فاكرين جيلان ابراهيم حبيبة محمد رياض اتقتلت واتصفا دمها على يد زوجها

 

فاكرين جيلان ابراهيم حبيبة محمد رياض الاولى قبل ما يتعرف على منى زكى فى مسلسل "الضوء الشارد" وراءها قصة من القصص اللى تحرق الدم
قصة الفنانة جيلان ابراهيم التى قتلها زوجها وتركها فى بانيو الحمام الى ان تصفى دمها وماتت ولم يحاول ان ينقذها
الفنانة جيلان إبراهيم فؤاد زكى الله يرحمها كانت طلعت فى مسلسل الضوء الشارد فى كام مشهد كدة على أنها حبيبة محمد رياض قبل ما يشوف منى زكى ويحبها
هو ده المسلسل الوحيد الى طلعت فيه لأنها بعد عرضه ب ٦ شهور أتقتلت على إيد زوجها
طيب إيه القصة؟
القصة بأختصار أن جيلان ٢٦ سنة كانت دارسة قانون ومحامية وبتعمل ماجستر ودكتوراة عن الأدمان وأمكانية شفاء المدمن والمجرم وأزاى أنه ممكن المجرم المدمن يتحول ببعض الخطوات والدعم لعضو ناجح وفعال فى المجتمع
كانت متزوجة ظابط شرطة اسمه خالد محمد رضا كان مدمن مخدرات وخمور، شرس وعنيف وكان دائم الأعتداء عليها بالضرب والشتيمة والأهانة وهى كانت بتسامحه عشان بتحبه وعشان هى واثقة انها تقدر تغيره وتعالجه من الأدمان و كانت لا تشتكى من تصرفاته الى والده لواء الشرطة.
يوم ٢٨ مارس ٢٠٠٠  وهو يوم عيد ميلاده وبعد سهرة طويلة مع الأصدقاء شرب وسكر وشرب كل أنواع المخدرات تقريبا وعنف مراته كتير قدام أصدقائهم وبعد ما مشيوا والبيت فضى عليهم دخل هو الحمام وسمعها من جوة بتكلم واحدة صاحبتها تقريبا بتطلب منها أدوية مهدئة له خرج زى المجنون خد منها التليفون ورماه فى الأرض كسره وضربها بالقلم جريت هى من قدامه عشان تدخل ترمى المخدرات فى الحمام قبل ما يدخل ياخدها ويخرج يكمل ضرب فيها جرى وراها جابها من شعرها وبأداة حادة نزل ضرب فيها على رأسها وفى أنحاء متفرقة من جسمها لحد ما وقعت سايحة فى دمها
طبعا اتخض من المنظر يعمل إيه؟
شالها دخلها الحمام وحطها فى البانيو وقلعها فستان السهرة اللى كله دم ولبسها برنص الحمام وسابها فى البانيو تموت بالبطىء من الأصابات والجروح والكسور الى مالية جسمها
ونده على عسكرى الأرسال الى بيبقى واقف مستنيه فى عربية الشرطة تحت البيت عشان يساعده فى تنضيف الدم وغسل هدوم جيلان فى الغسالة كل ده وهى جوه بتموت بالبطىء فى البانيو يعنى حتى محاولش ينقذها مثلا لا سابها تموت وفضل هو يمسح دمها الى ساح فى الشقة عشان محدش يكتشف جريمته
طبعا جيلان ماتت وهو قال فى التحقيقات انها وقعت وهى بتستحمى جوة البانيو وماتت
وبالرغم من شهادة والدها أنه دائم الأعتداء عليها وانه مدمن هيروين وكوكايين وخمر وبلاوى سودة وشهادة ضيوف الحفل اللى قالوا انه كان عصبى وبيعنفها قدامهم وشهادة الدكتور النفسى الى كان بيروح له عشان يتعالج من الأدمان ومن حالة العنف اللى عنده أنه كان عنيف وحاد والأدمان خلاه شخصية غير متزنة نهائى وشهادة عسكرى الأرسال اللى قال أنه الساعة واحدة صباحا المتهم خالد نده عليه عشان يطلع يمسح الدم وانه شافه بعينه بيغسل هدومها اللى فيها الدم فى الغسالة وشهادة السواق انه كان بيعنفها قدامه وانه مدمن فعلا ده غير طبعا تقرير الطبيب الشرعى إللى أثبت أن الأصابات اللى فى جسمها استحالة تكون أصابات واقعة جوه بانيو ديه أصابات قاتلة ومتفرقة بأله حادة
يعنى جريمة قتل ١٠٠%
بالرغم من كل ده جوزها خرج من القضية واتقفلت القضية على انها قضاء وقدر
وماتت جيلان اللى كانت بتحلم انها تاخد دكتوراه فى القانون الدولى فى الأدمان
ماتت ضحية سذاجتها لما أفتكرت انها ممكن تعالج جوزها وتقف جانبه فى محنته كمدمن مخدرات وتساعده على الشفاء وانه يرجع إنسان سوى وسليم فى المجتمع
القصة دى مش خيالية القصة دى حقيقية وكانت مشهورة جدا سنة ٢٠٠٠ ولحد اللحظة ديه محدش أخد حق الإنسانة دى وقد قرأت كل التحقيقات اللى اتنشرت فى الصحف والمجلات عن الحادثة دى وكل ما افتكرها اترحم عليها وعلى شبابها اللى راح على إيد حيوان معندوش دم ميستاهلش الحياة أصلا
الله يرحمها ويصبر أبوها اللى كان منهار
مرة عشان بنته اللى ماتت ومرة عشان حقها اللى مجاش





أه نسيت أقولكم أنها كانت حامل كمان وهو كان عارف ده يعنى هو قتلها هى وابنه
حسبى الله ونعم الوكيل فى القاتل .الله يرحمها وربنا يمهل ولا يهمل وهو المنتقم الجبار  .
الدنيا ياما فيها بلاوى لا يصدقها عقل  واحيانا يكون الواقع اغرب من الخيال  .