رواية امرأة وخمسة رجال

رواية امرأة وخمسة رجال للكاتبة شاهندة الفصل الثاني

قال إسماعيل بصوت حاد:
ياسعاد.. ياسعاااد.
هرولت سعاد إلى حيث زوجها الجالس على كرسيه يرمقها بنظرات حادة.. لتقول بتوجس:
خير ياإسماعيل.

قال إسماعيل بحدة:
بنتك فين ياسعاد؟
قالت سعاد بإرتباك:
بنتى.. قصدك تمارا .. أصلها يعنى...
قال إسماعيل فى غضب:
أصلها إيه.. ماتنطقى .

قالت سعاد وقلبها يرتجف خوفا:
أصل صاحب الأجزاخانة اللى هي شغالة فيها وراه مشوار مهم النهاردة .. وكلمها تقعد بداله وهي سألتنى وأنا قلتلها ماشى.
نهض إسماعيل وعروقه تنتفض من الغضب وهو يقترب منها قائلا:
عملتى إيه ياأختى.. وافقتى؟وإزاي توافقى من غير ماتسألينى.

تراجعت سعاد خطوة إلى الوراء وهي تقول فى خوف:
إسمعنى بس ياإسماعيل.. الدكتور عرض عليها مبلغ حلو لو وقفت بداله النهاردة.. وانت عارف إنها نفسها تأجر فستان فرح حلو.. واحنا مفضلش معانا فلوس.. أنا كنت هستلفلها حقه من أم محمود جارتنا بس أهي ريحتنا من السلف.

وقف إسماعيل قبالتها وهو يقول فى صرامة:
سلف إيه اللى كنتى عايزة تستلفيه ياولية.. أنا قلتلك قبل كدة إنى مليش دعوة بمصاريف فرح بنتك.. أنا كفاية علية مصاريف تعليم ريم.

قالت سعاد وقلبها ينتفض رعبا:
وأنا أصلى قلتلك إدفع حاجة ياأخويا؟.. ما تمارا اللى اشتغلت ومن تحويشها يانضرى جهزت نفسها.. وأنا ساعدتها بقرشين من شغلى فى الخياطة.. وأهى الحمد لله خلصت.. وفاضل على فرحها أيام ياإسماعيل.

إلتفت إسماعيل ليعود إلى مقعده وهو يجلس عليه قائلا:
اللى مصبرنى إنى خلاص هخلص منها .. روحى ياولية.. روحى قوليلها تقفل الأجزاخانة وتيجى حالا.. مش عايز حد فى الشارع يقول إسماعيل مش عارف يحكم أهل بيته.. يلا مستنية إيه.. غوووورى.
انتفضت سعاد وهي تسرع بالمغادرة.. لتتصل بتمارا وقلبها تتقافز دقاته من الخوف.

قال عزت فى ملل:
ماتروق ياابنى انت وهو.. الواحد مش ناقص نكد.. هتفكوها ولا أقوم أمشى؟
قال وليد فى حدة:
قوم إمشى ياعزت.

قال عزت بإستنكار:
هي بقت كدة؟.. بقى أنا أسيب مراتى وحفلة كبيرة فيها بنات زي اللوز.. عشان فى الآخر تقوللى قوم إمشى ياوليد.. طب أنا قايم ماشى أهو.
ونهض بعصبية ليمسكه كمال من يده قائلا:
اهدى بس ياعم المهم واقعد.. وليد بيهزر.. هي القعدة تحلى من غيرك برده.

قال وليد فى ضجر:
اقعد ياعزت وبلاش غلبة.. ياسيدى بهزر معاك.
جلس عزت وهو يرفع ياقة القميص بغرور قائلا:
أيوة كدة اتعدلوا ..
لتلمع عيناه وهو يستطرد قائلا:
ده أنا جايبلكوا معايا مفاجأة.

نظر إليه كمال قائلا فى حيرة:
مفاجأة إيه دى؟
أخرج عزت من جيبه ورقة صغيرة فتحها أمامه لتظهر ثلاثة أقراص تشبه الدواء.. وهو يقول:
حاجة كدة خيال.. مجربتوهاش قبل كدة ولا عمركوا كنت هتجربوها .. يلا بقى أنا مش عارف بس من غيرى كنت هتعملوا إيه؟

إلتمعت عينا وليد وهو يمد يده ليمسك قرصا من الأقراص قائلا:
إيه ده؟
أبعد عزت يده وهو يقول:
حيلك حيلك إستنى بس.. أصل الحبوب دى حاجة كدة هتوصلكوا للسعادة المطلقة زي ما بيقولوا .. هتعيشكوا فى دنيا تانية خالص.. جايالى مخصوص من برة.. محتاجة جو هادى خالص عشان نعيش معاها.. تعالوا نشربها فى العربية.

قال كمال وهو يهز رأسه رافضا:
لأ.. أنا كفاية اللى شربتوا النهاردة.. مش ناقص أسمع كلام من علياء.. كفاية اللى سمعتوا النهاردة قبل ما آجى.
قال عزت بسخرية:
خايف من الست.. لأ رجولة ياجدع.

قال كمال فى عصبية:
ما تتلم ياعزت.. وتلم لسانك.. أنا مش خايف.. بس مبحبش المشاكل.
قال وليد فى سخرية:
مصدقينك ياكمال.. مصدقينك.

نقل كمال نظره بينهما فى حنق ليقول موجها حديثه إلى عزت:
طب هات ياعزت .. هات الحباية دى وخلصنى.. مش لازم نستنى لما نروح العربية.. هااات.
قال عزت بإبتسامة:
أيوة كدة ياكمولة ياحبيبى.. إمسك.

ليناوله القرص فأخذه كمال وتناوله بسرعة يتبعه وليد ثم عزت لتلتف رءوسهم على الفور وتصور لهم أوهام ذلك المخدر أن الحياة صارت رائعة وأنهم يدخلون باب الجنة بأرجلهم.. لا يدركون أنهم مايدخلون إلا بابا سيفتح عليهم نار جهنم ليحترقون بلهيبها.

ردت تمارا على هاتفها على الفور عندما رأت رقم إبنة خالتها وصديقتها وفاء.. لتقول بابتسامة:
فوفو حبييتى وحشتينى.
قالت وفاء بعتاب ساخر:
لو وحشتك بجد كنتى عديتى علية الصبح قبل ماتنزلى.

مالت تمارا برقبتها واضعة هاتفها مابين أذنها اليمنى وكتفها وهي تسجل آخر دواء باعته منذ قليل قائلة:
والله يافوفو كنت مستعجلة أوى الصبح لإنى سهرت بالليل شوية وصحيت متأخرة.. فمعرفتش اعدى عليكى.
قالت وفاء بسخرية:
وإيه ياأختى اللى كان مسهرك بالليل.. أكيد بترغى مع المحروس .. وأنا ولا على بالك.

توقفت تمارا عما تدونه وهي تقول بحيرة:
أنا نفسى اعرف بس مش طايقة ماجد ليه ياوفاء؟ده حتى عمره ما جاب سيرتك غير بكل خير.
قالت وفاء بارتباك:
وأنا مالى وماله ياتمارا؟هو أنا قلت حاجة ؟كل الموضوع بس إنه واخدك منى وطبعا لما هتتجوزوا هياخدك منى أكتر.

ابتسمت تمارا وهي تعود لتكمل الكتابة قائلة:
قلتييلى.. لأ ياستى متقلقيش أنا قلت لماجد إنك مش بنت خالتى وبس.. لأ ده انتى زي أختى وأكتر وإن بيتى هو بيتك .. يعنى تشرفينا ياستى وقت ماتحبى وتباتى معانا كمان.

قالت وفاء:
أبات معاكو.. انتى الظاهر إتجننتى.. عموما كفاية كدة كلام فى التليفون وأشوفك لما ترجعى.. متنسيش تعدى علية.
قالت تمارا وهي تغلق الدفتر لتعود وتمسك هاتفها بيدها قائلة:
مش هينفع يا أختى.. خالتك سعاد بتتصل بية بقالها نص ساعة وأنا مبردش، أكيد بابا قالب الدنيا عشان إتأخرت وأنا يادوبك هطلع على أول الشارع وآخد تاكسى مش هستنى الأتوبيس زي كل يوم.. الحمد لله إن ماجد مكلمنيش كان هيضايق أوى لو عرف إنى خدت وردية بالليل ومقلتلوش.. يلا كله عشان خاطر فستان الفرح اللى قلتلك عليه.. يارب بس بكرة أنزل ألاقيه لسة متحجزش.

قالت وفاء فى سخرية:
متقلقيش هيروح فين يعنى.. هما العرايس يعنى بتتجوز كل يوم.. ما احنا ملقحين زي الرز أهو ومحدش بيهوب ناحيتنا .
قالت تمارا بحنان:
معلش يافوفو بكرة ربنا هيرزقك بإبن الحلال اللى يسعدك بس انتى إصبرى بس.

قالت وفاء:
صابرة يااختى .. صابرة.
قالت تمارا:
تمام.. يلا بقى.. هشوفك بكرة قبل ما أنزل الشغل.. سلام.
ثم أغلقت الهاتف ووضعته فى حقيبتها وهي تغلق باب الصيدلية وتتجه بخطوات سريعة إلى الشارع الرئيسى.. كي تركب أي سيارة أجرة توصلها إلى البيت بأقصى سرعة.

دلفت السيدة منيرة إلى الحجرة لتجد ميار الجالسة على السرير تبكى فى صمت.. وبجوارها حقيبة مفتوحة بها بعض ملابسها.. ما ان رأتها ميار حتى مدت يدها لتمسح دموعها على الفور لتقترب منها منيرة وتجلس بجوارها على السرير قائلة بهدوء:
مش هسألك كنتوا بتتخانقوا ليه وصوتكوا عالى.. ولا ليه لميتى هدومك فى الشنطة دى؟بس هسألك سؤال تانى خالص وياريت تجاوبينى عليه بمنتهى الصراحة؟

نظرت إليها ميار قائلة فى حزن:
اتفضلى ياطنط.. إسألى.
نظرت منيرة إليها قائلة:
لما هتروحى بيتكم هتقولى إيه لمامتك وباباكى.. هتقوليلهم أنا بسرعة إستسلمت وفقدت الأمل فى جوزى وخلاص مبقتش عايزة أكمل.. هتقولى إن بنت عيلة الجمال مقدرتش على أول مشكلة واجهتها وفضلت تهرب زي الجبنا.

حاولت ميار أن تتحدث لتقاطعها منيرة بإشارة من يدها قائلة فى حزم:
طيب مفكرتيش فى وليد لما يعرف إنك سبتى البيت وخرجتى من غير إذنه.. تفتكرى وليد هيعدى حاجة زي دى بالساهل.. مش بعيد يطلقك فيها.. قوليلى بقى.. ده اللى انتى عايزاه يا ميار يابنت أختى؟ ياللى اخترتك من وسط البنات اللى كانوا أدامى كلهم عشان تكونى مرات إبنى.

أطرقت ميار برأسها قائلة بحزن:
هي دى المشكلة.. أنا كنت اختيارك انتى مش اختياره ومن يوم مااتجوزته لغاية النهاردة وأنا بدفع تمن الاختيار ده.. بس أنا تعبت.. من حقى أحس إنى محبوبة ومرغوبة من جوزى مش حاجة اتفرضت عليه.

قالت منيرة فى هدوء:
بصى ياميار.. جوازك من وليد ده حلم بنات كتير.. كانوا مستعدين يعملوا أي حاجة عشان يكونوا فى مكانك.. وأي ست عاقلة بتحافظ على بيتها هتتحمل.. وهتشوف إزاي ممكن تخلى جوزها يحبها وميستغناش عنها.. خدى بالك من بيتك وخدى بالك من جوزك عشان مترجعيش تندمى ياميار.

لتنهض قائلة فى حزم:
أي جواز فى الدنيا لازم تحصل فيه تنازلات .. إذا كنتى مستعدة تقدمى تنازلات عشان علاقتكوا تنجح يبقى هتكملى معاه أما لو لأ.. فساعتها انتى حرة.. القرار يرجعلك.

لتمشى مغادرة الحجرة فى هدوء.. تتبعها عينا ميار الحائرتين.. تتساءل هل هي حقا مستعدة لتقديم تلك التنازلات للحفاظ على زواجها من وليد؟وهل ذلك الزواج يستأهل أن تفعل ذلك؟ترى هل تحبه إلى تلك الدرجة؟لتظل أسئلتها عالقة...دون إجابة.

قال عزت فى ملل:
يوووه ياوليد.. احنا لسة موصلناش لشقتك؟
قال وليد الذى يقود السيارة بصعوبة من أثر تلك الحبوب:
قربنا أهو ياعزت..
قال عزت:
يعنى مش كنا جبنا البت زيزى معانا.. أهى كانت طرت لينا الليلة حبة بدل ماهي ناشفة كدة؟

قال كمال وهو يحاول أن يفيق من أثر المخدر الذى يسرى فى دمه:
يعنى وهي رضت تيجى معانا وإحنا مجبنهاش؟.. ما قالتلك ان إحنا كتير عليها.
قال وليد وهو يحاول أن يفتح عينيه بصعوبة:
أحسن إنها جت منها وهي دى أشكال أصلا تطرى قعدة.. ذوقك بقى لوكال ياعزت.

قال عزت بسخرية وهو ينظر خارج السيارة:
خلينالك الذوق العالى ياكبير.
ليصرخ فجأة قائلا:
اقف ياوليد.. بسرعة.

توقف وليد كابحا فرامل سيارته على الفور.. قائلا:
فيه إيه؟
أشار عزت إلى الجهة الأخرى من الطريق قائلا:
بصوا كدة ع المزة اللى هناك دى.. يالهوووى.. دى صارووخ.

نظر كل من كمال ووليد إلى الجهة التى ينظر إليها عزت لتلتمع عينا وليد وهو يقول:
فعلا ياواد ياعزت.. صاروخ.
قال عزت بتباهى:
عشان تعرف بس ذوقى ياسى وليد.. آل لوكال آل.

قال كمال:
الحقيقة البت قمر .. بس واقفة فى الحتة المقطوعة دى ليه وفى الوقت ده؟
قال عزت:
تلاقيها شمال.. وواقفة تلقط رزقها.. ماتيجوا نجرب .. مش جايز تظبط وأهى أحلى من البت زيزى بمراحل.

قال وليد وهو يفكر:
من جهة أحلى فهي أحلى.. ومالوا.. تعالوا نجرب..
ليدير سيارته وهو يلتف بها من المحور المقابل ليقترب منها بسرعة ثم يتوقف بجوارها تماما.

... كانت تمارا تقف على الطريق تلعن ذلك الحظ الذى جعلها تفكر فى ركوب سيارة أجرة لتظل قرابة النصف ساعة فى هذا المكان ولم يقترب منها سوى بعض السيارات المسرعة.. حتى هاتفها الذى حاولت أن تتصل بماجد من خلاله.. وجدته فارغا لتلعن حظها مجددا وهي تنظر إلى ساعتها تدرك أنها ستحظى بتقريع من والدها يساوى ماحصلت عليه منه طوال حياتها.. لتفيق على صوت توقف سيارة بحدة بجوارها وصوت صاحبها يقول بلهجة ثقيلة:
القمر رايح فين؟

نظرت إليه تمارا لتشعر بأن وجهه مألوف إلى حد ما.. لابد وأنها رأته فى مكان ما ولكن أين؟ليقول ذلك الشاب الذى فى الخلف:
ماتيجى معانا يامزة واللى انتى عايزاه هتاخديه؟

هنا أدركت تمارا مايحدث .. انهم مجموعة من الشباب أولاد الأغنياء والذين يظنون أنهم يستطيعون شراء شرفها بالمال.. لتشيح بوجهها عنهم وهي تنظر إلى الطريق تدعوا الله من كل قلبها أن تجد أي سيارة أجرة لتركبها وتبتعد عنهم لينتفض قلبها رعبا حين هبط ذلك الرجل بالخلف قائلا:
ماتعبرينا يامزة.. إيه مش عاجبينك ولا إيه؟

أغمضت عينيها وهي تدرك من لهجته الثقيلة وترنحه أنه لابد وأنه مخمور.. مما زاد الطين بلة.. لتنظر حولها تريد ان تستنجد بأي أحد فلم تجد.. حاولت أن تمشى بعيدا عنه ولكن استوقفتها يده التى أمسكت بها قائلا بحدة:
رايحة فين وسايبانى.

نفضت يده فى غضب قائلة:
سيب إيدى ياحيوان.
ليصفعها بقوة قائلا:
حيوان.. لأ ده إنتى عايزة تتربى من أول وجديد.
أمسكت تمارا وجنتها بيدها فى ألم وكادت أن تضربه باليد الأخرى ليمسك يدها بينما وجدت ذلك الشابين قد خرجا من السيارة وأصبحا بجوارهما فى ثانية وأحدهما يقول:
فيه إيه ياعزت .. مالها البت دى؟

قال ذلك العزت:
بتشتمنى ولازم تتربى.
قال ذلك الشاب:
طب يلا هاتوها معانا واحنا نربيها بطريقتنا.

اتسعت عينا تمارا فى جزع وهي تستمع إلى تلك الكلمات لتتركهم وهي تهرول مبتعدة .. تطلق ساقيها للرياح هربا منهم.. لتجد نفسها فى ثوان.. مقيدة من قبل أحدهم الذى وضع يده على فمها يكمم صوتها.. و حملها معه رجل آخر منهم.. بينما أسرع الثالث لفتح باب السيارة قائلا:
يلا بسرعة قبل ما حد يشوفنا.

لتجد تمارا نفسها فى سيارة مجهولة مع رجال لا تعرفهم يقيدونها بقوة ويكممون فمها متجهين إلى مكان ما لتصرخ بكل قوة وتركل بقدمها بشدة.. تحاول الإستنجاد بأي أحد.. قبل أن تشعر بضربة على رأسها و يحيط بها الظلام.

رواية امرأة وخمسة رجال للكاتبة شاهندة الفصل الثالث

أفاقت ميار من صدمتها على صوت رنين هاتفها المتواصل لتذهب إليه وتمسكه فى قلق خشية أن يكون محدثها وليد وهي غير مستعدة نفسيا الآن لتحاكيه.. لترى إسم والدتها .. وتجيبها على الفور وهي تقول:
ماما.

قالت سهام فى لهفة:
ميار.. حبيبتى.. فينك.. صحيتك من النوم؟
جلست ميار فلم تعد قدميها قادرة على حملها وهي تقول:
لأ ياماما.. أنا لسة منمتش أصلا.
قالت سهام فى حيرة:
لحد دلوقتى منمتيش؟دى الساعة داخلة على خمسة الفجر.. انتى كويسة ياميار؟

تنهدت ميار قائلة:
كويسة ياماما متقلقيش.. هيكون فية إيه يعنى.. أنا كويسة الحمد لله.
زفرت سهام قائلة:
الحمد لله يابنتى أنا كنت خايفة بشكل.. كويس إنى إتطمنت عليكى.
عقدت ميار حاجبيها قائلة:
ليه بس ياماما.. قلقانة ليه؟

قالت سهام:
ها.. لا أبدا.. بس يعنى حلمت حلم كدة مش كويس.. وأول ما صحيت قلت أطمن عليكى.
قالت ميار:
متقلقيش ياماما.. ده حلم زي ماقلتى.. هتلاقيكى تقلتى شوية على العشا.
قالت سهام:
باباكى برده قاللى كدة.. عموما يلا بقى روحى نامى عشان متقلقيش وليد.

قالت ميار بسخرية:
وليد مش هنا أصلا.. لسة برة.
قالت سهام بتوجس:
برة فين.. اوعوا تكونوا اتخانقتوا تانى ياميار؟
قالت ميار فى مرارة:
لأ ياماما .. متخانقناش.. بس وراه ميتنج مهم.

قالت سهام:
ميتنج لحد دلوقتى؟.. غريبة.. عموما ربنا يابنتى يعينه.. طيب.. أسيبك دلوقتى تنامى وحاولى تجيلنا بكرة انتى ووليد تتعشوا معانا وتقعدوا شوية.. انتى وحشتى بابا أوى.

ابتسمت ميار فى مرارة قائلة:
حاضر ياماما.. هقول لوليد وأكلمك.. تصبحى على خير.
قالت سهام فى حنان:
تلاقى الخير ياحبيبتى.

أغلقت ميار الهاتف ثم رفعت الشريط الذى بيدها أمامها مجددا وهى ترى العلامتان الحمراوتان واللتان تؤكدان لها بلا أدنى ذرة شك أنها حامل .. وأنها فى طريقها لتنجب طفلا من وليد.. زوجها و.. .. معذبها.

قال كمال فى حسرة ودموعه تتساقط على وجهه:
حرام عليكوا .. منكوا لله.. أنا عندى أخت.. والله عندى أخت.. يارب .. بلاش عقابى يكون فيها.. يااارب.
قال عزت فى حدة:
ماخلاص بقى ياكمال اللى حصل حصل.. هنعمل إيه يعنى؟.. وهو إحنا كنا داريانين باللى بنعمله.

نهض كمال ليقترب من عزت بسرعة يمسك بتلابيب قميصه قائلا بغضب:
انت بالذات تسكت خالص.. إنت السبب فى اللى حصل.. لو مكنتش إديتنا الزفت اللى شريبناه ده .. مكنش حصل كل ده.
نفض عزت يد كمال قائلا بغضب:
وأنا كنت يعنى ضربتك على إيدك وقلتلك تشرب الحباية.. ما إنت اللى عملت فيها راجل وشربتها.
عاد كمال يمسك بتلابيب عزت وهو يقول:
أنا راجل غصب عنك.

وجدا وليد يقف بينهم وهو يقول بغضب:
ماتلموا نفسكوا شوية.. ماشافوهمش وهما بيسرقوا.. شافوهم وهما بيتحاسبوا.. إحنا عايزين نشوف حل للمصيبة اللى وقعنا فيها دى.. البت قاطعة النفس خالص.. ولازم نتخلص منها ولا انتوا ناسيين إنها فى شقتى.

ترك كمال قميص عزت وهو يقول بصدمة موجها حديثه إلى وليد:
إنتوا مش هتودوها المستشفى جايز يلحقوها؟إنتوا للدرجة دى معندكوش قلب ولا ضمير؟

قال وليد فى غضب:
مستشفى إيه بس.. إنت إتجننت؟ .. مستحيل طبعا.. ده احنا لو عملنا كدة هنروح كلنا فى داهية .. مش بعيد ناخد فيها إعدام.. دى جريمة إغتصاب والبت كمان كانت عذراء.. يعنى أهلها هيقلبوا الدنيا.. ومش هيسكتوا.

جلس كمال على أقرب كرسي وهو يخبط بيده على رأسه قائلا فى مرارة:
ياربي أنا إيه اللى عملته ده.. ياريتنى ماشفتكوا تانى .. ياريتنى ماعرفتكوا .. أنا كنت فى حالى وماشى جنب الحيط .. ليه بس مشيت معاكوا .. ليييه؟

قال عزت فى ضجر:
يوووه.. رجعنا للموال ده تانى؟
قال وليد بصرامة:
خلصنا ياعزت.. المهم دلوقتى تعالوا ننقلها لعربيتى ونرميها فى اقرب حتة مقطوعة.. خلينا نخلص من اليوم ده بقى.

نهض كمال قائلا بعصبية:
لأ طبعا مستحيل.. اعملوا اللى تعملوه .. انا مش ممكن أعمل اللى بتقولوا عليه ده وأنا واعى وفايق.. كفاية الجريمة اللى عملتها واللى مش قادر أصلحها.. أنا ماشى من هنا.. وياريت ماأشوفش وشكوا تانى.

ليغادر كمال بخطوات سريعة .. كاد عزت أن يلحق به ولكن يد وليد استوقفته وهو يقول ببرود:
سيبه ياعزت.. أدينا خلصنا من زنه.. وتعالى نشوف المصيبة دى نرميها فى أي مكان قبل ماحد من جيرانى يصحوا ويبقى روحنا فى ستين داهية بجد.

أومأ عزت برأسه موافقا واتجه معه إلى حيث تمارا الفاقدة الوعي بعدما ذبحها هؤلاء الحيوانات والذين يطلقون عليهم مع الأسف لقب رجال.. .. وهم أبعد مايكونوا عن ذلك اللقب العظيم.

استيقظت ميار على صوت جريان الماء فى الحمام لتدرك أن زوجها قد عاد، اعتدلت وهي تفكر كيف ستخبره بما لديها، لتتساءل فى حيرة، هل تخبره أم تنتظر قليلا؟

أفاقت على خروجه من الحمام وهو يضع ذلك اللاصق الطبي على كتفه.. لتنهض بسرعة وهي تتجه إليه قائلة فى جزع:
وليد مالك.. حصلك إيه؟
ليتجاهلها وليد كلية وهو يلبس تيشيرته.. انتظرته حتى فعل لتقترب منه قائلة فى قلق:
وليد.. رد علية.. انت كويس؟

قال وليد بحدة:
آه ياستى كويس.. حادثة بسيطة وأنا تمام.. إرتاحتى.. كملى نومك بقى وسيبينى أنام.. دى حاجة تقصر العمر.
ثم تركها واقفة مكانها فى صدمة واتجه إلى السرير يتمدد عليه بهدوء واضعا ذراعه على وجهه.. يخفى ملامحه.. لتتنهد ميار فى يأس.. ثم تضع يدها على بطنها تربت عليها قائلة فى همس:
مفيش فايدة.

فتحت علياء عينيها تشعر بصوت أنين مكتوم.. إلتفتت تجاه الصوت لتجد كمال بجوارها يهتز جسده لتعتدل على الفور وتربت على ظهره قائلة:
كمال .. إنت كويس؟

لم يجيبها.. فقط إزدادت إهتزازات جسده لتنهض من مكانها وتلتف تجاهه لتتوقف فى صدمة وهي تضع يدها على فمها تكتم شهقة كادت أن تخرج منها وهي ترى دموعه المتساقطة على وجهه.. سقط قلبها بين قدميها .. واقتربت منه بسرعة لتجلس على ركبتيها بجوار السرير.. تضع يدها على وجهه قائلة وهي تمسح دموعه بيديها:
مالك ياكمال.. بتعيط ليه بس ياحبييى؟

نظر إلى عينيها ولم يجيبها.. لتشعر بالقلق يعصف بكيانها.. وهي تقول:
كمال رد علية .. أنا قلبى هيقف من القلق.
نهض كمال وهو يعتدل جالسا.. يمسك يديها ينهضها ويجلسها بجواره قائلا بصوت مختنق من البكاء:
أنا كويس ياعلياء.

قالت علياء بقلق:
لأ مش كويس.. دى أول مرة أشوفك بتعيط.. أكيد حصل حاجة.
أطرق كمال برأسه وهو يترك يديها قائلا:
حصل حاجات ياعلياء.. حاجات.
قالت علياء بتوجس:
إيه بس اللى حصل وخلاك بالشكل ده؟

رفع كمال وجهه إليها وهو يمسح دموعه بيديه بسرعة قائلا بتوتر:
ها.. لا محصلش حاجة ..
نظرت إليه بشك قائلة:
حصل ولا محصلش.. مالك ياكمال متلخبط كدة ليه.. فيك إيه؟

نهض كمال قائلا فى توتر:
هيكون فيه إيه يعنى ياعلياء.. غلطة.. قصدى يعنى إتخانقت مع وليد وعزت وقلنا شوية كلام كدة ملهمش لازمة.. وحلفت ما أعرفهم تانى.. علاقتنا أصلا من الأول كانت غلطة.. بس .. هو ده الموضوع كله ياعلياء.. إرتاحتى.

شعت عيون علياء بالفرحة وهي تقول:
إرتاحت؟ده أنا لولا الملامة كنت زغردت ياراجل.. دى دعوتى اللى كنت بدعيها الفترة اللى فاتت دى كلها وأخيرا ربنا إستجابها منى.

نظر إليها كمال ولم يعلق لتقول فى توجس:
بس لما انت بتقول إنها غلطة.. بتعيط ليه بس ؟

أشاح كمال بعينيه قائلا:
متضايق ياستى من الكلام اللى قالوهولى.. وياريت تبطلى السين والجيم والمحضر اللى انتى فاتحاهولى ده.. عشان أنا فية اللى مكفينى وعايز أنام وأرتاح.

قالت علياء:
طب خلاص ياكمال تعالى نام والصباح رباح.. تبقى تحكيلى اللى حصل لما تقوم من النوم.. أو أقولك أنا هروح أعملك كوباية لمون تروق دمك قبل ما تنام ياأخويا.. ما هو ماينفعش تنام وإنت كدة.

أمسكت يده تجلسه على السرير قائلة:
أقعد بس استنانى هنا.. ثوانى وراجعالك.

لتغادر الحجرة تتبعها عيناه فى ألم قائلا:
أقولك إيه بس.. انتى لو تعرفى مش هتعمليلى لمون.. هتعمليلى سم هارى ياخدنى ويريحنى من اللى أنا فيه ياعلياء.. ياريتنى سمعت كلامك وبعدت عنهم.. . ياريتنى.

ليطرق برأسه أرضا ودموعه تعود للظهور مجددا.. يبكى ندما على غلطة يدرك انه سيدفع ثمنها آجلا كان أو عاجلا.. ووقتها لن ينفعه الندم.

قال ماجد بعصبية:
يعنى هتكون راحت فين بس.. الساعة داخلة على عشرة الصبح؟انتوا إزاي بس متعرفونيش من بالليل إنها مرجعتش البيت.

قال إسماعيل بغضب:
كنت هتعمل إيه يعنى.. أنا قلت من زمان.. البت دى عايزة تتربى من أول وجديد.
قالت سعاد بسرعة:
بنتى متربية ياإسماعيل..
قاطعها إسماعيل قائلا فى غضب:
إخرسى خالص.. مسمعش صوتك.

إنزوت سعاد فى مكانها بينما قال ماجد بعصبية:
أنا بقى مش هسكت.. أنا لازم أعرف هي فين لغاية دلوقتى وتليفونها مقفول ليه؟آخر مرة كلمت فيها وفاء كانت الساعة 11.. أنا مش عارف بس إزاي تخبى علية إنها هتشتغل وردية بالليل.. إزاي؟

قالت ريم أخت تمارا فى سخرية:
قول لنفسك يامسيطر.

رمقها ماجد شذرا وكاد أن يقول شيئا لولا تعالى رنين جرس الباب لتذهب إليه ريم وتفتحه فإذا بسعيد جارهم يدلف إلى المنزل وهو يقول:
إلحق ياعم إسماعيل .. إلحقى ياست سعاد.. أمى كلمتنا من المستشفى .. بتقوللى إنها شافت الست تمارا هناك.. جايبينها فى حادثة وحالتها خطيرة.

لترتجف القلوب رعبا مع إنطلاقة صرخة سعاد بإسم إبنتها فى لوعة.

رواية امرأة وخمسة رجال للكاتبة شاهندة الفصل الرابع

دلفت صافى إلى حجرة نومها.. لتجد نورها قد إشتعل فجأة.. رأت عزت الجالس على الأريكة واضعا قدما فوق الأخرى.. يرمقها بملامح جامدة.. نظرت إليه بتساؤل قائلة:
خير.. مالك ياعزت.. قاعد كدة ليه؟

قال عزت فى برود:
الهانم كانت فين للساعة دى؟
قالت صافى بهدوء:
انت عارف كنت فين.

ثم اتجهت بلامبالاة إلى تلك الخزنة الخاصة بها والموجودة بداخل دولابها وفتحتها تخرج منها علبة مجوهراتها.. ثم تتجه إلى التسريحة تخلع قرطيها وتضعهما فيها ليقول عزت بحدة:
إيه البرود اللى انتى فيه ده.. لأ ياستى معرفش.. قوليلى انتى كنتى فين؟

توقفت صافى عن خلع ذلك العقد حول رقبتها وهي تلتفت إليه قائلة فى دهشة:
انت مالك النهاردة ياعزت؟.. ما أنا قايلالك.. إنى رايحة حفلة شيرى.. ولا إنت نسيت.
نهض عزت مقتربا منها وهو يقول بصرامة:
الحفلة خلصت الساعة ٦ الصبح والساعة دلوقتى ١٢ الضهر.. الهانم بقى كانت فين الست ساعات دول؟

ظهر الإرتباك على ملامح صافى لتتمالك نفسها بسرعة قائلة:
خدتنى بيرى وكوكى وروحنا قعدنا شوية على النيل.. فيها حاجة دى؟
مال ينظر إلى عينيها قائلا:
مقلتليش ليه؟

قالت فى حدة:
كنا زهقانين وقلنا نقعد نرغى شوية.. محبتش أقلقك.. قلت أكيد نايم.. وبعدين.. فيه إيه ياعزت.. وأنا من إمتى بقولك على كل تحركاتى؟
عقد حاجبيه قائلا:
من النهاردة ياصافى.. من النهاردة هتقوليلى على كل تحركاتك.. من النهاردة مش هتروحى مكان من غيرى.. مفهوم؟

مشيت من أمامه قائلة:
لأ إنت أكيد إتجننت.. مش عارفة بس إنت مالك النهاردة؟
أمسك ذراعها بقوة يقربها منه مجددا قائلا:
أنا عقلت ياصافى.. إيه.. مش كنتى مبتحبيش تروحى حتة من غيرى.. مش كنتى بتترجينى أروح معاكى الحفلات دى؟

أمسكت بيدها.. يده التى تمسك بذراعها تبعدها عنها وهي تقول ببرود:
وإنت بقالك فترة بترفض وبتروح تسهر مع أصحابك
.. بون مون شيرى.. إتعودت أروح لوحدى.. إيه بقى اللى غيرك فجأة كدة؟

أمسك كتفيها بقوة قائلا فى جمود:
حاجات كتير اتغيرت.. إسمعينى ياصافى وده آخر كلام عندى.. من النهاردة أنا معاكى فى كل حتة وسهر برة البيت للصبح هيكون معايا أنا وبس.. مفهوم ولا لأ؟
نظرت إليه صافى قائلة فى برود:
أوكيه.. مش مشكلة ممكن بقى تسيبنى عشان آخد الشاور بتاعى وأنام.

تركها لتمشى بخطوات سريعة غاضبة تجاه الحمام لتدلفه وتصفق الباب خلفها ليقول عزت بغل:
الظاهر إنى سيبتلك السايب فى السايب ياست صافى.. والله أعلم بتعملى إيه من ورايا.. بس أنا وراكى ولو اكتشفت إنك بتخونينى أو تخدعينى.. ورحمة أبويا ما هرحمك.. مش كفاية متجوزك أكبر منى ب ١٥ سنة ومستحمل قرفك.. مش كفاية الذل اللى أنا عايش فيه معاكى.. ومستحمل كل ده عشان الفلوس.. لكن تفكرى تخونينى او تبيعينى يبقى بتلعبى فى عداد عمرك.. مش عزت اللى يتخان أو يتباع ياصافى.. أصبرى علية بس.. مبقاش عزت إن ما عرفت كل حاجة مخبياها عنى.. وأنا وإنتى والزمن طويل.

قالت نجوى بنعومة لمحدثها فى الهاتف:
لأ ياعلاء.. مش هينفع نتقابل النهاردة.. معنديش محاضرات وعلياء مرات أخويا عارفة..
قال علاء بنبرة مغرية:
ولو قلتلك عشان خاطرى يانوجا.
قالت نجوى:
خاطرك غالى أوى عندى ياعلاء.. وإنت عارف.. بس أعمل إيه.. هخرج بحجة إيه بس؟

قال علاء برجاء:
وإن قلتلك إنى محضرلك مفاجأة كبيرة النهاردة وحابب أوريهالك.
شعت عيون نجوى بسعادة طاغية وهي تقول:
مفاجأة.. مفاجأة إيه ياعلاء؟
قال علاء بنبرة مغرية:
وهي تبقى مفاجأة لو قلتلك عليها.. تعالى وإنتى تشوفيها بعنيكى..

قالت نجوى:
خلاص هحاول وأقولك.. سلام ياحبيبى
لتغلق الهاتف وهي تضعه بجوارها.. تحاول أن تفكر فى حجة تجعلها تخرج وتقابل علاء... أول من دق له قلبها.. زميل دراستها... وحبيبها.

إستيقظت ميار لتنظر إلى جوارها فى قلق.. تشعر بأن هناك شيئا خاطئا.. لتجد مكان زوجها فارغا.. عقدت حاجبيها وهي تنظر إلى الساعة بجوارها لتجد الوقت مازال باكرا على إستيقاظه فقد عاد للمنزل فى الصباح وتوقعت هي أن يأخذ اليوم إجازة.. وينام طوال النهار.. نفضت عنها الغطاء وهي تنزل من السرير وتسرع بوضع دثارها عليها لتخرج من الحجرة متجهة إلى الأسفل إلى حيث وجدت حماتها منيرة.. التى تجلس فى الردهة تحتسى فنجال قهوتها فى هدوء.. تقدمت منها قائلة:
طنط منيرة.. صباح الخير.

تأملت منيرة ماترتديه ميار بعين غير راضية.. وهي تقول:
صباح الخير ياميار.
قالت ميار بارتباك وهي تلاحظ نظرة خالتها إلى ملبسها:
احمم.. وليد خرج؟
قالت منيرة ببرود:
خرج من بدري.

ثم صمتت للحظة قبل أن تقول:
انتوا اتخانقتوا إنبارح تانى ؟
عقدت ميار حاجبيها قائلة:
لأ متخانقناش.. بس...
ثم صمتت لتنظر إليها منيرة بإستفهام قائلة:
بس إيه؟

هزت ميار كتفيها قائلة:
معرفش كانت حالته غريبة انبارح وكتفه متصاب...
قاطعتها منيرة قائلة فى جزع:
وليد متصاب؟متصاب إزاي؟

قالت ميار بحيرة:
مش عارفة بس لما سألته اتنرفز علية وقاللى حادثة بسيطة وطلب منى أسيبه ينام.. سيبته فعلا ولما صحيت ملقيتهوش.. أنا قلقانة عليه اوى ياطنط.

أومأت منيرة برأسها وهي تنهض قائلة:
أنا رايحاله الشركة أشوف إيه الحكاية.
قالت ميار بسرعة:
استنينى ثوانى.. هغير وآجى معاكى.
قالت منيرة فى حزم:
لأ خليكى انتى.. جايز ميحبش يشوفك دلوقتى.

ثم نظرت الى ملبسها قائلة:
آخر مرة تنزلى الهول وانتى بالشكل ده ياميار.. مفهوم؟
لتتركها وتغادر تتابعها عينا ميار الدامعتين.. تتنازعها مشاعر عديدة ولكن بالتأكيد ما يغلب عليها هو... الضياع.

خرجت علياء من حجرتها تتابعها عينا نجوى فى لهفة.. لتهز علياء كتفيها فى قلة حيلة.. لتصاب نجوى بخيبة أمل.. اقتربت منها علياء قائلة:
معلش يانجوى مش مهم تروحى لصاحبتك النهاردة.. خليها لبكرة.

قالت نجوى بعصبية:
بكرة إيه بس ياعلياء.. صاحباتى كلهم رايحينلها النهاردة عشان يباركولها على الخطوبة وأنا بقى اللى هقولهم خليكوا لبكرة عشان خاطرى.. أصل أخويا نايم وكل ما مراته تدخل تصحيه عشان أستأذنه أخرج ميردش عليها.. ده أنا هبقى مهزأتهم كلهم بعد كدة.

قالت علياء بهدوء:
مش لازم تحكيلهم تفاصيل يانجوى.. قوليلهم إنى تعبانة مثلا ولازم تقعدى معايا.. وبكرة ياستى ابقى روحى لصاحبتك ولو على إنك مش عايزة تروحى لوحدك.. فأنا هبقى اروح معاكى.. ها.. إيه رأيك؟

ظهر على نجوى الإرتباك للحظة قبل أن تتمالك نفسها وهي تقول بغضب:
لأ ياستى خلاص.. مش رايحة خالص.. عشان ترتاحوا انتى وسى كمال بتاعك ده.

ثم اتجهت بخطوات غاضبة إلى حجرتها.. لتدلف إليها ثم تصفق الباب خلفها بقوة.. لتنظر علياء إلى باب حجرة نجوى فى صدمة.. ثم تضرب كفا على كف قائلة:
هو أنا هلاقيها منك يانجوى ولا من أخوكى اللى حالته مش مريحانى؟.. ولا من بابا كمان اللى كل شوية يكلمنى ويقولى إن الأسطى محمود زعلان ولازم كمال ينزل يشوف شغله.. أولع فى نفسى يعنى وأخلص ويقولوا الولية إتجننت.

لتتنهد وهي تضع يدها على بطنها قائلة فى حنان:
والله ما مصبرنى ع اللى أنا فيه غيرك إنت ياحبيبى.. إمتى بقى الأيام تعدى وأشوفك أدامى وأملى عينى بيك وأشم ريحتك..
لتنظر إلى السماء قائلة:
يارب إهديلى جوزى وريح قلبه وقلبى.. وخليلنا ابننا اللى بنترجاه من الدنيا.. يااااارب.

أفاقت تمارا على صوت بكاء قريب.. حاولت فتح عينيها فلم تستطع فى بادئ الأمر.. بدأت الأفكار تعود إليها شيئا فشيئا.. حتى تلك اللحظات الكريهة والتى عاشت فيها أسوا كابوس قد تعيشه فتاة على الإطلاق.. لحظات دنستها للأبد.. لتفتح عينيها على وسعهما تصرخ بألم.. إقتربت منها والدتها بلهفة قائلة:
ياحبييتى يابنتى.

نظرت إلى أمها الباكية فى ألم.. لتدير رأسها تنظر إلى والدها الذى جلس على كرسي بعيد يطرق برأسه وهو يضعها بين يديه.. لتستقر نظراتها بعد ذلك على ماجد الواقف بعيدا بجوار النافذة يرمقها بجمود.. أخافها جموده.. كادت ان تنطق بإسمه ولكنها عادت بنظراتها إلى والدتها التى أمسكت بيدها قائلة ببكاء:
تمارا.. ياعينى عليكى يابنتى.. وياويلنا من اللى عملتيه فينا؟

نظرت إليها تمارا فى صدمة قائلة وعيونها تغرقها الدموع:
أنا عملت فيكوا إيه ياماما؟أنا اللى إتعمل فية.. أنا اللى روحت بلاش.. أنا اللى ضعت..
لتصرخ مرددة:
أنا اللى ضعت.
قال إسماعيل بحدة:
وليكى عين تتكلمى يابت إنتى..

نظرت تمارا إلى والدها الذى إستطرد قائلا فى غضب:
وطيتى راسنا فى الوحل.. أورى وشى للناس إزاي دلوقتى.. أكيد أم سعيد فضحتنا فى الشارع والكل بقى عارف اللى حصلك.. ياويلك ياإسماعيل... ياويلك.

قالت تمارا بدموع سالت على وجنتيها قهرا:
وأنا كان ذنبى إيه بس؟عملت إيه.. ده أنا قاومتهم بكل ذرة فية.. بس هم كانوا أكتر وأقوى منى.. أنا الضحية.. والله العظيم أنا الضحية.

ضرب ماجد يده فى زجاج الشباك لينكسر الزجاج بصوت مدوي ويجرح يده.. وصرخة تمارا تدوى لمرأى ذلك المشهد.. حاولت النهوض من مكانها والهروع إليه لترى جرحه.. ولكن جراحها كانت أكبر وجسدها كان أضعف لتعود وتجلس على السرير ناطقة بإسمه فى ضعف.. لينظر إليها بنظرة مزقتها.. فقد إمتلأت عيونه بالحزن ممزوجا بعتاب وخيبة أمل.. قبل أن يندفع مغادرا الحجرة وكأن الشياطين تطارده.. لتنهار تمارا فى البكاء تشاركها والدتها.. أما إسماعيل فقد نهض من مكانه قائلا:
من حقه.. وطيتى راسه فى الطين هو كمان.. ومش بعيد يفشكل الجوازة كلها.. ماهو إيه اللى هيغصبه يتجوز واحدة زيك دلوقتى.. واحدة خلاص مبقتش...

قاطعته صارخة:
إسكت متقولش كدة.. حرام عليك.. ماجد مستحيل يسيبنى أو يتخلى عنى.. ماجد بيحبنى فاهم.. بيحبنى.
قال إسماعيل فى سخرية:
بيحبك.. على إيه ياحسرة.. لا مال ولا جمال.. ودلوقتى كمان ولا شرف.. قوليلى بس هيحبك على إيه؟

صرخت تمارا فى لوعة قائلة:
إنت إيه ياأخى.. مستحيل تكون أب.. فيه أب فى الدنيا يقول الكلام ده لبنته وفى لحظة زي دى.. بنته فيها مدبوحة وضعيفة والكل بينهش فيها.. وفى سيرتها.. حرام عليك والله حرام.. حرام.. حرااااام.

لتظل تصرخ وتصرخ.. تشعر بالإنهيار يمزق كيانها.. تحاول سعاد أن تحتويها لتخفف من إنهيارها ولكن هيهات.. ففى تلك اللحظة تشعر لأول مرة فى حياتها بالوحدة تقتلها لتهتز الرؤية أمامها قبل أن تسقط مجددا فى بئر الظلام.