رواية قل متى ستحبني

رواية قل متى ستحبني للكاتبة الشيماء محمد الفصل العشرون

اصوات اصوات كتيره ملهاش ملامح، اصوات ملهاش اي معنى، اللغه اللي بيتكلموها مش مفهومه، صوت حد بيعيط، ...
مفيش اي شيئ له معنى، مفيش حتى احساس بالالم، دي حياه ولا موت!؟
اخيرا فتح عنيه بس غمضهم تاني...
سميرة: احمد حبيبي فوق، فتح عنيك، كلمني...
احمد: (كلام مش مفهوم)
سميرة: مش فاهمه انت بتقول ايه؟
احمد: س س سل
سميرة: سلمي؟ قصدك على سلمي؟ بيعالجوها هيدخلوها اوضه العمليات وان شاءالله هتبقي كويسه.

احمد: عايز اشوفها
سميرة: حبيبي انت تعبان
احمد بيحاول يقوم يقعد وامه بتحاول ترجعه مكانه
زقها بعيد عنه بكل قوته الضعيفه
احمد: لازم اشوفها
احمد شاف هناء بتعيط
احمد: انتي قتلتيها، انتي قتلتيها
نزل من على السرير وحاول يقف بس وقع في الارض
احمد بيعيط وبيصرخ وعايز سلمي مراته
سميرة: رجلك مكسوره مش هتقدر تقف ارجع سريرك
احمد: عايز سلمي ابعدوا عني لازم اشوفها
اي حد بيحاول يقربله بيزقه بعيد عنه
احمد: سيبوني لازم اروحلها.

بيحاول يقف بس رجله مش شيلاه وبيقع وامه بتعيط زياده
هناء: رجلك مكسوره والحركه غلط عليك
احمد: ملكيش دعوه ( بيزعق بصوته كله) ملكيش دعوه بينا، روحي يالا بعيد عنها روحي افرحي اهي ماتت اهي هيا كمان، اهي ماتت اهي
هناء: ما ماتتش يا احمد سلمي لسه عايشه.

احمد: هتموت هيا كمان هتسيبني، هتسيبني وهيا فاكره اني بكرهها وده بسببك، كل يوم كنت بهينها واجرحها علشان اخليها بعيد علشان ما اضعفش قدامها علشان تأنيب ضميري اني قتلت بنتك
عبير احترمتها وحبيتها وعمري ما جرحتها او هنتها او زعلتها اوقلتلها مره كلمه ضايقتها، كل طلباتها كانت مجابه، احلامها كانت اوامر، بس معرفتش احبها بالطريقه اللي كانت عيزاها، عمري ما قصرت معاها.

وانتي اقنعتيني اني كنت بعذبها واني كنت وحش واني قتلتها وخليتيني حرمت الحياه على نفسي، حرمت نفسي من اني اعيش.

ولما حبيت سلمي كنتي كل لحظه تفكريني اني قتلت بنتك فخليتيني كل شويه اقولها اني ما بحبهاش وانا بعشقها، هنتها وجرحتها وحرمتها من كل حقوقها من ابسط حقوقها دفنتها بالحياه، ولو ضعفت قصادها كنت بحملها هيا ذنب ضعفي وبقولها انها رخيصه واني ما بعتبرهاش مراتي، عاملتها بأسوأ طريقه ممكن حد يعامل حد بيها وكل ده بسببك انتي، ولما استسلمت واخدت قراري اني اعيش لمستها، لمستها مره واحد بس وسافرت ورجعت تقوليلي ان مراتي ماتت بسبب مضاعفات الولاده وان حملها وولادتها قتلوها مش انا واروح البيت الاقي سلمي بتقولي انها حامل وبدال ما افرح افتكرك انتي وانتي بتقوليلي ان مراتي ماتت بسبب الحمل واهينها تاني واجرحها تاني واقولها اني بكرهها واني مش عايز اخلف منها واجرجرها من شعرها علشان اسقطها وفي الاخر هيا تختار انها تموت نفسها واخر حاجه سمعتها مني اني بكرهها.

شفتي انتي عملتي فيا ايه؟؟ شفتي وصلتيني لفين؟
شفتي انانيتك وصلتنا لايه؟؟
هناء: سلمي عارفه انك بتحبها
احمد: متجيبيش اسمها على لسانك، متجيبيش اسمها على لسانك، امي انا لازم اشوفها ارجوكي وديني عندها ارجوكي
سميرة: حاضر يا حبيبي حاضر
امه جابتله كرسي وجابت اتنين ممرضين يساعدوه واخدوه عند سلمي اللي كانوا بيجهزوها للعمليات
يوسف كان معاها واول ما شافه دخله عندها.

يوسف: خلي املك في ربنا كتير، ان شاءالله هتكون كويسه ما تخافش
احمد: انا عايزها تفوق ينفع تفوقها؟
يوسف: لا ما ينفعش حاليا لازم تدخل العمليات علشان عندها نزيف واعتقد كده البيبي نزل
احمد غمض عنيه ودموعه نزلت
احمد: انا عملت فيها كده؟ انا وصلتها لده؟
يوسف: احمد حياتنا كلها مرسومه وكلها خطوات احنا بنخطيها وبعدين ربنا بيقول ايه
قل لن يصيبنا الا ما كتب الله لنا وكل اللي بيجي من عند ربنا كويس.

عبير ماتت وربنا رزقك ياسمينا نورت دنيتك وبعدها رزقك بصحتك وشغلك وحب الناس ليك ورزقك بسلمي واكيد مخبيلك حاجات كويسه بس انت ارمي تكالك عليه وامن بقضاؤه وهتتفاجئ بقضاء ربنا،
ربك بيقول لو اطلعتم على الغيب لاخترتم الواقع
احمد: ونعم بالله، يارب انت عالم بحالي يا رب رجعهالي يارب، رجعها لحضني يارب انا ملحقتش اعيش معاها ملحقتش اقولها بحبك
يوسف: احنا هندخل دلوقتي العمليات وربنا يسهل امورنا.

دخلوا العمليات واحمد بره بيدعي ان سلمي ترجعله تاني وترجع لبنته...
شويه وممرضه خرجت تجري واحمد مش عارف ايه بيحصل ومش قادر يتحرك بص لامه
سميرة: هشوف في ايه
سميرة رجعتله: احمد حبيبي
احمد: ايه في ايه؟
سميرة: محتاجين دكتور جراحه ومفيش غير هناء وهيا تعتبر اكفأ حد هنا بس لازم موافقتك
احمد: انتي عايزاني اخلي حياه سلمي بين ايدين هناء.؟ وان قتلتها؟

هناء: انا عمري ما كرهتها يا احمد، اه حاولت بس معرفتش، من جوايا كنت بحب وجودها في حياه حفيدتي، والفتره اللي فاتت كنا على طول مع بعض وعلشان كده انا حبيتها فاعترفتلك بالحقيقه، سلمي بقت زي بنتي
احمد: بنتك! المفروض اني اصدق انك بتحبيها!
هناء: اوعدك اني هعمل المستحيل علشان انقذها
احمد: لو ماتت انتي هتقولي لياسمينا انك قتلتي امها بايدك فاهمه، دمها هيكون على ايدك.

دخلت هناء وعملت المستحيل هيا وجوزها علشان ينقذوها لاحمد
وهما في العمليات قلبها وقف وهناء كانت هتجنن
هناء: انتي لازم تعيشي، احمد هيموت من غيرك، وياسمين محتجالك، انتي لازم تعيشي
فضلت تنعش فيها لحد ما قلبها استجاب ورجع ينبض تاني
خرجت من العمليات
يوسف: احنا عملنا كل اللي نقدر عليه واعتقد انها ان شاءالله هتبقي كويسه بس تفوق وهنحدد ساعتها.

احمد راح وراها اوضتها في العنايه المركزه وحطوله سرير جنبها وعطوله مهدئ علشان يقدر يرتاح
فاق تاني يوم وبص جنبه وحاول يقوم وفضل يعافر لحد ما وصلها بس زي ما هيا
احمد لقي عم سيف وام سلمي جنبها، ام سلمي في اتهام في نظرات عنيها لاحمد، احمد غمض عنيه لانه مش هيتحمل اتهام من ام تاني
احمد: قوليها صريحه
عم سيف: يا ابني حمدلله على سلامتك الاول
احمد: الله يسلمك.

امها: هيا كانت حامل صح؟ وايه اللي حصل؟ ايه اللي حصل يا احمد...
احمد مش عارف يقولها ايه؟ يقولها انه مكنش عايز الحمل وسلمي صممت وانهم اتخانقوا لحد ما العربيه اتقلبت بيهم،؟ يقولها ايه؟ السكوت افضل
امها: يعني هو انت ما بتعرفش تسوق ولا انت مش عايز حمل فبتعمل بيهم حوادث انت بتعمل ايه بالظبط؟
عم سيف: ايه اللي انتي بتقوليه ده؟ هو حد بيتعمد يعمل كده؟ يا وليه صلي على النبي وادعيلها تقوم بالسلامه.

احمد ساكت بس دموعه نزلت بصمت
يوسف دخل: انت فوقت
احمد: هيا ما فاقتش ليه؟ ولا فاقت وانا نايم؟
يوسف: للاسف يا احمد ما فاقتش
احمد: مالها في ايه؟
يوسف: ده شيئ في علم الغيب، طبيا المفروض انها تفوق واحنا كمان حاولنا نفوقها بس مافاقتش
احمد: يعني ايه؟ دخلت في غيبوبه مثلا؟
يوسف: لأ برضه بس اعتقد يا احمد ان هيا نفسها رافضه تفوق، ودي الفكره المسيطره على عقلها انها مش عايزه تعيش وبالتالي مش بتفوق.

احمد: طيب انا عايزها تسمعني، هيا لازم تسمعني
يوسف: الطب هنا بيوقف عاجز مش بايدينا حاجه نعملها غير ان احنا نرفع ايدينا ونقول يارب
سابه وانسحب واحمد فضل جنبها كل شويه يهمس جنبها انه بيحبها
احمد: سلمي انا بعشقك، هقولك ليل ونهار اني بحبك بس انتي فوقي، حبيبه قلبي خليكي معايا ما تسيبينيش، ما تتخليش عني محتاجلك، ياسمينا كمان محتجالك، انتي بتحبيها هتسيبيها لمين؟

هتسيبينا احنا الاتنين لمين؟ ارجعلنا يا سلمي ارجعي ارجوكي
بس سلمي فاضله على حالها، احمد الالم في رجله بيموته بس بيكابر وبيعند وبينكر
امها وابوها برضه مش بيسيبوها نهائي، الكل جنبها
ام سلمي: احمد يا ابني
احمد: افندم
امها: سامحني حبيبي على الكلام اللي قلته كان غصب عني انا عارفه انك روحك فيها بس فضفضت بقى وطلعت كده حقك عليا ما تزعلش مني.

احمد: انتي اللي حقك عليا وفوق راسي كمان، انا اتسببت في الحادثه دي، انتي من حقك تتهميني لان انا فعلا متهم، لوميني زي ما انتي عايزه صرخي في وشي واعملي كل اللي نفسك فيه لاني استاهله واكتر
امها: لا يا حبيبي ما تشيلش نفسك فوق طاقتها
احمد: وهيا مش دي الحقيقه؟
امها: سلمي هتفوق وهتشوف بنفسك وكل حاجه تتعوض والبيبي هتعوضوه باذن الله وتملوا البيت عيال تتنطط حواليكم هتشوف
احمد ابتسم لها ومردش.

ياسمينا جت تشوفهم لان ابوها واحشها جدا وسلمي كمان
ياسمينا: بابي هيا سلمي هترجع البيت امتي؟
احمد: لما تفوق ان شاءالله
ياسمينا: طيب هتفوق امتي؟ ما تيجي نصحيها
احمد: ياريت يا حبيبتي نعرف نصحيها ياريت
ياسمينا: طيب هيا بتحبك انت نادي عليها وهيا هتسمعك وهترد عليك
عنين احمد دمعت: انا بنادي عليها كتير ومش بترد عليا يا ياسمينا
ياسمينا: تلاقيها زعلانه منك انت على طول بتزعلها يا بابي.

احمد: طيب انتي نادي عليها يمكن تسمعك انتي وترد عليكي
ياسمينا قربت من سلمي وفضلت تكلم فيها.

ياسمينا: مامي حبيبتي اوعي تسيبيني يالا بقى قومي علشان نروح البيت بابي اهو رجع من السفر يالا فوقي بقى، اوعي يا مامي تسيبيني زي ماما عبير وتروحي لربنا وتسيبيني لوحدي تاني، انا مش عايزه ابقي لوحدي تاني، انتي لو سيبتيني بابي كمان هيسيبني، هيسيبني للدادات كل شويه وانا هرجع ما اتكلمش تاني، انا بحبك قوي يا سلمي فوقي بقى
كل الموجود عيط وخصوصا هناء.

ياسمينا روحت البيت وعم سيف وام سلمي كلهم راحو شقه احمد وياسمين راحت معاهم
احمد فضل جنب مراته واخر النهار حس بسلمي بتتحرك رن الجرس ويوسف وهناء جم يجروا بسرعه
سلمي بدأت تفوق واحده واحده
فتحت عنيها وبصت حواليها وشافت احمد واول ما بصتله قرب منها
احمد: سلمي انا بحبك سامعاني انا بحبك
ولحظات وغابت تاني من غير ما تنطق
الصبح فاقت تاني ولقت احمد برضه جنبها نايم
سلمي: احمد احمد اصحي.

احمد صحي وبصلها وقام بسرعه قرب منها
احمد: انتي كويسه؟
سلمي: ياسمينا سمعت ياسمينا بتناديلي هيا فين؟
احمد: بقى سمعتي ياسمينا وانا لأ؟ ياسمينا في البيت
سلمي: كانت بتعيط هيا كويسه؟
سلمي كانت بتتكلم بالعافيه
احمد: كانت خايفه عليكي تسيبيها بس هيا كويسه المهم دلوقتي انتي...
سلمي: ابني كويس؟
احمد بص للارض ومعرفش يرد
سلمي: نزلته صح؟ انت خلتهم ينزلوه؟
احمد: لا يا سلمي هو نزل لوحده.

سلمي: انت مكنتش عايزه وكنت عايز تنزله افتكرت كل كلمه انت قلتها، واديك اهوه نفذت كلامك مش هخلف غصب عنك، عمري ما طلبت منك حاجه والحاجه الوحيده اللي طلبتها اخدتها مني
احمد: انا اسف يا سلمي سامحيني اسف على كل لحظه عدت مقولتلكيش فيها اني بحبك، اسف على كل دمعه نزلتها من عنيكي، اسف حقك عليا.

كان غصب عني كنت شايل ذنب موت عبير، وكنت واخد عهد بيني وبين نفسي ومع هناء اني مش هحب غيرها واني طالما محبتهاش وحرمتها من اني اقولها بحبك يبقى مش هقول لحد غيرها وده كان غلط وعذبتك معايا فسامحيني
سلمي: انا ممكن اسامحك على كل حاجه يا احمد الا ابني اللي انت حرمتني منه، حرمتني اني احس بالامومه واني اخلف وده مش هسامحك عليه
احمد: سلمي خلي قلبك كبير معايا زي ما انتي كنتي ديما قلبك كبير وحاولي تعذريني.

سلمي: ارجوك يا احمد انا تعبانه سيبني ارتاح
احمد: ارتاحي ارتاحي دلوقتي وبعدين نتكلم
يوم واتنين وسلمي بتتحسن وشايفه احمد قدامها بيحاول يصالحها، ساعات بتحن وخصوصا لما يكون تعبان ويداري تعبه عن الكل، وبيحاول يتحرك ويعتمد على نفسه بس رجله بتخونه ومش بيقدر فساعتها هيا بيبقي نفسها تقوم وتساعده او تسنده لانه بيقف مكانه وما بيقدرش يتحرك ومفيش حد يساعده.

بس بتفتكر خناقهم وتفتكر لما جرجرها وركبها غصب عنها عربيته علشان يسقطها فبتقسي عليه
سلمي خرجت من المستشفي واحمد كمان وكانت عايزه تروح بيت ابوها
احمد: سلمي خليكي هنا
سلمي: انا اسفه مش هقدر محتاجه ابعد
احمد: طيب انا هسيبلك البيت بس خليكي هنا ما تبعديش كده
سلمي: مش عايزه افضل في بيتك يا احمد
احمد: ده بيتك انتي
سلمي: عمره ما كان بيتي
احمد: طيب فكري في ياسمينا ولا هيا مش في بالك؟

سلمي: ما تلعبش بورقه ياسمينا لو سمحت
احمد: مش بلعب باي ورق انتي لو سافرتي هيا هتزعل ودي حقيقه واضحه وهتتعب لحد ما ترجعي
سلمي: احمد انا مش هرجع انا جربت حظي معاك واكتفيت خلاص انا اسفه بس مش هقدر اكمل
احمد: سلمي انتي عايزه تسيبيني؟
سلمي: انا ياما مديت ايدي وكنت ديما بتضربها وترفضها وانا ايدي تعبت خلاص وانا تعبت ووصلت لمرحله خلاص مش هقدر ادي تاني او اقدم اي حاجه.

احمد: انا مش عايزك تدي او تقدمي انا عايزك بس موجوده اديني فرصه يا سلمي اعوضك عن اللي فات، اديني فرصه احبك
سلمي: احمد انا مش متقبله اي كلام منك دلوقتي فلو سمحت سيبني وصلني بس الشقه اخد حاجتي
احمد استسلم وصلها هيا واهلها وسابها ومشي
ياسمينا قضت اليوم الاخير مع سلمي واخر النهار سميرة جت اخدتها وهيا سافرت مع اهلها
عدي شهر بحاله وهما بعيد عن بعض حتى الكلام ما بيتكلموش.

ياسمينا بتتطلب من ابوها كل شويه انها تروح لسلمي او تكلمها
احمد اتصل بيها
احمد: ازيك يا سلمي
سلمي: انا كويسه انت اخبارك ايه وياسمين عامله ايه؟
احمد: احنا كويسين،
سلمي: رجعت شغلك ولا لسه؟
احمد: لا لسه
سلمي: هيا رجلك لسه تعباك؟
احمد: رجلي بس اللي وجعاني؟ ما تشغليش بالك المهم ياسمينا عايزه تكلمك
ياسمينا فضلت تتكلم مع سلمي وترغي معاها
وكل يوم بقت بتكلمها في التليفون واحمد بيبقي جنبها بس مش بيكلمها
وفي يوم.

ياسمينا: بابي ممكن توديني لسلمي؟
احمد: اوديكي ازاي؟ وسلمي بقت كويسه علشان تستقبلك؟
ياسمينا: اه يا بابي هيا قالتلي اروح عندها
احمد: ومدرستك؟
ياسمينا: اجازه نص السنه يا بابي اسبوعين اخدهم معاها وافق يا بابي بليز
احمد: هشوف يا ياسمينا؟؟
احمد اتصل بسلمي وهيا قالتلها انها فعلا قالت لياسمينا تقضي معاها اجازه نص السنه
احمد اخد بنته وسافر واخيرا وصل عندها كان مشتاق ليها جدا.

استقبلوه كلهم ورحبوا بيه جامد وسلمي سلمت عليه عادي
احمد مع سلمي لوحدهم
احمد: انتي متأكده انك عايزه ياسمينا طول الاجازه
سلمي: اه متأكده، هيا دي محتاجه سؤال يا احمد؟
احمد: اه محتاجه وهتفضلي هنا لامتي؟
سلمي: ما انا قولتلك مش هرجع تاني؟
احمد: وبعدين ناويه على ايه؟
سلمي: على الطلاق.

رواية قل متى ستحبني للكاتبة الشيماء محمد الفصل الحادي والعشرون

احمد الكلمه وجعته قوي ومتخيلش ابدا انه ممكن يسمعها او ان سلمي ممكن تبيعه
سكت ومردش عليها بس سابها ومشي ولاحظت انه لسه بيعرج على رجله
كان نفسها تناديه وترمي نفسها في حضنه
احمد نزل في فندق صغير في بلدهم وابوها اول ما سمع اتجنن وراح لبنته
عم سيف: انتي اتجننتي؟ عايزه الناس تاكل وشي، بقى جوزك ينزل في فندق والبيت كبير ومفتوح ده اسمه كلام ده؟

سلمي: انا معرفش انا افتكرته مشى لاننا اتفقنا يسيب ياسمينا معايا الاجازه
عم سيف: اتصلي بيه وقوليله يجي حالا هنا اتفضلي
سلمي اتصلت بيه وطلبت منه يجي ضروري لان باباها عايزه وفعلا احمد راحلهم
عم سيف: بقى ده اسمه كلام ده يا احمد، يعني كان المفروض بقى لما نزلنا مصر كنا قعدنا في فندق مش في بيتك وانت اهو بتقولنا حسوا
احمد: لا يا عمي العفو البيت بيتك طبعا وبيت بنتك
عم سيف: وهنا ايه؟ البيت مش قد المقام؟

احمد: لا يا عمي ما تقولش كده
عم سيف: امال نزلت في فندق ليه؟ وليه مقعدتش هنا في بيتك؟
احمد: الظروف مختلفه يا عمي وبعدين انا كنت همشي واسيب ياسمينا بس غيرت رأيي وقلت استني بكره تقضيه معاكم واخدها وامشي
هنا سلمي خرجت: تاخدها ايه؟ احنا اتفقنا تسيبها معايا الاجازه كلها
احمد: مش هينفع
سلمي: ليه مش هينفع؟
احمد: اهو مش هينفع وخلاص
سلمي: مفيش حاجة اسمها مش هينفع وخلاص انت بتعاقبني صح؟

احمد: لا يا سلمي مش هعاقبك بس مالوش لازمه تقعد عندك الاجازه، تقدري تقوليلي بعد الاجازه ما تخلص هتعمل ايه؟ ايه الوضع هيبقي ماشي ازاي؟ انتي طالبه الطلاق! يعني بتقطعي كل الخيوط ما بينا يبقى ياسمينا لازم تتعود على بعدك
امها: مين دي اللي طلبت الطلاق؟ انتي اتجننتي؟ انتي طالبه الطلاق ليه؟ هو انتي بتلوميه على ايه؟ انه عمل حادثه؟ ولا انه خسر ابنه؟ دي حاجات بتاعت ربنا
سلمي: ماما ارجوكي انتي مش فاهمه حاجه.

امها: طيب فهميني انتي
احمد: المهم همشي انا
عم سيف: قسما بالله العظيم ما تتطلع من البيت
احمد: يا عمي لو سمحت
عم سيف: لا انا حلفت، اطلع ارتاح
احمد: يا عمي انا مرتاح في الفندق
وقدام حلفان عم سيف واصراره وافق احمد يبات عندهم
طلع اوضه سلمي فوق وبات فيها بس ما ينام غير مرتاح البال
نسي ادويته ومسكناته وتعب جدا وطلع بره التراس وافتكر اخر ليله قضوها مع بعض ومحاولات حماته انها تقرب بينهم.

حماته جهزتله القعده زي المره اللي فاتت
ام سلمي بعد ما نزلت كلمت سلمي
امها: اطلعي شوفي جوزك
سلمي: اشوفه اعمله ايه؟
امها: شكله تعبان جدا
سلمي: معلش ربنا يشفيه
اخر الليل سلمي قلبها ما طاوعهاش تسيبه كده فطلعتله
احمد كان عرقان جدا وشكله فعلا تعبان جدا وماسك رجله بيحاول يدلكها او يريحها في اي وضع
سلمي: اقدر اساعدك بحاجه؟
احمد اتفاجئ بوجودها
احمد: لا متشكر
سلمي: شكلك تعبان.

احمد: متشغليش بالك وبعدين كلها الصبح وهنختفي من حياتك
سلمي: وياسمين؟
احمد: مالها؟
سلمي: انا عايزه اشوفها
احمد: ياسمينا اعتبرتك ام ليها لكن انتي الدور ده مش عاجبك وهيا مش هتعرف تعتبرك حاجه تانيه يبقى الاحسن انها تتخطاكي
سلمي: انا بحبها يا احمد
احمد: اه فعلا
سلمي: هو انت ليه عايز تحسسني بتأنيب الضمير؟ ليه عايز.

قاطعها: انا مش عايز اي حاجه اوكي؟ انا حبيتك وانتي ما تنكريش انتي حسيتي بحبي ده حسيتي بيه من قبل حتى ما نتجوز وعلشان كده وافقتي على ارتباطك بيا وكان عندي ظروفي منعتني اقولك بحبك بس قولتها بمليون طريقه تانيه
ايوه كنت بعيد بس ديما كنت بحاول اعمل كل اللي يسعدك، تقدري تنكري ده؟
سلمي: لا ما انكروش بس ما تنساش اهاناتك المستمره وجرحك ليا وتشبيهي كل شويه ببنات الليل
احمد: بجد؟
سلمي: اه بجد قصدك ايه؟

احمد: قصدي انك كنت فاهمه اني كنت بعمل كده علشان كنت بضعف قصادك فكنت بحاول احمي نفسي قدامك وما تحاوليش تنكري ده
سلمي: ده مش مبرر
احمد: هو انتي ليه بتجيبي القديم والجديد احنا تخطينا المرحله دي وبدأنا من جديد
سلمي: انت ربطت القديم والجديد
احمد التعب شد عليه فسكت لانه مش قادر يتكلم تاني.

احمد: شوفي يا سلمي خلاصه الكلام انا هاخد بنتي وامشي الصبح ياتمشي معانا وخدي كل الوقت اللي انتي محتاجاه علشان تسامحيني يا اما اول ما وصل هبعتلك ورقه طلاقك وعيشي حياتك زي ما انتي عايزه
سلمي: بسهوله كده بتستسلم وعندك استعداد تطلقني
احمد: انا بحبك من سنه ومعرفتش اقولك بحبك وما بعرفش اعبر عن مشاعري فانا مش عارف حاليا انتي عايزه ايه؟

عندك استعداد ترجعي ولا عايزه تقلبي الصفحه دي من حياتك، في حاجات مينفعش نتجبر عليها لازم ناخد القرارات دي بحريه تامه من غير ضغط
خدي وقتك وفكري وقرري ومش هقولك غير اني بحبك وعايزك الكره دلوقتي في ملعبك، تصبحي على خير
قفل الكلام وهيا سابته ونزلت ولقت ياسمينا بتعيط
سلمي: في ايه مالك؟
ياسمينا: انتي كدبتي عليا
سلمي: انا عمري ابدا ما كدبت عليكي
ياسمينا: لا كدبتي انتي وحشه وانا مش هحبك تاني.

سلمي: طيب قوليلي كدبت في ايه؟
ياسمينا: قولتيلي انك هتفضلي على طول جنبي وعمرك ما هتسيبيني ابدا ابدا الا اذا بابي مش عايزك وقالك امشي وكل شويه انتي تزعلي بابي سيبته عيان ومشيتي وقبلها سيبتيني انا عيانه ومشيتي ودلوقتي سمعته برضه بيقولك انه بيحبك وعايزك تيجي معانا وبرضه انتي مش راضيه تبقي كدابه ولا لأ؟
انتي ما بتحبيناش ولا انا ولا بابا؟ انتي وحشه.

سلمي: انتي مش فاهمه حاجه يا ياسمين
ياسمينا: انا فاهمه ان بابا بيحبك وانا بحبك يبقى انتي مش بتحبينا
سلمي: المواضيع مش بسيطه كده
ياسمينا: بابي حتى لما كان زعلان منك وقولتله يجيبني عندك جابني، انا مش هحبك وطالما انتي مش عايزه تفضلي معانا انا كمان مش عايزاكي
قايمه وسيباها
سلمي: طيب انتي رايحه فين؟
احمد: رايحه لبابي هو ديما معايا وعمره ما سابني ابدا ابدا وعلى طول بيحبني.

ياسمينا سابتها وراحت لابوها تعيط في حضنه
احمد: مالك حبيبتي في ايه؟ اهدي ما تعيطيش
ياسمينا: بابي هو انت ممكن تبطل تحبني وتسيبني وتمشي؟
احمد: عمري ابدا، هفضل على طول معاكي
ياسمينا: هو انت ممكن تكون بتكدب عليا؟
احمد: هو انا عمري كدبت عليكي قبل كده؟ طول عمري بعاملك وكاننا اصحاب وصريح معاكي صح؟

ياسمينا: امال سلمي بتكدب ليه قالتلي على طول هتفضل معايا وكدبت
احمد: سلمي ما كدبتش عليكي وهيا بتحبك وبتموت فيكي كمان، بس انا اتسببتلها في، افهمك ازاي...
انا زعلتها جامد وهيا مش عارفه تصالحني
ياسمينا: طيب قولها انا اسف
احمد: في حاجات يا ياسمينا الاسف ما بينفعش فيها
ياسمينا: زي ساعت ما كسرتلها ال CD
احمد: ايوه زي كده
ياسمينا: وانت كسرتلها ايه؟ اشتريلها غيره
احمد: شوفي سلمي كانت حامل.

ياسمينا: يعني ايه حامل؟
احمد: يعني ايه حامل؟ يعني في بيبي في بطنها والمفروض انه يكبر ويجي الدنيا ويبقي اخوكي او اختك
ياسمينا فرحت: وراح فين يا بابي انا عيزاه
عايزه يبقى عندي اخوات
احمد: راح لربنا
ياسمينا زعلت: يعني مش هيجي تاني ابدا زي ماما عبير
احمد: ايوه، الحادثه اللي انا عملتها وهيا معايا هيا اللي اخدت البيبي فهيا زعلانه مني فهمتي؟ وكلمه اسف مش هترجع البيبي ده وعلشان كده ما ينفعش اسف هنا.

ياسمينا: طيب يا بابي في ناس عندهم عيال كتير يعني ممكن نقول لربنا يدينا بيبي تاني؟ ينفع؟
احمد: ياريت كل الامور ببساطتك دي؟
ياسمينا: فين المشكله؟
احمد: المشكله انها لازم تسامحني الاول وتيجي معانا وبعدها نجيب البيبي التاني
ياسمينا: وهيا مش بتسامحك علشان البيبي الاولاني مات
احمد: كده فهمتي صح؟

ياسمينا: اه فهمت، خلاص يا بابي لو هيا مش عايزه تسامحنا احنا نمشي ونروح بيتنا وانا لما اكبر واتجوز هجيبلك بيبيهات كتيره قوي
احمد ابتسم من برائتها وحبها وصراحتها وبساطتها
احمد: خلاص اتفقنا
ياسمينا: طيب يالا بينا دلوقتي؟
احمد: الصبح
ياسمينا: ليه الصبح مش دلوقتي؟
احمد: لان انا تعبان جدا ومش قادر احرك رجلي خالص
الصبح ان شاءالله ابقي كويس ونمشي
ياسمينا: طيب خد الدوا بتاعك انت بتبقي كويس لما بتاخده.

احمد: نسيته يا ياسمينا نسيته نامي انتي والصبح ان شاءالله هبقي كويس
ياسمينا: انا هقول لربنا يخليك تبقي كويس
احمد ضمها واخدها في حضنه، ياسمينا هيا الشيئ الوحيد الثابت والحقيقي في حياته، الحب الحقيقي اللي عمره ابدا ما هيتبدل او يتغير
سلمي كل ده واقفه سمعاهم وحست ان كل كلمه ياسمينا نطقتها كانت صح؟ هيا فعلا وعدتها ان عمرها ما هتبعد واهي بعدت كذا مره.

احمد الوجع بيكتر نزل بنته من حضنه ومش عارف يعمل ايه؟ سلمي مقدرتش تقف ساكته اكتر من كده فدخلتله
سلمي: قولي انا ممكن اساعدك ازاي؟
احمد بصلها: ما تشغليش بالك بيا ومش هتقدري تساعديني، الالم بيستمر فتره وبيروح
سلمي: طيب انا عندي مسكنات حماك كان كاتبهملي علشان الالم ممكن تاخد منهم
احمد: انتي شاغله بالك بيا ليه؟ ربنا بينتقملك مني افرحي بقى وسيبيني
سلمي: انا عمري ما اتمنيت الاذي لحد فمش هتمنهولك.

وبعدين انت كلك عرقان وشكلك باين عليه التعب قوي احمد: شويه وهبقي كويس
سلمي قعدت جنبه وحطت ايدها على رجله ويدوب هتدلكها احمد اتألم جامد ومسك ايدها
احمد: بلاش
سلمي سابته وقامت وهو افتكر انها مشيت بس رجعت تاني معاها ميه ومسكن ودهان
سلمي: اتفضل خد قرصين من دول
احمد استسلم لها واخد القرصين وقعدت جنبه
سلمي: ممكن ترفع رجل بنطلونك دي علشان احطلك المرهم ده فيه نسبه مخدر عاليه المسكن مع المخدر هيهدوا الالم شويه.

احمد: سلمي بتعملي ايه؟
سلمي: احمد انا ما بطلتش احبك على فكره انا مش مسمحاك اه بس لسه بحبك وبعدين انت كنت بتحبني وبتكرهني وفي نفس الوقت لما كنت بتعب بتفضل معايا الدور عليا بكرهك وبحبك وعايزه اخفف ولو شويه عنك
سلمي اتاثرت لما شافت مكان الكسر والخياطه ومكان جرحين وبصتله باستفسار
احمد: كسر مضاعف وبعدين ما اتعالجش على طول ومع استمرار الضغط عليها فبتاخد وقت.

سلمي: وليه ما اتعالجتش على طول وليه ضغطت عليها واستعملتها ليه وهيا مكسوره؟ ايه اللي كان اهم منها ساعتها؟
سلمي نسيت ان الوقت ده كان نفس الوقت اللي هيا فيه في العمليات وبتواجه الموت
احمد بصلها وسكت ومردش بس نظره عنين طويله
احمد: ساعتها مكنتش تفرق معايا.

سلمي افتكرت انهم قالولها انه رفض يتعالج لحد ما هيا خرجت من العمليات وقالولها انه كان بيضغط عليها وده كان اكبر غلط، هيا السبب في وجعه ده، هيا اللي سببت الحادثه دي
بدأت تدلك رجله بالمخدر وفي الاول احمد كان عايز يصرخ مع كل حركه لايدها على رجله وبعدها بدأ يستسيغ الالم، او الالم بدأ يقل المهم ان الالم المستمر ده بدأ يهدي شويه شويه
احمد نام من كتر التعب وهيا بتدلك رجله فضلت تراقبه وهو نايم.

قد ايه هيا بتعشقه؟ ازاي تعرف تعيش من غيره؟ ازاي قلبها يطاوعها تبعد عنه؟ ده هو الحب الاول والاخير؟ ده اول واحد قلبها يدق ليه؟
اخيرا نامت هيا كمان من التعب جنبه
احمد صحي بعد شويه لقاها نايمه جنبه فشدها في حضنه وكمل نوم، قد ايه كان مشتاقلها هو كمان
النهار نور وياسمين صحيت وقعدت جنبهم من غير ما تتكلم، ام سلمي طلعت تشوفهم لقتهم في حضن بعد فاخدت ياسمينا ونزلت بيها
ياسمينا: تيته هما هيتطلقوا؟

ام سلمي: لا ياحبيبتي هما بس زعلانين شويه ويتصالحوا ان شاءالله
ياسمينا: طيب انتي قولي لسلمي انها ترجع معانا واحنا نقول لربنا يدينا نونو تاني وما تزعلش
ام سلمي: ان شاءالله حبيبتي ان شاءالله
الشمس طلعت عليهم بس احمد مش عايز سلمي تبعد عن حضنه، سلمي صحيت لقت نفسها في حضن احمد اخدت نفس طويل علشان تشبع منه ومن ريحته قبل ما يمشي وضمته جامد قوي ما تعرفش ان احمد صاحي مش نايم.

اتعدلت في حضنه وبصتله بحب وايديها بتلعب في شعره وباسته براحه، جت تقوم مسكها وشدها عليه
او بمعني تاني وقعها عليه وباسها وهيا كانت لسه في حاله من الشوق ولسه عقلها ما فاقش واشتغل فتجاوبت معاه
احمد: امشي معايا يا سلمي ما تسيبينيش، انا خسرت حاجات كتيره قوي فمتخلينيش اخسرك انتي كمان
سلمي للحظات ساكته ونفسها تقوله ايوه بس شدت نفسها منه وقامت من غير ما ترد وانسحبت.

نزلت تحت ولقت ياسمينا مع مامتها بتأكلها فجت تشيلها بس ياسمينا رفضت
ياسمينا: انتي مش عايزانا وانا مش عيزاكي
سلمي: ياسمينا حبيبتي
قاطعتها: انا مش حبيبتك فمتقوليش حبيبتي اللي بيحب حد ما بيسيبوش
امها: والله البنت بتتكلم صح! روحي بيتك وخدي عيلتك في حضنك
سلمي: ارجوكي يا ماما
ام سلمي: احمد بيحبك وبيحبك كتير كمان انتي بقى بتحبيه ولا لأ؟
سلمي: عمر ما كانت مشكلتنا في الحب
ام سلمي: بيضربك؟
سلمي: لأطبعا.

امها: ما بيصرفش عليكي وبيحرمك من اللي نفسك فيه ومش مكفي بيته؟
سلمي: لا يا ماما
امها: بيحبسك في البيت وما بيخرجكيش وحارمك من الشغل مثلا او بيغير عليكي زياده عن اللزوم؟
سلمي: يا ماما لأ ايه اللي انتي بتقوليه ده؟
امها: مش راجل مثلا ومقصر معاكي في السرير مش مديكي واجباتك كزوجه؟
سلمي: انتي بتقولي ايه؟ لا طبعا احمد غير كده خالص.

امها: يعني مكفيكي سواء في السرير او مصاريفك وبيعاملك كويس وما بيحبسكيش ومش غيور بطريقه تخنق ولا بيضربك ولا بيحرمك من حاجه يبقى ليه افتري مثلا؟ انتي ما بتقعديش مع صحباتك وتشوفي كل واحده بتشتكي قد ايه من جوزها؟
جوزك ما شاءالله طول بعرض بحلاوه بشياكه
راجل كل البلد حاسدينك عليه، قوليلي عيب واحد فيه عايزه تسيبيه علشانه، قوليلي وحش في كذا
سلمي: احمد مش وحش في حاجه.

امها: طيب عايزه تطلقي منه ليه؟ بتكرهي بنته؟
سلمي: لا طبعا انا بعشقها
امها: يبقى بتاع نسوان وبيخونك وكل يوم مع واحده؟
سلمي: لأ احمد اخلاقه عاليه ومالوش في التهيس
امها: شوفي انا عمري ما ضربتك بس قسما بالله هقوم اجيب عصايه من بره وهفضل اضرب فيكي لحد ما يبانلك صاحب
سلمي: يا ماما انتي مش فاهمه
امها: فهميني يا اختي فهميني
سلمي: احمد متعلق بمراته وقافل قلبه عليها واه مش مقصر معايا بس هو اصلا مش معايا.

انتي بتقولي بيحبني انا عمري ما حسيت الحب ده، ساعات بحس اني حمل على اكتافه هو مستحمله بالعافيه، انا اه باكل وبشرب وبلبس وبشتغل ومش ناقصني حاجه بس مشاعري مهمه، هو مش مشبعني عاطفيا في حاجات كتيره انتي متعرفيهاش وانا استحملت كتير بس نزول الحمل ده جاب أخرى معنديش اي شيئ اقدمه تاني فاهماني؟

امها: لا مش فهماكي ومش عايزه افهم منك ودي حياتك اللي بتضيعيها بس الحب اللي بتقولي مش موجود ومش حساه انا حسيته منه، حسيته من اول يوم يوم فرحك لما رقص معاكي وكان متعلق بيكي وضامك في حضنه وكأن حياته متعلقه بيكي، شوفته في عنيه، شوفته في لهفته عليكي، شوفته في خناقه معاكي لما سيبتيه واتخليته عنه لما كسرتي دراع بنته
سلمي: انا مكسرتش دراع بنته.

امها: لا كسرتيه وكسرتي كلامه، هو جالك برضه، شوفت الحب لما نام بره في التراس وشايل بنته وانتي نايمه جنبه وسألته يومها بتحب بنتي ولا لأ؟
سلمي: جاوبك بإيه؟ تلاقيه لف ودار
امها: قالي بعشقها مش بحبها
سلمي: احمد عمره ما قالي بحبك
امها: قالها بمليون طريقه تانيه لكن في ناس امثالك كده عايزين كلام معسول وخلاص ويصبحها بعلقه ويمسيها بعلقه لكن يحترمها وينفذلها كل طلباتها يبقى كخه ووحش طالما ما قاليش بحبك.

سلمي: انتي مش فاهماني
امها: ومش عايزه افهمك ودي حياتك وانتي حره اطلقي وتعالي هنا وقسما بالله لاجوزك لاي كلب يصبحك بعلقه ويغديكي بعلقه ويمسيكي بعلقه علشان تبقي تحمدي ربنا على النعمه لما تكون في ايدك
امها سابتها وقامت حضرت الفطار لاحمد. وطلعتهوله وفطرته بالعافيه وقعدت معاه لحد ما فطر وحاولت معاه تخليه يقعد باقي اليوم بس احمد اصر يمشي
لبس هو وبنته ونازل هو وهيا.

عم سيف: يا ابني انت تعبان وطول الليل تعبان ريح النهارده وروح بكره
احمد: معلش يا عمي وبعدين ادويتي نسيتها
عم سيف: طيب اشتري غيرها
احمد: اغلب الادويه مستورده ومش هلاقيها هنا
عم سيف: طيب وبعدين واخرتها ايه؟
احمد: اخرتها ايه في ايه بالظبط؟
عم سيف: في مراتك؟
احمد: شوف اللي يناسبها ايه واللي يريحها هعمله
عم سيف: انت عايز ايه؟
احمد: انا بحبها وعايزها بس مش هينفع اخدها غصب عنها ولا ايه؟
عم سيف نادي على بنته.

عم سيف: روحي مع جوزك يالا
سلمي: انا اسفه يا بابا
عم سيف: يعني ايه اسفه؟
سلمي: يعني مش هقدر امشي معاه
عم سيف: يعني انتي عايزه ايه؟
احمد: سيبها براحتها
عم سيف: طيب انت دلوقتي هتسوق ازي وانت رجلك تعباك كده؟ وبعدين ده مشوار طويل ده في الطبيعي بياخد 6، 7 ساعات
احمد: هياخد الضعف دلوقتي وزي ما جينا نروح ما تشغلش بالك
عم سيف: طيب روح بالاتوبيس وسيب العربيه انا ابعتهالك مع اي سواق
احمد: ما تشغلش بالك بينا يا عمي.

سلمي: بابا عنده حق انت هتسوق ازاي؟ انت طول الليل مش قادر تحرك رجلك
احمد: هرد عليكي زي ما رديت على ابوكي ما تشغليش بالك او بالاصح ما تعمليش نفسك شاغله بالك
سلمي: انا ما بعملش نفسي انا فعلا قلقانه عليكم وبعدين انت مش خايف على نفسك خاف على بنتك
احمد: مالكيش دعوه ولا بيا ولا ببنتي
سلمي: يا احمد
قاطعها احمد: انتي تعرفي عني اني بغير رأيي؟ ريحي نفسك.

عم سيف: يا ابني معلش يعني ومش قصدي اضايقك بس انت مراتك الاولانيه ماتت في حادثه والتانيه كانت هتموت في حادثه وابنك مات وانت اهو رجلك متصابه يعني انت سواقتك مش قد كده فما بالك وانت متصاب وتعبان
احمد اتضايق جدا: على فكره انا سواقتي كويسه جدا ومحترف كمان ومش معنى اني عملت حادثتين ان سواقتي وحشه مراتي الاولي كانت بتتخانق معايا وانا سايق وفي لحظه اجبرتني ابصلها وهنا عملنا الحادثه.

عم سيف: والحادثه التانيه؟
احمد: الحادثه التانيه بنتك كانت مشاركه فيها والظاهر انها حبت تقضي عليا فاختارت نفس الطريقه اللي مراتي ماتت بيها وحبت تعيدها تاني
عم سيف: يعني ايه؟ يقصد ايه يا سلمي؟
سلمي: ما تقوله بالمره انا ليه حبيت اعيد التاريخ تاني؟ ليه اتخانقت معاك وانت سايق؟
احمد: انتي ما اتخانقتيش معايا.

سلمي: اوكي يا احمد انا اللي قلبت العربيه وانا اللي دوست على البنزين علشان ما تعرفش تقف بس عملت كده ليه؟
احمد: علشان اتخانقت معاكي وقولتلك مش عايز عيال فحبيتي تنتقمي مني بطريقه انتي عارفه انها هتدمرني
حبك غريب قوي يا سلمي
عم سيف: ايه اللي بتقولوه ده؟ سلمي انت قلبتي العربيه ازاي؟
احمد: عمي مالوش لازمه الكلام
ياسمينا: يالا يا بابي نمشي من هنا انا وانتا وما نجيش هنا تاني وخلي سلمي لوحدها.

احمد: طيب يالا سلميي عليهم وقوليلهم مع السلامه
سلمي جت تسلم عليها بس هيا بعدت ومسكت ايد ابوها
ياسمينا: مش عايزه اسلم على حد يالا بينا
احمد: براحتك يالا
ويدوب خطوا خطوتين سلمي وقفت قدامهم وقعدت قصاد ياسمينا
سلمي: ياسمينا اسمعيني قبل ما تمشي انا بحبك قوي
قاطعتها ياسمينا: كدابه انتي ما بتحبيش حد ووعدتيني وكدبتي انتي كدابه
سلمي: ياسمينا انا بحبك اقسم بالله بحبك بس.

ياسمينا: بس ايه زعلانه؟ بابي حاول يصالحك؟ النونو؟ ممكن تجيبوا نونو تاني؟ يبقى ايه؟
انتي وعدتني مش هتسيبيني الا اذا بابا كان مش عايزك وبابا عايزك تبقي كدابه ولا لأ؟؟ تبقي مش بتحبينا ولا بتحبينا؟
احمد: ياسمينا خلاص
ياسمينا: بابي انا اسفه لما قولتلك مش بحبك وبحب سلمي وقولتلك انها مامي هيا مش ماما ابدا انت عمرك ابدا ما سيبتيني وهيا كل شويه تسيبنا ومفيش ماما بتسيب عيالها صح؟ هيا مش ماما ابدا.

احمد: هيا كانت زي ماما بس مش ماما وبعدين هيا عندها حياتها وعايزه تعيشها
سلمي: حرام عليك اللي انت بتقوله
احمد: عايزاني اقول ايه؟ ماهيا قدامك فاهمه كل حاجه هتضحكي عليها بأيه؟
سلمي: قولها اني بحبها وانه غصب عني
احمد: فاقد الشيئ لا يعطيه
سلمي: يعني ايه؟
احمد: يعني انا نفسي مش مصدق انك بتحبيها هقنعها ازاي؟، انتي بتعطفي عليها اه! بتصعب عليكي اه، لكن حب؟ انتي ابعد ما يكون عن الحب!
سلمي: انا بحبها.

احمد: مش بالكلام
سلمي: انا بحبها
احمد: مش بالكلام، مش معنى اني اقولك بحبك يبقى انا فعلا بحبك انا ممكن اقولك بحبك مليون مره في اليوم واكون بخونك مع كلاب السكك، وممكن ما اقولهاش ولا مره بس كل حاجه بعملها بتقولك بحبك
سلمي: انت عايز تفهمني انك كنت بتقولي بحبك بتصرفاتك؟ ايه اللي عملته ليا بحب او المفروض بقولي بحبك؟

احمد: لو انتي مش عارفه اجابه السؤال ده فعلا ومن جواكي ما حسيتيش بحبي ده يبقى الكلام مالوش اي لازمه؟ انتي بنفسك لما كنت اقولك ما بحبكيش تقوليلي كداب انت بتموت فيا لانك حاسه بده دلوقتي ده اختفي؟ في كل مره كنتي في حضني فيها انتي حسيتي الحب ده وعشتيه! في كل مره لما اقولك عايزه ايه وتقوليلي مش عايزه اي حاجه غير اني افضل كده وتفضلي في حضني كنتي حساه
ما تجيش دلوقتي يا سلمي وتقوليلي عمري ما حسيته.

سلمي: انت جرحتني.

احمد: ما حاولتيش تعرفي ايه ظروفي؟ كان ممكن تحاولي تسمعيني؟ كان ممكن تاخدي الموضوع بهدوء وتهديني معاكي؟ كان في مليون طريقه تتصرفي بيها غير انك تقفي قصادي كده وتاخديها تحدي وكأنك عدو ليا داخله معايا حرب ومصره تكسبيها، على فكره انتي بتلوميني ان انا اللي سقطتك مع انك لو فكرتي بعقلك للحظه انتي اللي سقطتي نفسك، اانتي اللي قلبتي العربيه، ، انتي اللي حاولتي تقتلينا انا وانتي، انا مش عارف انتي ازاي اصلا جايلك عين تزعلي؟

سلمي: انت كنت عايز تقتل ابني
احمد: مكنش ابنك لوحدك، مطاوعتنيش ليه؟ ما اخدتنيش على قد عقلي ليه؟ محاولتيش ليه تسأليني ليه مثلا؟؟ ما اخدتنيش في حضنك ليه وشوفتي ايه اللي وصلني للمرحله دي الاول؟ يمكن لو كنتي عملتي كده كان ابنك هيبقي لسه في بطنك
سلمي: اتجننت اول ما قولتلي كده كان لازم اتصرف واحمي نفسي.

احمد: تحمي نفسك مني؟ قولتيلي كذا مره انا عايزه الامان معاك مش منك، ليه ساعتها ما طلبتيش الامان معايا؟ مش بقولك مش بالكلام
سلمي: يا احمد انا...
احمد: انتي مش مطلوب منك تدافعي عن نفسك، حياتك وانتي حره فيها بلغيني قرارك ايه وانا هنفذهولك وبيتي مفتوح ليكي ديما، ياسمينا يالا؟
ياسمينا: يالا بابي
اخدها ويدوب هيخرجوا من الباب ياسمينا وقفت وصرخت وفضلت تصرخ.

رواية قل متى ستحبني للكاتبة الشيماء محمد الفصل الثاني والعشرون والأخير

خرجو من الباب فياسمينا وقفت وصرخت
ياسمينا: اااااههههه
احمد: يالا ياسمينا في ايه؟
ياسمينا: بطني يا بابي اهههه
احمد: في ايه مالها؟
ياسمينا بدأت ترجع وترجع كتير جدا وعيطت
سلمي جريت عليها واخدتها في حضنها لان احمد مش عارف يقعد جنبها من رجله اللي ما بيقدرش يتنيها
وشويه وياسمين
ياسمينا: عايزه الحمام
سلمي اخدتها الحمام وطولوا فيه
وشويه وخرجت شايلاها ورجعت تاني
احمد: انتي اكلتي ايه يا ياسمينا؟ مالك.

سلمي: احمد لازم نروح لدكتور دي بتسهل كمان
احمد: طيب هاتيها انا هوديها يالا ياسمينا
سلمي: بقول نوديها مش توديها يالا
سبقته على العربيه
كشفوا عليها والدكتور اصر يعلقلها محاليل لحد ما الترجيع يهدي شويه
سلمي جنبها واحمد واقف متابع ورجله بدأت توجعه تاني
الدكتور كشف عليها وطمنهم بس اصر انها تفضل حتى 24 ساعه على الاقل
احمد: طيب انا كنت مسافر دلوقتي.

الدكتور: لا طبعا اذا انا مش موافق تاخدها البيت تقوم تقولي اسافر بيها؟ وهتعمل ايه في الطريق في الاسهال والترجيع اللي عندها؟ وبعدين انت نفسك شكلك تعبان وواقف بالعافيه
سلمي: لسه هو كمان خارج من حادثه ورجله تعباه جدا ومصر يسافر القاهره وهيسوق الطريق بنفسه.

الدكتور: طيب ده معروف ان اللي عنده عيال بيبقي عاقل! ايه بقى؟ مش خايف على نفسك خاف عليها! وبعدين اللي انا اعرفه عنك ان والدتها متوفيه وده معناه انك انت بتقوم بدور الاتنين وفي الحالات دي بيكون الحب والخوف اضعاف مضاعفه فين الحب بقى في حالتك؟
احمد: لو عندي شك اني مش هقدر اكمل الطريق مش هسافر بس انا عارف مقدرتي ايه؟ وعارف استحمل ايه وايه لأ
الدكتور: برضه معلش خليكوا معانا النهارده واخر النهار ربنا يسهل.

سلمي مامتها كلمتها تتطمن على ياسمينا وحكتلها اللي حصل وعلى الظهر امها جاتلها بالغدا ليهم هما الاتنين
امها: اطلعوا اتغدوا انتو وانا هفضل جنبها
احمد: لا معلش روحي انتي لو عايزه
سلمي: وانا كمان مش عايزه
امها: انا عملت الاكل لخيالي صح؟ اطلعوا انتو الاتنين كلوا والا مش هيحصلكم كويس انتو ما بتسمعوش الكلام ليه؟ ولا انا تعبي مالوش قيمه عندكم؟
احمد: يا ست الكل العفو بس.

امها: ما بسش اطلع انت وهيا اتغدوا اقعدوا تحت في جنينه المستشفي واتغدوا وتعالوا وانا جنبها
احمد: ياسمينا انتي كويسه؟
ياسمينا: اه يا بابي روحوا انتو كلوا وانا تيته معايا
اخيرا خرجوا الاتنين ياكلوا وسابوا ام سلمي معاها
وبعد ماخرجوا
امها: تعبتي يا حبيبتي؟
ياسمينا: يعني شويه بس الابره وجعتني قوي
امها: معلش يا قلبي بس اهو كله يهون
ياسمينا: انتي متأكده انهما كده هيرجعوا لبعض؟
وان خطتنا هتنجح؟

امها: اه يا حبيبتي وانتي تعبانه سلمي مش هتقدر تسيبك ولو راحت معاكم البيت ابوكي هناك هيعرف يتصرف
ياسمينا: بس بابي لو عرف اني شربت الشوربه اللي اديتيهالي واني اتعمدت اتعب هيزعل مني
امها: اولا اسمها شربه مش شوربه وبعدين احنا عملنا كده علشان يتصالحوا مش علشان حاجه وحشه ما تخافيش بس انتي بنوته شاطره انك ظبتي الموضوع كده شاطره
ياسمينا: يارب بس سلمي تيجي معانا
امها: هتيجي وابقي شوفي.

احمد و سلمي اكلو بصمت وكل واحد سرحان بملكوته
طول الوقت سلمي حاسه ان احمد الوجع بيشد عليه شويه شويه وكل ما تقوله ينكر
سلمي: وبعدين انت تعبان بتنكر ليه؟
احمد: يعني انا مش فاهم انتي فارق معاكي تعبي في ايه ولا قاعده هنا ليه؟ ولما تتطلقي مش هتتعب تاني؟ معناها ايه القعده دي؟ بتريحي مثلا ضميرك؟ ولا بتعذبيها هيا معاكي، انك دلوقتي جنبها وبعد شويه لأ؟

سلمي: انا مش عارفه خلاص، كل حاجه دلوقتي مشوشره قدامي، ، انا بحب ياسمينا وانت عارف كده كويس وبحبك انت كمان وبعشقك، الصبح اول ما صحيت فضلت اشم ريحتك يمكن اشبع منها، انا بحبك
احمد: بتحبيني وعايزه تسيبيني منطق ايه ده؟

سلمي: منطق واحد مجروح، بحبك اه بس مش قادره اسامحك دلوقتي، مش عايزه اتطلق منك، انت قولتلي خدي قرار دلوقتي فقلتلك كده بس انا محتاجه وقت اتصافي فيه مع نفسي، محتاجه وقت ازعل فيه على نفسي وعلى البيبي اللي راح محتاجه وقت وانت مش بتديني الوقت ده
احمد قرب منها ومسك ايديها.

احمد: خدي كل الوقت اللي انتي عيزاه بس خديه في بيتي، سبق وقولتيلي انتي خد كل الوقت اللي محتاجه وانا فعلا كنت محتاج لوقت بس مسيبتكيش ومشيت، ياسمينا محتاجاكي تعالي البيت وافضلي زعلانه مني وسيبيني احاول اصالحك واعوضك لكن ما ينفعش انتي في بلد وانا في بلد لان ياسمينا في النص بينا فكري فيها واتنازلي ولو شويه واعملي فيا انا ما بدالك.

سلمي: المهم دلوقتي هيا تتحسن وانت ممكن تروح لاي دكتور بره يكتبلك اي حاجه لحد بس ما ترجع مصر ممكن؟
احمد: سيبك مني دلوقتي
سلمي: اهوه انت ما بتسمعش غير نفسك وبس ومن لحظه تقولي هصالحك يبقى ابدأ راعي كلامي
احمد: حاضر يا سلمي هروح لدكتور
سلمي: دلوقتي
احمد: يا الله منك
سلمي: تعال يالا ياسمينا نايمه
شدته من ايده واخدته وبتمشي بسرعه ومره واحده وقف ووقفها معاه
سلمي: في ايه مالك يالا.

احمد: في ان رجلي واجعني وسيادتك ماشيه ولا الهوا
سلمي: اه اسفه انا بمشي بسرعه سوري مخدتش بالي
سلمي مسكت ايده ومشيوا براحه وهو سند عليها ودخلوا للدكتور
الدكتور: انا هكتبله على مسكنات بس هو محتاج اشعه ومحتاج يتابع مع دكتوره ومع دكتور علاج طبيعي
احمد اخد المسكنات بس مكنلهاش تأثير كبير بس هديت الالم شويه
الصبح مشيوا وياسمين بقت كويسه لان مفعول الشربه راح خلاص فوصلوا سلمي بيتها ويدوب هيمشي
سلمي: احمد ثواني.

احمد: خير؟
سلمي: اديني ربع ساعه اجهز نفسي واجي معاكو ينفع
احمد: قولتلك بيتي مفتوح
سلمي: بس زي ما انا قلت محتاجه لوقت انا راجعه لياسمينا بس مش ليك
احمد: زي ما قلت خدي وقتك
ام سلمي ابتسمت وبصت لياسمينا اللي ابتسمت هيا كمان ان خطتهم نجحت
سلمي مشيت معاهم وطول الوقت متابعه احمد وهو بيسوق وبعد ساعتين وقف ونزل من العربيه
سلمي نزلت وراه
سلمي: مالك؟ رجلك وجعاك؟
احمد: شويه افردها بس شويه ونكمل.

سلمي: براحتك خد وقتك احنا مش مستعجلين
احمد فضل شويه وركبوا تاني ساق ساعه كمان ووقف
سلمي: ايه؟ تنزل تفردها؟
احمد نزل فعلا بس حتى الفرد مش مريحها سلمي عطلته المسكنات اللي معاها
فرشوا في الارض وقعد شويه وياسمين كانت جعانه فأكلوا وياسمين فضلت تلعب جنبهم
سلمي: هو المرهم لما دهنتهولك ريحك؟
احمد: اعتقد لاني نمت بعدها
سلمي: طيب انا معايا المرهم ادهنهولك ماشي؟
احمد: ماشي
وفعلا دهنتله المرهم وفضلت تدلك رجله.

سلمي: احمد انت تعبان
احمد: وبعدين؟
سلمي: انا اسوق وهسوق براحه لحد ما انت ترتاح واهو نتحرك لقدام بدل ما احنا واقفين؟
احمد: انتي ما سوقتيش على طريق سريع قبل كده؟
سلمي: ماهو انت جنبي اهو وبعدين انا ما عملتش حوادث قبل كده؟
احمد ابتسم: اتسببتي في واحده، هو انتي كنتي بتفكري في ايه ساعتها؟
سلمي: مكنتش بفكر
احمد: وتقوليلي انا مجنون؟
سلمي: الطيور على اشكالها تقع، انت مجنون وانا مجنونه.

احمد: طيب قومي يا مجنونه وورينا شطارتك
سلمي ساقت هيا واحمد جنبها مركز معاها
سلمي: هاه رايك ايه؟
احمد: استاذك كان شاطر
سلمي: استاذي؟ انا اللي بسوق مش هو
احمد: اه بس هو علمك السواقه
سلمي: على فكره المفروض انك بتصالحني
احمد: يا باشا انتي سواقه محترفه! استاذ مين وكلام فاضي مين ده انتي علامه
سلمي: ايوه كده اتعدل، ينفع بقى ازود عن 100.

احمد: لأ السيطره على العربيه بعد 100 بتبقي صعبه هتفرق معانا في ساعه زياده تستاهل بقى نخاطر فيها وبعدين انا مش حمل حوادث تانيه
سلمي: ماشي مش هزود عن 100
روحوا البيت واول ما وصلوا احمد جري على ادويته اخدها وقعد مكانه وغمض عنيه
سلمي: انت نمت؟
احمد: لا ما نمتش ياسمينا فين؟
سلمي: نامت، هتاكل؟
احمد: لا لا مش قادر انا محتاج انام انا كمان
سلمي: طيب قوم اوضتك
احمد: انهي اوضتي؟ اخر مره اوضتي كانت نفس اوضتك؟

سلمي: انت قولت خدي وقتك اديني وقتي بقى؟
احمد: قولتلك خدي وقتك وانتي جنبي
سلمي: وانا في بيتك مش جنبك؟
احمد: اعملي استثناء وانا تعبان
سلمي: على اساس وانا تعبانه كنت بتيجي تنام في حضني صح؟ بص يا احمد كل اللي انت عملته معايا انا هعمله معاك
احمد: يا قلبك الاسود
سلمي: انا قلبي اسود ماشي؟
احمد: اه قلبك اسود بس على فكره اي مره كنتي تعبانه فيها كنت بفضل جنبك حتى لما بتكوني زعلانه او مشغوله كنت بفضل جنبك تنكري؟

سلمي: ماهو انا جنبك اهوه
احمد: كنت باخدك في حضني، فاكره لما ياسمينا كسرتلك ال CD مش فضلت في حضنك النهار كله وعملتلك فشار كمان؟ انكري بقى انكري
سلمي: مش هنكر انت عايز ايه دلوقتي؟
احمد: تعامليني بنفس طريقتي
فتح ايديه علشان تيجي في حضنه
سلمي بتقرب عليه واحده واحده وهو قاعد على الكنبه قدامها لحد ما وصلتله وطت عليه وسندت باديها على ركبه ووشها في وشه.

سلمي: انا لو خدتك في حضني دلوقتي هتبقي نزوه؟ رغبه؟ لكن مش حب؟
احمد ضحك بصوته كله: وانا راضي انها تكون نزوه او رغبه
شدها عليه
احمد: مش سبق وقولتلك انك متخلفه؟ بتصدقي اي حاجه! عمرك سمعتي قبل كده عن نزوه او رغبه بين راجل ومراته؟ انتي هبله؟ الرغبه ديما بتبقي علاقه محرمه لكن انتي كنتي مراتي، انتي هبله وبتصدقي اعملك ايه؟
سلمي: سيبني
احمد: مش هسيبك انتي عرضتي وانا وافقت
سلمي: رجلك هتوجعك.

احمد: مالكيش دعوه برجلي
سلمي: احمد لو سمحت سيبني
احمد: مش هسيبك
قام وشالها ودخل بيها اوضه نومها...
احمد: فاكره الاوقات اللي قضيناها مع بعض هنا؟
سلمي قلبها بيدق بسرعه لو حاول اكتر معاها مش هيكون عندها المقدره تقول لأ
سلمي: مش عايزه افتكر
احمد: خايفه تفتكري لانك لو افتكرتي هتضعفي
احمد حطها على السرير براحه.

احمد: ما تخافيش مني مش هعمل حاجه غصب عنك وانا عند كلمتي خدي وقتك بس ما تلعبيش لعبه انتي مش قدها وما تقلدينيش لانك هتخسري تصبحي على خير
باسها في خدها وخرج وراح اوضته وهيا فضلت كتير تفتكر اللحظات الجميله اللي سبق وعاشوها وكل شويه تفكر تروح لحضنه...
تاني يوم احمد خرج وقضي معظم النهار بره واتصل بيهم وهو راجع وقالهم يجهزوا هيخرجهم
خرجوا اتعشوا بره واتبسطوا ورجعوا اخر الليل.

سلمي حطت ياسمينا في سريرها وراحت اوضتها وغيرت هدومها وفضلت واقفه كتير تختار هتلبس ايه؟ واخيرا قررت انها تجنن احمد زي ما امها كانت بتعمل فاختارت فستان لونه اخضر تفاحي من غير حمالات وقصير وفكت شعرها وعدلت ميكب بتاعها وخرجت وعدت من قدام احمد متجاهلاه وعملت نفسها بتلم حاجات من الصاله كوبيات مستعملينها واخدتها المطبخ
احمد اول ما شافها ابتسم وفهم هيا بتعمل ايه بالظبط.

دخلت المطبخ ودخل وراها واقف ساند على الباب بيراقبها بابتسامه وهيا عامله نفسها مش شايفاه
حاولت تجيب علبه عاليه ومش طيلاها ولقته هو وراها بيمد ايده يجيبهالها جابها وحطها قدامها بس حاولت تتحرك ما عرفتش هو وراها زانقها
سلمي: وبعدين؟
احمد بيدفن وشه في شعرها وعرفت انها بتلعب لعبه هيا مش قدها
احمد: وبعدين دي تقوليها لنفسك، وبعدين؟
سلمي: طيب سيبني
احمد: لأ.

سلمي لفتله وبقى وشها في وشه علشان تواجهه وتبعده بس عرفت غلطتها اول ما اتقبلت عنيهم وعرفت انها مش هتقاومه وانها بتغرق اكتر
احمد مستمتع تماما بورطتها
احمد: قولتلك ما تلعبيش بالنار لانها هتحرقك انتي الاول صح؟
سلمي حاولت تبعده بس الطريقه اللي نطقت بيها واتكلمت بيها قالت عكس اللي هيا بتقوله
سلمي: احمد ارجوك.

احمد: بترجوني ايه بالظبط؟

احمد بهمس في ودنها
احمد: بحبك
سلمي مردتش عليه غمضت عنيها
احمد: سلمي بصيلي
مسك وشها وخلاها بصتله
احمد: انا بحبك وعايزك بس مش عايزك بالطريقه دي، عايزك من جواكي تكوني راضيه مش عايز الحرب اللي جواكي دي، عايز تفكيرك بنسبه مليون في الميه معايا مش عايز ولو واحد في الميه تردد منك فاهمه؟
خدي وقتك
سلمي: متشكره يا احمد انك فاهمني
احمد: فاهمك بس ابوس ايدك خليها حرب شريفه
سلمي: يعني ايه؟

احمد: بلاش اغراءات والنبي انا على أخرى ارحميني
سلمي: كل شيئ مباح في الحرب
احمد: كملي العباره: كل شيئ مباح في الحرب والحب
سلمي: يعني ايه؟
احمد: يعني مش كل مره هوقف نفسي طالما كل شيئ مباح يبقى ده كمان مباح
سلمي: يبقى نخليها حرب شريفه
احمد: يبقى الطيب احسن تصبحي على خير
احمد سابها وخرج وهيا مبسوطه وبتفكر تفاجؤه وتروح ترمي نفسها في حضنه بس اتراجعت
احمد كل يوم بيخرج وبيفاجئ سلمي كل شويه بحاجه.

بوكيه ورد كبير عليه بحبك
تصحي الصبح تلاقي على مرايه الحمام بحبك
تخرج تلاقي في المطبخ كاتبلها بحبك
كل ما بتتحرك بتلاقي الكلمه دي قدامها
يخرجوا يجيبلها اكل بره يرسملها بالكاتشب بحبك
يجيب جاتوه عليه بحبك
تقريبا كل خطوه بتخطيها بتلاقي الكلمه دي وفي نفس الوقت عامل مسافه بينهم وده مضايقها.

هو بيحاربها بخبرته، هو كل ما بيقرب هيا بتبعد وبتستغل النقطه دي ولما حرمها منها ضايقها لانها كانت عايزاه على طول يطاردها وبتحب معكساته فلما بطلها اتضايقت
اسبوعين عدوا عليهم بالمشاحنات دي
سلمي: وبعدين معاك؟
احمد: ايه مالك؟
سلمي: كلمه بحبك اللي موجوده في كل حاجه دي؟
الكبايه المج المرايه العربيه اللاب الموبيل الرسايل الورد كل حاجه تقريبا
احمد: مش كنتي زعلانه اني ما بقولهاش؟ ارسي على بر بقى.

سلمي: انت بتكتبها مش بتقولها في فرق
احمد: نعم؟ على فكره انا ممكن اقولك كلمه غلط دلوقتي
سلمي ضحكت: انت بجد مش بتقولها؟
احمد: بما اني الضغط عالي النهارده وانا مش مستعد لزيادته فهقولك تصبحي على خير
سابها وقام ينام وهيا دخلت اوضتها تنام
شويه والباب خبط عند سلمي واحمد دخل ومن غير ما ينور النور قرب منها على السرير وهمس: بحبك اعتقد كده قولتها؟
باسها وخرج ولو فضل لحظه واحده كانت شدته جنبها.

تاني يوم احمد نزل الصبح وشويه وسميره جت تزورهم
سميرة: بقالي كام يوم ما شفتكمش ايه مختفين ليه؟
سلمي: عادي يعني
فضلوا يرغوا كتير
وهما في المطبخ مع بعض بيجهزوا الاكل
سميرة: ياسمينا بتيجي الساعه كام من المدرسه؟
سلمي: على 2 كده
سميرة: احمد نوي على ايه؟ وفكر في عرضي ولا لأ؟
سلمي: ناوي على ايه في ايه؟ وعرض ايه؟
سميرة: هيعمل ايه؟ هيشتغل معايا ولا لأ؟ بعد ما ساب شغله و
قاطعتها سلمي: ساب شغله؟

سميرة: انتي ما تعرفيش؟ ايوه ساب شغله من قبل حتى ما يسافرلك البلد و قدم استقالته
سلمي: مقاليش وليه؟ هو بيحب شغله؟
سميرة: انتي عمرك شوفتي ظابط بيعرج؟ اصابته جامده يا سلمي رجله عمرها ما هترجع تاني؟ وبعدين محتاجه لسه كذا عمليه الله اعلم نتيجتهم هتكون ايه؟ وبعدين انتي ازاي ما تعرفيش ماهو كل يوم في المستشفي وعند بتوع العلاج الطبيعي ايه ما بتسأليهوش رايح فين وجاي منين؟

سلمي افتكرت كل مره بيخرج فيها بيرجع تعبان ومجهد ويبتسم في وشها ويداري وجعه عنها وهيا محستش بيه! مفكرتش ولا مره تسأله كشف ولا لأ؟ عارفه انه بيبقي تعبان وبياخد مسكنات كتير وما اهتمتش! كل اللي اهتمت بيه نفسها واستمتاعها بمحاولات مصالحته ليه ونسيته هو خالص ونسيت وجعه والمه، زي ماهو قالها: انتي بتحبي بالكلام بس!
كانت عايزه تعيط او تصرخ او تشوفه هو وتوطي على رجله وتبوسها.

اتغدوا التلاته مع بعض سميرة وسلمي وياسمين
وسميره مشيت وسلمي فضلت مستنيه رجوع احمد واخيرا الباب بيتفتح واحمد دخل
احمد: واقفه كده ليه في حاجه؟
سلمي: لا عادي معديه سمعت الباب باستقبلك
احمد ابتسم: بنفسك؟ ده شرف ليا سيدتي الجميله
احمد قرب منها ودخل ودخلها معاه وقعد وهيا جنبه
سلمي: اعملك اكل او حاجه؟
احمد: لا ماليش نفس، انا محتاج بس اريح شويه ساعتين كده وبعدها نخرج احنا التلاته ايه رايك؟
سلمي: موافقه.

احمد سابها ودخل وراقبته وهو ماشي بيعرج وحست قد ايه كانت عميه عن تعبه ده؟ هيا اللي عملت فيه كده؟ دمرت مستقبله وبعدته عن شغله اللي بيحبه وعلى الرغم من كده عمره ما لامها او حتى عاتبها
احمد دخل اوضته ودخل ياخد شاور وخرج لبس وكان تعبان ومحتاج يرتاح
شويه والباب خبط وسلمي دخلت
احمد: خير؟ في حاجه؟

سلمي ما ردتش عليه بس دخلت وقفلت الباب وراها وجت جنبه ورفعت الغطا ورقدت واتغطت معاه ونامت على كتفه وهو في حاله ذهول
سلمي: ممكن انام هنا؟

احمد جاوبها بانه ضمها وشويه ونام وهيا في حضنه تأنيب الضمير بيموتها مكنتش متخيله ان تأنيب الضمير بيوجع قوي كده بس دلوقتي هيا جربته، هيا اذته بس ما بال لو واحد قتل واحد زي ماهو حصل معاه؟ عمرها ما عذرته ابدا لما ضميره كان بيأنبه على موت مراته بسببه، هيا اذت رجله بس وهتموت من وجع ضميرها امال هو كان بيعمل ايه؟ دلوقتي بس قدرت وجعه وبعده عنها، دلوقتي بس فهمت هو ليه كان مستكتر على نفسه السعاده والحب.

دموعها نزلت غصبا عنها على صدره وعيطت بهدوء
احمد صحي مخضوض
احمد: في ايه مالك؟ سلمي ايه اللي حصل؟
سلمي: انا بحبك اكتر من روحي
احمد: انا عارف انك بتحبيني بس بتعيطي ليه؟
سلمي: حبني وبس يا احمد
احمد: انا بحبك بس انتي مالك الاول وبتعيطي ليه؟
سلمي: علشان بحبك قوي وعلشان احنا اغبيه وما بنستفيدش من اخطائنا ابدا.

العمر اقل من اننا نضيعه في الزعل وساعات بينتهي في لحظه، مش عايزه دقيقه تانيه تفوت وانا مش في حضنك، مش عايزه زعل وبعد تاني كفايه بقى كفايه
احمد مسح دموعها: كفايه، مش هنزعل تاني.

الصبح النهار طلع وياسمينا جت تتنطط فوقهم مبسوطه انهم مع بعض
ياسمينا: مين فيكم هيوديني المدرسه؟
سلمي: انا هوديكي
احمد: انا نازل هوديها في طريقي
سلمي: خلاص نروح مع بعض يالا
احمد: خليكي مرتاحه انا هوديها
سلمي: طيب هاجي معاك ايه مشكلتك؟
احمد: معنديش مشكله يالا
نزلو ودوها المدرسه وبعدها
احمد: تحبي نفطر فين؟
سلمي: مش وراك مشوار؟ نروح مشوارك الاول
احمد: لسه فيه وقت نفطر فيه.

اخدها وقعدوا في مكان هادي فطروا وهما قاعدين
سلمي: ليه مقولتليش؟
احمد: مقولتلكيش ايه؟
سلمي: ان انت سيبت شغلك؟
احمد: يفرق معاكي في ايه؟
سلمي: انت بتحب شغلك ده؟
احمد: اه بحبه بس خلاص معدش ينفع الحياه مش هتقف
سلمي: ليه مقولتليش؟ ليه انا مش بشاركك في وجعك؟ ليه مش بروح معاك جلسات علاجك؟ ليه يا احمد هو انا مش مراتك؟

احمد: اللي انتي فيه مكفيكي انتي محتاجه وقت تلملي فيه نفسك وتعالجي جروحك وتاخدي فتره نقاهه من اللي حصلك مش محتاجه احمال تانيه على اكتافك وبعدين انا مش عايزك معايا في جلسات العلاج بتاعتي
سلمي: انا مراتك نتقاسم كل حاجه مع بعض وبعدين ليه مش عايزني معاك؟
احمد: مفيش راجل بيقبل ان حبيبته تشوفه وهو بيصرخ او يتوجع، مكابره او رجولتي بتنقح عليا
حاول يضحك وهيا كمان بس دموعها نزلت
احمد: هشششش ما تعيطيش.

سلمي: انا السبب
احمد قام وقعد جنبها واخدها في حضنه
احمد: اوعي يا سلمي تدخلي دوامه تأنيب الضمير دي ملهاش اخر واللي بيدخلها ما بيعرفش يخرج وشويه شويه بيسحب كل حاجه معاه
سلمي: مكنتش عارفه اعذرك دلوقتي عذرتك
احمد: علشان كده مقولتلكيش علشان متحمليش نفسك ذنب مش ذنبك
سلمي: امال ذنب مين؟
احمد: ذنب اللي ذنبه بقى اهم حاجه يا سلمي تأنيب الضمير ما بيفدش بيدمر بس، عايزه تعوضيني عوضيني بحبك وبوجودك جنبي اتفقنا؟

سلمي: اتفقنا
احمد: وبلاش دموعك دي
سلمي: طيب اروح معاك لجلسات العلاج
احمد: لا معلش مش دلوقتي روحي معايا للدكتور لكن العلاج الطبيعي بلاش
سلمي: احمد ارجوك
احمد: ارجوكي انتي ما تضغطيش عليا
روحها وهو راح لجلساته.

اخر النهار الباب خبط جريت تفتح لاحمد بس اتفاجئت بهناء
سلمت عليها ورحبت بيها جامد لانهم كانوا اتصاحبوا في الفتره الاخيره
سلمي: لا انا زعلانه منك كل ده ما تسأليش؟ طيب ياسمينا مش وحشاكي
هناء: انتو الاتنين وحشتوني بس مكنتش عارفه هتقابليني ازاي؟ بعد اللي حصل؟ ومكنش عندي عين اجي؟
سلمي: ايه اللي حصل وبعدين انتي مالكيش علاقه باللي حصل؟

هناء: ازاي ماليش علاقه انا اللي سببتلك الاذي طول جوازك باحمد! انا اللي كنت بوجع احمد وافكره ببنتي وكل شويه اقوله قتلت بنتي ! انا مكنتش بسمحله ينساها! انا اتجننت لما جه قالي انه عايز يتجوزك! انا اللي خليته يتفق معاكي الاتفاق الغريب ده؟! انا اللي كل يوم اقوله انت قتلت بنتي وروحت اتجوزت واخليه يوعدني انه ما يلمسكيش؟! انا كنت واقفه بينكم طول الوقت؟! وانا اللي جننته وخليته يقولك ننزل البيبي! انا كنت السبب في كل مشاكلك.

سلمي: انتي ايه علاقتك بالبيبي؟ قولتيله ايه؟؟
هناء: الفتره الاخيره قربنا احنا الاتنين من بعض وانا حبيتك وساعتها قلت لازم اصلح علاقتكم ببعض وساعتها كان لازم اقول لاحمد الحقيقه
سلمي: حقيقه ايه؟
هناء: موت عبير، انا اقنعت احمد انه هو قتلها بالحادثه
سلمي: وهيا مش دي الحقيقه؟
هناء: لأ الحقيقه انها ماتت نتيجه الولاده حصلتلها مشاكل في الولاده ونزيف معرفناش نسيطر عليه وماتت.

سلمي: وانتي قولتيله انه هو السبب؟ حرام عليكي
بس ده ايه علاقته بالبيبي؟
هناء: احمد بيحبك وبعدين انا قلتله ان اللي قتل مراته الحمل والولاده ويروح البيت في نفس الوقت حبيبته تقوله انها حامل متخيله يعمل ايه؟؟ خاف انك تروحي منه زي عبير ما راحت قبلك، بس معرفش يعبر عن مشاعره.

سلمي هنا افتكرت اليوم ده من اوله روجوعه مهموم ولما سألته قالها موضوع قديم واتاريه جرح قديم ما اتقفلش وتاني هيا بتظلمه وما بتقدرش مشاعره
كان عنده حق لما قالها كان المفروض تاخديني في حضنك وتعرفي انا زعلان ليه؟
احمد بيحب بجد وهيا تلميذه في الحب بتخبط ومش فاهمه حاجه عن الحب بجد
هناء مشيت وهيا فضلت مكانها واحمد رجع اخر النهار وياسمينا قابلته
احمد: حبيبه قلب بابي.

ياسمينا: بابي مامي بتعيط بقالها كتير ومش بتسكت ابدا
احمد: طيب حبيبتي ما تقلقيش انا هشوفها مالها
احمد دخلها لقاها على سريرها بتعيط
سلمي اول ما شافته رمت نفسها في حضنه وزودت عياطها
احمد: يعني ايه؟ مش اتفقنا كفايه؟ ايه مالك؟
سلمي: خبيت عليا ليه؟ مقولتليش ليه؟
احمد: مقولتلكيش ايه تاني؟؟ قصدك على ايه؟
سلمي: انك كنت عايز تنزل البيبي خوف عليا مش انك كاره تخلف مني؟ لو كنت قولتلي؟

احمد: مش هنفضل كتير في لو دي؟ لو دي ابشع كلمه
لو هسأل يا سلمي لو دي
يبقى هقول لو كنت قولت لعبير اني بحبها؟ مكنتش اتخانقت معايا ومكنتش عملت الحادثه وممكن كانت تفضل موجوده وساعتها مكنتش هقابلك ولا هحبك ولا هعيش الحب ده؟
فهماني لو مش حلوه وبعدها بفتره بتعرفي اجابه ال لو دي لوحدك...
لو مكنتش جيت بلدكم، مكنتش هتعرف على اجمل مخلوق في الدنيا، لو مقابلتش عبير؟ مكنتش ياسمينا هتبقي موجوده
بلاش تسألي لو دي؟

اللي فات انتهي اقفلي الصفحه الجديده وتعالي نبدأ مع بعض من اول وجديد تعالي نعيش بقى حياه مليانه حب وامل وفرح
طلع من جيبه ورق
سلمي: ايه ده؟
احمد: دي تذاكر لينا انا وانتي نعوض شهر عسل متأخر ايه رايك؟
سلمي: وياسمين؟
احمد: جربنا شهر عسل قبل كده وياسمين معانا بس كنا مترهبنين المره دي مش هينفع هعوضها بعد كده
سلمي ضحكت وهو مسحلها دموعها
سلمي: ورجلك وعلاجك.

احمد: احنا هنسافر بره مصر واهو بالمره اشوف دكتور كويس يعني هتبقي رحله علاج مع العسل هاه ايه رايك؟
سلمي: موافقه طبعا
وبدأت رحلتهم في الحياه مع بعض وعاشوا في حياه مليانه حب وخناق زي اي حياه طبيعيه
وياسمين بقى عندها اخوات وهيا عامله عليهم وصي بحكم انها الكبيره
احمد سمح لهناء ترجع حياته وتتمتع باحفادها
او هيا بتعتبر اخوات ياسمينا احفادها
سميرة قابلت حب جديد في حياتها واتجوزته.

واحمد وسلمي الحب فضل يكبر وينمو جواهم طول ماهما بيراعوه...
اه وبالنسبه لاحمد فتح شركه امن وتحقيقات خاصه بيه اهو يبقى قريب من مجاله
رجله بتتحسن ببطئ شديد بس بيشتغل في مجال بيحبه ومراته مسكت شركه سميره تديرها.
تمت
نهاية الرواية
أرجوا أن تكون نالت إعجابكم