6 اخطاء اتسوويها اتبينج اكبر من عمرج !!!!!!!!!

1- ابتعدي عن الالوان الكئيبه مثل الاسود والرمادي والنيلي والبني هايه الالوان دائما راح تنطيج شكل كئيب وتبينج اكبر من عمرج , بس اذا انتي حابه تلبسيها ف احسن حل هو ان تكسريها بشال مشجر باللوان حلوة او اكسسوارات تنطي روح شبابيه ل اللوك , بس بنات احنه هسه بالصيف يعني جربي الالوان الفاتحه مثل الابيض والوردي الفاتح والازرق والاصفر راح ينطيج شكل احلى وينور الوجه حتى لو انتي سمره لتخافين اجربين هايه الالوان.
2- ابتعدي عن الستايل الرسمي والكعب لان راح ايبينج اكبر بالعمر بس اذا مكان شغلج يفرض عليج هذا الستايل حاولي مثلا اجربين ستايل السبورت- شيك يعني اتكون ملابسج كلها رسميه وتكسريها بحذاء رياضي واذا متحبين هيج شي جربي تلبسين الاحذيه الفلات او الكعب الي تجي بيها نقشات مثل الورود او الفراشات او النجوم راح تغير شكلج 180 درجه .

3- النقشات مال عجايز الي من تشوفيها اذكرج بالدشداشه مال بيبيتج رجاءا هايه النقشات ابتعدي عنها 1000 متر ولتتقربين منها نهائيااااااااااااااااااا .
4- ابتعدي عن الجنط الجبيره والافضل تختارين جنط صغيره او متوسطه حسب حاجتج واختاريها باللوان فاتحه وجربي تلبسيها بطريقه الكروس حتى تنطيج مظهر شبابي اكثر .
5- المكياج والرموش والعدسات وصبغ الشعر مال ميس كمر هايه الاشياء كلها اتكبر شكلج يعني بنات والله حرام اذا انتي مراهقه او شابه صغيره ماكو داعي لكل هايه الاشياء واذا انتي حابه المكياج ما بيها شي بس خليج دائما بالالوان الفاتحه اللطيفه الخفيفه .
6- اهتمي دائما بصحتج ومضهرج لان كل متهملين نفسج راح ايبين عليج علامات الكبر يعني مرات تشوفين بنيه عمرها بالعشرينات وجوه عينها اسود والتجاعيد طالعه ووجهه كله جفاف والاضافر متكسره والشعر متقصف زين ليش ؟؟؟ يعني انتي كاعده 12 ساعات باليوم على النت اخذي نص ساعه منها ال نفسج اشربي مي اكلي فواكه حطي مرطب كصي اطراف شعرج سوي ماسكات طبيعيه تره هايه كلها اشياء اسويها بالبيت ميحتاجلها لا طلعه ولا صرف فلوس .