصدر والجتف نازل بسيط واخذت حذاء نفس اللون.

أنت تستحق من يُقيم حرباً، ليحظى بكَ حُباً.

رواية صبرا يا قلبي الجزء الأول للكاتبة روز الفياض الفصل الثالث

يا فكه عيون الگلب؟
يا ميزتي البيها انغر
مو رايدك واتنفسك
لا يانفس شي اكبر.

اليوم كعدت من الصبح واجت فاطمه حتى تساعدنه والظهر رحنه للصالون سوتلي شعري تسريحه بسيطه مثل مااني ردت لان هي بس كعدت رياجيل رفعتلي شعري من كدام ومكياج خفيف ورجعنه للبيت لكيت خالاتي وخوالي وعمامي واهلي كلهم موجودين ومنتظرين اهل سراج يجون دخلت للغرفه اني وفاطمه وبقينه ننتظر.
وره شويه سمعنه صوت الجرس.
نزيت وركضت للشباك اباوع كلت اكيد وصلوا طلع ابويه وعمي فتحوا الباب واسمعهم يكولون:.

اهلا وسهلا كل الهلا بيكم اتفضلوا اتفضلوا.
بس مااشوف منو اجه بقيت واكفه اباوع منتظرتهم يوصلون يم شباك غرفتي لان بصف الديوانيه،
وصلوا بابا ووراه صديق سراج السيد ووياه بعد واحد مااعرفه بس سراج ماكو دخلوا واسمعهم يضحكون ويسولفون شويه وطلع بابا من الديوانيه وصاح لماما ودخلوا بالغرفه يمي كللها:
وينهم ذوله لهسه ماكو صارت الساعه ( 5 ) وهمه ماكو الناس كاعده تنتظر اتصلي على امه شوفيهم وين صاروا.

اتصلت ماما محد يرد.
بابا:
اففف اتصلي من جديد.
ماما:
هم ماكو يدك محد يشيله وهسه كطعوه.
بابا:
يجوز بالطريق بس ازدحام بس غير يردون عالتليفون.
ماما:
خل اتصل من جديد يمكن متسمعه، ماكو هسه مغلق هاي احتمال التليفون خلص شحن.
بابا:
والله كلبي كارصني خل اروح لاصدقائه همه يتصلون عليه بس لحد تحجي شي منكم كدام عماتج وخالاتج والبنات ابد. منريد فضايح وقال وقيل
ماما:.

لا عيني اسم الله ماكو فضايح ان شاءالله ومنحجي شي بس انت اهدأ ولتظل تفكر وتصير عصبي.
طلع بابا معصب سمعت باب الديوانيه الخارجي انفتح ركضنه اني وفطوم نباوع من الشباك شفنه السيد طلع بره وطلع تليفونه وكل شويه يخليه على اذنه شويه وبعدين يرجع ينزله ويدوس من جديد ويرجعه على اذنه كالت فاطمه:
اكيد يتصل بسراج وهذا ميرد فدووه للكرعه.
ذهب:
هههههه لج ياكرعه انتي هسه وكتها.
فاطمه:.

اوي فدوه للمتوتر والعصبي على كيفج حبي هاي متحبيه وهيج لعد لو تحبيه شلون؟
ظل السيد على هالحال نص ساعه اخر شي طلع بالشارع وطلع وراه الولد الثاني اللي اجه وياه بعدين طلع وراهم بابا وظلوا بره هوايه طولوا وبعدين رجعوا بهدوء ودخلوا للديوانيه.
وره دقايق اجه بابا صاح ماما ودخلوا بغرفتهم وسدوا الباب واني وفاطمه نباوع نريد نعرف شكوا مندري المهم مرت عمي الحشريه راسأ سألت بابا:.

ها خويه ابو ذهب اشو طولوا الجماعه خوماكو شي؟
بابا:
لا ام علي ماكو شي فد ساعه ويجون صايره وياهم حادث بالطريق.
مرت عمي:
ياخطيه خو ممتأذين العريس خوما بي شي؟ وضحكت
ابوي بعصبية:
لا مابيهم شي الحمدلله والعريس كل شي مابي موجود بالديوانيه يمنه بس منتظر اهله يجون وباوع على امي ودخل للديوانيه بسرعه وامي وجها ينطي الوان ولاحجت كلمه.
فاطمه:
شوكت اجه سراج مشفته دخل؟
ذهب:.

ولا اني شفته دخل وحتى لو جاي شلون يصير يجي بحده واهله يجون وراه شنو هالهوسه؟
انفتح باب الديوانيه الخارجي وركضنه للشباك نباوع شفنه السيد طلع بالحديقه يحجي بالتليفون بعصبيه بس مينسمع صوته بس نشوفه يأشر بايده وجان يمسح وجهه بكلينكس كل دقيقه وركبته ويخلص تليفون ويرجع يتصل من جديد ويخلص ويرجع يتصل اخر شي خله التليفون بجيبه وفتح الدكم مال القميص الفوك ونزع الستره كالت فاطمه:.

محتر فدووه خاف مصخن سوده عليه.
ذهب:
ههههههه لا يمكن مرتبك ومحرج من الموقف اللي صار يعني اجو قبلهم واتورطوا هههه..
صارت الساعه ( 6 ) واحنه ننتظر وفجأه اندك الجرس حيل اكثر من مره راحت فاطمه تركض للشباك اني ماكمت لان ضجت وتعبت صاحت فطوم:
اجو اجو اجو كومي شوفي.

كمت اباوع وياها واشوف هواي رياجيل لابسين عكل ودشاديش واكو ثنين لابسين غتره لونها اخضر وولد هوايه ورياجيل كومه وطبوا للديوانيه واسمع صوتهم يسلمون بس هوايه مكفتهم الديوانيه فالشباب طلعوا وبالحديقه وطلعولهم ولد خوالي كراسي وكعدوا وياهم بالحديقه.
دخل بابا صاح على ماما وعماتي:
جاي جاي بسرعه.
ظلوا ماما وعماتي يسوون جاي ويصيحون على الشباب ياخذوه وظلوا هيج فد ساعه ونسمع صوتهم بس الكلام ممفهوم.

وره شويه اجه بابا لونه مخطوف وحسيته ضايج كل لامي:
يالله غطيها خل يعقدلها السيد.
فلبستني عباية راس وكلتلي:
غطي وجهج ودنكي راسج هسه راح يدخل السيد والولد حتى تعقدون.

بس ماما جانت عصبيه وتصيح وصاحت لفاطمه وطلعوا ودخل بابا ووراه اثنين مشفتهم منو بس اكيد واحد السيد والثاني سراج حسيت بساعتها كلبي راح ينفجر من كد ميدك بقوه وبده السيد يقرا واني اجاوبه اقبل بس ظليت مصدومه مو نفس المهر اللي اتفقنه عليه المهم نفس شي السيد سأل سراج وجاوبه قبلت بس اني حسيت مو صوته هذا صوت ناصي ومبحوح مو مثل صوت سراج ولاحتى اسمه همه غير كالوا اسمه سراج؟
منو ماجد؟

خلص السيد وباركلنه وطلع هو وبابا وسراج رجعوا للديوانيه. اني متغطيه بالعباية لحدما دخلوا عماتي وخالاتي وماما وفطوم اجوا بوسوني وباركولي ماعدا فاطمه كاعده يمي وساكته لاحس ولانفس وتعدل بشعري وماما تبجي كتلها:
فطوم شبيج مخلوسه اني استحي انتي شبيج وين راح لسانج؟
محجت شي بوستني وكالت:
حبي الله يوفقج وان شاءالله زواجة العمر اني تأخرت اخوي ينتظرني بره باجر اجيج ان شاءالله.

راحت بس اني ضجت حسيتها مو فرحانه معقوله فطوم تغار وانقهرت بس بنات عمي وبنات خوالي منطوني مجال كلهم هجموا تحقيق ويايه رغم اني جنت حالي حالهم كل شي ممفتهمه من الموضوع:
لوتيه تخافين نحسدج اشو لانفس الاسم لانفس المهر ولانفس المواصفات وينه الشعر الاسود والعيون الكبار بس هم حلو بعد انتي حضري نفسج منا وهيج نتصور وياه على اساس جنه بالخارج والتقينه بي ههههه.
اني مثل الهبله اضحك ماادري شيحجون.

بعدين من راحوا محد بقى بس اني وماما وخالتي والرياجيل طلعوا محد بقى بالديوانيه واني احس نفسي دخت من الهوسه وكل شي مفتهمت وضاك خلكي على فطوم.
دخل بابا باركلي وكلي:
يالله بابا تعالي دخلي يم خطيبج.
باوعت لماما تبجي كسرت خاطري فكمت بستها وبجيت كتلها:
بعدني وانتي من هسه تبجين.
بوستني وكلتلي:
مسحي عيونج وروحي يم خطيببج.

كمت عدلت كحلتي ورحت للديوانيه طبيت عادي مدنكه راسي مستحيه سلمت وكعدت وره بابا مرفعت عيني ولاباوعت على سراج.
بابا:
بنيتي هذا زوجج لازم تشوفيه وتعرفين شنو صار وليش سوينه هيج.
اني مدنكه مفهمت شي من حجي بابا..
بابا:
رفعي وجهج بابا وباوعليه.
استحيت اباوعلهك كدام ابوي بس لمحت بطرف عيني شكل مو غريب وممتوقعته خفت اباوع يطلع اللي اشوفه صدك.
بابا:.

ذهب بابا الولد هو يريد يحجيلج لان هذا الكلب سراج مااجه لاهو ولا اهله.
اني وكف كلبي من سمعت هالحجي. شنو مااجه؟ لعد منو خطبني؟ منو اللي جان يمي بالعقد؟ رفعت راسي باوعتله حسيت نفسي بحلم مو معقوله اللي لمحته صدك هذا مو سراج هذا صديقه.
باوعت لبابا كتله:
شنو هاي؟ منو هذا؟
شصاير؟ ليش هذا الولد هنا واني بدون حجاب؟
بابا:
هذا خطيبج سيد ماجد.
ذهب:
شنو الفلم؟ شنو منو خطيبي؟ وين سراج؟
بابا:
مااجه.

ظل ابوي يبجي واني هم بجيت حاول يسكتني بس اني ممفتهمه شي شنو الفلم شنو القضيه.
بابا يحجي بس مااسمع شي من حجيه حسيت الدنيا بدت تظلم.
هوايه إلى صار هوايه عقلي ميستوعبه. حسيت انخفض ضغطي اني من انقهر ينخفض ضغطي ويغمى عليه.

الدنيا صارت ظلمه لزمت ايد بابا حيل ومحسيت بشي بعد الا وره فتره وماما تغسل وجهي بمي بارد فتحت عيوني شفت ماما وخاله كاعدين يمي وواحد واكف كبالي متجتف ويباوعلي عرفته هذا السيد صديق سراج كعدت عدل طاحت دموعي.
دخل بابا كال:
ها بابا حبيبتي كعدتي؟
مارديت بس ماما وخاله كلوله:
اي كعدت.
ماما التفتت على السيد وكلتله:
مو كتلك هسه نص ساعه وتكعد ميحتاج مستشفى هي من تخاف او تنز ينخفض ضغطها وتوكع شويه وتكعد مابيها شي.

محجه شي بس هز راسه وباوعلي اني امسح بدموعي.
خاله:
اسم الله عليج خاله دموعج غاليه ملازم تنزل بس على غالي.
اني شهكت بصوت عالي وبجيت كتلها:
اني ماابجي عليه مااعرفه اصلا حتى ابجي عليه اني ابجي على حظي ليش هيجي يسوي بيه ويفشلني كدام الناس شنو شاف عليه لو سمع عني شي مو زين اني يصير بيه هيج؟
بابا كال:.

بابا وعسى ان تكرهوا شيئا وهو خير لكم والسيد انعم الله عليه وجزاه الله الف خير لم الموضوع وكال كدام الناس اني العريس واتصل باهله وعمامه وكلهم اجو خلال ساعه هم انصدموا مثلج لان ماعدهم خبر بس جانوا فرحانين واني ماعرفت شسوي بساعتها من اقترح علي السيد انو هو يخطبج وافقت مااريد احد يحجي عنج بنيتي ويكولون شنو شاف عليها وتركها ومااجه هو واهله.

بابا طلع وصاح ماما وخالتي طلعوا وياه وسدوا الباب اني دموعي مبطلت اخذت الكلينكس وبديت امسح وجهي كلت اكيد هسه الكحل سال وصرت افشل وهذا صافن بوجهي مثل الصنم ونفس النظرات اللي جنت اشوفها من جان يجي للكليه كعد بصفي اني جفلت واستمريت امسح بوجهي حيل من كدما مستحيه ومفتشله ومقهوره وماعندي حجي اكوله ولا مستوعبه اللي صار وهذا يباوعلي بعدين عدل كعدته صار باتجاهي وكلي:
كافي وجهج صار احمر تره راح المكياج.

حسيت جلدي قشعر لان حسيت صوته قريب يمي واستمريت امسح بوجهي كتله:
لااا.
مد ايده اخذ الكلينكس من ايدي، انتبهت على فستاني قصير وهذا يباوع. كمت من مكاني اخذت كوشايه من القنفه الثانيه ورجعت كعدت بس مو بنفس المكان ابتعدت شويه وحطيت الكوشايه بحضني اغطي بيها رجليه وظليت مدنكه وابجي. اتنهد وكلي:
ليش كعدتي هناك؟
ذهب:
عادي
السيد:
استحيتي مني؟ تره انتي هسه زوجتي على سنة الله ورسوله.
طاحن دموعي ومستحهن كتله:
الله كريم.

السيد:
ها نحجي هسه ارتاحيتي؟
ذهب:
شنحجي؟ اني مالي عيني احجي شي.
ظلت دموعي تصب وامسحها بيدي.
كعد بصفي كلي:
منخلص من البجي اليوم كافي بجي انطيني مجال حتى احجي.
مسحت دموعي رفعت راسي بس مااتجرا اباوع عليه لان كاعد بصفي حسيت نفسي مهزومه اني اللي مااتصرف تصرف ممكن يجيبلي لو يجيب لاهلي حجايه هيجي يصير بيه بدون مااسوي شي غلط ليش؟

وهذا كاعد بصفي متفضل عليه وعلى اساس لام القصه حتى لاانفضح ليش شنو جريمتي؟ وشلون لازم اتصرف هسه؟ وهذا شلون سوه هيج؟ هو مو صديق الكلب سراج الف فكره مرت براسي.
حسيته مد ايده رفع كذلتي فرجعت ليوره خفت وهو ابتسم:
شبيج مراح آكلج عدلت شعرج بس.
باوعتله مالي خلك.
ضحك كلي:
ماكلت شي غلط ليش ضجتي مو من حقي؟
ذهب:.

لا مو من حقك انتي بالنسبه إلى شخص غريب مااعرفك ولااعرف اسمك اهلك عشيرتك شنو قصتك وشنو هالفلم اللي سويته وليش؟
ابتسم كلي:
على كيفج شويه شويه وياي تره اني خوش ولد مو مثل ماانتي متصوره وحقج مو مستوعبه كل اللي صار وحقج تعرفين كل شي عني وهسه احجيلج كل شي بالتسلسل بس اريد استكان جاي لو سمحتي.
اتحسرت حيل وكتله:
ان شاءالله.
رحت لماما لكيتها هي وخاله بالمطبخ ويحجون باللي صار ويسوون عشا فكتلها:
ماما؟
ماما:.

نعم ياماما شبيج؟ شصار؟
ذهب:
ماكو شي بس يريد استكان جاي.
بسرعه هي حطت القوري عالنار وخاله ركضت جرتني كلتلي:
شكال شحجه؟
ذهب:
ماكو شي.
كالت:
محجه ولاشي؟ لعد شجنتو تسوون؟
ذهب:
محجينه شي هو ساكت واني ابجي.
خاله:
كافي ياروحي لتبجين عيونج الحلوه هاي ذبلت من البجي وياريت على شي يسوه.

رحت فتحت باب غرفة ماما وبابا ردت اشوف بابا شيسوي مديت راسي على كيف شفته كاعد عالسجاده يصلي ويبجي متت من القهر سديت الباب ورحت نزعت الكعب لان مو بحاله وخليت عباية جتف عليه شال على راسي واخذت الجاي ودخلت للديوانيه هو جان مدنك بس دخلت رفع راسه ووكف اخذ مني الجاي وخلاه عالطاوله.

‏أحببتك بإصرار غريب قد يحتاج إلى سنوات طويلة في علاقاتٍ أخرى ليكون بهذا الحجم.

رواية صبرا يا قلبي الجزء الأول للكاتبة روز الفياض الفصل الرابع

بدأت قصتنا برساله ونتهت بأدمان.

ظل واكف باوعلي وابتسم وكعد يخوط استكان الجاي وهو مبتسم حسيت حاصرته الضحكه يمكن لان لبست العبايه والشال
غلست وردت اكعد على الجهه البعيده بس هو عبالك قرأ افكاري رأسا كلي:
هنا تعالي اكعدي قريب علي حتى احجي وياج براحتي وجيبي الكلينكس وياج ادري بيج بجايه.
شرب شويه جاي وخله الستكان عالطاوله ودار عليه كلي:.

اني وسراج اصدقاء بس مو مقربين هو يشتغل عدنه بالشركه وصح احنه اصدقاء بس مو من زمان اطباعنه مختلفه اني صديقي المقرب ضياء وهم موظف ويانه بالشركه وجان موجود اليوم وشاف وسمع كل شي وشجعني على هالخطوه وهو بالنسبه إلى اخ مو بس صديق هاي حتى تعرفين موقفي من اللي سواه سراج ومتستغربين من تصرفي.
هسه احجيلج عن نفسي حتى تتتعرفين علي واي شي تردين تسالين عنه سألي واني اجاوبج لتستحين بس بدون بجي عفيه.

محجيت شي اني بس اهز براسي وباوعتله سبحان الله هذا صدك يشبه هذا الممثل بس هذا يتخيلي اطول؟
حسيته انتبه اني صافنه عليه فدنكت استحيت واتذكرت فطوم مسكينه من هيج انقهرت وراحت جانت معجبه بي وماعرفت شتكول انصدمت واستحت مدري خافت تحجي شي.
لزم ايدي اني كمزت وراسا سحبت ايدي.
كلي:.

اني اسمي ماجد عبدالله الوالد الله يرحمه سيد والحجيه علويه لان هي بت عمه وعمري 33 عندي ماجستير بالهندسه وعندي اخ واحد اسمه رائد بس متوفي واخت وحده متزوجة بره.
ذهب:
الله يرحمه
السيد:
ويرحم والديج
السيد:
اختي اسمها نجلاء متزوجه ابن عمي وعايشه بالسويد هي وزوجها واطفالها واني هم..
اتزوجت بت عمي وره وفاة اخوي ب سنتين والله مرزقنه اطفال و.

اني هنا اتخبلت درت عليه عيوني بكصتي اني تاليتي اتزوج هيجي وجماله واحد متزوج وماعنده اطفال معناها هذا السبب اللي خلاه يسوي هيج حسيت دموعي بعد مااكدر الزمها كتله:.

شنو متزوج؟ وشلون قشمرت ابويه وقنعته؟ وشلون هو قبلها إلى اتزوج واحد متزوج؟ ومتزوجني علمود اجيبله اطفال؟ ليش شناقصني؟ شنو الغلط اللي سويته؟ لا لا مااصدك مو صح الا تخبلت واقبل بيك وظليت احجي وابجي وأشر بيدي بعصبية ودموعي مابطلت وهو ساكت اخر شي رجع ليوره وانتجا عالقنفه وغمض عيونه وكال:
يايابه هاي شنو من قابليه عندج للبجي منين تجيبن هاي الدموع؟
رجع عدل كعدته وكعد كبالي وكلي:.

اششش شويه بس صبري خليني اكمل واللي تردينه اني حاضر بي بعد شتردين؟
سكتت بس بقيت ابجي بسكته وكل شويه تطلع شهكه غصبا عني انطاني مي هزيت راسي مااريد كلي:
خلص كافي تره اني مااكدر اكمل وانتي تبجين ولازم تسمعين كل شي للنهايه.
هزيت راسي فكال:.

اني صح اتزوجت بت عمي وهي هم بت خالتي بس انفصلنه وره سنتين ومو بسبب الاطفال لا بس مجنه متفقين مختلفين بكل شي واني اصلا اتزوجتها لان الحجي الله يرحمه لزك الا تتزوج بت عمك وخلينه نفرح شويه من اتوفى اخوك واحنه بحزن ومن هالحجي والحجيه نفس الموال فاتزوجنه بس ماكو اي تفاهم وجنت بعدني طالب بالكليه وهي بالمدرسه وبس اتزوجنه بطلت هي من المدرسه ووره فتره بسيطه بدت المشاكل لدرجة مجنت احب ارجع للبيت حتى مااشوفها وتصير مشكلة والحجي الله يرحمه والحجيه حسوا اني مو سعيد وظلموني بهالزواج بس ميكدرون يكولون طلك لان بت عمي وبت خالتي.

الى ان اتمرضت الحجيه وصارت عدها جلطه وسببتلها شلل نصفي ايدها ورجلها اليمين ومتحجي والحجي كعد من الشغل بالشركه حتى يداريها على اساس هو واسراء اللي هي زوجتي بس مجانت متعاونه ولاعبالك خالتها وعمها ومتحترم وبيوم طلعت روحي وقررت اشتكي لعمي وخالتي وفعلا اشتكيت لعمي ومقصر بيها بس اتفاجأت بخالتي واكفه بصفها وتكلي بنتي مدلله متعرف تخدم نفسها مو بعد تخدم خالتها بعدين خالتها سالفتها مطوله وبنتي تريد ترجع للمدرسه خوماتعوف دراستها وتكعد تكابل خالتها جيبوا خدامه احسن طلعت رجعت للبيت حجيت للحجي كلي الخدامه سهله من باجر روح جيب( ٢ ) مو وحده ومرتك خليها تكمل براحتها.

وفعلا جبت خدامات ( 2 ) يساعدون الحجيه ويسبحوها ويهتمون بالبيت ينظفون ويطبخون.
اني جنت اغلب الوقت انام جوه يم الحجيه خاف تحتاج شي بالليل.
المهم بعد مده متحملت المشاكل ودوخة الراس على شنو متحمل وصلت مرحله اخذتها لبيت اهلها وكتلهم هاي بتكم طالك وطلعت.
زواجنه استمر سنتين بس.
وبالكوه لخاطر الحجي والحجيه جنت متحملها.
سكت وظل يباوع على وجهي بعدين كال:.

هاي قصة زواجي واللي انتهت قبل 8 سنوات وطول هالسنين اهلي يلحون عليه اتزوج اتزوج كبرت خلي امك تفرح بيك وتشوف اطفالك قبل لتموت بس اني انسدت نفسي عن الزواج وكرهته.
اتنهد وكلي:
تعبتي كلبي متتفاهمين كبل تبجين وهسه عندي طلب ثاني.
اني صافنه وافكر شهالقصه شيحجي هذا؟ معقول كل هذا يصير ويايه حياتي انكلبت بساعه وحده؟
ااخ راسي ظل يوجعني من البجي كمت كلي:
وين؟
كتله:
اغسل وجهي واجي..
السيد:.

وياج استكان جاي ثاني ولو تعبت الوالده اليوم بس راسي يوجعني.
طلعت بهدوء رحت للمطبخ لكيت ماما وبابا كاعدين عالطاوله والعشا كدامهم وصافنين وخاله ماكو
ذهب:
وين خاله؟
ماما:
راحت نامت تعبت اليوم.
باوعت للساعه ب9 فكلت لماما:
يريد جاي.

فضحكت ماما واني ضحكت وبابا يباوعلنه عفتهم ورحت للحمام غسلت ورحت لغرفتي نزعت الفستان بعده جوه العبايه لابسته وضايقني ورحت للمطبخ اخذت الجاي من ماما ورجعت للديوانيه دخلت وسديت الباب وراي وهو كام اخذ الجاي مني ورجع كعد.
رحت عالمكتبه بيها علبه زغيره بابا مخلي بيها ادويته دورت بندول اخذته وانطيته اله رفع راسه باوع مستغرب.
ذهب:
مو تكول راسك يوجعك.
السيد:.

اي والله واخذ منه حبتين ورجعلياه وبلع الحبتين وشرب وراهم جاي.
اني هم طلعتلي حبتين راسي موتني لان بجيت هوايه وبلعتهم وشربت وراهم مي وكعدت بدون كلام خلص جايه ودار علي:
شكد حلو الهدوء مو؟
بس هالهدوء راح ينكلب عاصفه من ارجع للبيت كلهم منتظريني بالبيت اشرحلهم اللي سويته اليوم. هالخطوبه المفاجأه ومنو هالعروس ومنين عرفتها وليش خليت الموضوع سر وفاجئتهم بي ووو الى اخره تحقيق يعني اليوم.

اني مدنكه وساكته مالي خلك بس حسيته منتظرني احجي فكتله:
وشنو راح تجاوبهم؟
ماجد:
اكلهم الصدك.
باوعتله ماادري شحجي بس هو كمل حجيه كال:
اكلهم شفتها بالكليه وعجبتني وسالت عنها الطلاب طالب طالب والاساتذه ورئيس القسم والحراس والامن إلى واكفين باب الجامعه وحتى الفلاح والفراش وكلهم كلولي فوت وانت مغمض واللي كلي خيعونه الياخذها واللي يكلي لاتسال ميحتاج نحلف باسمها احنه وهواي حجي كله حلو.
اني دمعتي نزلت كلي:.

ها هم بجي.
كتله:
لعد ليش هيج سوه صديقك؟
السيد:
لتكولين صديقي خلص انتهت هالصداقه من اتصرف هالتصرف. واما ليش هيج سوه فيمكن الله استجاب لدعوة امي لان امي الوحيده اللي تعرف بمشاعري تجاهج وجنت طول فتره ال 6 اشهر الفاتت اني اسأل عنج بحجة سراج بس الصدك هو اسال عنج واراقبج لان حسيت انتي المفروض تكونين إلى زوجتي حلالي.

المشكله هو اللي خطبج قبلي مااكدر اسوي شي جنت اجي للكليه حتى اشوفج يوميه اعوف شغلي واجي وبكل صلاة اكول ياربي اني صبرت واتحملت بس هالموضوع ماعندي صبر عليه لو تجعلها من نصيبي لو تخليني اشيلها من بالي بس كل يوم احبج اكثر وجنت احجي للعلويه اكلها مو تردين اتزوج لكيت بنيه بس انتي ادعيلي بصلاة الفجر الله يجعلها من نصيبي وهي خطيه تدعي لحد اليوم الظهر قبل لا اطلع كتلها علويه جنج مدعيتيلي من كلبج.

رفعت ايديها تدعي سألتني عن اسمج كتلها ذهب ضحكت ونزعت شيلتها ودعت وشدة شيلتها.
وطلعت سبحان الله باخر لحظه الله استجاب دعائها بس كال سراج صرفت نظر وباجر مسافر حسيت مي بارد ونزل على كلبي راسا حجيت ويه ابوج واقنعته واتصلت بعمامي واهلي والموظفين كتلهم اريدكم تجون باقل من ساعه هنا كالوا شكو؟ شصاير؟ كتلهم اريد اخطب.

اوكف فهمنه شلون؟ منو؟ منين؟ كتلهم تعالوا خطبوا وبعدين نحجي بالتفاصيل واجوا وانتهى الموضوع الحمدلله.
باوع على ساعته كال:
الساعه عشره اووه لازم اروح هسه العلويه بالها يمي.
كام وكف حتى يطلع فكلي:
مااريد اضغط عليج واجبرج بس اكلج انطيني فرصه اتعرفي علي زين وبعدين حكمي.
مشى شويه وصل لباب الديوانيه ودار علي كلي:.

المهر مو من مقامج بس اعوضج بالمستقبل ان شاءالله والشبكه تردين انطيج فلوس وانتي تشترين؟ لو تردين اني وياج ووالدتج نطلع نشتريها؟ لو تردين اني اجيب على ذوقي؟ فكري وانطيني خبر..
وهسه اني اروح بس ياريت لو تصيحين الوالد اسلم عليه قبل لا اطلع.
هزيت راسي كتله:
ان شاءالله.
دخلت للبيت صحت لبابا كتله:
هذا راح يروح ويريد يسلم عليك.

راح بابا وظلوا واكفين بره اكثر من نص ساعه وماما تباوعلهم من باب المطبخ واني كاعده على طاولة الطعام وحاطه ايدي على خدي.
ماما:
باس ابوج من راسه مبين مؤدب اي هسه طلع، اجه ابوج خل نفهم شحجوا شكالوا.

كمت اني رحت لغرفتي نزعت العبايه ورحت للحمام لان اريد اصلي وشعري كل سبريه. سبحت واتوضيت وطلعت كعدت عالدرج ماما وبابا بالمطبخ يتعشون حسيتهم ارتاحوا فجأءه وانفتحت شهيتهم ويسولفون مره بصوت عالي ومره يبسبسون كمت رحت لغرفتي اريد اصلي لان صارت الساعه ب11.
صاحوا عليه تعالي اتعشي كتلهم:
مااريد اريد اصلي وانام.
صليت وبجيت على حظي وفضيحتي وخلصت كمت اتمددت على جربايتي ودك ابوي الباب ودخل كلي:.

ها بابا نمتي؟ ردت احجي وياج شويه قبل لتنامين.
كعدت كتله:
منين يجيني النوم؟
دنك باس راسي وكعد يمي عالجربايه كلي:.

انت فرحتي من هالدنيا ماعندي اعز منج ابد لتضوجين حبيبتي واني لوما متأكد منه خوش ولد وخوش رجال وابن ناس محترمين صدكي فلا اوافق لو مو تصير فضيحه ونتفشل كدام الناس بس الصدك اني من جنت اسال على هالنذل سراج كلهم جانوا يمدحون باخلاقه كلهم جانوا يكولون نفس الكلام خلوق متدين واتصور حتى هو مدير الشركه اللي يشتغل بيها هالنذل واهله ناس طيبين محافظين لان ساده معروفين وهي الخطوبه فتره للتعارف اتعرفي عليه وبعدين قرري وباجر هو يجي الصبح حتى يجيب الحلقات حتى وراها تعقدون محكمه.

باوعتله كتله:
بابا شبسرعه؟
مااريد عقد محكمه من هسه بعدني مااعرفه اصبروا عليه شويه..
بابا:
حبيبتي هم الناس شرطوا ثاني يوم يلبسج حلقه وراها تعقدون محكمه حتى الولد يطب ويطلع براحته محد يكدر يحجي لان ساعتها انت زوجته حتى يتعرف عليج وتتعرفين عليه يا بابا.
يالله حبيبة ابوج نامي هسه وارتاحي واقريلج كم ايه وهاذي سبحتج لزميها وذكري ربج (قل لن يصيبنا الا ماكتب الله لنا) باس راسي وطفه الضوه وطلع.

اني احس عيوني مااكدر افتحها تحركني وتوجعني من البجي وخشمي مسدود واحس نعساااانه بس مااكدر انام من التفكير.
فتحت ضوه التبلام اللي عالطاوله بصفي وكمت طلعت احرام الصلاة لبسته وفرشت المصلايه وسجدت وظليت ابجي بحركه واني ساجده واكول حسبي الله ونعم الوكيل بيك ياسراج عالسويته بيه.
نعسانه اتعاجزت اكوم انام بفراشي غفيت على سجادتي.

وره ماادري شكد حسيت سمعت صوت كمزت وفتحت الاضويه خفت ليكون اكو صرصور بغرفتي باوعت انتظرت ماكو شي نزعت احرامي وشلت مصلايتي باوعت عالساعه بالوحده ونص طفيت الاضويه ونمت توني بديت انام وسمعت صوت شي يهتز كعدت خفت كلت شنو صار بعقلي شي من وره احداث اليوم رجع الصوت فتحت المجرات ماكو شي جوه الجربايه ماكو شي جوه الكنتور ماكو شي رجعت بفراشي ماادري شلون عدلت المخده وشفت تليفوني صامت والشاشه شغاله 12 مسج طلع هو مصدر الصوت واني خفت عبالي صرصور.

فتحت الواتساب لكيت الرقم إلى يدزلي مسجات واغاني كالمعتاد دازلي قصيدة نزار قباني قولي احبك وبالنهايه حرف m قريتها وضحكت وكلت بصوت عالي:
والله بطران يمكن صحيح انت مؤيد لو تدري اليوم بيه اتأهلت ههههه.
وراها دزلي اغنية قديمه حتى مااعرف اسم المطرب اللي يغنيها بس احبها لان جنت اسمعها بسيارة بابا من يوصلني مرات اسمها ( لزرعلك بستان ورود) سديتها مالي خلك اسمعها هسه اني مو بحالها شويه ودزلي مسج:.

عجبتج؟ اكيد عجبتج لان اعرف تحبيها ذوقج حلو.
وراها دزلي اغنية وليد الشامي ( ذهب ) بجيت كلت اني الف واحد يتمناني يسوي ويايه هالحقير هيج ويجي صديقه يكمل القصه وتاليتها اني اتزوج غصبا ماعليه علمود لاانفضح ليش شمسويه وليش انفضح الله يسامحك بابا شلون طاوعك كلبك هيج تسوي بيه.
وصل مسج جديد:
معقوله معجبتج؟
اني احبها لان اسمها على اسمج ذهب وانتي ذهب.

غلقت التليفون ونمت حسيت اريد انام والصبح اكعد والكه كل اللي صار حلم مزعج وانتهى.
الساعه ( ب9 ) ونص ماما اجت كعدتني:
كعدي صلي واتريكي قبل ليجي الولد.
اني هم كمت ناسيه اللي صار البارحه كل ظني رايحه للكليه رحت غسلت واتوضيت ورجعت لغرفتي صليت وطلعت رحت ركض لماما كتلها:
ليش مكعدتيني من وكت اتأخرت ماالحك على المحاضره الاولى.

ماما تباوعلي وبابا جان يشرب جاي غص خطيه وظل يكح ومن هدأ حط ايده على كصتي عباله مصخنه واهذي باوع لماما
كلتلي:
يامحاضره حبيبتي مو بعدكم معطلين؟
اني صفنت صدك عطله لعد ليش كعدتني هنا اندك الجرس وكام بابا يفتح الباب وماما كلتلي:
يالله ماما كعدي تريكي بسرعه اجه الولد وانتي بعدج بالبيجامه هذا اكيد خطيبج.
لدقيقه ظليت متحيره ياخطيب؟
اجه بابا:
هذا السيد خل افتحله الصاله.

اتذكرت البارحه وبلاوي البارحه السيد وسراج ضاك صدري كمت مااكلت شي بعدين رحت للصاله فتحت الباب شفته كاعد هو وبابا ويضحكون.

‏عيناك ‌صوتك و‌حديثك وابتسامتك
جميَعها غُلبت قلبي وإنتهيتُ ‌بكِ.