قصة جميلة بنت بسيطه فلاحه

رواية جميلة الجزء الأول للكاتبة الشيماء محمد الفصل الحادي عشر

ميس: وريني بقي يا وليد هتعمل ايه ؟ هقدملك شعرها النهارده هديه
وصلت اوضتها وجابت مقص وبدأت تقص شعرها وسط عياط جميله ...
وليد هو وندي خارجين علي شغلهم ولسه هيركب العربيه جاله عم عباس
وليد: صباح الخير يا راجل يا طيب
عباس: صباح الخير وليد بيه ... الورد بتاع ست جميله نبت كله وما شاء الله يفرح القلب..

وليد ابتسم: بجد ! طيب كويس
ندي: ايه ورد جميله ده ؟
وليد: ده ورد جميله زرعته
ندي: طيب ينفع نشوفه الاول
وليد: هنتأخر لما نرجع
ندي: لا احنا بنرجع متأخر هتبقي الدنيا ظلمه وريهولي بسرعه
وليد: ماشي تعالي
راحو الاتنين يشوفو الورد وعباس معاهم ...

علية مش عارفه تعمل ايه وتنجد جميله ازاي ؟
فكرت .. انا ماسمعتش عربيه وليد بيه يمكن الحقه بره ... طلعت تجري علي بره شافت عربيته موجوده ولمحتهم عند الورد فراحت تجري عليهم وليد اول ما شافها جري عليها
وليد: في ايه يا علية بتجري ليه كده ؟
علية: الحق جميله من ميس هانم..

وليد ما وقفش يسمع الباقي بس طلع يجري وندي وراه .. دخل الفيلا وسمع عياط جميله جاي من فوق فطلع علي فوق بسرعه وراح ناحيه اوضته وهناك شاف جميله في الارض وميس فوقها بتقص في شعرها ... مش عارف ساعتها هو حس بإيه لان مفيش كلمات ممكن توصف احساسه ... جري ورفع ميس من فوق جميله اللي مش عايزه تسيبها
وليد: انتي اتهبلتي ؟ بتهببي ايه ؟

ميس بجنون: سيبني عليها
وليد وقف في وشها ومتجنن علي اخره وندي دخلت اتفاجئت بالمنظر معظم شعر جميله في الارض وهيا متكوره بتعيط ووليد في وش ميس فدخلت حضنت جميله بتهديها
وليد: انتي مش طبيعيه ابدا .. اطلعي بره
ميس: هيا اللي تطلع من هنا انا مش عيزاها هنا
بتزق وليد علشان توصل لجميله ووليد حيطه قدامها.

وليد: هيا مش هتطلع من هنا ولو في حد هيطلع هيبقي انتي فاتفضلي
ميس بجنون: انا مراتك هيا حياله خدامه
وليد: طيب يا ميس انتي طالق معدتيش مراتي ... اتفضلي بقي من هنا
ميس وقفت للحظه تستوعب ايه اللي وليد قاله وصمت بيقطعه شهقات جميله اللي بتجنن وليد
ميس: انت طلقتني علشانها ؟

وليد: ايوه طلقتك اتفضلي بقي بره البيت ده
ميس هجمت مره واحده علي جميله
ميس: طيب انا هقتلها خالص
رفعت المقص عايزه تضربها بيه وهنا وليد مسك ايدها وواقف قصادها وبيزقها بعيد فحاولت تخلص ايدها منه وهيا بتشد ايدها جامد المقص عور وليد في ايده
هنا ميس ووليد الاتنين وقفوا لان مش قصدها ابدا تعور وليد.

ميس: وليد انا اسفه .. مش اقصدك انت
وليد وصل لاخر تحمله: انتي ملكيش مكان هنا
بص حواليه شاف مفاتيح عربيتها علي التسريحه فاخدهم ومسكها من شعرها يخرجها بره البيت ومش بيسمع ولا صراخها ولا توسلاتها ولا توعدها لجميله.. خرجها بره الفيلا وحدف المفاتيح في وشها وقفل الباب..

وليد: اتفضلي من هنا
وطلع لجميلته يجري كانت مكانها في الارض وندي بتحاول تهديها
وليد دخل قعد جنبها في الارض
وليد: جميله
جميله باصه للارض بتعيط بهدوء ومش عايزه تبصله
ندي شهقت: ايدك ؟ انت اتعورت ازاي ؟

هنا جميله بصت لايده وقامت بسرعه جابت علبه الاسعافات ومسكت ايده
وليد: سيبي ايدي وكلميني الاول .. جميله ردي عليا
جميله: ايدك الاول
ندي حست انها عازل بينهم: انا هروح هكلم ماما ... وخرجت
وليد: انا اسف يا جميله ما تخيلتش ابدا ان ممكن الجنون يوصلها لكده...

جميله باصه لايده وشعرها القصير نازل مغطي وشها فمش شايف عنيها وهو بيحاول يرجعه لوري بايده السليمه ومش متخيل اللي حصل لسه
وليد: جميله .. ارجوكي اتكلمي
جميله بعياط: مكنش المفروض تطلقها
وليد: انا الخطوه دي اتأخرت فيها قوي .. انا بحبك انتي وبس ومش عايز غيرك في بيتي
جميله: انت مستوعب اللي عملته ده هيعمل ايه دلوقتي ؟ ست نبيله وشريف بيه و
وليد: ما يهمنيش حد .. انا اقدر اقف في وش الكل المهم انتي تبقي كويسه .. انتي مراتي وده ابسط حقوقك
جميله: وانا متنازله عن حقوقي في سبيل مصلحتك ومصلحه عيلتك ..

وليد: وانا مش متنازل يا جميله
جميله: ايدك خلاص بس لازم تروح لدكتور لان ممكن تحتاج لخياطه بعد اذنك
قامت وقفت وهو وقف وراها ويدوب مشيت خطوتين وقفت وبصتله
جميله: وليد
ووقعت من طولها وهو لحقها وشالها وبينادي علي ندي اخته اللي طلعت تجري
ندي: في ايه مالها ؟

وليد: معرفش يا ندي وقعت مره واحده
ندي: نطلب دكتور ولا ايه ؟
وليد: هاخدها المستشفي تعالي بس نفوقها الاول
ندي: هجيبلك برفان ..انا اتصلت بماما علي فكره وزمانها علي وصول ..
وليد مردش بس بيحاول يفوق جميله وفعلا بدأت تفوق وبتبص حواليها
وليد: جميله انتي كويسه ؟ ردي عليا !

حاولت تتعدل بس منعها: خليكي مرتاحه علشان ماتدوخيش تاني .. حاسه بإيه ؟
بتبص حواليها بتوهان وكأنها ناسيه هيا فين ؟ وعنيها وقعت علي شعرها المقصوص في الارض ووليد اخد باله انها بتبصله فحاول يلهيها بس ما عرفش يعمل ايه ؟ وهيا بدئت تعيط وبتهدد بالانهيار...

وليد: انا اسف حبيبتي، علشان خاطري ما تعيطيش ( كان ضاممها في حضنه وبيحاول يسكتها بس هيا خلاص فتحت في العياط )
دخلت نبيله تجري: في ايه هنا ؟
بنظره للاوضه فهمت ايه اللي بيحصل واتفاجئت بشعر جميله علي الارض وهيا كمان معرفتش ساعتها تتكلم
نبيله: وليد ! ايه اللي حصل ! ندي بتقول انك طلقت ميس ؟

وليد بصلها للحظه بصدمه بس ما ردش ومره واحده شال جميله وعدي مامته واخته واخدها اوضتها ( الاوضه اللي شهدت اول لقاء بينهم وشهدت ميلاد حبهم )
وليد: طيب هتفضلي كتير ما ترديش عليا ؟ طيب علي الاقل طمنيني عليكي ؟ اخدك لدكتور ؟
هنا جميله مسحت دموعها وبصتله: انا كويسه .. اللي انا فيه مش محتاج لدكاتره
وليد: عارف بس برضه انتي اغمي عليكي .. عايز اطمن عليكي !

جميله: انا كويسه ما تقلقش عليا
دورت وشها بعيد عنه وهو رجعه تاني ليه وخلاها تواجه: بصيلي .. اتكلمي .. عايزه تصرخي فيا صرخي؟ عايزه تتخانقي معايا اتخانقي؟ اللي انتي عيزاه اعمليه بس ما تسكتيش كده !
جميله: انا مش عايزه اعمل اي حاجه انا بس عايزه افضل لوحدي.

وليد: ماهو انتي لوحدك اهو لان انا وانتي واحد .. وانا مش ناوي ولا اسيبك ولا ابعد عنك ومن هنا ورايح انتي وبس مراتي وحبيبتي وكل دنيتي
جميله ابتسمت بوجع: وانت متخيل ان حد هيسمحلك بده ؟
وليد: ما يهمنيش حد .. او معدش هيهمني حد واللي له عندي حاجه ياخدها
جميله: والدتك مش هتسمحلك .. حماك .. اعمامك .. اولاد اعمامك .. مجتمعك .. للاسف انت مش هتقدر تواجه كل ده ..
وليد: انتي ليه مش واثقه فيا اني اقدر اقف في وش الكل ؟

جميله: انا طبعا واثقه فيك بس خايفه من وقوفك في وشهم يكلفني حاجه مقدرش عليها ..
وليد: تعالي نبعد عن الكل .. نروح بلدكم .. ناخد بيت صغير ونعيش فيه انا وانتي واخوكي ايه رأيك ؟
جميله: انا بحبك قوي .. فوق ما تتخيل وياريت نقدر نعمل كده ؟ بس ده حلم وانت عارف ده كويس.. ودلوقتي لازم تصحي من الحلم ده وتقوم تقف وتروح شغلك وتشوف هتعمل ايه مع ميس لان حاليا اخر حاجه انت محتاجها ان هيا وابوها كمان يبقوا ضدك .. خطوتك دي غلط وغلط قوي كمان..

وليد: غلط ؟ غلط يا جميله ؟ انا كنت مدفون بالحيا معاها ؟ عمري كان بيضيع من غير ما احس ؟ انا محستش اني عايش غير بعد ما انتي دخلتي حياتي وجايه انتي دلوقتي تقوليلي ان خطوتي دي غلط ؟ الغلط الوحيد فيها انها جت متأخر قوي .. بس كل شيء بمعاد واوان .. طلاقي لميس الحاجه الصح الوحيده اللي عملتها من فتره طويله ..

جميله: ميس لمجرد انها غارت شوف عملت ايه ومستعده لايه فما بالك لما تطلقها ؟
وليد: حبيبتي .. ممكن ترتاحي وما تشغليش نفسك بمشاكلي الكتير قوي دي وانا بإذن الله هظبط كل حاجه .. ما تقلقيش انتي ..
حاولت تتكلم بس منعها وخلاها ترتاح .. اخدها في حضنه زي العيل الصغير وفضل جنبها لحد ما راحت في النوم .. فضل يبصلها واتجرأ ومد ايده علي شعرها المقصوص واتملكه غيظ وكره لميس وحس انه لو شافها حاليا مش هيسيب رقبتها غير لما تموت بين ايديه !

خرج والغيظ ماليه مش عارف رايح فين بس عايز حد يفضي فيه غله ...
نبيله: تعال يا وليد اقعد
وليد: لا مش هقعد بعد اذنك
نبيله: اقعد يا وليد نتكلم الاول وتهدي كده علشان نفكر هنعمل ايه في المصيبه دي
وليد: المصيبه دي ؟ يا تري ايه المصيبه بالنسبالك ؟ طلاقي لميس ؟ ولا اللي حصل لجميله ؟

نبيله: اللي حصل لجميله شيء لا يطاق وصعب جدا بس الستات كل يوم بيقصوا شعرهم بالعكس ده موضه حتي و
قاطعها وليد: تقصه بمزاجها اه !تولع فيه براحتها اه !لكن غصب عنها وبالشكل ده لأ والف لأ .. وبعدين انا مش عارف كنت متوقع منك ايه ؟ بس ده الطبيعي بتاعك بتهتمي بحاجات ملهاش قيمه يا ماما وبتنسي المهم.

نبيله: حبيبي انا عارفه ايه المهم وايه الاهم .. جميله مهمه بالنسبالك اوكي عرفنا .. لكن حاليا ميس كمان مهمه وما ينفعش هيا كمان تبقي في صف الاعداء
وليد: امي .. امي وقفي .. مهما تقولي مش هتغيري من حقيقة اللي حصل .. طلقت ميس وانتهي الموضوع لهنا وبس
نبيله: طيب ماشي .. مش هتكلم عن ميس .. مش هتكلم عن ابوها .. هتكلم عن جميله .. حبيبتك جميله
وليد: مالها جميله ؟

نبيله: اولا هيا بقالها كام يوم مش مظبوطه .. بتتعب بسرعه .. اكلها قليل .. بتدوخ .. واللي عرفته انها اغمي عليها من شويه
وليد: قصدك ايه ؟ عايزه تقولي ايه ؟
نبيله: اقول انها احتمال كبير قوي تكون حامل
وليد قلبه دق بسرعه: حامل !

ابتسم ونبيله لاحظت ابتسامته دي: اه حامل بس هل انت حاليا مستعد للحمل ده ؟
وليد: مستعد ازاي يعني ؟ المفروض استعدله ازاي ؟ وبعدين هو انا اتجوزت جميله ليه اصلا من الاول ؟
نبيله: الظاهر يا وليد انك ذكي في امور الشغل وبس لكن في الحب والعواطف ..
وليد: انتي عايزه توصلي لايه ؟ بطلي الالغاز بقي.

نبيله: حاضر هبطل هتكلم بوضوح .. انت اتجوزت جميله علي اساس انها لما تخلف البيبي هيبقي ابن ميس وانت .. الكل ممكن يعارض او يرفض او حتي يطعنوا في نسبه وبتحليل صغير لل DNA هيعرفوا انه ابنك صح
وليد: والوضع ده ما اتغيرش .. هيفضل ابني
نبيله: بس مش ميس مامته
وليد بنرفزه: تفرق في ايه ؟

نبيله: ميس ليها وضعها وابوها راجل له تقله في السوق وله وضعه ومحدش يقدر يلمس بنته لكن جميله ؟
وليد: مالها بقي ؟
نبيله: ملهاش ديه يا وليد .. سهل الاستغناء عنها هيا واللي في بطنها .. بمجرد ما علاقتك بجميله هتتكشف ولو اتعرف انها حامل هتكون حفرت قبرها بايدك يا وليد ..
وليد: انا اقدر احمي مراتي.

نبيله: مش وكل الجبهات مفتوحه حواليك وكل اللي حواليك اعداء حتي حليفك هيتقلب ضدك .. ما ينفعش حبيبي الواحد يحارب في كل الجبهات .. ايوه انت قوي وتقدر تقف في وشهم بس دي مخاطره هل انت بقي مستعد تتحمل نتيجه المخاطره دي لانك لو خسرت هتخسرها هيا واللي في بطنها ؟
وليد سكت: والمفروض اعمل ايه ؟ اخلي مراتي علي طول خدامه .. وارضي بالذل والاهانه ليها ؟

نبيله: محدش قال كده
وليد: هو ده اللي انتي بتقوليه ان جميله تفضل في الظلمه
نبيله: فتره مؤقته لحد بس ما نقف علي ارض صلبه .. حبيبي انا حاسه بالنار اللي جواك بس ارجوك حكم عقلك مش عواطفك دلوقتي
وليد: يا ريتني زيك .. معنديش مشاعر ولا احاسيس .. انا في نار جوايا انتي مش حاسه بيها.

نبيله: والله حاسه بيك يا حبيبي بس خايفه عليك اكتر .. وخايفه علي جميله كمان .. حبيبي جميله ما دخلتش قلبك انت بس .. حنيتها وطيبتها زي البلسم اللي بيشفي اي حاجه يلمسها ... استحمل معلش شويه
وليد: بعد اذنك يا امي انا لازم اخرج
سابها ومشي وهيا مرضيتش تضغط عليه اكتر من كده ...

ميس وصلت بيتها منهاره من العياط ولحقت ابوها كان رايح الشركه واول ما شافها اتفاجئ بمنظرها
شريف: في ايه ؟ ايه اللي حصل ؟
ميس: وليد طلقني يا بابا، وليد طلقني
عيطت كتير وابوها سندها ودخلها لجوه وبيحاول يهديها وهيا مش بتهدي ابدا بس بتعيط.

ميس: وليد طلقني علشان الجربوعه اللي عنده .. انا يطلقني علشانها .. انا يا بابا يطلقني .. اقسم بالله هقتلها .. هقتلها
شريف مش عارف يهديها واخيرا اتصل بدكتور وجه وعطالها مهدئ علشان تنام وفعلا نامت وابوها فضل جنبها ...
جميله فاقت ونزلت من اوضتها كانت نبيله قاعده ونادت عليها
نبيله: عامله ايه دلوقتي ؟
جميله: انا كويسه يا هانم.

نبيله: ما تزعليش يا جميله علي شعرك .. عارفه انه حاجه صعبه بس انتي اقوي من كده .. انا عارفه انك قويه جواكي ..
جميله: مين قال ان انا قويه ؟ انا الدنيا بتشيلني وتحطني زي ما هيا عايزه ..
نبيله:اللي تتحمل علشان تربي اخوها تبقي قويه ! اللي توافق تدخل عش دبابير تبقي قويه ! اللي تقدر تزرع الحب في قلب راجل مكانش عايزها اصلا تبقي قويه .. انتي اقوي من ما تتخيلي.

جميله: ما علينا يا هانم المهم حضرتك عايزه مني حاجه ؟
نبيله: عايزاكي تقفي جنب وليد .. اقنعيه بالصح يا جميله .. عارفه انه طلب صعب بس صدقيني انا خايفه عليه وعليكي وهو مش هيقدر يحارب الكل
جميله: من غير ما تقولي يا هانم انا قلتله الكلام ده ..
نبيله: عارفه انك بتحبيه وهتقفي جنبه مهما يحصل .. المهم انا عايزه اخدك ونروح لدكتوره تكشفي
جميله: انا كويسه يا هانم
نبيله: انتي دبلانه حتي قبل اللي حصل النهارده وبصراحه انا عايزه اتأكد من حاجه
جميله: من ايه ؟

نبيله: انتي حامل يا جميله صح ؟
جميله بصتلها كتير وما ردتش عليها
نبيله: مقولتيش ليه ؟
جميله: لان حملي معناه كتير قوي .. معناه ان العد التنازلي بدأ وايامي مع وليد بيه بقت معدوده .. فازاي اقول ؟

نبيله: وليد بيحبك وده هيقلب كل الموازين .. انا مش عارفه ايه اللي ممكن يحصل بس اعتقد انه عمره ما هيتخلي عن وجودك في حياته .. المهم احنا لازم نتأكد
اخدتها وراحوا لعياده صغيره في مكان عادي
نبيله: العياده في مكان عادي بس علشان محدش يعرفنا .. ماشي
جميله: مفيش مشكله
دخلوا وعملت تحاليل والدكتوره كشفت عليها
الدكتوره: هو حضرتك والدتها ؟

نبيله اترددت: لا حماتها
جميله اتفاجئت بالكلمه دي لان عمرها ما تخيلت ان نبيله بتعتبرها مرات ابنها او بتعتبرها اي شيء اكتر من كونها خدامه ...
الدكتوره: مبروك مرات ابنك حامل ..
نبيله فرحت من جواها: هيا دبلانه وبيغمي عليها
الدكتوره: عندها انيميا ونقص في الحديد وضعيفه جدا لازم يغمي عليها .. هنهتم باكلها جدا وهكتبلها فيتامين للحمل .. وطبعا هنرتاح وبلاش اي اجهاد
نبيله: هيا حامل في قد ايه بالظبط ؟

الدكتوره: السونار بيقول سبع اسابيع وكام يوم يعني تقريبا شهرين ..
مشيوا من عند الدكتوره الاتنين ساكتين ... وصلوا البيت كان وليد خارج واول ما شافهم انفجر فيهم
وليد: انتو ازاي تخرجوا من غير ما تعرفوني ؟ انتوا متخيلين كميه الافكار السودا اللي جت في دماغي ؟
نبيله: اسفه حبيبي بس اخدتها للدكتوره اطمن عليها
وليد اختفي الغضب تماما وحل مكانه قلق وخوف: وقالتلك ايه ؟ فيها ايه ؟ وهيا مسهمه كده ليه ؟

نبيله: زي ما قلتلك .. جميله حامل في شهرين تقريبا
وليد بص لجميله ومعرفش ينطق او يتكلم ...
وليد: انتي ساكته ليه ؟
جميله: معنديش حاجه اقولها
وليد: طيب ادخلوا .. تعالوا جوه
دخلوه وجميله: ممكن اطلع اوضتي ارتاح ؟

وليد: براحتك طبعا
طلعت بسرعه وسابتهم
وليد: هيا مالها ؟
نبيله: اللي حصل النهارده كان كتير .. هتعمل ايه؟ انت لازم ترد ميس
وليد: يخربيت ميس وسنينها يا امي .. احنا في ايه ولا في ايه ؟
نبيله: لازم ميس ترجع ولازم تكون مراتك لما البيبي ده يتولد
وليد: مش هعمل اللي في دماغك ده ابدا .. ابني انا وجميله هيفضل ابني انا وهيا
نبيله: يا حبيبي فكر.

قاطعها: بعقلي .. ماهو انا بفكر بعقلي .، ميس ما تنفعش ام هيا اصلا معرفتش تكون زوجه فازاي متخيله انها تكون ام لابن هيا بتكره امه اصلا وبتتمني تنتقم منها ؟ دي قصتلها شعرها لمجرد انها غارت علشان بس شعرها اتفرد قدامها .. متخيله تعمل ايه في عيل مش ابنها لو حب امه الحقيقيه اكتر منها ؟ فوقي يا امي ؟
نبيله: مش هيحصل لانه هيفتكر ميس امه الحقيقيه.

وليد وقف: انتي بتقولي ايه ؟ الجنون ده مش هيحصل واياك السما تنطبق علي الارض العيل اللي في بطن جميله مش هيكون له ام الا جميله نفسها ...
اتفاجؤا الاتنين بشريف واقف وسامعهم
شريف: وعلشان كده بقي طلقت بنتي ؟
الاتنين بصوله واتفاجؤا بيه
ندي: انا اسفه بس كنت في الجنينه وداخله واتقابلنا ؟

وليد: اتفضل يا عمي
شريف: اتفضل ايه بقي ! مراتك بقت حامل وبنتي معدلهاش لازمه ولا مكان فرميتها .. مش ده اللي حصل ؟
وليد: لا طبعا مش ده اللي حصل ...بنتك اللي وصلتنا للحاله دي .. ده نتيجه لتصرفاتها مش اكتر
شريف: وايه هيا تصرفاتها ؟ غيرتها وحبها ليك ؟ بتعاقبها علي حبها يا وليد ولا بتعاقبها علي عدم خلفتها ؟

وليد: عدم خلفتها ؟ لا يا شريف بيه ما اسمحلكش تلعب بالورقه دي ابدا .. انا طول عمري بحب بنتك ومخلص لها جدا وعمري ما ضايقتها او زعلتها وانت عارف ده كويس .. ولما اكتشفنا موضوع عدم الخلفه ولا فرق معايا ولا عمر حد في البيت ده وجهلها كلمه تهينها او توجعها
شريف: انت متجوز غيرها يا وليد.

وليد: ومين اللي جابلي العروسه دي ؟ ومين اللي فضل يقنعني اتجوزها ؟ انت نفسك قعدت قد ايه تقنعني ! محسسني اني روحت اتجوزت من وراكم .. ده انا الوحيد اللي كنت رافض الفكره دي ولا نسيت يا شريف بيه !؟
شريف: لا ما نسيتش يا وليد .. بس ما اتفقناش ابدا انك تحبها وتفضلها عن مراتك.

وليد: اه حبتها مش هنكر ده لكن ما فضلتهاش ابدا بالعكس انا ديما باجي عليها .. انا ابسط حقوقها مش بديهالها .. كفايه قوي انها تعتبر خدامه في بيتي مش زوجه
شريف: ده كان اتفاقنا .. وانت اخليت بيه
وليد: انا ما اخليتش بحاجه .. علي الاقل لحد النهارده .. ميس تصرفاتها هيا اللي وصلتها للي حصل النهارده .. تصرفاتها هيا وبس
شريف: افهم من كده ايه ؟ انت ناوي علي ايه يا وليد !

نبيله اتدخلت: مش ناوي علي اي حاجه .. الكل اعصابه تعبانه نسيبهم بس الاتنين يهدوا وكل واحد فيهم يستوعب اللي حصل وبعدها نتكلم
شريف: انتي عاجبك طلاقه لبنتي ؟
نبيله: عمر ما الطلاق بيعجب حد بس فعلا المره دي ميس زودتها قوي
شريف: انا عايز افهم هيا عملت ايه ؟ايه اللي عملته يستاهل ان وليد يطلقها ويرميها بره البيت
وليد انفجر: سيادتها اتضايقت من جميله لمجرد انها قلعت طرحتها مره
شريف مش مستوعب: يعني ايه قلعت طرحتها ؟

وليد شده من ايده واخده علي فوق وهو مش فاهم حاجه بس ماشي وراه لحد ما دخله اوضه بنته
وليد: اتفرج بنفسك
شريف: ايه ده ؟
وليد: ده شعر جميله .. بنتك قصتهولها .. كتفتها وقصتهولها لمجرد انه طويل
شريف مش مصدق: ميس ما تعملش كده .. ميس مش همجيه ولا بربريه بالشكل ده ابدا.

وليد: بتبلي عليها انا صح ؟ لعلمك دي مش اول مره تعمل حاجات همجيه كده لجميله .. بتعاملها بطريقه غير ادميه بالمره وكأنها عبده اشترتها .. بلاش جميله خالص ( مد ايده المتعوره ) عارف ايه دي ؟ دي وانا بمسك المقص من ايد بنتك وهيا بتحاول تموت جميله ! انت متخيل هيا وصلت لحد فين ؟ انا اخدت يجي عشر غرز فيها ..كل ده خلاني اشوف جانب في ميس صراحه مش قادر اتحمله.. وبصراحه عملة النهارده جابت اخرها معايا .. انا مش هقدر استحمل تصرفاتها وجنانها اكتر من كده ... دي مش ميس اللي اتجوزتها ابدا ومفيش قدامي حل غير ده.

شريف سكت شويه: علي العموم انا اسف علي تصرفات بنتي بس الغيره تعمل اكتر من كده وانا مش ببررلها تصرفها بالعكس .. بس زي ما قالت والدتك نهدي وندرس الامور .. انا همشي دلوقتي ونتقابل بعدين ..
شريف مشي لانه مش عارف يبرر تصرف بنته وروح علي بيته كانت ميس فايقه
ميس: روحتله ؟ صح ؟ قالك ايه ؟ ندم ؟

شريف انفجر فيها: ندم ايه ؟ علي همجيتك ؟ ايه اللي انتي عملتيه ده ؟ في حد عاقل يعمل كده ؟ده لو بيعشقك مش هيخليكي في بيته
ميس: انت بتقول ايه ؟ انا كان المفروض قتلتها مش بس قصتلها شعرها
شريف: بطلي هبل بقي .. فوقي لنفسك .. قولتلك تهورك وغباءك هيخلوكي تخسري ما صدقتينيش.

ميس: انا مش هخسر حاجه وليد بيحبني وما يقدرش يستغني عني هو بس الشهامه اخدته
شريف: مش بقولك غبيه وهبله.. وليد استغني عنك خلاص مش لسه هيستغني واحب اطمنك واقولك ان مراته جميله اللي انتي مش طايقاها دي حامل وهتجيبله ولي العهد وللاسف انتي طلعتي بره اللعبه بغبائك يا ميس...

قصص و روايات - قصص رائعة :
رواية جميلة الجزء الأول للكاتبة الشيماء محمد الفصل الثاني عشر

رواية جميلة الجزء الأول للكاتبة الشيماء محمد كاملة

رواية جميلة الجزء الأول للكاتبة الشيماء محمد الفصل الثاني عشر

ميس: انا مش هخسر حاجه وليد بيحبني وما يقدرش يستغني عني هو بس الشهامه اخدته
شريف: مش بقولك غبيه وهبله.. وليد استغني عنك خلاص مش لسه هيستغني واحب اطمنك واقولك ان مراته جميله اللي انتي مش طايقاها دي حامل وهتجيبله ولي العهد وللاسف انتي طلعتي بره اللعبه بغبائك يا ميس
ميس: ايه ؟ جميله حامل ؟ مين قالك ؟

شريف: هما قالولي ... وانتي حاليا مالكيش اي قيمه عندهم وبغبائك خسرتي الكل ..
ميس: انا بإشاره مني وليد هيرجع .. وليد بيحبني
شريف: اضحكي علي نفسك اضحكي .. حب ايه اللي بتتكلمي عنه ده ؟ هاه ؟ وبعدين هيحبك ازاي وانتي اتحولتي لانسانه شريره .. ده انتي فتحتيلو ايده وخلتيه اخد فيها يجي عشر غرز
ميس: انا مكنتش اقصده.

شريف: امال ايه ؟ كنتي عايزه تموتي جميله ؟ وتبقي قتاله قتله؟ انتي غبيه ولا انتي جرالك ايه ؟ ما تفوقي بقي ؟ انتي خسرتي وليد خلاص وما اعتقدش انه هيرجعك تاني
ميس: لا طبعا وهتشوف
شريف: والله انا شايف كويس الدور والباقي عليكي انتي تفتحي عنيكي .. الولد ده لو اتولد واتكتب باسم جميله هتبقي خسرتي كل حاجه بجد عقلك في راسك بقي...
سابها وخرج وهيا قامت ونزلت علي الشركه بسرعه..

وليد طلع لجميله اللي كانت في سريرها
وليد: جميله ! صاحيه !
جميله اتعدلت وجت تقوم بس هو بسرعه قرب وقعد جنبها: خليكي مرتاحه
كانت ساكته وباصه للارض وليد رفعلها وشها تبصله: جميله كلميني
جميله: اقولك ايه ! معنديش حاجه اقولها
وليد: مش فرحانه باللي في بطنك !

جميله: فرحانه ! افرح ان مهمتي قربت تخلص وخلاص همشي من هنا من غير ابني ومن غير ...( سكتت ومكملتش)
وليد: من غير ايه تاني ! ما تسكتيش
جميله: من غير قلبي ..
وليد بابتسامه: انا قلبك !
جميله بصتله بوجع: انت مش عارف ده!

وليدضمها لقلبه: عارف يا روح روحي .. جميله انتي ازاي متخيله اني ممكن استغني عنك ؟ او ممكن ابعدك عن ابنك هاه ! انتي ازاي فكرتي كده ! جميله انتي جواكي حته مني ومنك .. ابننا انا وانتي وبس ومحدش له اي حق فيه غير انا وانتي وبس
جميله ابتسمت بدموع: الكلام جميل قوي يا سي وليد ..
وليد: ده مش كلام يا جميلة حياتي
جميله: وميس وابوها واعمامك والشركه ووالدتك واختك ومليون حاجه تانيه .. كل دول ايه هتتجاهلهم .. هتنسي كل الالتزمات اللي وراك !

وليد قام وقف: جميله مش عايز افكر في كل ده دلوقتي
جميله: امال عايز ايه ؟
وليد: نفرح انا وانتي بابننا اللي جواكي
جميله ابتسمت ووقفت وراه ضمته وسندت علي ظهره بحب: تعال نفرح
دموعها نزلت بصمت وهو شدها ومضها ووقفوا الاتنين بصمت .. محدش فيهم تجرأ يقطعه ..
ميس هتتجنن ازاي وليد قدر يطلقها اكيد اتجنن هو .. لازم ترجعه تاني لتحت ايديها فلبست وراحت علي مكتب وليد ... دخلت كان علي مكتبه وما بصلهاش نهائي
وليد: افندم .. خير ؟

ميس: انت بتتكلم كده ليه ؟ ايه خير دي ؟
وليد: عايزه ايه ؟ عندك اي طلب يخص الشغل قوليه معندكيش فاتفضلي بقي علشان مشغول
ميس: وليد .. وبعدين ؟ انا ميس حبيبتك ومراتك!
وليد: ولا حبيبتي ولا مراتي اتفضلي بقي .. كلمت المحامي هيخلص الاوراق ويبعتلك ورقتك
ميس: وليد .. انت مش هتطلقني
وليد: انتي مش واخده بالك اني خلاص طلقتك مش لسه هطلقك !

ميس: ده كلام في ساعه غضب مش اكتر
وليد: لا يا ميس ده كان طلاق ومش ناوي اردك
ميس: كل ده علشان الخدامه ؟
وليد: الخدامه دي مراتي فاهمه ولا لأ ؟ ومش هسمح لاي حد يغلط فيها نهائي .. وكفايه اني اتأخرت قوي علي الخطوه دي
ميس: انت بتقول ايه ؟

وليد: بقول ان جميله مراتي ومش هسمح لحد يضايقها نهائي .. اتفضلي بقي علشان عندي شغل
ميس: انا وبس اللي مراتك
وليد: حاليا انتي شريكه معايا في الشغل ولا اكتر ولا اقل يالا بقي شوفي وراكي ايه ! اتفضلي ..
ميس طلعت مش مصدقه جريت علي مكتب ابوها
شريف: ايه ؟ صدقتي ؟

ميس: وليد مش عايزني يا بابا
شريف: امال انا بقولك ايه !
ميس: بابا انا ما ينفعش اخسره .. قولي اعمل ايه ! بابا اتصرف
شريف: دلوقتي اتصرف ؟ ما انا ياما نصحتك وما سمعتيليش .. كل ما كنتي بتيجي علي جميله كل ماهيا بتصعب عليه وبتقربيها منه
ميس: ما تجيبش سيرتها.

شريف: لا انا مش بس هجيب سيرتها ده انا هقولك ان حاليا هيا اللي مراته وانتي هتضطري ورجلك فوق رقبتك تقبليها ضره ليكي
ميس: انت بتقول ايه ؟
شريف: ده مش بس كده لا دي هيا هتكون الاساس وانتي لو وحطي مليون خط تحت لو دي .. لو وليد قبل يردك هتقبلي ان هيا تكون مراته وانتي حاجه جانبيه هيقبلك من باب الادب مش اكتر واحتراما ليا
ميس: انا استحاله اقبل بالوضع ده.

شريف: يبقي خلاص هو وطلقك وهيا الهانم وهيا ام ولي العهد واللي في بطنها هياخد المجموعه كلها وهتبقي برضه هيا فوقك
ميس: انت عايز تجنني
شريف: انا بفهمك ايه اللي هيحصل
ميس: يعني في كل الاحوال عايزني اوطي راسي ليها صح ؟
شريف: لحد ما تولد والبيبي يتكتب باسمك وساعتها ارميها بره البيت حتي او وليد ياخدلها شقه بره او يبعدها عنك
ميس: وايه اللي هيخليه يكتبه باسمي ؟ وايه اللي هيخليه يرميها ولا يطلعها ؟

شريف: اعمامه مش هيسيبوه في حاله يا ميس ومش بعيد يخلصوا منه او من ابنه وساعتها لازم تكوني انتي جوه اللعبه مش براها افهمي .. وليد كزوج وكحبيب انتي خلاص خسرتيه وده امر مفروغ منه.اكسبي حقك بقي
ميس: والبيبي هيكتبه ازاي باسمي.

شريف: بمزاجه ! غصب عنه ! المهم هيتكتب باسمك انتي .. وبعدين في نقطه مهمه قوي .. انتي ليكي وضعك وابنك اللي هيقربله هيتردد علشانك لكن ابن جميله مالوش ديه .. دي خدامه .. فهو من مصلحته ان البيبي يتكتب باسمك اصلا .. العبي معايا ومش هتخسري صدقيني .. تعالي بس علي نفسك شويه
ميس: انا مش هقدر اسفه .. مش هقدر يا بابا
شريف: فكري وقرري علي مهلك.

بالليل وليد روح بيته تعبان مهدود مش قادر .. اتغدي هو ومامته وجميله كانت في اوضتها واخيرا طلعلها اوضتها كانت راقده في السرير واول ما دخل وقفت تستقبله.. ابتسم لها ودخل مسك ايديها الاتنين وشدها عليه يضمها لحضنه.. شدت ايديها من ايديه و لفتهم حوالين رقبته..
وليد: ياااه متتخيليش انا مستني اللحظه دي من امتي ؟

جميله: وما تتخيليش انا فرحتي بدخلتك عليا قد ايه بس يا سي وليد
حط ايده علي بوقها منعها تكمل
وليد: من هنا ورايح اسمي وليد وبس ..
جميله: لا يا سي وليد
وليد: اسمي وليد وبس .. علي الاقل واحنا لوحدنا يا جميله .. قولي اسمي يالا ... قولي وليد وبس
جميله بحرج: وليد ...

وليد رفعلها وشها لفوق: ارفعي راسك انتي مرات وليد نصار ومن هنا ورايح انتي مراتي وبس فاهمه ؟ والكل هيعاملك علي الاساس ده ...
جميله: انت كده غلط يا وليد ... فكر في اللي حواليك
وليد: بقولك ايه سيبك من اللي حوالينا .. اللي له عندنا حاجه يجي ياخدها .. انتي مراتي وام ابني اللي جواكي .. وده المهم ..
جميله: انا خايفه قوي
وليد: خايفه من ايه ؟

جميله: خايفه عليك وعليه خايفه من الايام الجايه يا وليد قوي
وليد: ما تخافيش طول ما انا وانتي مع بعض ما تخافيش
جميله: وميس وابوها هيعملوا ايه ؟ هيبقوا اعدائك هما كمان ؟ انا مش عيزاك تزود العداوه حواليك
وليد: ممكن ما تقلقيش ! انا هتصرف المهم النهارده ليله مميزه .. خليها انتي كمان مميزه .. النهارده انتي جواكي حته مني .. انتي حامل في ابننا ... انتي النهارده انتي وبس اللي مراتي وانا جوزك انتي وبس تعالي نعيش.

حاولت تتكلم بس منعها بشفايفه تتكلم وشالها برقه وحطها علي السرير
وليد: نفسك في ايه ؟
جميله: فيك انت
وليد: غيره عايزه ايه ؟
جميله:برضه انت
وليد: حاليا انا بسألك عن حاجه نفسك فيها احققهالك.

جميله: حبيبي انت املي في الحياه دي .. طول ما انت في حضني كده بتبقي الدنيا كلها بين ايديا لا يمكن ابدا اعوز حاجه معاك .. انت كفايا
وليد معرفش يجاوبها بالكلام فبيجاوبها بالفعل ...
فضل كتير معاها في حضنها
قعدت جميله في حضن وليد تتكلم وهو بيسمعها
وليد: اقولك علي حاجه ؟
جميله: قول يا حبيبي
وليد: شكلك كده احلي بكتير
جميله: شكلي كده ازاي ؟

وليد: شعرك القصير احلي ... حابب شكله كده انا حابه كده اكتر
جميله: لو كنت قلتلي كنت قصتهولك
وليد: لا طبعا انتي كنتي بتحبيه طويل ..
جميله: كل شيء بأوان ...
الصبح صحي علي خبط علي الباب فجميله صحيت
جميله: وليد حد بيخبط .. اصحي
وليد: سيبيه يخبط ونامي
جميله: وليييد !

وليد: يووووه جميله .. حاضر هقوم
قام بعنين مقفوله اصلا فتح الباب وكانت مامته
وليد: خير يا امي ! في ايه ؟
نبيله: حماك ومراتك تحت عايزينك
وليد فتح عنيه: مراتي في حضني معنديش غيرها
نبيله: بقولك ايه فتح عنيك كده وفوق وقوم انزل للناس تحت نشوف هنعمل ايه ؟

يدوب هيعترض بس نبيله منعته: انجز وانزل بعد اذنك
دخل وليد وقعد علي السرير بيفكر وجميله اتعدلت وبصتله: انزلهم ورد مراتك ده الصح
وليد: لا مش ده الصح ده الغلط بعينه .. الغلط ان الواحد يعمل اعتبارات لحاجات ملهاش اي اهميه ويهمل الحاجات المهمه بجد في حياته .. امبارح كانت تقريبا اجمل ليله في عمري كله عايزاني انهي ده علشان ايه ؟ الشركه ؟ الفلوس ؟ ايه المهم ؟ سعادتي هيا هنا في حضنك انتي الباقي كله تحصيل حاصل.

جميله ضمته وهيا وراه: حبيبي الكلام ده لو انت مسؤل عن نفسك بس لكن انت في رقبتك ناس كتير قوي .. اولهم امك واختك وغيرهم شوف انت كام بيت مفتوح بسببك .. ما ينفعش تفكر كده
وليد: تعبت يا جميله .. عايز اعيش بقي
جميله: انا هفضل علي طول جنبك مش هتخسرني ابدا .. فقوم واقف وواجه الكل وما تحاولش تخسر حلفاءك حبيبي ..
وليد: هو انتي ليه عاقله قوي كده ؟ ليه مش انانيه في حبك ؟

جميله: علشان بحبك قوي وخايفه لو بقيت انانيه في حبي انت تتأذي .. مش عايزاك تقف في وش الكل وعايزه حد جنبك حتي لو الحد ده هيشاركني فيك .. وجودك في حد ذاته كفايه
وليد ضمها قوي لحضنه: انتي ما تتخيليش انا بحبك قد ايه ؟ انا مش عارف اصلا انا كنت عايش ازاي قبلك ! اصلا انا مكنتش عايش
جميله: طيب قوم انزل وحاول تهدي الامور.

فعلا وليد اخد شاور سريع ولبس ونزل لحماه وميس وامه كمان وكلهم مترقبين ...
وليد: يا اهلا يا عمي .. ميس ازيك
ميس: ازيك انت حبيبي
وليد ما ردش عليها وقعد بهدوء ومستني حماه يتكلم في المفيد
شريف: من غير مقدمات ولا لف ولا دوران يا وليد ميس جايه معايا علشان تردها وترجعوا لبعض انتو متستغنوش عن بعض ابدا.

وليد: مع احترامي ليك ولوجودك في بيتي يا عمي بس ميس دي اللي قدامي انا معرفهاش دي انسانه غريبه جدا عني ومعنديش استعداد ارجعلها تاني
نبيله: وليد الامور تتاخد بهداوه دي رجعالك اهو بنفسها
وليد: انا هادي يا امي وبتكلم بمنتهي الهداوه
شريف: طيب يا ابني هيا عرفت انها زودتها قوي وراجعه اهو وهتتغير
وليد: هتتغير ازاي ؟ اسمع منها.

ميس: وليد انا بحبك وانا اسفه اني اتهورت بالشكل ده وعورتك
وليد: عورتيني ؟ ده كان شيء جانبي ومش مهم بالنسبالي ومش ده اللي عايز اسمعه منك
ميس: امال انت عايز ايه ؟ اي ان كان اللي انت عايزو هنفذه
وليد: اوك يا ميس ... انتي غلطتي في حق جميله وهتعتذريلها و
قاطعته: ده لا يمكن ابدا اعتذر لخدامتي
وقف وليد: اعتقد يا عمي الكلام منتهي اصلا وده مجرد تضيع وقت مش اكتر
شريف: ميس احنا قلنا ايه ؟! هتعتذر لجميله انها قصتلها شعرها صح يا ميس ؟

ميس واقفه متغاظه جدا: حاضر
وليد: مش ده بس
ميس: سيادتك عايز ايه تاني ؟
وليد: جميله مراتي وهتفضل مراتي وانسي تماما فكره انها خدامتك .. جميله في البيت ده زيها زيك بالظبط الروس اتساوت يا ميس
ميس يدوب هتنطق بس شريف اللي اتكلم
شريف: حقك .. جميله مراتك بس اكيد طبعا هتفضل في السر زي ما هيا صح ؟
نبيله: طبعا وخصوصا دلوقتي مع حملها
وليد: قصدك ايه بحملها ؟

نبيله: قصدي انك حاليا هترد مراتك وتاخدها وتسافروا اسبوعين تلاته ولا حتي شهر وترجعوا تعلنوا ان ميس حامل وانكم عملتوا طفل انانبيب
وليد: نعم ؟ انتي متخيله اني هنفذ اتفاقنا القديم ؟ جميله مراتي وهيا اللي هتبقي ام ابني
شريف: ولو قتلوهالك هيا واللي في بطنها؟
وليد خاف: مش هيحصل دول اعمامي مش قتالين قتله.

شريف: بجد انت شايف كده ؟ امال مين اللي حاول يقتلك انت نفسك السنه اللي فاتت ؟ مين قطعلك فرامل العربيه ؟ ده اللي عملوا معاك فما بالك بحتت بنت لاراحت ولا جت ولا ليها دية اصلا ؟ فكر بعقلك يا وليد المصلحه واحده ...
وليد: المصلحه واحده ؟ وانت مصلحتك ايه ؟

شريف: بنتي تفضل معززه مكرمه ونحافظ علي الشركه في بيتنا .. وابنك كمان هيكون محمي كويس لان انا وانت مجتمعين محدش يقدر علينا فالعيل لو امه ميس ده هيديله حصن غير لو كانت امه نكره ملهاش قيمه مع احترامي ليها ولمكانتها عندك
وليد: انا مش هاخد ابني من جميله ومش هتخلي عنها
ميس هترد بس ابوها سحبها براحه ورد هو.

شريف: محدش قال اننا هناخد حاجه من جميله .. زي ما هيا مراتك الولد ابنها وحقها محفوظ بس ده كرت امان مش اكتر وهيا وابنها معززين مكرمين اعتقد كده مالكش حجج تانيه ؟ نجيب المأذون؟
وليد: حاجه كمان .. ميس ...جميله مراتي وهتاخد حقوقها كامله انا اه هردك بس علشان خاطر المصلحه العامه زي ما ابوكي بيقول لكن الاساس هتكون جميله مش انتي واه هنسافر بس هيا كمان معانا وهتبقي فرصه اقضي معاها شهر عسل
ميس: انت بتستفزني صح ؟

وليد: انا بعرفك اللي هيحصل علشان بس ما تتفاجئيش
ميس: وماله يا وليد وماله ؟
وليد رجع ميس لعصمته من تاني وطلع لجميله بعد ما كل شيء انتهي وشريف مشي وميس طلعت اوضتها
جميله: ده الصح يا وليد ما تزعلش
وليد: المفروض انا اللي اقولك ما تزعليش مش انتي
جميله: وانا وانت ايه ؟ مش روح واحده بنحس ببعض .. انا حاسه بيك حبيبي وحاسه باللي جواك.

وليد: انا معملتش كده يا جميله الا خوفا عليكي انتي واللي في بطنك ده .. خوفا عليكم انتو الاتنين
جميله: عارفه .. عارفه يا حبيبي
وليد: انتي حاليا هتسافري لعيلتك
جميله: بجد ؟ بس اشمعني دلوقتي
وليد: مش واحشينك ؟

جميله: واحشيني جدا بس مش عايزه اسيبك في الوقت ده
وليد: مش هتسيبيني .. انتي هتسافري تشوفيهم وتطمني عليهم علشان قدام الكل انتي سافرتي لاهلك ويومين وهبعت أجيبك وهاخدك ونسافر انا وانتي نقضي شهر عسلنا
جميله: وميس ؟
وليد: ميس هتسافر برضه بس مش هتكون معانا .. قدام الكل انتي في بلدكم وانا وميس مع بعض فهمتي بقي ؟

جميله: بس مش ممكن حد يعرف ؟
وليد: هيراقبوكي وهيعرفوا انك روحتي بلدكم وهيراقبوني وهيعرفوا اني سافرت انا وميس والامور تستقر ونتقابل انا وانتي
جميله: طيب وليه المخاطره دي ؟
وليد: علشان انا عايز كده،، مش نفسك في شهر عسل في حضني؟
جميله: ايوه بس.

قاطعها: ما بسش هنقضي شهر عسلنا يا جميله انا وانتي وده ( حط ايده علي بطنها بحب ووطي باس بطنها ) روح قلبي انتو الاتنين ..
جميله: ربنا يخليك لينا حبيبي ديما وما يحرمني منك ابدا ابدا ابدا
وليد: ولا منكم انتو كمان ... مفيش قوه في الارض هتبعدنا عن بعض يا جميله .. ثقي في حبنا
جميله: يا رب يا حبيبي

شريف بعد ما مشي اتصل ببنته يطمن عليها
شريف: ايه الاخبار ؟ عامله ايه ؟
ميس: انت ازاي توافق علي كلام وليد بالشكل ده ؟ مين دي اللي راسها براسي ؟ ازاي اقبل الكلام ده ازاي يا بابا ؟
شريف: تقبليه زي الناس وعايز كمان تعاملي جميله ولا كأنها اختك اللي بتحبيها
ميس: انت بتقول ايه يا بابا انت سامع نفسك ؟

شريف: سامع يا بنتي .. اسمعي كلامي بس
ميس: واتقهر صح ؟ ازاي اسمع كلامك ؟ كرامتي ؟
شريف: وعد مني يا ميس يا حبيبتي ان العيل ده بس يتكتب باسمك وانا وحياتك انتي لادفع وليد تمن كل كلمه نطقها في حقك مش بس تصرفاته لا وليد زودها قوي اسمعي كلامي لحد ما يشرف ولي العهد وهتشوفي ابوكي هيعمل ايه ؟

ميس: هتعمل ايه يعني ؟ وليد الشريك الاساسي في المجموعه ؟ حتي لو وقفت ضده برضه هو الاساس؟
شريف: اعمامه بيخططوا يخلصوا منه انا مش عارف هما بيدبروا ايه بالظبط بس هما بيطبخوا طبخه مش حلوه وناوينله علي نيه سودا علشان كده بقولك بس العيل يتكتب باسمك هيبقي هو الوريث الاساسي وطبعا بصفتك مامته هتكوني الوصيه عليه وبجانب نصيبي انا كمان هتبقي انتي الكل في الكل والشركه تقريبا هتكون في جيبك انتي.

ميس: ولو معرفوش يعملوا لوليد حاجه ؟و فضل هو وست جميله مع بعض ؟
شريف: مش هيحصل مش هيسيبوه وكمان لسه لما يكتشفوا بحملك هيتجننوا اكتر وهيحاولوا يتصرفوا بسرعه المهم بس العيل ده يتولد بسلام وانتي تبقي وصيه عليه الباقي كله سهل
ميس: بابا
شريف: اسمعي انتي بس كلامي واوعدك مش هتندمي واوعدك جميله دي هخليكي تستمتعي بكل لحظه تذليها فيها وتدفعيها تمن مشاركتها لجوزك
ميس: حاضر يا بابا هسمع كلامك وبكره قريب.

تاني يوم في الشركه
علاء: نسمه !
نسمه: ايوه علاء بيه
علاء: هتيجي معايا نشوف توصيل الاجهزه الجديده ؟
نسمه: كنت فاكره ان انا هروح لوحدي ؟
علاء: عادي هروح انا وانتي
نسمه بضيق: اه حاضر لحظه
علاء: في ايه مالك ؟
نسمه: لا مفيش .. اتفضل حضرتك
علاء: في ايه وشك اتغير وملامحك اتغيرت ؟

نسمه: قلت لحضرتك مفيش
ركبوا العربيه ومشي شويه وبعدها ركن علي جنب وبصلها
علاء: مالك وما تقوليش مفيش ؟
نسمه: مفيش .. الحكايه وما فيها اني تخيلت اني هشتغل في الشركه دي وهكتسب خبره وهشق طريقي
علاء: وايه اللي بيحصل غير كده ؟ معترضه ليه؟
نسمه: معترضه لان حضرتك لحد دلوقتي ما بتثقش فيا ولا بتسيبني اقوم باي مهمه لوحدي .. حضرتك مش شايفني كفؤ .. انا مش عارفه اصلا انا وجودي لازمته ايه؟

علاء ابتسم: مش ده قصدي نهائي انتي مهندسه ليكي وضعك وكفاءتك الكل يشهدلها ومش ده ابدا السبب اللي علشانه بروح معاكي في الشغل.. مش عدم ثقه ابدا ابدا يا نسمه
نسمه: امال ايه ؟

علاء: نخلص شغلنا ده وبعدها اقولك اتفقنا .. بس علشان خاطري ما تقلبيش وشك كده .. ابتسمي خلي الشمس تنور
راحوا وهو ساعدها في الاجهزه وتشغيلها واخدوا وقت طويل لحد ما خلصوا وهما مروحين
علاء: يضايقك يا نسمه لو عديت علي البيت اغير هدومي ؟ انتي شايفه هدومي اتبهدلت ازاي ومش هينفع ارجع بيها لان في ميتنج
نسمه اترددت:...

علاء: لو متضايقه اروح اوصلك الاول وبعدها ارجع علي البيت اغير هتأخر اه بس مش مهم ؟
نسمه: لا لا عادي .. غير هدومك الاول
ابتسم علاء وهيا ابتسمت ابتسامه اختفت بسرعه وحل محلها قلق مبهم ...
وصلوا بيته كانت عماره فخمه جدا ومدخلها رائع
نسمه بصتلها: انت ساكن هنا ؟

علاء: ايوه فووووووق خالص ... والمنظر من فوق فوق الخرافي
نسمه: اه .. طيب اطلع غير يالا علشان الميتنج
علاء: وانتي ما تقوليش هتفضلي في العربيه ؟ احنا ناس متحضره مش رجعيين يالا
نسمه: معنديش مشكله استناك
علاء: انا عندي ... اطلعي يالا شوفي المنظر من فوق عقبال ما انا اغير وهننزل علي طول يالا بقي .
ماهو انا مش هعرف اطلع اغير وانا سايبك كده في العربيه مش منظر هوه يالا بقي
نسمه نزلت معاه بتردد ...

وصلوا الدور العاشر ونزلوا من الاسانصير وفتح شقته ودخلت .. الاعجاب كان باين في كل ملامحها
علاء: عجبتك ؟
نسمه: نعم ؟ دي حاجه كده خياااااال
علاء: تعالي هوريكي الفيو شكله ايه ؟
اخدها من ايدها وفتح اوضه النوم فاترددت
علاء: ما تفهميش غلط .. الفيو في البلكونه تعالي
شدها وفتح البلكونه وفعلا كان المنظر فوق الرائع
علاء: هدخل انا اغير وانتي اعتبري البيت بيتك.

سابها ودخل وهيا سرحت وتخيلت نفسها صاحبه البيت ده .. وتخيلت علاء ملكيه خاصه بيها هيا
" فوقي يا نسمه ايه اللي بتحلمي بيه ده ؟ انتي مجرد بنت عاديه وهو زي ما انتي شايفه مليونير هيبصلك ليه ؟ علشان حلوه شويتين ؟ فوقي لنفسك ! اللي زيه يوم ما يفكر يتجوز هيتجوز من الوسط بتاعه مش انتي ابدا ! فوقي.. ليه لأ ؟ انتي ابوكي كان له وضعه .. ايوه بس مات مديون وانتي ومامتك وحدانين ومالكوش حد ويدوب عايشين براتبك بالعافيه فوقي بقي وانسي اللي فات".

فاقت من تخيلاتها علي صوت علاء وراها واتفاجئت بيه بشعره مبلول ولابس برنس حمام فبصت للارض
علاء: اتفضلي
نسمه: ايه ده ؟
علاء: كاس
نسمه: ايوه شايفه انه كاس .. جواه ايه ؟
علاء: براندي
نسمه:انت تقصد خمره ؟
علاء: ليه بتسميها كده ؟ وبعدين ده مجرد كاس واحد يعني مش هيأثر ابدا ما تخافيش
نسمه: ممكن تلبس هدومك علشان نرجع الشركه بقي هنتأخر ؟

علاء: ما تقلقيش
نسمه خرجت من البلكونه وهتخرج بره بس علاء مسكها من دراعها وبصتله باستنكار
علاء: كنتي عايزه تعرفي انا ليه مش بسيبك تروحي اي شغل لوحدك ؟
نسمه: ايوه ليه؟
علاء: علشان انا عايز افضل طول الوقت معاكي .. عايزك علي طول قدام عنيا .. مش عايزك تبعدي عني .. ولو اقدر اخليكي ديما قدامي مش هتردد ابدا فهمتي ليه؟ الموضوع مالوش علاقه بالثقه ابدا .. الموضوع اني عايزك طول الوقت تبقي قدامي.

نسمه مش عارفه تتكلم او تتنفس من قربه ده وكلامه
نسمه: ممكن نخرج الاول من هنا وبعدين نبقي نتكلم ؟
علاء: خليكي معايا عايزه تخرجي ليه ؟ خليكي في مملكتي يا نسمه .. يا اجمل نسمه
نسمه: ارجوك يا علاء نخرج من هنا الاول
علاء: ارجوكي انتي حسي بيا بقي.

قرب منها يبوسها بس هيا دورت وشها بعيد وهو رجعه تاني وبص لعنيها
علاء: ما ترفضيش حاجه انتي عايزاها
نسمه: مش بالطريقه دي ولا بالاسلوب ده ولا في المكان ده .. ارجوك باشمهندس علاءابعد عن طريقي
علاء: لا يا نسمه مش هبعد انتي عيزاني زي ما انا عايزك بالظبط
زقها وقعها علي السرير وراح فوقها وهيا اتحطم حلمها الوردي انه بيهتم بيها فعلا .. هيا مجرد رغبه مش اكتر
حاولت تقاومه بس هو اقوي منها بمراحل ومحدش هيلومه هو .. هيا دخلت برجليها شقته ..

نسمه: ابعد يا علاء ارجوك
علاء: ارجوكي انتي حسي بالنار اللي جوايا
نسمه: كان لازم اسمع كلام وليد لما حذرني منك
علاء: وليد حذرك ؟ ماشي خلي وليد ينجدك من ايديا انتي مش هتطلعي من هنا غير لما اعمل كل اللي انا عايزو ...

صرخت وجريت منه بس قام مسكها وضربها بالقلم فوقعت علي الارض وراسها خبطت في الكوميدينو واغمي عليها وهو ابتسم بطريقه شيطانيه ...
علاء: اخيرا هتبقي ملكي وبتاعتي...

رواية جميلة الجزء الأول للكاتبة الشيماء محمد الفصل الثالث عشر

نسمه: ابعد يا علاء ارجوك
علاء: ارجوكي انتي حسي بالنار اللي جوايا
نسمه: كان لازم اسمع كلام وليد لما حذرني منك
علاء: وليد حذرك ؟ ماشي خلي وليد ينجدك من ايديا انتي مش هتطلعي من هنا غير لما اعمل كل اللي انا عايزو ...

صرخت وجريت منه بس قام مسكها وضربها بالقلم فوقعت علي الارض وراسها خبطت في الكوميدينو واغمي عليها وهو ابتسم بطريقه شيطانيه ...
علاء: اخيرا هتبقي ملكي وبتاعتي
شالها وحطها علي السرير وبدأ يندمج معاها وفجأه لقي السرير كله دم من راسها ..

حاول يفوقها بس مش بتفوق ويهز فيها مفيش اي فايده .. قام بسرعه وطلب الاسعاف ولبس هدومه بسرعه وهو هيموت من الخوف عليها شالها علي رجليه
علاء: ارجوكي يا نسمه فوقي واوعي يجرالك حاجه انا مقصدش كده ابدا .. حبيبتي فوقي علشان خاطري يا نسمه ما تبعديش عني ارجوكي .. انتي احلي حاجه حصلت في حياتي ارجوكي ..
الاسعاف وصل واخدوها بسرعه علي المستشفي وهو فضل جنبها ومكنش عارف يعمل ايه او يتصرف ازاي ... تليفونها كان بيرن كتير ومش عارف يرد ولا يسيبه يرن...

وليد كان في مكتبه ... دخلت مريم سكرتيرته
مريم: وليد بيه مدام صفاء عايزه تكلم حضرتك ؟
وليد: صفاء مين ؟
مريم: مامت نسمه بتسأل عليها
وليد: طيب حوليلي المكالمه هرد عليها
وليد كلمها: ايوه خيريا ست الكل
صفاء: نسمه يا ابني ما بتردش علي تليفونها نهائي واخر مره كلمتني قالت انها في شغل بره ومش هتتأخر ومعاها الباشمهندس علاء.

وليد: طيب حضرتك ما تقلقيش وانا هكلم علاء واشوف هما فين واطمن حضرتك ما تقلقيش بس انتي وبعدين عادي ممكن الشغل اخد وقت اكتر من ما كانوا متوقعين
صفاء: طيب ما بتردش عليا ليه ؟
وليد: ممكن تكون نسيت تليفونها في العربيه .. علي العموم هشوف وهطمنك
صفاء: ربنا يخليك يا ابني
وليد قفل معاها واتصل بعلاء اللي خايف يرد ومش عارف هيقول ايه اصلا .. وليد اتصل تاني وبرضه مردش فقام وراح لعمه محي
وليد: هو علاء فين يا عمي ؟

محي: خير ؟
وليد: هو فين ؟
محي: معرفش هو فين .. الصبح قالي انه رايح المستشفي علشان الاجهزه
وليد: ايوه انا عارف ده حاليا بقي هو فين ؟
محي: معرفش يا وليد هو تحقيق ولا ايه ؟ في ايه للاسئله دي كلها ؟
وليد: في ان باشمهندسه نسمه معاه والاتنين ما بيردوش علي تليفوناتهم ووالدتها اتصلت كذا مره
محي ابتسم: تلاقيهم بيقضوا وقت ممتع مع بعض ولما يخلصوا هيردوا.

وليد بنرفزه: هو حضرتك مستوعب انت بتقول ايه ؟ نسمه مش من نوعيه بنات علاء نهائي
محي: وايه هيا نوعيه بنات علاء ؟
وليد: بنات تافهه ملهاش اي قيمه ولا ثمن ! بنات رخيصه
محي: وليه ما تقولش انه البنات ما بتقاوموش ؟
وليد: انا مش هدخل معاك في مهاتره عن بنات علاء انا يهمني حاليا اعرف ابنك فين ونسمه فين فاتفضل حضرتك كلمه
محي مسك تليفونه واتصل بعلاء مره واتنين لحد مارد عليه
محي: انت فين يا ابني ؟ ونسمه فين ؟

علاء: احنا في المستشفي
محي: كل ده لسه مخلصتوش ؟ امال ما بتردوش ليه ؟
علاء: لا احنا خلصنا ومشينا .. احنا في المستشفي يا بابا
محي وقف: مستشفي ايه ؟ في ايه حصل ؟ ورحتوا المستشفي تاني ليه ؟
علاء: نسمه اتخبطت في دماغها واغمي عليها وجبتها علي هنا
محي: اديني عنوان المستشفي اللي انتو فيها
وليد ومحي راحوا علي المستشفي لعلاء
وليد: عملتلها ايه ؟ رد
محي: اهدي واسمع .. في ايه يا علاء ؟

علاء: وقعت علي دماغها وجبتها هنا وبس
وليد: وقعت فين ؟ كنتو فين لما وقعت ؟
علاء: مكناش
وليد قرب منه جامد: كنتو فين ؟
علاء: في شقتي ارتحت
وليد: البنت لو جرالها حاجه مش هرحمك يا علاء فاهم ولا لأ ؟

محي: احتفظ بتهديداتك دي .. الدكتور اهو
الدكتور جالهم: احنا حاليا عطيناها ادويه تقلل النزيف اللي عندها ونتمي انها ما تحتاجش تدخل جراحي ان شاء الله
وليد: هو ايه اللي حصلها بالظبط ؟
الدكتور: هيا اتعرضت لخبطه جامده في دماغها وده عملها نزيف في المخ .. الله اعلم بقي النزيف ده هيكون ضرره ايه ! ده هنعرفه لما تفوق
وليد: طيب لو محتاجه تدخل جراحي ؟

الدكتور: النزيف في المخ عاده بنتابعه ساعات بيقف لوحده ويعالج نفسه بنفسه وساعات بيحتاج لتدخل جراحي هنشوف حالتها هتوصلنا لايه ! بعد اذنكم
وليد: لحظه يا دكتور .. هيا هتفوق امتي ؟
الدكتور: ده شيء في علم الغيب والله اعلم اذا كانت هتفوق اصلا ولا لأ ! انا لسه بقولك الاصابات في المخ نتايجها مجهوله
سابهم الدكتور ومشي وفضل شويه الصمت مسيطر عليهم لحد ما وليد قطعه
وليد: عملتلها ايه ؟

محي: لا يا وليد انت كده اوفر قوي ... هيكون عملها ايه يعني ؟ خطفها ودخلها بيته ؟
وليد: ابنك يعملها للاسف
علاء: انا معملتلهاش حاجه !
وليد: امال اتصابت ازاي ؟ هاه ؟ لو راحت معاك بمزاجها شقتك اتصابت ازاي ؟
علاء: وقعت .. اتكعبلت ووقعت اتخبطت في دماغها في حرف التربيزه .. انا معملتلهاش حاجه صدقني ؟

وليد: للاسف مش مصدقك وهستني تفوق ونشوف هتقول ايه بس اقسم بالله يا علاء ما يكون لك يد باللي حصلها لاحبسك فيها
محي: انت بتقول ايه ؟ مين دي اللي تحبسه علشانها ؟ انت ناسي نفسك ولا ايه ؟
وليد: لا يا عمي مش ناسي نفسي بس للاسف سيادتك ربيته بلا قيود او حرام او غلط وخليت كل حاجه عنده مباحه فده كان غلط حضرتك في تربيته .. كل حاجه عنده مباحه ! واللي بيجي ضده بيزيحه باي طريقه كانت ...

محي: وسيادتك بقي هتعلمني اصول التربيه ؟ يا عيل يا ابن امبارح ؟ ده انت حتي ما بتخلفش ولا عندك عيال تربيها جاي انت بقي تعلمني انا التربيه !
وليد: مش شرط يكون الواحد عنده عيال علشان يفهم في التربيه .. انا ابويا معلمنيش كده وبالتالي بقدر كل انسان .. كل واحد بيحصد اللي زرعه .. بعد اذنكم
مشي بعيد عنهم وكلم جميله حكالها اللي حصل وطلبت منه يفضل مع نسمه لحد ما تفوق .. كمان كلم والدتها وبعتلها عربيه تجيبها واول ما وصلت راحت لعلاء
صفاء: يا ابني هيا جرالها ايه ؟ كانت كويسه.

علاء: هيا بس وقعت واتخبطت
صفاء: وهيا ايه اللي طلعها شقتك ؟
علاء: هدومي اتبهدلت وعدينا اغيرها بس وانزل بسرعه مكنتش اعرف ان ممكن يحصلها كده .. ارجوكي صدقيني .. نسمه مهمه جدا بالنسبالي
امها سكتت لانها عارفه ان بنتها معجبه جدا بعلاء وبتتمني منه كلمه ... سكتت وقعدت تستني بنتها تفوق ...
شويه وحسين وخالد وصلوا لعلاء وكلهم وقفوا بعيد عن وليد
حسين: في ايه اللي حصل ؟

محي: انا عارف علاء ورطنا في ايه تاني ؟ انت هببت ايه ؟ انت عملت حاجه للبنت دي ؟
علاء: قلت لأ ملمستهاش
محي: يعني لو عملولها تحليل لل DNA مش هيلاقوا اثر ليك ؟
علاء: لا مش هيلاقوا ما تقلقش
حسين: هو ايه اللي حصل بالظبط ووليد ماله سانن اسنانه ليه ؟
محي: سيادته عامل فيها حامي للبنت وحالف يحبس علاء لو جرالها حاجه
خالد: وهيا نسمه حالتها ايه اصلا ؟ ايه اللي حصل بالظبط يا علاء ما تحط النقط علي الحروف ؟

علاء: نسمه هتبقي كويسه وهتفوق وتخرج من هنا .. فاهمين ؟ هتفوق
سابهم ووقف بعيد حالته تغني عن اي كلام
حسين: هو ماله ؟ اوعي يكون خايف من كلام وليد ؟ انا اول مره اشوفه كده
خالد: لا ده مش خوف من وليد
محي: امال ماله !

خالد: علي ما اعتقد انه بيحب نسمه .. ده خوف عليها هيا
محي: حب ؟ حب ايه وكلام فاضي ايه ؟ علاء مالوش في الكلام ده
خالد: طيب عندك تفسير تاني لحالته دي ؟
محي: هو بس
خالد: ايه ؟ قلقان علي موظفه في الشركه ؟

حسين: مش وقته الحوار ده ... المهم محي روح لام البنت وحاول تخليها في صفنا بحيث لو جد في الامور امور ما تعملناش مشاكل
محي يدوب هيروح ناحيه ام نسمه بس علاء وقف في وشه: ما تقولهاش اي حاجه
محي: يا ابني هضمن بس انها ما تعملش مشاكل
علاء: لا ما تروحلهاش .. خلينا نطمن علي نسمه الاول .. الباقي كله يهون المهم تفوق
محي باستغراب: انت بجد بتحبها بقي ؟

علاء بص للارض: مش وقته
اخيرا نسمه فاقت وبصت للوشوش الكتير حواليها
محي: اخيرا فوقتي خضيتينا عليكي
نسمه بتبص للكل لحد ما شافت علاء فخافت وشاورت عليه وصرخت بهستيريا وبتقول لأ

الدكتور خرج الكل بره وعطوها مهديء
وليد: تقدر تقولي انت عملتلها ايه ؟
علاء: معملتلهاش يا وليد
وليد: علشان كده اول ما شافتك صرخت وبتشاور عليك صح ؟
علاء: يمكن علشان انا اخر حد شافته قبل ما يغمي عليها ؟
وليد: او يمكن انت حاولت تفرض نفسك عليها وده حصلها لما قاومتك ؟

علاء افتكر محاولة هروبها وافتكر وهو بيضربها ووقعتها علي الارض وهنا راح بعيد يلوم نفسه لغباؤه وتخلفه
الدكتور خرج وراح وقف معاهم
وليد: حالتها ايه ؟
الدكتور: جسمانيا اعتقد كويسه لكن نفسيا ..
وليد: وبعدين ؟
الدكتور: في اثار مقاومه علي ايديها وعلي وشها
وليد: تقصد ايه ؟
الدكتور: اقصد انها اتعرضت للضرب ...
وليد: ضرب ؟ طيب والاغتصاب ؟

الكل بص لوليد باستنكار
الدكتور: اغتصاب ؟ احنا مكشفناش عليها .. وعلشان نعرف اذا كانت مغتصبه ولا لأ لازم موافقه ولي امرها الاول
وليد: طيب انا هجيبلك الموافقه
الدكتور مشي والباقي هاجم وليد
محي: انت عايز تلبس ابني مصيبه ولا ايه ؟
وليد: لو كان لمس شعره منها هحبسه وده وعد مني
علاء: انا ملمستهاش
وليد: يبقي خايف من ايه طالما ملمستهاش ؟

علاء: مش خايف انا بس قلقان عليها
وليد: عملت فيها ايه بالظبط ؟ ما تتكلم ؟
علاء: معملتش ...
علاء سابهم ووقف بعيد ووليد يدوب هيتحرك
حسين: لم الدور يا وليد
وليد: اسف يا عمي بس انا مسؤول عن اي حد في شركتي ولو حد له حق هاخدهوله.

وليد دخل لامها واتكلم معاها وكلهم واقفين بره
محي: انا معدتش قادر استحمل وليد ابدا
حسين: قريب يا اخويا قريب هنسترد كل حاجه نملكها
محي: ودلوقتي ؟ لو علاء عمل للبنت دي حاجه هنعمل ايه ؟

حسين: الفلوس بتعمل المعجزات يا محي ما تقلقش وبعدين لو هو بيحبها خليه يتجوزها والبنت ما هتصدق
محي: يتجوزها ؟
حسين: ليه لأ ؟ البنت حلوه مش وحشه
محي: ربنا يسترها
وليد مع ام نسمه
وليد: ناويه علي ايه ؟
صفاء: والله مااعرف يا ابني .. المفروض اعمل ايه ؟
وليد: نطمن عليها ونشوف هيا سليمه ولالأ؟
صفاء: يعني نعمل ايه ؟

وليد: انا مش عارف اقولك ايه ؟ بس ابسط حاجه نطمن انها ما اتعرضتش لاغتصاب مثلا ؟
امها شهقت: اغتصاب ؟ ومين هيغتصبها ؟ اوعي تقولي باشمهندس علاء؟ دي بتحبه !
وليد: الله اعلم انا بقول نعمل احتياطاتنا مش اكتر .. شوفي اللي يناسب حضرتك انا معاكي فيه ؟
صفاء: نسمه قالتلي انك انسان كويس قوي وبتهتم بكل موظفينك كأنهم اهلك
وليد: الحكايه وما فيها اني مبحبش الظلم .. هاه نويتي علي ايه ؟

صفاء: انا معرفش .. نستني احسن لما تفوق وهيا تحدد هتعمل ايه ؟ انا مش هخبي عليك يا ابني .. هيا بتحب علاء
وليد: للاسف حسيت بده
صفاء: هو وحش قوي يعني ؟
وليد: مش حكايه وحش .. هو ابن عمي مشكلته بس انه اتربي ياخد اللي عايزو بغض النظر عن اي اعتبارات تانيه .. لكن هو انسان رائع .. ذكي جدا .. مهندس ناجح جدا في شغله .. فيه حاجات كتيره حلوه .. مشكلته بس انه اتربي غلط فالقيم والمباديء بالنسباله مهاترات مش اكتر ..

صفاء: يبقي نصبر نسمه تفوق وهيا اللي يريحها نعمله
وليد: خلاص تمام .. انا هروح دلوقتي والصبح بدري هجيلك .. تليفوني الخاص اهو مع حضرتك كلميني في اي وقت هتلاقيني عندك
صفاء: ربنا يحرسك لشبابك يا ابني .. روح ارتاح شويه انت من بدري هنا
الكل روح الا علاء رفض يتحرك نهائي بس فضل واقف بره اوضتها وشويه وامها طلعتله
صفاء: روح ارتاح شويه
علاء: لا معلش عايز اطمن عليها
صفاء: ليه ؟ تهمك ؟

علاء: فوق ما تتخيلي
صفاء: وطالما تهمك ازاي جت هنا ؟ ايه اللي حصل وارجوك ما تقوليش وقعت دي ؟
علاء: مش هقولك غير ان نسمه مهمه جدا في حياتي .. انا بس كنت غبي .. اتعودت اخد اللي انا عايزو بغض النظر عن اللي قدامي عايز ايه .. لو عايز حاجه بمد ايدي واخدها
صفاء: وانت كنت عايز ايه من نسمه ؟

علاء: عايزها كلها .. انا عايزها كلها انتي فاهمه ؟ معدتش قادر استحمل اني اشوفها وما تبقاش بتاعتي ومن حقي .. ملكيه خاصه ليا انا وبس ..
صفاء: الحاجات دي ليها طريق يا ابني مش بتكون بالغصب او الاجبار
علاء: مش لسه بقولك اني اتعودت اخد وبس .. انا اسف يا ست الكل تفوق بس وانا هعوضها .. هعوضها عن كل لحظه قضتها هنا .. انا هصلح كل حاجه .. تفوق بس
صفاء: انت لمستها ؟

علاء: لا طبعا .. بنتك زي ما هيا ...
صفاء: طيب .. ربنا يسهل .. ربنا يسهل
وليد اول ما روح ميس قابلته وجميله كمان بس اتراجعت اول ما شافت ميس ووليد لمحها بتبعد ونبيله كمان جت عليهم فسكت
ميس: اتأخرت ليه ؟وكنت فين ؟
وليد: كان في مشكله وبحلها
نبيله: مشكله ايه يا ابني خير ؟
وليد: مشكله من مشاكل علاء باشا هو احنا ورانا غيره اصلا ؟
ميس: عمل ايه المرادي ؟

حكالهم وليد اللي حصل
نبيله: والبنت اخبارها ايه دلوقتي ؟
وليد: جسمانيا كويسه لكن نفسيا الله اعلم .. تفوق بس ونطمن عليها
ميس: انا مش عارفه تهمكم في ايه البنت دي اصلا ؟ قرشين ترميهم في وشها وهيا هتسكت لا وهتفرح كمان .. مش تقولي تقف في وش علاء وعمك وتتخانق معاه.

وليد بيبصلها باستغراب: انا مش كده ابدا ونسمه لو ليها حق هجيبهولها مهما هيكون هقف في وش مين .. وبعدين مش كل الناس اللي قرشين هيسكتوهم
ميس: انت غاوي مشاكل بقي مع اعمامك علي الفاضي ؟
وليد: انا ما بتهمنيش المشاكل ومش هقف واصقف للباطل مهما يكون هقف في وش مين ؟ ودلوقتي بعد اذنكم انا طالع ارتاح اليوم كان طويل
ميس: طيب يالا على اوضتنا
وليد: لا خليكي مرتاحه انا طالع لجميله بعد اذنكم.

ميس: وليد
وليد وقف بس من غير ما يبصلها: نعم
ميس: انا طالعه معاك استني
طلعت معاه لحد فوق ووقفت تشد فيه يدخل معاها اوضتها
ميس: علشان خاطري بقي ادخل معايا انت واحشني قوي يا وليد تعال .. يالا بقي .. حتي شويه وابقي روح نام عندها .. وبعدين انا كمان مراتك وليا حقوقي ولا ايه؟

وليد: لا ملكيش انتي اتخليتي عن حقوقك من زمان يا ميس .. بعد اذنك
شد نفسه منها وسابها واقفه ودخل عند جميله
ميس: وحياتك يا وليد لادفعها تمن عمايلك دي كلها معايا .. حتي انت كمان هتدفع التمن غالي قوي وده وعد مني..
وليد بعد ما دخل لجميله اللي قامت تستقبله
جميله: كنت متخيله انك هتروح لميس ؟
وليد: عايزاني اروح ؟

جميله: لا مش كده بس اكيد هيا متضايقه
وليد: المهم انا مبسوط وانتي مبسوطه ما يهمنيش حد تاني
جميله: بلاش يا وليد تعاديها هيا وابوها
وليد: بقولك ايه ؟
جميله: قول
وليد: انا جاي من يوم طويل وتعبان وعايز ارتاح ينفع بقي تريحيني ولا هتفضلي الليل كله تتعبيني ؟
جميله ابتسمت ومدت ايديها لحبيبها تدخله جنتها ...

وليد: علي فكره صح بكره تروحي لاهلك البلد تقضي معاهم يومين وتزوريهم
جميله: خليني هنا في حضنك
وليد: كان علي عيني بس اولا روحي اطمني علي اخوكي وبيت عمك وبعدين انا كمان هسافر وهاخدك معايا فلازم تتظبط وبعدين الكل مشغول بحكايه علاء ونسمه ودي فرصه كويسه انتي تتحركي فيها ..
جميله: امرك حبيبي.

وليد اتعدل لجميله: حبيبتي ده مش امر ابدا .. مش امر انتي فاهمه ؟ انا عايزك تتطمني علي اخوكي وعايز اخدك واسافر بعيد فمعلش مضطرين نرتبها كده
جميله ابتسمت: عارفه ومقدره بس اعمل ايه مش هاين عليا ما اشوفكش يومين بحالهم
وليد ضحكلها: انا كمان مش عارف هعمل فيهم ايه !
الصبح فطر وجميله معاه ونبيله وميس نزلت لقتهم بيفطروا بصتلهم بقهر بس اول ما شافوها ابتسمت وراحت ناحيتهم.

ميس: صباح الخير
الكل رد
وليد وقف: انا نازل .. جميله جهزي نفسك علشان في اي وقت هبعتلك السواق
جميله: تمام
ميس: اشمعني علي فين ؟
وليد: هتروح لاهلها علشان تعرف تخرج من هنا واعرف اخدها قبل ما نسافر انا وانتي
ميس: اهممم طيب ... المهم استني هنزل معاك
وليد: انا رايح لنسمه المستشفي الاول
ميس: هتعملها ايه يعني ؟

وليد: هعمل اللي هعمله بعد اذنكم
نزل وسابهم وهيا كمان نزلت علي الشركه لابوها وجميله سافرت لاهلها ..
في المستشفي كان علاء لسه واقف مستني وليد وصل وبصله وما اتكلموش مع بعض
صفاء: يا اهلا يا ابني
وليد: فاقت ؟
صفاء: لا لسه الدكتور هيعدي عليها دلوقتي المفروض تفوق بقي
وليد: ان شاء الله خير ما تقلقيش
صفاء: ان شاء الله بقولك يا ابني
وليد: خير يا ست الكل.

صفاء: قول لابن عمك يروح يرتاح ده واقف الليل كله كده علي الباب
وليد بصله: ما تقلقيش عليه انتي ..
نسمه بدئت تفوق فامها جريت عليها ورنت الجرس للممرضه اللي في ثواني جتلهم واتصلت بالدكتور علشان يجلهم
والكل بيبصلها وهيا فتحت عنيها.

صفاء: حبيبتي يا بنتي طمنيني عليكي .. قولي اي حاجه
الدكتور: انسه نسمه اتكلمي
نسمه بتبص لكل واحد شويه لحد ما شافت علاء واقف علي الباب وعنيها ركزت عليه جامد ووليد بصله باتهام
نسمه: انت ..