٨ خطوات هتساعدك لو حاسس بالوحدة

ممكن تبقى عايش لوحدك فعلا ماعندكش ناس حواليك وبتكافح في رحلة تكوين الصحاب، أو ممكن يبقوا صحابك في مرحلة مختلفة عن المرحلة اللي إنت فيها، أو زي الكلام الإكليشيه "لكنه حقيقة" إنك حواليك ناس بس حاسس إنك لوحدك، ممكن تبقى في أي حالة من الـ 3 دول تحس إنك وحيد.

إحساس الوحدة غالبا هو إحساس حس بيه كل شخص بغض النظر عن المشاعر اللي بتنعكس عليه بعد كده سواء كان بالقلق والخوف أو بالحزن أو بالغضب، بس إحساس الوحدة شيء بيمر بيه كل إنسان، لكن الوحدة المزمنة ممكن يبقى ليها آثار سلبية على صحة الشخص، في الواقع الدراسات النفسية بتقول إن الوحدة قادرة تسبب مشاكل صحية زي الاكتئاب وإدمان الكحول والسكتات الدماغية وانخفاض نظام المناعة والموت المبكر.

8 خطوات عشان تتعامل مع الوحدة:






1- اعمل قايمة بالأنشطة اللي إنت عايز تعملها بنفسك:

من المشاكل اللي أغلب الناس بتقع فيها هي إنهم لما يبقوا عايزين يعالجوا وحدتهم هي إنهم يدوروا على ناس بس في حياتهم، وللأسف ده علاج قصير الأمد لإن الشخص اللي بتملا بيه وحدتك بمجرد ما يختفي هترجع تحس بالوحدة، فبدل الناس اشغل نفسك بالأنشطة اللي ممكن تعملها حتى لو هتنزل لعب على الموبايل وتلعبها، تتعلم الخياطة، تتفرج على أفلام ومسلسلات.

كيت باليستيري، دكتورة علم نفس في لوس أنجلوس بتقول إن الوحدة فرصة كويسة عشان نكتشف فيها نفسنا، تقدر في الوقت اللي بتحس فيه بالوحدة تخرج مع نفسك ممكن تتعشى برا، تروح سينما أو مكان كان نفسك تروحه، بتقول كيت باليستيري كمان إن الناس بيكرهوا الوحدة وبيلجأوا للناس عشان ينظموا مشاعرهم، وإنك تقعد مع نفسك دي أحسن فرصة عشان تقدر تنظم فيها مشاعرك.

2- دور على أنشطة تقدر تكون فيها لوحدك مع ناس تانيين:

اعرف إيه هوايتك وابدأ اعملهم مع ناس شبهك فكريا، زي الرسم أو التصوير أو السفر والخروج في رحلات، بس دور في الأول عن جروبس مبتدئين، ممكن الهدف من الخطوة دي هي إنك تبقى موجود مع ناس حتى لو مش هتكون صداقات، لو لقيت حابب يكون بينكوا صداقة يبقى كويس.

3- اعمل قايمة بالناس اللي ممكن تبقى معاهم لما تحس بالوحدة:

ممكن يبقى في القايمة دي ناس من أهلك أو من صحابك أو معارفك المهم إنه يبقى شخص بيخليك تحس بالإيجابية، القايمة دي عشان تحس إن فيه أشخاص جنبك لما تحس إنك مش لاقي ناس تتكلم معاهم، وعشان تخلي معاك اختيارات مختلفة حاول تزود عدد الناس اللي في القايمة دي، وبلاش يبقى شخص واحد بس في القايمة دي لإنك هتحس بالوحدة أكتر

4- حاول تبقى اجتماعي أغلب الوقت حتى لو إنت مابتحبش كده:

جربت تبقى بتتكلم مع حد وحاسس إنه مش فعال في إنه يسمعك أو إنك تحكيله أو إنكوا تتكلموا مع بعض في المطلق؟ ده لإن الوحدة عموما بتحسس الشخص إن التواصل الاجتماعي ملوش معنى، كيت باليستيري بتقول إن الشخص لازم يبقى بيقول على نفسه كلام إيجابي في كلامه مع الناس وممكن ده يساعد زي "أنا مهتم، وأنا بقترح، وانا مابخفش من الرفض"

5- حاول ترد الجميل:

ممكن تتطوع في حاجات زي إنك تلعب مع القطط أو تخرج الكلاب أو تروح ملاجئ للمشردين وتساعدهم، أو تزور ناس عيانه مثلا، غالبا ده بيبقى كويس للوحدة، لإن التفاعل اللي هتعمله هيبني علاقات مع أشخاص جديدة أو حيوانات أليفة بيتبسطوا لما يشوفوك وده في الحقيقة ممكن يسعد الشخص أكتر من صحابه.

6- حاول تحرك جسمك بالطريقة اللي تبقى مستمتع بيها:

الموضوع مش متعلق بالتمرينات على قد ما هو متصل بالنظام الحسي عند الشخص، كل اللي هتحاول تعمله هو إنك هتحرك جسمك وإنك تلحق عقلك من الإحساس بالوحدة، فممكن الشخص يجرب إنه يمشي حافي في الرمل أو يركب الأمواج مثلا أو يلعب كره كل دي حاجات هتساعد الشخص إنه ينتبه لمشاعر جسمه.

7- ممكن تروح لدكتور نفسي:

بالإضافة للحاجات اللي ممكن الدكتور النفسي يقدمهالك فهو كمان شخص يقدر يسمعك كويس ويقدرك ويقدر مشاعرك، ساعات الموضوع ممكن يتلخص في إنك تلاقي حد يسمعك ودي حاجة مهمة.

8- افتكر إن الوحدة شيء مؤقت:

مش معنى إنك حاسس بالوحدة دلوقتي هو إنك هتفضل وحيد طول عمرك أو مش هتلاقي المجتمع اللي يحتويك، إنت اللي هتحدد مستقبلك، ساعات بيبقى لازم تخرج من علاقات بس مع الوقت هتقدر تحط أسس وقواعد لعلاقات تانية.