قصة جميلة بنت بسيطه فلاحه

رواية جميلة الجزء الأول للكاتبة الشيماء محمد الفصل الثامن

نبيله: قصدك بمين ؟ عمك وابن عمك ؟ما اعتقدش هما عايزين الشركه لكن مش عايزينها تخسر طبعا
وليد: ماهو ده تفكير علاء الغبي لانه متسرع وطبعا ابوه لما عرف صلح الدنيا لانه زي ما انتي ما بتقولي هو مش عايز الشركه تخسر هو عايزها كلها
نبيله: وناوي علي ايه ؟

وليد: مش ناوي ... مفيش اي دليل واي رغي في الموضوع ده هيعمل بلبله مش اكتر ... اصلا المساهمين قلقوا لما اتسرقنا مش عايز كمان اوريهم ان في صراعات داخليه !
نبيله: طيب فتح عنيك كويس قوي وخلي بالك من نفسك ... ومن جميله ؟
وليد بصلها: مالها جميله وايه دخلها ؟

نبيله: جميله لو حد عرف هيا هنا بتعمل ايه مش بس هيفكروا يخلصوا منك بسرعه لا ده كمان
وليد كمل: هيحاولوا يخلصوا منها هيا كمان ... بس مين هيعرفهم بجميله ؟
نبيله: الغيره سلاح قوي يا وليد اوعي تستهون بيه
وليد: تقصدي ان ميس ممكن ؟
نبيله: اقصد ان الغيره بتلغي عقل البني ادم وبتشوش تفكيره .. ممكن تشوف ان دي الطريقه اللي تخلص بيها منها،..

وليد: ما اعتقدش يا امي لأ .. ميس ما تعملهاش
نبيله: المثل يقول حرص ولا تخون
وليد: حاضر يا امي هحرص ...
ميس نزلت قعدت معاهم: يااه غمه وانزاحت .. بس ازاي حته موظف امن يخطط لكل ده ؟
وليد: الله اعلم .. المهم زي ما قلتي انها غمه وانزاحت يالا هقوم انا
ميس: رايح فين ؟

وليد: عايز انام يا ميس ولا مش واخده بالك اني بقالي يومين ما نمتش ؟
ميس: نام نام .. انا هروح عند بابي لان عنده سهره
وليد: براحتك
ميس: احتمال لو اتأخرت هبات للصبح لان اكيد انت هتنام للصبح ؟
وليد: طبعا هنام للصبح مفييش حيل لسهرات براحتك يا ميس يالا تصبحوا علي خير.

وليد طلع اوضته ينام وفعلا غرق في النوم تماما من كتر تعبه.. النهار صاحي فايق وسأل علي مراته وعرف انها فعلا باتت عند باباها ودي كانت فرصه يختلي بجميله لانها وحشاه جدا..
نادي عليها وامه خرجت بصتله من تحت
نبيله: عايز حاجه حبيبي ؟
وليد ابتسم: عايز جميله ينفع تبعتيهالي
نبيله ضحكت: مفيش فايده فيك مش هتجيبها لبر انت ..

وليد: ابعتيها بفطار اوك ؟ جعان جدا
نبيله: حاضر حبيبي
نبيله دخلت المطبخ والكل بصلها
نبيله: جميله خدي فطار وطلعيه لوليد فوق اتحركي
جميله: حاضر يا هانم
بدئت جميله تجهز لحبيبها فطاره
علية: اترحمتي من شغل البيت وحظك ميس مش موجوده.

جميله: لو حضرتك عايزاني اعمل حاجه سيبهالي اعملها .. وليد بيه كلها شويه وهينزل شغله
علية: انتي طيبه قوي يا جميله .. اطلعي يا بنتي يا عالم الايام مخبيالك ايه .. اطلعي لنصيبك
جميله طلعت لوليد اوضته بس ملقتهوش فيها واستغربت ممكن يكون فين ؟ وبعدها فكرت ممكن يكون في اوضتها هيا ؟
راحت اوضتها وفتحت الباب كان هو جوه واول ما دخلت اخد منها الاكل وحطه علي التربيزه وما نطقش غير كلمه واحده
وليد: وحشتيني ...

فضلوا كتير مع بعض اكلته وفضلت معاه شويه ونبيله خبطت علي الباب
وليد قام فتح الباب وخرج لامه واقف معاها علي الباب
وليد: خير يا ماما في حاجه؟
نبيله: انت هتفضل عندك لامتي ؟
وليد: انا وجودي هنا مضايقك في حاجه ؟

نبيله: لا طبعا حبيبي انا تهمني راحتك بس ميس بتتصل كل شويه ومستغربه انت ازاي نايم كل ده ؟ مش عارفه اقولها ايه تاني ؟
وليد: هو انا مش من حقي اريح يوم ؟
نبيله: ماشي ريح بس اكيد مش مع جميله ؟
وليد: ولو كانت راحتي معاها هيا ؟

نبيله: وليد اعقل .. انت داخل علي فتره حرجه وانت شايف اهو اعمامك مستعدين لايه بالظبط ؟ خلي الايام الجايه تعدي علي خير واحتفظ براحتك مع جميله دلوقتي لنفسك
وليد اتنهد: حاضر يا امي ... حاضر هكلم انا ميس خلاص
دخل لجميله وسرحان وماسك موبيله مخنوق
جميله ضمته وهيا وراه: سيبها علي الله ما تفكرش كتير.

وليد: ياريت الدنيا بسيطه زيك يا جميله
جميله: هيا بسيطه انتو اللي بتحبوا تعقدوها
وليد: طيب المفروض نعمل ايه علشان ما نعقدهاش
جميله: لو كل واحد امن انه مهما يجري ويتعب مش هينول غير اللي ربنا كاتبه هنرتاح .. اعمل اللي عليك وسيب التدبير ليه ...
وليد: وانتي اعمل معاكي ايه ؟ انتي مراتي ومش قادر اديكي ابسط حقوقك.

جميله: انا خليني اخر اهتمامتك .. انا راضيه اكون ملجأك الامن اللي بتهرب بيه من الدنيا وقرفها .. الحضن اللي بتيجي ترمي في همومك ده مكفيني
وليد: بس مش مكفيني ...
جميله: خلص مشاكلك وحل امورك وبعدها ربك يسهل .. سي وليد انا راضيه باي شيء طالما اني جنبك وطالما انك عايزني جنبك .. مش عايزه حاجه تاني
وليد مسكها من وشها: ولما تعملي المطلوب منك ما فكرتيش ساعتها هنعمل ايه انا وانتي ؟

جميله بحزن: ما فكرتش ومش عايزه افكر .. عايزه اعيش كل لحظه املكها حاليا معاك .. خلي بكره لبكره وبعدين مش ممكن ما اخلفش اصلا ؟ هو حد علم الغيب ؟ مش هقلق علي حاجه لسه في علم الغيب .. وانت المفروض تعمل زيي عيش يومك ...
وليد: يا ريت يا جميله يا ريت ...

اتصل بمراته يشوفها مالها
ميس: اخيرا صحيت ؟ ده مكنش يومه طبقته
وليد: عايزه ايه يا ميس ؟
ميس: مش هتصدق مين جه النهارده المجموعه
وليد: مين ؟
ميس: عمك حسين وابنه خالد وقاعدين مع عمك محي وعلاء
وليد: اممم العصابه اكتملت يعني ...
ميس: هتيجي امتي ؟
وليد: جاي دلوقتي لازم ارحب بعمي وابنه ...

قفل وفضل قاعد شويه ساكت
جميله: عصابه ايه اللي اكتملت ؟
وليد: عمي حسين وابنه خالد لسه راجعين من السفر
جميله: كانوا مسافرين فين ؟
وليد: كان في فرع من مجموعتنا بره في امريكا .. واهم رجعوا النهارده
جميله: طيب ليه بتقول عصابه ؟

وليد: لان عمي حسين نفس عمي محي طول عمرهم بيتفقوا مع بعض ضد ابويا وحاليا ضدي والمشكله ان عيالهم نفسهم .. نتيجه لعداء الابهات فالاولاد ورثوا نفس العداء .. وخالد وعلاء ضدي
جميله: طيب ليه ما تحاولش تنهي العداء ده ؟
وليد: ومين قالك اني محاولتش ؟ رفضوا وقالوا اني مش همن عليهم بحقهم الشرعي واي محاوله مني بتتقابل بالصد والرفض
جميله: ربنا يهدي النفوس .. طيب قوم اتوكل علي الله علشان ما تتأخرش.

في الشركه العصابه مع بعض
حسين: ايه اصل موضوع السرقه ده ؟ مش راكب دماغي ابدا
محي: هو فعلا ما يركبش في دماغ حد .. ده كان اخر انجازات علاء
خالد ضحك: مين يومك مجنون
علاء: والنبي تسكت،. انا لحد دلوقتي عند رأيي والله ما كان هيعرف يتصرف ولا يسد ديونه وكان هيقع
حسين: وبعد ما يقع بالشركه !؟ هتوقفها ازاي ؟

علاء: هوقفها .. هبيع البضاعه ومع الفلوس اللي معانا في البنوك كانت هتقف
محي: رد عليه انت يا حسين لاحسن هيجلطني
حسين: هتبيع البضاعه ازاي يا علاء ؟ وفين ولمين ؟
علاء: الشركات كتير
خالد: علاء دي بضاعه مسروقه .. واكيد انت عارف يعني ايه مسروقه ... يعني ممكن مجرد ما تظهر ده علي افتراض انك ما اتكشفتش هيجيبوك .. اول ما تحاول تبيعها هتتمسك وحتي لو بعتها متخيل تبيعها بكام ؟ اكيد مش اكتر من ١٠٪‏ من قيمتها.

علاء: اهو المهم كان هيقع وليد باشا
محي: مش بالطريقه دي ؟
علاء: خلاص خليه يكبر ويعلي واحنا نشتغل في خدمته
حسين: لا الوضع ده مش هيستمر ... ما تقلقوش
محي: البت الشغاله دي عرفت حاجه عنها يا علاء؟
حسين: بنت مين ؟

محي: بنت شغاله عند وليد في البيت بس مهتم بيها جدا لدرجه انه ضرب علاء لمجرد انه ضايقها بكلمه
حسين: اوعي يكون في بينهم حاجه
خالد: ولنفترض بينهم حاجه ايه المشكله ؟ خدامه وبيتسلي بيها
محي: المشكله لو الخدامه دي خلفت
خالد: ولي عهد صغير يبوظ كل خططنا ؟

علاء: كفايا كفايا البنت طلعت مجرد خدامه وهو بيدافع عنها من باب الشفقه مش اكتر ... عينت حد يراقبها ويجيبلي اخبار من جوه البيت وفعلا مجرد خدامه بس لانها حلوه حبتين ميس حطاها في دماغها ووليد باشا الحامي بتاعها ولا اكتر ولا اقل
حسين: متأكد يا علاء ؟
علاء: متأكد .. متشغلوش بالكم بيها
خالد: طيب طالما شاكين فيها ما نخرجها بره البيت .. راتب اعلي ؟ حياه احسن ؟ نزغلل عنيها باي مبلغ هتخرج ؟

علاء: وده اللي ناوي اعمله .. هخرجها بره البيت باي تمن
هنا الباب اتفتح وكلهم بصوا متفاجئين
وليد: ايه هيا اللي هتخرجها باي طريقه ؟
محي بسرعه: قطه ... قطه في البيت بتفضل طول الليل تنونو وبتصحي الكل من النوم
وليد: اهمم .. المهم حمد الله علي السلامه عمي حسين ..
سلم عليهم وقعد وسطهم وهو حاسس بعداوتهم
وليد: مبلغتونيش ليه بمعاد وصولكم كنت استقبلتكم بنفسي ؟

حسين: سمعت انك مشغول بموضوع السرقه فمحبتش اتقل عليك
وليد: يا خبر يا عمي تتقل عليا ؟ عيب ده انا ابنك ولا ايه ؟
حسين: طبعا طبعا
خالد: يطلع مين بقي الموظف اللي سرقكم ده ؟ بقي معقوله مستواك الامني يا وليد يسمح لحته موظف يسرق بضاعه بملايين ؟
وليد: الموظف ده كان مجرد كبش فدا للحرامي الحقيقي يا خالد
علاء اتوتر: قصدك ايه ؟

وليد: قصدي ان حد غبي فكر وخطط ونفذ وبعدين الموضوع كبر منه وجه حد تاني عاقل واذكي خططله ازاي يخرج منها وخلاه يتراجع وطبعا كان لازم حد يشيل الليله فشالها الموظف بمبلغ محترم
محي: حلو الاخراج ده ؟ المفروض كنت اشتغلت مخرج !
وليد: انفع يعني ؟
خالد: اشمعني فكرت كده ؟

وليد: حاجات كتيره اولها ان جهازي الامني مش سهل علشان موظف يسرقه فبالتالي لازم يكون حد له صلاحيات كتيره .. ثانيا معاد وصول الشحنه قليل قوي اللي يعرفه وسرقه بالحجم ده لازم يكون متخططلها كويس وثالثا بقي هو عيله الموظف اللي علي قد حالها اللي فجأه اتنقلوا لشقه فخمه في مصر الجديده بدال الحاره اللي كانوا عايشين فيها .. المفروض بحبس ابوهم حالتهم تتدهور مش ينطوا لفوق بالشكل ده
خالد: اهمممم عندك فكره مين ممكن يعمل كده ؟

وليد بص لعلاء كتير: مش قوي يا خالد المهم انه لم نفسه والحمد لله ان ربنا بعتله اللي يطلعه من الموضوع ده لان لو مكنش عمل كده مكنتش هرحمه وكنت هخليه عبره لغيره ... المهم حمدالله علي السلامه يا عمي وخالد ... النهارده امي عامله عشا للعيله ما تتأخروش اوكي ؟ عمي محي ما تتأخرش ...علاء خالد هستناكم .. بعد اذنكم
سابهم وخرج.

علاء: يا ما نفسي اقتله بايدي ؟
خالد: قتل ايه يا علاء ؟ ده ابن عمك ؟ احنا بس عايزن حقنا من الشركه
علاء: مسيره يوم هيقع ومحدش هيرحمه مني ...
محي: ومن هنا لحد اليوم ده ما يجي امسك اعصابك وبطل تهورك ده .. الليله ما تتأخروش علي العشا عنده
علاء: انت متخيل ان انا هروح ؟

محي: طبعا هتروح لان اولا غيابك مش هيكون له مبرر غير تأكيد الشكوك بتاعته وثانيا علشان جميله دي ولا معرفش اسمها ايه ؟ شوف هتخرجها ازاي ؟
خالد: ما تسيبولي انا البنت دي ؟
محي: لا هو سبق وكلمها وممكن تصدقه لو لقته مصر انها تخرج

بالليل الكل بيتعشي وعزموا كبار رجال الاعمال و وليد طلب من جميله ما تظهرش نهائي .. وبالتالي فضلت في المطبخ
علاء عرف يدخلها واتفاجئت بيه فجريت ومسكت سكينه تاني .. رفع ايديه باستسلام
علاء: مش محتاجاها انا بس هتكلم وهعتذر مش اكتر ممكن تقبلي اسفي ؟
جميله: مقبول اتفضل بقي من هنا ؟

علاء: حاضر هتفضل بس اسمعيني الاول ..
جميله: قول اللي عايز تقوله بسرعه واتفضل من هنا
علاء: حاضر ... بصي انا عايزك تيجي بيتنا تشتغلي عندنا
جميله: اسفه انا مرتاحه هنا
علاء: الراتب اللي تحلمي بيه ؟ مهما تطلبي
جميله: برضه شكرا
علاء: جميله اصبري
جميله: انت عايز ايه مني ؟ اكيد مش شغل فبلاش لف ودوران..

علاء: حاضر من غير لف ودوران انتي يا جميله حاجه جديده في حياتي .. ما تتخيليش انتي عملتي فيا ايه ؟ مش قادر اشيلك من تفكيري ابدا .. انا بحبك
جميله: انت اتجننت ولا ايه ؟ اتفضل بقي من هنا
علاء: صدقيني انا بحبك .. تعالي معايا ومش هتندمي ابدا اوعدك
جميله: سبق وقولتلك لأ
علاء: علشان انا طلبتك عشيقه لكن المره دي لأ انا عايزك بالشكل اللي يرضيكي.

جميله: اسفه لأ اتفضل بقي من هنا
علاء: هتجوزك ... اه هتجوزك ايه رأيك ؟ وهتدخلي البيت ده هانم !
جميله متنحه: انت بتقول ايه ؟ انت الظاهر مش طبيعي
علاء: مش طبيعي فعلا علشان حبيتك .. اديني فرصه يا جميله ارجوكي
جميله: اطلع بره بدال ما انادي لوليد بيه
علاء: هقول لوليد اني بحبك
جميله: انت مجنون ... اطلع بره .. اتفضل
علاء: بس اسمعي
جميله: ولا كلمه بره ... بره
علية دخلت: في ايه ؟

جميله: مفيش علاء بيه كان عايز كوبايه ميه وخلاص شرب ...
علاء خرج ووقف مع خالد
خالد: شكلك فشلت ؟ للدرجه دي ؟
علاء: البنت غبيه ومنشفه دماغها ...
خالد: اجرب انا ؟
علاء: في نفس الوقت هتشك ان في حاجه غلط ..نصبر عليها شويه
محي جه: عملت ايه ؟

علاء: رفضت بالثلث لدرجه ان الغبيه دي قولتلها هتجوزها وبرضه رفضت
خالد: تتجوزها مره واحده ورفضت ؟ لا كده يبقي في حاجه مش طبيعيه ؟
محي: قالتلك ايه ؟
علاء: هددتني انها هتنادي وليد
محي: طيب شوفلنا اي حد يراقبها وادفعله وهو يقولنا البنت دي وضعها ايه بالظبط ؟ واهم حاجه بالليل بتنام فين ؟ مع الخدم ولا لها معامله خاصه ! ومين اخر الليل بينام عندها.

نبيله كانت وراهم: حمدالله علي السلامه يا خالد .. ليك وحشه حبيبي
كلهم بصولها
خالد: الله يسلمك يا مرات عمي
علاء: مفيش اهلا يا علاء؟
نبيله: لا طبعا ازاي ؟ ازيك يا علاء.. والله كنت لسه بفتكر ايام زمان لما انت ووليد وخالد بتلعبوا مع بعض وتتخانقوا مع بعض كنتو علي طول مع بعض
محي: ماهم لسه مع بعض ؟

نبيله: انت شايف كده يا محي ؟ انهم مع بعض ؟
محي: امال انتي شايفه ايه ؟
نبيله: شايفاهم اتقسموا زي ما ابهاتهم قبلهم اتقسموا اتنين ضد واحد
محي: لا لا احنا ما اتقسمناش متهيألك والعيال برضه متقسموش
نبيله: اتمني ... اتمني يا محي
اخيرا الحفله خلصت والكل روح بيته
وليد: اليوم النهارده كان طوووويل
ميس: فعلا انا محتاجه انام .. تصبح علي خير.

وليد: انا طالع معاكي يالا
نبيله خرجت: استنوا انتو الاتنين
نادت علي جميله برضه
وليد: في ايه ؟ مالك ؟
نبيله: من هنا ورايح جميله هتنام في اوضه من اوض الشغالين تحت
جميله: حاضر يا هانم
وليد: ليه ان شاء الله ؟
نبيله: اهدي واسمع
ميس: ويهدي ليه هو ما بيستحملش الهوا عليها.

نبيله: مش وقته ... المهم سمعت خالد وعلاء واعمامك كانوا شاكين هيا مهمه ليه هنا واللي فهمته ان علاء اتكلم معاها وبناءا علي كده قرروا يراقبوها او يحاولوا يرشوا حد في البيت علشان يعرفوا ايه اهميتها هنا والاهم بتنام فين ومع مين ؟
وليد: علاء قالك ايه ؟
جميله: مفيش حاجه مهمه
وليد: انا اللي اقرر مهم ولا لأ .. قالك ايه ؟

جميله: طلب مني اشتغل في بيتهم بالراتب اللي احلم بيه
وليد: وبعدين ؟
جميله: اما رفضت غير الكلام
وليد: ازاي ؟اتكلمي علي طول
جميله:قالي انه ...
وليد: جميله انطقي انه ايه ؟
جميله: بيحبني ومستعد يتجوزني
وليد كان هيولع: وقولتيله ايه ؟

جميله بصتله باستغراب: رفضت طبعا وطردته من عندي
وليد: حاول يضايقك ؟
جميله: لا لا ابدا اتكلم بس ومشي
ميس: اهو اتفضل اهتمامك بيها عمل ايه ؟ اهم شكوا فيها ومستعدين لاي شيء في سبيل انهم يعرفوا وراها ايه ؟
وليد: انا هوقفه عند حده.

نبيله: لا يا وليد كل ما بتتدخل كل ما شكوكهم بتتأكد انت مش هتعمل اي شيء وهتبقي هادي جدا وجميله هتنام تحت وانت هتتعامل معاها علي اساس انها شغاله وبس فتره لحد ما الامور تستقر
ميس: علي اساس انها شغاله ؟ امال هيا ايه هنا ؟ ماهيا شغاله هنا ! ولا ايه ؟

وليد: الحكايه مش طالبه خناق علي اخر الليل تصبحوا علي خير
ميس: كان المفروض من الاول ما سمحتلوش يتمادي معاها
نبيله: كنتي هتعملي ايه يعني ؟المهم كلنا لازم نكون حذرين .. جميله هما مصممين يخرجوكي من هنا او يعرفوا حاجه منك
جميله: ما تقلقيش يا هانم من ناحيتي..

ميس: طبعا ما تقلقيش من ناحيتها سيادتها باصه لاكبر راس في المجموعه ومنشنه صح
نبيله: لا حول ولا قوه الا بالله اطلعي يا ميس نامي حبيبتي وانتي يا جميله تعالي اوريكي اوضتك الجديده تعالي
ميس طلعت ونبيله اخدت جميله
نبيله: حاولي اليومين دول تخلي وليد بعيد لاني مش بثق فيه
جميله: حاضر
نبيله: وخلي بالك كويس..

ميس طلعت اوضتها كان وليد هينام خلاص
ميس: بقولك ايه انا زهقانه وقرفت بقي
وليد: زهقانه ليه وقرفتي من ايه ؟
ميس: من وجود البنت دي .. خلاص مشيها من هنا
وليد: اخدلها بيت بره قصدك ؟
ميس: طبعا لأ .. مشيها ماطرح ما جت واديها قرشين ومشيها .. ولا حملت ولا اتنيلت يبقي تمشي
وليد: ربنا يسهل نامي يا ميس نامي...

الايام اللي بعد كده وليد فعلا حس اني في حد مراقب البيت وده ضايقه جدا او اللي ضايقه بعده عن جميله بالشكل ده ...
وليد كان في مكتبه وكان اعمامه متجمعين فراحلهم واول ما دخل سكتوا
وليد: نفسي اعرف بتخططوا لايه كده واول ما ادخل تسكتوا كلكم ؟
حسين: وهنخطط لايه ادخل بنتكلم في الشغل.

دخل وقعد وفضل يتكلموا في مواضيع تخص الشغل شويه وبعدها وليد جاله تليفون ولازم يطلع بس قبل ما يخرج
وليد: هاه يا علاء ... هتشيل المراقبه من علي بيتي امتي ؟ لو عايز تعرف حاجه كفايه تسأل وانا هجاوبك مش محتاج للاسلوب ده ... سلام
سابهم وخرج وكلهم فضلوا ساكتين شويه
محي: ارفع المراقبه يا علاء
علاء: ماهو ده اللي عايزه.

محي: طالما عارف انك بتراقبه يبقي المراقبه ملهاش لازمه
حسين: احنا بنضيع وقت في حاجه ملهاش لازمه خلينا في المهم ... الصفقه اللي هنخلي وليد يعملها لازم نخططاها كويس قوي ولازم وليد يصر انه يعملها بنفسه ... سيبكم من البنت حتي لو بينهم حاجه فهتكون تسليه مش اكتر دي خدامه ومش هتتخطي المرتبه دي ... خلينا في المهم
خالد: افهم الاول انتو ناوين علي ايه لوليد بالظبط ؟ اوعوا تكونوا بتفكروا تؤذوه ؟

علاء: نعم يا اخويا
حسين قاطعه: لا طبعا ده ابن اخونا احنا بس هنبعده عن الشركه وهو بعيد هنعمل انقلاب ونطرده هو من الشركه واحنا نستولي عليها
خالد: لكن هو وبيته ؟
حسين: محدش هيلمسهم احنا رجال اعمال مش قتالين قتله
خلصوا كلامهم وخالد مشي
محي: ابنك ماله يا حسين ؟

حسين: بيحن لوليد اللي كان بيلعب معاه وهو صغير
محي: يعني ممكن يسبب مشاكل ؟
حسين: طالما ما يعرفش الحقيقه يبقي مش هيعمل مشاكل ... خلوا خالد بعيد ... وسيبولي انا الكلام معاه ديما وانت يا علاء اوعي تغلط قدامه باي حاجه هو بيحب وليد.

محي: طيب ماهو ممكن
قاطعه حسين: لا مش هيخنا .. هو مقتنع باسبابنا ما تقلقش من الناحيه دي هو بس بيكره العنف عامه... فخلوا خالد بعيد عن كل خططنا دي .. اللي مالوش لازمه بلاش يعرفه اتفقنا
علاء: اتفقنا محدش هيعرفه حاجه غير الضروري بس...

رواية جميلة الجزء الأول للكاتبة الشيماء محمد الفصل التاسع

علاء في الشركه دخل لوليد متضايق كعادته ووليد كان معاه تليفون والتاني مستنيه يخلص
وليد خلص: في ايه مالك ؟
علاء: سبق وقولتلك اننا محتاجين مهندس اجهزه علشان يعاين الاجهزه ويشرف علي توصيلها للمستشفيات وتركيبها وانت وافقت بس لما انا اختارت سيادتك رفضت ممكن افهم ليه بقي ؟
وليد: ممكن تهدي وتقعد وانا افهمك ؟

علاء: لا مش ههدي ومش هتنيل .. انت علي طول اراءك انت وبس اللي صح وغيرك غلط
وليد: انت جايبلي عيل متخرج امبارح ميعرفش اي حاجه وناجح بسبب ابوه وعايز تمسكه شغله زي دي ؟ عايز تجامل ابوه مسكه اي حاجه مش حيويه علي الاقل لحد ما يتعلم لكن مش في دي
علاء: كله بيتعلم.

وليد: معنديش مشكله بس لحد ما يتعلم ما يمسكش منصب زي ده وتحط سمعه المجموعه في ايد عيل اقصي طموحه يجيب ليفيل عالي في لعبه علي موبيله ! وبعدين انا عينتلك حد مناسب
علاء: مش عايز الحد المناسب وعايزك تبطل تتعامل علي اساس انك هنا الكل في الكل
وليد: انت كل المواضيع بتوصل لنفس النقطه دي وبعدين معاك بقي يا علاء
علاء: وبعدين معايا انا ولا انت يا سي وليد باشا
وليد هيرد قاطعه خبط علي الباب
سكرتيره: معلش يا افندم بس نسمه عبدالله بره
وليد: دخلها.

علاء واقف ودخلت البنت: اسفه لو جيت في وقت مش مظبوط بس ده المعاد اللي اتفقنا عليه
وليد: لا لا طبعا اتفضلي اعرفك بعلاء دي ابن عمي وشريك في المجموعه
علاء كانت ايديه في وسطه وظهره للبنت ولما وليد عرفه اضطر يتلفت للبنت وهنا اول ما شافها الدنيا كلها اختفت من قدامه وما شافش غير بحر غرق فيه وتاه في امواجه ومعرفش ولا ينطق ولا يتكلم بس مد ايده وهو مسلوب.

نسمه: اهلا بحضرتك ..انا باشمهندسه نسمه
وليد: دي يا علاء المهندس المسؤل عن الاجهزه زي ما حضرتك طلبت ...هاه ؟
علاء بص لوليد اللي كان هيضحك علي شكله
علاء: اه اه ... اهلا بحضرتك
وليد: شوفي باشمهندسه .. التسويق والتركيب ده تخصص علاء فهو هيقولك مطلوب منك ايه بالظبط ؟ اوكي علاء ولا في مشكله ؟
علاء مردش لسه غرقان وعايز حد يشده
وليد: علااااء
علاء: اه اه .. اه طبعا ..

وليد: ينفع توريها مكتبها ولا انا اقوم بالمهمه دي ؟
علاء: لا انا هوريها .. اتفضلي حضرتك
البنت خرجت وعلاء وراها بس وقف وبص لوليد
علاء: مش شايفها عجوزه ولا خبره ١٥ سنه مثلا تفرق ايه عن الولد ؟
وليد: تفرق انها متخرجه من خمس سنين عملت فيهم دبلومه ودكتوراه في امريكا ومتخصصه في مجالنا .. العيله دي بتفهم اكتر مني ومنك في الاجهزه الطبيه .. لو لسه مصر علي الولد بتاعك ؟

علاء: يولع هو وابوه
وليد ضحك وعارف ان دي نقطه ضعف علاء
وليد: علاء عايزينها في الشركه ما تضايقهاش
علاء: وانا من امتي بضايق حد ؟
وليد: انت ؟
علاء: علي فكره دي اشاعات بعد اذنك
وليد: خلي بالك واوعي تغرق
علاء وهو بيقفل الباب: مش انا اللي اغرق.

وليد قعد علي مكتبه ومش عارف ليه افتكر جميلته اللي حنلها جدا واشتاقلها جدا ... بعده عنها هيقتله .. بيروح البيت في اضيق الحدود .. بيهد نفسه في الشغل .. وحشته لاقصي الحدود
مراته دخلت فاجئته
ميس: مالك اتفزعت ليه ؟ كنت سرحان في ايه ؟
وليد: مش في حاجه .. بس علاء كان هنا ومعترض كالعاده
ميس: وبعدين ؟

وليد ابتسم: قابل المهندسه نسمه اللي هتستلم الاشراف علي الاجهزه
ميس: وايه ؟ وبتبتسم ليه ؟
وليد: افتكرت شكله وهو بيزعق علشان المهندس اللي رفضته وحاله البلاهه اللي صابته اول ما شاف نسمه ... مش عارف اقولك كان شكله ايه ؟
ميس: هيا حلوه قوي كده ؟
وليد: ايه السؤال ده بقي ؟ المفروض انا اجاوب ازاي ؟

ميس لفت وقعدت علي رجليه: تجاوب عادي .. حلوه ولا مش حلوه
وليد: عاديه .. عنيها ملونه ويمكن ده اللي لفت نظر علاء
ميس: لونهم ايه ؟
وليد: تقريبا كده عسلي
ميس: يعني انت كمان ركزت في لون عنيها
وليد ابتسم: انا قابلتها كذا مره دي مش اول مره وبعدين لون عنيها ملفت شويه وغير كده بقي من امتي انا بيهمني الجمال او الشكل هاه ؟

ميس بتقرب من رقبته في محاوله لاغراؤه: امال بيهمك ايه ؟ ايه اللي بيحرك وليد الحجر ابن اكبر رجل اعمال في الشرق الاوسط احمد نصار ؟ اللي بيتحدي الكل
وليد علي طول تفكيره راح لجميله بخفتها ورقتها وهدوئها وشخصيتها البسيطه وميس لاحظت سرحانه وقلبها قالها انه فكر في جميله
مسكت وشه وخلته يبصلها وباسته وهو استجاب بفتور .. معدش قادر يتجاوب معاها بلهفه زي الاول .. الشوق والنار والاحساسيس عايزه حد تاني لكن مش ميس ابدا
بعد فتره وهيا علي حجره.

وليد: علي فكره انا عندي شغل كتير وفي عملاء مهمين علي وصول
ميس: عايزني اقوم وامشي ؟
وليد: لا طبعا بس بقولك اني مجبر
ميس وقفت: انا مسافره اسكندريه يومين وكنت جايه ابلغك
وليد: اه هتروحي مع الاجهزه تسلميها ؟ هو معادهم النهارده ؟
ميس: اه .. طبعا المفروض ان المهندسه الجديده دي هتيجي معايا.

وليد: اه فعلا .. بلغيها واتفقي معاها وابقي عدي عليا قبل ما تتحركي
ميس: اوك اروح اشوف ام عنين دي
خرجت وراحت لمكتب نسمه وهناك لقت علاء قاعد بيتكلم معاها في الشغل بس تركيزه وانتباهه كان مشتت جدا
ميس: يا اهلا بيكي في مجموعتنا
الاتنين بصولها ونسمه وقفت تسلم عليها وميس اتضايقت ان نسمه فعلا جميله جدا وعنيها حلوه بشكل ملفت جدا للنظر
نسمه: اهلا حضرتك ؟

علاء: دي ميس مرات وليد
نسمه: وليد بيه صاحب المجموعه ؟
علاء: مفيش حد هنا صاحب المجموعه
ميس: المجموعه عباره شركاء مع بعض واسهم .. المهم ايوه وليد ده .. انا جايه ابلغك اننا اللي هو انا وانتي هنسافر بعد ساعتين اسكندريه علشان تبدئي شغلك وتشرفي علي تسليم الاجهزه وتركيبها جاهزه ولا لسه ؟
نسمه: سفر من اول يوم ؟

ميس: لو مش هتقدري ؟
قاطعتها: لا هقدر باذن الله
علاء: هاجي معاكم لان باشمهندسه نسمه لسه جديده وممكن تحتاج لمساعده ولا حاجه
ميس ابتسمت وافتكرت كلام وليد: براحتك .. قدامكم ساعتين
سابتهم وخرجت
نسمه: المفروض اعمل ايه دلوقتي ؟
علاء ضحك: اولا تهدي وتاخدي نفسك .. وبعدين تروحي البيت تحضري شنطه بسيطه ليومين زي ما انا هعمل دلوقتي
نسمه: وايه كمان ؟

علاء: تهدي ... مالك ؟ وليد قال انك واخده دبلومه ودكتوراه .. متوتره كده ليه ؟ اكيد مش اصعب من مناقشه دكتوراه ولا ايه ؟
نسمه: طبعا مش اصعب بس الدراسه دي حاجه بعملها ومن وانا عندي ٦ سنين مفرقتش بقي دكتوراه او غيره لكن الشغل وفي مجموعه بالحجم ده والاسم ده ؟ حاجه تانيه !

علاء: مسؤليه وانا واثق انك قدها .. ما تقلقيش انا هكون معاكي
نسمه: هتساعدني مش هتختبرني وتشوفني ملائمه للشغل ولا لأ اوكي ؟
علاء: انتي خلاص اشتغلتي .. وايوه هساعدك طبعا ما تقلقيش .. بقولك بما اني نازل تعالي اوصلك في طريقي تجهزي شنطتك وانا راجع اعدي اجيبك ؟
نسمه: لا لا ابدا انا هتصل بالسواق يرجعلي.

علاء: انا مُصر انا كده كده نازل يعني
نسمه: انا مش عايزه اتعبك
علاء: وانا بقولك اني مصر يالا
خارج وهيا معاه واتقابل مع وليد كمان خارج
وليد: ايه من اولها ؟
علاء: هوصلها علشان تجهز للسفر وانا كمان
وليد: انت كمان ايه ؟
علاء: هسافر معاهم هيا لسه جديده ومحتاجه اشراف
وليد بابتسامه: وانت طبعا عرضت تشرف عليها ؟
علاء: عند حضرتك مانع ؟

وليد رفع ايديه الاتنين: ده شيء يخصك ... انا عندي اجتماع .. ان شاء الله تتبسطي معانا في المجموعه يا باشمهندسه نسمه .. ترجعوا بالسلامه
انسحب وهو عنده ثقه تامه ان علاء مش هيسيب نسمه في حالها ابدا
عدي علي مراته سلم عليها قبل ما يمشي علي اجتماعه وهو خارج
ميس: وليد
وليد بصلها فكملت كلامها .. هو انا هوحشك لما اسافر اليومين دول ؟

وليد مستغرب: اكيد يا عمري ترجعيلي بالسلامه
خرج وحس ان مراته بقت عبء عليه .. عبء مش عارف يزيفه اكتر من كده .. خلص اجتماعاته وقبل ما يروح اخر النهار افتكر انه قال لجميله انه هيتأكد ان كان جوازهم فيه اي حرمانيه ولا حلال
فقرر يعدي ويسأل ويتأكد
وقعد مع شيخ في الازهر وحكاله ملخص سريع عن اللي حصل
وليد: يعني بالمختصر انا عايز اعرف زواجي العرفي حلال ولا حرام.

الشيخ: بسم الله الرحمن الرحيم شوف يا ابني فالزواج العرفي غالباً هو الزواج الذي لم يسجل في المحكمة. وهذا الزواج إن اشتمل على الأركان والشروط وعدمت فيه الموانع فهو زواج صحيح، لكنه لم يسجل في المحكمة، وقد يترتب على ذلك مفاسد كثيرة، إذ المقصود من تسجيل الزواج في المحكمة صيانة الحقوق لكلا الزوجين وتوثيقها، وثبوت النسب وغير ذلك
أما الأركان فأهمها: الإيجاب والقبول.

وأما الشروط فأهمها: الولي، والشاهدان، والصداق (المهر) لقوله صلى الله عليه وسلم: "لا نكاح إلا بولي وشاهدي عدل" رواه ابن حبان في صحيحه عن عائشة وقال: ولا يصح في ذكر الشاهدين غير هذا الخبر، وصححه ابن حزم، ورواه البهيقي والدراقطني، ولقوله صلى الله عليه وسلم: " أيما امرأة نكحت بغير إذن وليها، فنكاحها باطل، فنكاحها باطل، فنكاحها باطل، فإن دخل بها فلها المهر بما استحل من فرجها، فإن اشتجروا فالسلطان ولي من لا ولي له" رواه الترمذي وحسنه، وصححه ابن حبان والألباني.

وأما الصداق فلا بد منه، لقوله تعالى: ( وآتوا النساء صدقاتهن نحلة) [النساء:4] ولقوله صلى الله عليه وسلم: لرجل أراد أن يزوجه من امرأة:"التمس ولو خاتماً من حديد" رواه البخاري ومسلم.
كما ننبه إلى صورة محرمة منكرة يقع فيها بعض الناس وهي: ‏
‏(أن يلتقي الرجل بالمرأة ويقول لها: زوجيني نفسك، فتقول زوجتك نفسي، ‏ويكتبان ورقة بذلك، ويعاشرها معاشرة الأزواج بحجة أنهما متزوجان زواجاً ‏عرفياً).‏

فهذه الصورة ليست زواجاً لا عرفياً ولا غيره، بل هي زنا لأنها تمت دون وجود ‏الولي والشاهدين، وعلى من فعل ذلك التوبة إلى الله سبحانه وتعالى، وإذا أراد ‏الزواج فليتزوج وفق الضوابط الشرعية المعتبرة في الزواج كما تقدم.‏
والله أعلم
وليد: طيب هيا كان عمها ولي امرها موجود والموافقه والقبول اتحققت والمهر اتدفع فكده صحيح الجواز صح.

الشيخ: باذن الله صحيح بس في نقطه مهمه لو في نيتك انك تطلقها بعد فتره فكده تحول الي زواج متعه وده حرام
وليد بحيره: وايه زواج المتعه ده كمان ؟
الشيخ: المتعة " - أو " الزواج المؤقت " – هو أن يتزوج الرجل المرأةَ إلى أجل معيَّن بقدر معلوم من المال .

والأصل في الزواج الاستمرار والدوام، والزواج المؤقت – وهو زواج المتعة – كان مباحاً في أول الإسلام ثم نُسخت الإباحة، وصار محرَّماً إلى يوم الدين .
عن علي رضي الله عنه: " أن رسول الله صلى الله وسلم نهى عن نكاح المتعة وعن لحوم الحمر الأهلية زمن خيبر ." وفي رواية: " نهى عن متعة النساء يوم خيبر وعن لحوم الحمر الإنسية ."

وليد: كلمني بلغه بسيطه ارجوك
الشيخ: يا ابني او جوازك بفتره ونيتك تطلقها فده حرام اما لو كنت ناوي تستمر معاها فان شاء الله حلال
وليد: يعني الموضوع يرجع لنيتي انا حاليا ؟
الشيخ: ايوه ..
وليد: كده انا فهمت .. انا متشكر جدا لحضرتك.

سابه وليد ومشي وابتسم ان جوازه صحيح من جميلته ..فكر يشتري لجميله حاجه قبل ما يروح وفعلا اشتري وروح وصل بيته واتغدي هو ومامته وبيحكيلها عن علاء ونسمه وحاله البلاهه اللي صابت علاء
نبيله: الواد ده لعبي يا وليد كنت حذرتها منه
وليد: اعتقد يا امي واحده واخده دكتوراه في امريكا اكيد هتعرف تتعامل مع واحد زي علاء هيا مش عيله اول مره تخرج للدنيا
نبيله: بس برضه.

وليد: احذرها اقولها ايه ؟ خلي بالك من ابن عمي لعبي حبتين
نبيله: والله ما عارفه ..المهم ميس فين ؟ هتتأخر ؟
وليد هنا استوعب ان ميس مفيش فقام وقف وابتسم: ميس مسافره يومين في شغل وانا هنا قاعد معاكي برغي
نبيله ضحكت: للدرجه دي وحشتك ؟
وليد: فوق ما تتخيلي بعد اذنك
نبيله: وليد هو انت ليه متعلق بيها كده ؟ ايه المميز فيها.

وليد وقف: ده ابيض قوي عندها ( بيشاور علي قلبه ) فيها براءه لسه ما حدش لوثها .. بنت علي الرغم من ضعفها الا انها قويه وعندها مقدره تخلي اللي قدمها قوي برضه ومستعد يعمل اي حاجه بمجرد نظره ضعف من عنيها .. او نظره حب .. بتزرع الحب في قلبي .. معرفش يا امي المهم انها مميزه في كل حاجه بتعملها...
وليد راح لجميله كانت في المطبخ مع علية و صابر الطباخ.

وليد: جميله تعالي عايزك
جميله خرجت وري وليد اللي اتفاجئت بيه بيشيلها ورايح ناحيه اوض النوم بتاعت الشغالين
جميله: سي وليد استني بس
وليد: انهي اوضه بتاعتك ؟
شاورت علي واحده ودخل ونزلها وراح للباب قفله وجت تتكلم قاطعها بشفايفه .. ما تخيلش هيا وحشاه قد ايه الا لما لمسها .. كان فاقد احساسه بالواقع حواليه معطاهاش اي فرصه تتكلم او تتنفس .. وهيا في حضنه.

وليد: مش انا روحت لشيخ النهارده
جميله اتعدلت: وقالك ايه ؟
حكالها وليد كل اللي حصل وبعدها مسك ايديها: يعني جوازنا حلال وانتي مراتي قدام ربنا .. اه نسيت حاجه
قام بيقلب في البنطلون بتاعه
جميله: في ايه نسيت ايه ؟
وليد: لحظه بس
طلع علبه صغيره من بنطلونه وراح قعد جنبها ومسك ايدها وفتح العلبه طلع خاتم صغير
جميله بفرحه: ده ليا انا ؟

وليد: اكيد مش ليا
جميله: بس ست ميس
وليد: مالكيش دعوه بحد خليه في ايدك
جميله: ينفع اسأل ليه ؟
وليد: عايزك تلبسي خاتم ايه المشكله ؟ مفيهاش ليه !
جميله كانت فرحتها ما تتوصفش باللحظات اللي بتقضيها مع وليد
جميله: مش هتقوم تطلع اوضتك ؟
وليد: بفكر في فكره مجنونه ... المهم وحشتيني الاسبوعين اللي فاتوا دول
جميله بعتاب: علشان كده ما كنتش بتدخل البيت ولما تدخل تطلع علي اوضتك .. كنت حارمني حتي اشوفك !؟

وليد: لاني لو وقفت قصادك كنت هعمل نفس اللي عملته ده .. كنت بهرب من عنيكي يا جميله لاني مكنتش هستحمل ابدا ... اشوفك وافضل بعيد
خبت وشها في صدره بحب
وليد: وحشتيني يا جميلتي
جميله: جميلتك ؟
وليد: عندك اعتراض ؟
جميله: طبعا لأ

في الاسكندريه
طول الطريق علاء مش مبطل كلام مع نسمه ابدا وكله كلام في الشغل .. ميس قاعده معاهم وحطت سماعات في ودانها علشان رغيهم ونامت لحد ما وصلوا الفندق اللي هيباتوا فيه وهيا طالعه
ميس: مكنتش اعرف انك رغاي بالشكل ده يا علاء ؟ انت ما بتفصلش يا ابني ؟ البنت هتقول عليك رغاي وممل
علاء وراها: بجد ممكن تقول اني ممل
ضحكت ضحكه عاليه جدا: فوق ما تتخيل.

وسابته وطلعت علي اوضتها مستغربه وكلمت وليد اللي كان غرقان في حضن جميلته فكر ما يردش عليها ويدوب هيقفل التليفون
جميله: رد علشان ما تقلقش
وليد رد عليها: وصلتوا ؟ ايه الاخبار ؟
ميس: مصدعه من ابن عمك .. تخيل طول الطريق ماسك ودان البنت عامل زي العيل المراهق
وليد ابتسم: خلي بالك من البنت دي مسؤليتك
ميس: وهيا عيله ولا ايه . انا مالي ؟ ولا انا هروح اقولها حافظي علي نفسك ؟

وليد: مش كده بس برضه خليكي منتبهه مش اكتر
ميس: يالا المهم انا قلت بس اطمنك اننا وصلنا هنام انا لاني تعبانه والصبح بدري هنروح المستشفي تصبح علي خير بيبي
وليد: وانتي من اهله باي
قفل وبص لجميلته اللي ابتسمتله
وليد: ما تعرفيش ابتسامتك دي بتعمل فيا ايه ؟

علاء وصّل نسمه لاوضتها
علاء: لو احتاجتي اي حاجه كلميني ما تتردديش
نسمه: اوكي .. باشمهندس
وقف بعد ما كان مشي خطوه وبصلها
نسمه: متشكره علي وقفتك ومساندتك ليا
علاء: اشكريني لما نرجع مصر تصبحي علي خير
نسمه: وحضرتك من اهل الخير
دخلت نسمه اتصلت بامها سهير تقدملها تقرير عن كل اللي حصل.

سهير: المهم حبيبتي خلي بالك من نفسك انا لولا اصرارك انك ترجعي مصر مكنتش نزلت ابدا
نسمه: انا قلتلك يا مامي مكاننا هنا في مصر في بلد بابا الله يرحمه .. ما تخافيش عليا
سهير: بس انتي بره كنتي هتتعيني في الجامعه وهنعيش كويس برضه
نسمه: مامي مكاننا في مصر يالا تصبحي علي خير وادعيلي ...

عند وليد
اخر الليل قام وخرج بره اوضتها
جميله: رايح فين ؟
وليد: دقيقتين وجاي ما تناميش
جميله ابتسمت: ولو نمت ؟
وليد: تستحملي اللي هيجرالك
خرج وقفل الباب وراه وطلع لاوضه نبيله خبط ودخل
نبيله: خير حبيبي في حاجه ؟
وليد: في دماغي فكره مجنونه عايز اعملها او محتاج اعملها
نبيله: فكره ايه ؟

وليد: انا هاخد جميله واسافر هقضي بكره معاها بره في اي مكان
نبيله: انت اتجننت وميس ؟
وليد: هرجع قبلها ومش هتعرف
نبيله: ولو عرفت من الشركه انك سافرت ؟
وليد: شغل في اي مكان .. امي انا بعرفك بس اوك انا هتحرك بيها دلوقتي
نبيله: يا وليد اعقل
وليد: انا طول عمري عاقل .. وحاسس اني ما عشتش غير لما سيبت العقل يا امي واتجننت واتجوزت جميله .. مش عايز افضل عاقل
نبيله ابتسمت: انت ماشي في طريق خايفه من اخره.

وليد بحب: مهما يكون المهم اني عشته واستمتعت في كل لحظه فيه .. اللي يحصل بعدها يحصل مش هيهم
نبيله: مش هقولك غير انا تهمني سعادتك بس خلي بالك جميله مش هتخرج للنور وده مفروغ منه
وليد: مش عايز افكر في النقطه دي دلوقتي .. تصبحي علي خير
نزل لجميلته: قومي البسي هدومك هنخرج انا وانتي
جميله: نخرج ؟ دلوقتي ؟ فين ؟

وليد: هاخدك واسافر اي مكان قريب نقضي فيه بكره لوحدنا
جميله: لا طبعا انت عارف ايه كميه المشاكل اللي هتقابلك ؟ انت في غني عنها
وليد مسك وشها بايديه الاتنين: قدامك خمس دقايق تكوني جاهزه انتي واللي ممكن تحتاجيه بكره ليا وليكي اتحركي
جميله: انا خايفه عليك
وليد: بقوا اربع دقايق اتحركي.

فعلا اتحركت وخلال عشر دقايق كانت جاهزه واخدها وركبت جنبه عربيته وكانت سعادتها البسيطه ما تتوصفش وهيا جنبه ... حلمت كتير تركب جنبه زي كده بس ما تخيلتش ان ممكن حلمها يتحقق، كان ماسك ايدها وحاسس بفرحتها المعديه .. ابتسامتها كفيله انها تخرجه من اسوأ حالاته وتدخله لدنيا تانيه ... نامت علي كتفه وهو ايده حواليها وفاقت فبتسحب نفسها.

وليد: خليكي نايمه
جميله: علشان تعرف تسوق
وليد: خليكي في حضني حبيبتي
رجعت لكتفه من تاني وايدها علي صدره فوق قلبه .. وهو سايق مبتسم فكر ياخدها ويختفي تماما من الدنيا كلها ومايرجعش ابدا ...
اخدها لشاليه بتاعهم في راس سدر دخلوا الاتنين وطلعوا يريحوا ويدوب وليد غمض عنيه حس بجميله بتصحيه
وليد: سيبيني انام
جميله: انت قلت اليوم ده بتاعي صح ؟

وليد: صح بس محتاج انام حتي ساعتين
جميله: انت نايم اربع ساعات مش اتنين
وليد فتح عنيه وبصلها: امال حاسس اني لسه مغمضتش عنيا ليه ؟
جميله بحب: عايز تنام تاني ؟
وليد: واضيع وقت اكتر من كده بعيد عنك ؟ ما اعتقدش .. هقوم اخد دش وافوقلك
جميله: وانا هجهز فطار بسيط
وليد: جيبتي اكل منين ؟

جميله: خرجت اشتريت ورجعت وانت نايم
وليد: جيبتي فلوس منين ؟
جميله بابتسامه: من جيبك
وليد: ماشي بس تاني مره ما تعمليهاش
جميله: اني اخد فلوس من جيبك ؟
وليد: لا طبعا انك تخرجي لوحدك من غير ما تقوليلي .. لكن فلوسي ملكك انتي اصلا اذا كان انا كلي ملكك يبقي فلوسي ايه ؟
فطروا مع بعض: فول وطعميه ؟

جميله: اسفه بس كانوا وحشيني قوي لو عايز حاجه تانيه اعملك ؟
وليد: لا لا هما وحشيني انا كمان .. كتير باكلهم وانا بره البيت
جميله: معقوله ؟
وليد: ويا سلام بقي لو تعمليلنا علي الغدا كشري ؟
جميله: انت تشاور وبس ..المهم نفسي المس الميه الزرقا دي
وليد: تلمسيها بس؟ ده انا هخليكي تغرقي فيها تعالي يالا

ميس وعلاء ونسمه فطروا مع بعض ونزلوا علي شغلهم ونسمه شويه كانت متوتره بس مع وجود علاء اتطمنت واكتشفت برضه ان ميس متكلمه لبقه وسيده اعمال مش مجرد مرات وليد وبس لأ دي لها وضعها الخاص...
علي العصر ميس انسحبت علي الفندق تريح قبل ما بالليل يحضروا حفله لافتتاح المستشفي اما علاء ونسمه مع بعض في الفندق في الكافيه
نسمه: ياه اليوم كان مرهق قوي ..

علاء: انتي كنتي متخيله ايه ؟ المهم انك عديتي اول يوم انتي موهوبه بالفطره
نسمه: متشكره انا بس كنت محتاج حد يقف جنبي ويمسك ايدي لحد ما اخد اول خطوه ومتشكره ليك انك كنت الحد ده
علاء: ودلوقتي عايزه تسيبي ايدي وتنطلقي ؟
نسمه حست ان سؤاله له كذا معني مش مجرد سؤال عادي او برئ ومكنتش عارف تجاوب عليه
نسمه: لو قلتلك اه ولأ هتقول ايه ؟

علاء: هقولك فهميني اه ليه ولأ ليه ؟
نسمه: اه لاني عايزه فعلا اعتمد علي نفسي ومش عايزه افضل العيله اللي محتاجه لحد ماسك ايدها
علاء: حقك ولأ ليه ؟
نسمه: لأ دي بقي مش عرفاها .. يمكن لاني مطمنه ان في سند ليا
علاء: وانا سند ليكي
نسمه: يضايقك ؟
علاء: طبعا ... لأ ... بالعكس ده يفرحني .. تحبي نتغدي ؟
نسمه: انا ميته من الجوع
علاء: وانا كمان.

عند جميله
جميله قضت اليوم كله لعب هيا وهو .. وليد حس انه شاب لاول مره ... حر من غير قيود .. عايش وسعيد واتمني لو اليوم ده ما ينتهيش ابدا بس للاسف خلص وقاعدين الاتنين علي الشط والشمس غابت كانت في حضنه وهو كله حواليها ومخبيها جواه
جميله: الشمس غابت والحلم انتهي
وليد: تيجي نفضل هنا علي طول ؟

جميله: يا ريت .. يا ريت ينفع
وليد: هنفضل هنا وبس .. مش هنكلم حد ولا حد هيكلمنا !
جميله: وشغلك
وليد: يولع
جميله: ومامتك واختك وحقهم وحياتهم انت مسؤل عنهم
وليد: هو انتي ليه بتفكري كتير ؟

جميله: علشان الحياه علمتني في مسؤليات الواحد ما ينفعش يهرب منها وساعات لما بيواجهها بتبقي مخبياله حاجات احلي
وليد: زي ايه ؟ انا من يوم ما ابويا اتوفي للنهارده والمسؤليه ما جبتش حاجه حلوه بس عداء بيني وبين اعمامي وعيالهم انتي مسؤليتك جابتلك ايه حلو ؟
جميله: انت وده بالدنيا وما فيها
وليد: وانا مش عبء عليكي يا جميله ؟

جميله: انت حبيبي وعمري وحياتي كلها
وليد: انا وجعك وقمه ألمك ولسه لو خلفتي هتكرهيني وتكرهي اليوم اللي شفتيني فيه يا اما ساعتها هبيع كله واعادي الدنيا كلها واللي يحصل يحصل
جميله: انت ليه ديما شايل هم بكره ؟ محدش عارف بكره مخبي ايه ؟ انت ليه مهموم كده ؟
وليد: عارفه ليه ؟ لاني لما وافقت علي لعبه ميس معملتش حسابي
جميله: معملتش حسابك لايه ؟

وليد: لحبك يا جميله
جميله لفتله وبصتله كتير قوي: حبي ؟
وليد: ايوه حبك واوعي تقولي انك مش حاسه بحبي .. بعشقي .. بجنوني بيكي
جميله ملقتش اي كلام ممكن ترد فيه فقربت شفايفها يمكن يعرفوا يردوا هما علي حبيبها
بعد فتره طويله في حضنه
وليد: علي فكره انتي معملتليش الكشري ؟

جميله ضحكت: حقك عليا بس انت ما سيبتنيش اقوم من حضنك
وليد: طيب اعمل ايه لقلبي اللي مش عايز يشبع منك ابدا ؟
جميله: اممم طيب ايه رأيك لو نعمله انا وانت دلوقتي؟
وليد عمره ما عمل اي شيء ابدا في المطبخ: موافق بس خلي بالك دي اول مره ليا فاستحمليني
جميله: انت هتقعد ملك تتفرج علي جاريتك حبيبي
وليد اتضايق: مش جاريتي ابدا .. عمري ما اعتبرتك كده ابدا ...

جميله: حبيبي عارفه انا قلتها بس كده ..
وليد: واثقه في حبي ليكي صح ؟
جميله: ايوه حبيبي
نزلوا مع بعض يعملوا اكله الكشري المعتبره واتعشوا احلي عشوه في الدنيا علي اضواء الشموع والموسيقي الناعمه
وليد قام يغير السي دي اللي شغال ووجميله راحت وراه وحضنته وهو بيختار سي دي
جميله بتحاول تقري: بي تهو فن ... بيتهوفن صح ؟
وليد باستغراب: صح .. انتي بتعرفي تقري انجليزي ؟

جميله: طبعا بعرف ليه بتسأل ؟
وليد: انتي مقولتيليش وبعدين ميس قالت انك جاهله
جميله: ممكن اكون بالنسبالكم جاهله لكن انا اتعلمت وكنت شاطره جدا ودخلت كليه اخدت فيها سنه
وليد: كليه ايه ؟
جميله: رياض اطفال بس مكملتش
وليد: ليه مكملتيش ؟
جميله: والدي اتوفي والمصاريف كترت علي عمي وكان يا اما انا اكمل او اخويا يكمل
وليد: وانتي اختارتي اخوكي صح ؟

جميله: مكنش ينفع اختار حاجه تانيه
وليد: انا ممكن اقدملك في كليه وتكملي !
جميله: دلوقتي يا وليد ؟ لا طبعا مش هينفع .. خلينا بس نخلص من المشاكل اللي انت فيها الاول وربنا يسهل بعدين
وليد: براحتك بس وقت ما تحبي تكملي بس عرفيني
جميله: ماشي حبيبي

اخر الليل قرروا يرجعوا تحت ضغط من جميله علشان وليد مايتخانقش مع حد ومع الحاهها وافق وفعلا رجعوا واول ما دخل البيت سمع اصوات فاجئته جدا فوق ما يتخيل ويدوب خطي خطوه جوه البيت
@@ اخيرا ظهرت ؟ كنت فين سيادتك ؟

جميله وقفت بره مكانها وما دخلتش علشان ما تعقدش الامور اكتر ...
وليد بص وراه بتوتر بس عرف ان جميله ما دخلتش
@@ مش هترد ولا ايه ؟ للدرجه دي رجوعي صدمه ليك ؟

رواية جميلة الجزء الأول للكاتبة الشيماء محمد الفصل العاشر

اخر الليل قرروا يرجعوا تحت ضغط من جميله علشان وليد مايتخانقش مع حد ومع الحاهها وافق وفعلا رجعوا واول ما دخل البيت سمع اصوات فاجئته جدا فوق ما يتخيل ويدوب خطي خطوه جوه البيت
@@ اخيرا ظهرت ؟ كنت فين سيادتك ؟
جميله وقفت بره مكانها وما دخلتش علشان ما تعقدش الامور اكتر ...

وليد بص وراه بتوتر بس عرف ان جميله ما دخلتش
@@ مش هترد ولا ايه ؟ للدرجه دي رجوعي صدمه ليك ؟
وليد: مفاجأه مش صدمه ... تعالي يا روح قلبي وحشتيني جدا
جريت ونطت اتعلقت في رقبته بحب
وليد: مقولتيليش ليه انك جايه كنت استنيتك في المطار ؟

ندي: كنت عايزاها مفاجأه ... بس سيادتك مش موجود ومختفي والله اعلم انت فين ؟
وليد: روح قلبي انتي معلش حقك عليا
نبيله: هات اختك وادخل يا وليد هتفضلوا كده كتير علي الباب ؟
ندي: تعال ندخل يالا اكيد راجع تعبان
وليد راح للباب يقفله ويشوف جميله فين بس مش لاقيها
ندي: بتبص علي ايه ؟ في حاجه ؟

وليد: لا حبيبي مفيش
يدوب قفل الباب وبيدخل لمح جميله واقفه في الطرقه جوه بتوريله نفسها انها دخلت علشان ما يقلقش عليها فابتسملها ودخل متطمن
ندي: كويس ان ميس مش هنا الليله
وليد: اشمعني يعني ؟
ندي: كانت هتاخدك مني ..
وليد: مش للدرجه دي يعني ... المهم راجعه قد ايه ولا خلاص هتعقلي وتستقري ؟

ندي: هو انا مجنونه ولا ايه ؟ علي العموم انا راجعه استقر .. تعبت من العيشه لوحدي ...
وليد: حمدالله علي سلامتك يا قمر
ندي: المهم احكيلي كل حاجه حصلت من ساعت ما سافرت لحد دلوقتي ...
فضل هو واخته كتير يرغوا مع بعض لحد ما اخته نامت منه .. قام وراح اوضته بعد ما اطمن ان جميله كمان نايمه ...

الصبح فطر هو ومامته كعادتهم وبعد ما مامته خرجت هو دخل يطمن علي جميلته قبل مايمشي
جميله: حمدالله علي سلامه اختك
وليد: الله يسلمك .. كويس انك عرفتي تدخلي .. قلقت عليكي
جميله: عارفه وعلشان كده اول ما دخلت جيت اوريك نفسي
وليد: وحشتيني الليله دي .. تيجي نعملها تاني انا وانتي ؟

جميله: لا ربنا سترها مره ... المهم اطلع بقي لاحسن حد يشوفنا
وليد: قربي مني الاول تعالي
جميله: وليد حد يشوفنا ...سي وليد
وليد: ما تسكتي بقي ايه سي وليد سي وليد اسكتي وقربي ...
جميله: خايفه ست ميس تيجي
وليد: ميس في اسكندريه .. وبعدين معاكي يا جميله بقي ؟
جميله: انا بس مش عايزه اعملك مشاكل
وليد: يبقي تقربي وانتي ساكته.

حطيت ايديها حوالين رقبته وعاشوا مع بعض لحظات مسروقه ومره واحده شالها ورايح ناحيه اوضتها...
ندي صحيت لبست هدومها ونازله مبتسمه تستقبل يوم جديد .. ما لقتش حد .. السفره جاهزه بس محدش عليها ومامتها مفيش .. دخلت المطبخ تشوف علية فين؟ بس ما لقتش حد نهائي والدنيا ساكته وهدوء .. كانت خارجه بس سمعت صوت ضحكه .. وكلام .. ايوه مش عالي بس في حد بيتكلم .. راحت وكان الصوت طالع من اوض الخدم..

واتفاجئت انها سامعه صوت اخوها .. لا اكيد مش هو وليد مالوش ابدا في علاقات مشبوهه وعمره ما يخون ابدا ... بس حتي لو ده مش اخوها في حاجه مشبوهه بتحصل جوه .. مقدرتش غير انها براحه تفتح الباب واتصدمت من المنظر اللي شافته .. اخوها في السرير مع الخدامه !
كانت صدمه عمرها لان طول عمرها وليد مثلها الاعلي في كل شيء ... وليد وبس اللي ما بيغلطش وليد هو كل حاجه ... مقدرتش تشوف اكتر من كده

ندي: مش ممكن
وليد بص بسرعه للباب واتفاجيء باخته فشد الغطا عليه بسرعه وهيا جريت .. نادي عليها بس ما ردتش .. قام بسرعه يلبس هدومه
جميله: سي وليد
وليد: بس يا جميله خالص دلوقتي لازم الحقها
في خلال دقيقه كان لابس وطالع وراها حافي.

لحقها في الجنينه قبل ما تركب عربيتها شدها ووقفها ودموعها مغرقه وشها
ندي: ابعد وسيبني .. سيبني خالص ما تلمسنيش
وليد: طيب اسمعيني
ندي: اسمع ايه ؟ هتبررلي عملتك دي بإيه ؟ غير انك استغليت ان محدش في البيت وبتستعبط مع الشغاله .. الشغاله يا وليد .. عمري ابدا ما تصورتك من النوعيه دي .. انت اكبر من كده .. انت مش كده .. مش انت الراجل اللي يستغل سفر مراته علشان حاجه زي دي .. ارجوك قولي انك مش كده..

وليد: خلصتي كلامك ولا لسه ؟
ماردتش بس دموعها مستمره وصوت عياطها
وليد: جميله مش شغاله
ندي ضحكت بتريقه: هاه
وليد: جميله مراتي يا ندي ... مراتي علي سنه الله ورسوله
ندي بصتله بصدمه اكبر والدموع جمدت في عنيها
ندي: يااااه يا وليد ... يا ريت كانت مجرد شغاله وانت في نزوه معاها ؟

وليد: انتي بتقولي ايه ؟ بقولك مراتي
ندي: سمعتك .. مكنتش متخيله انك منهم
وليد: انا مش فاهم حاجه .. من مين ؟
ندي: من الرجاله اللي كل همها الوريث وبس وعلشان مراتك ما خلفتش روحت تتجوز عليها ومين ؟ الشغاله .. وبتخون مراتك في بيتها وجاي تقولي انها مراتك.. ده ايه الجبروت بتاعك ده ؟ انت ايه ما بتحسش ؟ ما بتقدرش ؟ انت مش وليد اللي انا اعرفه لأ ؟

وليد: انتي عامله زي البغبغان اللي بيتكلم وخلاص ولا فاهم ولا ساكت .. انتي مش فاهمه اي حاجه
ندي: افهم ايه تاني ؟
وليد: تفهمي الموضوع من اوله
ندي: فهمني يا ... يا سي وليد
وليد: من غير تريقه .. هدخل اكمل لبس هدومي ونطلع انا وانتي وافهمك الحكايه كلها .. اصبري دقيقتين
سابها ودخل عند جميله يكمل لبس هدومه
جميله: لحقتها ؟ زعلانه منك ؟ زعلتك ؟

وليد وقف ومسك وشها بايديه: روح قلبي ما تخافيش عليا .. انا بعرف اتصرف ما تقلقيش .. وبعدين ندي انسانه جميله مش زي ميس ولا امي ما تقلقيش منها ...
جميله: اهم حاجه انها مش زعلانه منك
وليد: انا وندي مش بنزعل بسهوله من بعض ما تقلقيش علينا .. يالا هطلعلها عايزه حاجه ؟
جميله: سلامه عمرك.

وليد ابتسملها وخرج لاخته واخدها ومشيوا يقعدوا في مكان وحدهم يتكلموا فيه براحتهم
ندي: ادينا اهو لوحدنا قولي عايز تقول ايه وهتبرر ازاي اللي انت عملته واوعي تقولي الخلفه والجهل ده ..
وليد: هو فعلا الموضوع يخص الخلفه بس مش بالطريقه اللي في دماغك انا هحكيلك
حكالها وليد كل اللي حصل من ساعت ما رجع البيت واتفاجئ بجميله في بيته لحد ما دخلت هيا عليها وشافتهم من شويه ...

وليد: بس يا ستي دي كل الحكايه
ندي: يااه كل ده حصل وانا معنديش اي خبر .. مين يعرف بجوازكم
وليد: غيرنا احنا؟ ولا اي مخلوق
ندي: ممكن حد من الشغالين
قاطعها: الشغالين دول من ايام ابوكي اللي يرحمه كلهم ثقه محدش فيهم هيفتح بوقه بحرف ..
ندي: وميس متقبله الوضه ده ازاي ؟ ازاي بتسمحلك تنزل عند جميله ؟

وليد: ميس انسانه عمليه مش بتاعت عواطف ومشاعر والكلام ده .. هيا وافقت وهيا صاحبه الفكره كمان .. ندي انتي عارفه ان انا وميس مش بينا الحب والعواطف والكلام ده احنا علاقتنا ... تقدري تسميها علاقه عمليه .
ندي: انت عايز تفهمني انها مش بتغير ؟
وليد:مش غيره حب
ندي: هو في انواع للغيره ؟

وليد: طبعا في غيره الحب ودي معروفه وفي غيره السلطه والجاه ودي زي غيره اعمامك وفي غيره حب التملك والمظهر ودي بقي غيره ميس .
ندي: ايه غيره التملك دي ؟
وليد: ان انا جوزها فازاي افضل عليها مجرد شغاله اقل منها في كل حاجه .. واحده شايفاها مش ند ليها اصلا واخدت قلب جوزها .. وده اللي مجننها .. لكن مش حب ابدا.

ندي: مين قال انه مش حب ؟ مش يمكن كرامه مجروحه ؟
وليد: الكلام ده لو انا طلبت منها الوضع ده او جبرتها تقبل لكن انا اترجيتها ترفض وحاولت معاها بكل الطرق وهيا حكمت العقل والمنطق والشركه والبيزنس وطالما دول اولوياتها يبقي مفيش الحب.. الحب يا ندي مجنون ما بيعترفش بكل الفواصل والمهاترات دي .. الحب غيره مجنونه .. الحب تضحيه .. الحب اهتمام ومشاعر ..

الحب احساس بالحبيب وتفانيك في اسعاده .. ميس معندهاش اي شيء من الكلام ده .. ميس ابوها اقنعها انها لازم تجيب وريث يورثه ويورثني انا كمان في حاله لو حصلي حاجه .. فهيا وافقت علشان تورثنا
ندي: ايه البشاعه دي ! انا فعلا من زمان ملاحظه علاقتكم مبنيه علي الاحترام ومحستش بحب بس مش للدرجه دي المهم سيبك انت ...انت بقيت شاعر .طيب وجميله ؟

وليد ابتسم: جميله نبع من كل ده .. بتدي من غير حدود .. من غير مقابل .. بتهتم بكل حاجه .. جميله ... هيا جميله
ندي: انت حبيتها ؟
وليد اتنهد: عشقتها مش بس حبيتها
ندي: وهتعمل ايه لما تقضي مهمتها ؟ ازاي هتمشيها من بيتك وتاخد ابنها وترميها ؟
وليد: مش عارف .. بس ما اعتقدش اني ممكن اعمل كده ابدا .. لو هختار ما بين ميس وجميله اعتقد يا ندي اني هختار جميله .. المهم اللي حكيتهولك سر بينا ..
ندي: سر بالنسبه لمين ؟

وليد: الكل .الكلام ده كان بيني وبينك بس .. حتي امك ما تعرفش حاجه عن حبي لجميله .. انتي وبس فهمتي ؟
ندي: فهمت حبيبي ما تخافش
وليد: طيب يالا بينا المجموعه ؟
ندي: يالا بينا
في المجموعه عصابه الاعمام متجمعه وبيستقبلوا علاء يعرفوا منه اخر الاخبار ...

وليد دخل هو وندي مكتبه بيضحكوا وندي اخرت لحظه بترد علي الموبيل
ميس: بتضحك مع مين وصوتك جايب اخر الدنيا
وليد: يا بنتي خضتيني .. الناس تقول سلام عليكم ؟ تقول انا جيت ؟ تقول احم مش بتضحك مع مين ؟
ميس: بتضحك مع مين الاول ؟
وليد: انتي جرالك ايه ؟ انتي مكنتيش كده ؟

يدوب هترد دخلت ندي: حبيبي دي ماما بتطمن علينا ... ميس ؟ وحشتيني
ميس: ندي ؟ جيتي امتي ؟
سلموا علي بعض وقعدوا يتكلموا ووليد ساكت باصصلهم وبيدرس في ميس ... هيا فعلا اتغيرت ولا هيا كانت كده من الاول وهو مش واخد باله ؟ ولما ظهرت جميله شاف الفرق ؟ سؤال مش عارفله اجابه ؟
ميس: طيب انتو هتقضوا اليوم هنا ولا ايه ؟

وليد: اه عندي كذا اجتماع مهمين وندي عايزه تشوف النظام علشان تستلم شغلها معانا
ميس: انتي هتستقري ؟ طيب كويس خلينا احنا كمان نبقي عصابه وتبقي المعادله متعادله شويه اربعه قصاد اربعه
ندي ضحكت: علي فكره انا احسبيني باربعه لوحدي يعني كده حرام خالص عليهم
ميس: ماشي يا ستي .. انا هروح ساعتين وارجع هاخد شاور واغير هدومي وارجع
مشيت وعدت علي علاء قبل ما تمشي.

ميس: ازيكم كلكم .. علاء ما تنساش تكلم المستشفي وتطمن ايه الاخبار والمهندسه الجديده دي بيضت وشنا ولا ؟
علاء: نسمه ؟ اكيد طبعا وبعدين كل حاجه تمت تحت اشرافي
ميس: برضه اطمن .. انا ساعتين وراجعه
علاء: امال وليد فين ؟ مجاش ولا ايه النهارده كمان ؟
ميس: لا وليد موجود ومعاه ندي بس تقصد ايه بالنهارده كمان ؟
علاء: اصله امبارح مجاش المجموعه نهائي
ميس: امال كان فين ؟

علاء: الله اعلم
خالد: ميس لحظه .. انتي قلتي ندي مع وليد ؟ تقصدي ندي ندي ولا غيرها ؟ هيا رجعت من السفر ؟
ميس: ايوه هيا رجعت امبارح وممكن تكون هيا سبب ان وليد مجاش امبارح .. يالا باي ...
ميس مشيت ودماغها مشغوله بوليد راح فين امبارح ؟ ومع مين ؟ وصلت البيت اخيرا وبتلقائيه دورت علي جميله كانت في اوضتها وقفت تتفرج عليها لحد ما لمحتها.

جميله: خير يا هانم حضرتك محتاجه حاجه ؟
ميس: وهحتاج منك انتي ايه ؟ تقدري تعمليلي ايه ؟
جميله: اعملك فطار مثلا .. او اي حاجه
ميس: انا مش عايزه منك غير حاجه واحده وبس انك تطلعي بره البيت ده
جميله: دي حاجه مش بإيدي حضرتك .. حضرتك اطلبي حاجه اقدر انفذهالك
ميس: وليد كان فين امبارح طول اليوم ؟

جميله اتوترت: ده سؤال حضرتك تسأليهوله مش انا .. واكيد سي وليد مش هيجي يقولي هو رايح فين ؟
ميس اتنرفزت منها وسابتها وطلعت اوضتها ... بس لاحظت حاجه .. جميله وشها مسمر شويه زي ما يكون قضت اليوم في الشمس يا تري ليه ؟ ممكن تكون نبيله مثلا طلبت منها شغلانه في الجنينه ؟ بس نبيله مش بتحب تشغلها .. امال ايه سر لونها الجديد ده ؟

في الشركه
خالد: مش المفروض نروح نسلم علي ندي نقولها حمدالله علي السلامه ؟
علاء ضحك: هو انت لسه ؟
خالد بنرفزه: لسه ايه ؟ تقصد ايه ؟
علاء رفع ايديه باستسلام: ولا اي حاجه .. تعال نروح
لسه هيخرجوا قابلوا وليد وندي جايين عندهم.

خالد: احنا كنا هنيجي نسلم علي الانسه ندي
ندي: الانسه ندي ؟ من امتي الادب ده كله ؟ ايه يا خالد هو احنا غريبين عن بعض ولا ايه ؟
وليد: شكلهم بينسوا اننا اولاد عم ومتربين في بيت واحد
علاء بيغير الموضوع: ازيك يا ندي حمدالله علي السلامه
ندي: اهلا يا علاء اخبارك انت ايه ؟

خالد: حمدالله علي السلامه يا ندي
ندي: الله يسلمك خالد .. رجعت امتي ؟
خالد: يدوب
دخلوا وسلموا علي اعمامهم وقعدوا كلهم مع بعض
وليد: ندي هتشتغل معانا .. في التسويق
خالد: التسويق ده تخصصي وانا هكون اكتر من سعيد اني اعرفها كل حاجه . تحبي تبدئي امتي ؟
ندي: من بكره الصبح ايه رأيك ؟

خالد: اوكي تمام هستناكي
وليد: طيب تمام هقوم انا بقي علشان عندي اجتماع .. عمي محي جاي ولا ايه ؟
محي: اه يالا بينا
وليد: ندي السواق في اي وقت كلميه هيروحك
خالد: انا هوصلها
قالها بسرعه والكل بصله قوي
خالد: عايز اسلم علي مرات عمي بقالي فتره ما شفتهاش
وليد: اوكي روح ... يالا سلام.

وليد اخر النهار روح كعادته واول ما دخل قابل ندي
ندي: اخيرا رجعت ؟ الجو زهق موت
وليد: كنتي خرجتي انتي وميس
ندي: مراتك نايمه من ساعت ما رجعت الصبح ومش راضيه تصحي
وليد: ههههه .. هيا فعلا بتنام كتير
ندي: قعدت شويه مع جميله
وليد ابتسم: وايه ؟

ندي: مش هقولك غير ان اسمها علي مسمي .. جميله من جوه قبل من بره
وليد: فعلا انسانه مميزه ومختلفه وطيبه وبتدي بلا حدود
ندي: طيب بس لاحسن حد يسمعك
هنا جميله خرجت والاتنين بصولها
جميله: حمدالله علي سلامتك .. اجهزلك الغدا
وليد ابتسم: تعالي الاول
قربت منه وشدها من ايدها قربها اكتر وفضل ماسك ايدها
وليد: ندي بتشتكي منك ليه ؟ ضايقتيها في ايه ؟

الاتنين بصوله باستغراب وخصوصا ندي
جميله: انا ؟ ( بصت لندي )انا ضايقت حضرتك؟
ندي: مش عارفه انتي ضايقتيني ؟
جميله: حقك عليا لو عملت حاجه ضايقتك بس ايه اللي ضايقك مني ؟
ندي لاخوها: اخص عليك يا وليد
ندي قامت وحضنتها: وليد بيهزر مش اكتر يا قمر.

جميله ابتسمتلها: علي العموم برضه لو اي حاجه ضايقتك قوليلي علي طول
ندي: اوكي يا قمر .. سمعت ان اكلك لا يعلي عليه مش هتدويقيني ؟ انا مت من الجوع وانا بستني جوزك ده
جميله: ادوني دقيقتين
قامت دخلت ووليد اعتذر من اخته ودخل وراها وندي ضحكت عليه لانها حسته مراهق بيحب جديد
وليد دخل وري جميله وقفها في الطرقه وزقها علي الحيطه وباسها وحاصرها بين ايديه
جميله: اختك بره ومراتك فوق
وليد: وحشاني اعمل ايه ؟

جميله: انت اكتر
وليد: مش باين امال بتبعديني عنك ليه ؟ ايديكي مش حوالين رقبتي ليه ؟
جميله حطت ايديها حوالين رقبته وبادلته نفس حراره مشاعره لان هو كمان واحشها جدا
وليد ابتسم بحب وساند دماغه علي دماغها
وليد: كده احسن بكتير .. من هنا ورايح ده اولا والكلام ثانيا
جميله ما ردتش عليه بس بصتله
وليد بهمس: مالك ؟ بتبصيلي كده ليه ؟

جميله: هو انا لو قلتلك تعال ندخل اوضتي انا وانت شويه هتقولي ايه ؟
عنيهم متعلقه لبعض فتره طويله و وليد قري في عنيها حاجات كتير ومره واحده شالها ودخل بيها اوضتها وطفي نار بعدها عنه ...
جميله: اختك قالت انها جعانه واحنا بقالنا كتير هنا
وليد ضحك: انا كنت جعان اكتر ..
جميله: طيب نقوم ؟

وليد ايده حواليها وهيا علي صدره: قومي
جميله: طيب فك ايديك من حواليا
وليد: طيب ما تقومي انتي انا مش ماسكك
جميله: انت شيل ايديك من حواليا
وليد: انتي قومي
جميله اخدت نفس طويل: مش عايزه اقوم ابدا .. عندي استعداد افضل عمر بحاله كده
وليد: يبقي خلاص ما تقوميش خليكي كده
جميله: ومراتك.

وليد حط ايده علي شفايفها: هششش مش عايز اسمع يا جميله خليكي في حضني وبس
قامت قعدت فوقه وبصتله بكل حب
وليد: افردي شعرك
فردته وغطي ظهرها كله ونازل عليه وهو اتعدل ضمها في حضنه كتير ... وفجأه الباب خبط واتفتح فتحه صغيره واللي فتحه ما دخلش بس اتكلم
ندي: مراتك صحيت ونازله اطلع من عندك بقي انا هعطلها شويه
قفلت الباب وسابتهم وجميله قامت تلبس وهو قام بتكاسل
جميله: قوم يا سي وليد.

وليد: مش عايز اقوم .. انتي مراتي زيك زيها .. هيا المفروض تفهم كده
جميله: مش وقته كلامك ده ابدا .. بلاش مشاكل بقي .. يالا اتحرك .. انا هروح اجهزلك الغدا
وليد: اوكي روحي
قبل ما تخرج
جميله: صح مراتك سألتني امبارح انت كنت فين وليه ما رحتش الشغل ؟
وليد: قولتيلها ايه ؟

جميله: معرفش .. قولتلها انك مش بتقولي هتروح فين وبتيجي منين
وليد: ههههه ماشي
وليد خرج بعدها بجاكته بدلته علي كتفه والكرافت حوالين رقبته مفتوحه وقميصه كمان مفتوح يدوب زراره واحده او اتنين مقفولين
وطالع علي السلم قابل ميس وندي نازلين وميس بصتله من فوق لتحت كتير قوي
ميس: ايه اللي مبهدلك كده ؟ من امتي بترجع مفتح هدومك كلها ..

وليد: فكتهم وانا طالع علشان اغير بسرعه وانزل
ميس: حتي سوسته بنطلونك فكيتها ؟ ولا نسيت تقفلها ؟
وليد زقها وطلع: ما تشغليش بالك يا ميس وما تفكريش كتير ..
سابهم وطلع اوضته وهيا هتولع
ندي: مالك يا ميس اهدي ؟
ميس: اخوكي عايز يجننيني .. بيعاقبني البيه علي قرار غبي اخدته
ندي: قرار ايه ؟

ميس: ما تشغليش بالك انتي انا هعرف اتصرف معاه
شويه ووليد نزل كانت السفره جاهزه وعلية قالتلهم ان الاكل جاهز ونبيله نزلت وقعدوا مع بعض كلهم
نبيله: ياااه بقالنا كتير ما اتجمعناش كده
ندي: فعلا وحشتني اللمه دي قوي ...
وليد: حمدالله علي سلامتك يا قمر ..

ميس: الا قولي يا وليد
وليد: اقولك ايه ؟
ميس: امبارح ما روحتش الشركه ولسه عارفه من ندي انها كانت عامله رجوعها مفاجأه .
وليد: وبعدين ؟
ميس: قضيت يومك فين ؟
وليد: كان عندي شويه مشاغل بره الشركه قضيتها
ميس: مشاغل ايه اللي تاخدك النهار كله وتختفي ومحدش خالص يعرف مكانك ؟
وليد: مشاغل خاصه بيا
ميس: ومقولتليش عليها ليه لما كلمتني ؟

وليد: انتي مش ملاحظه انك بتحققي معايا ولا ايه ؟
ميس: التحقيق بيكون لما الواحد عنده حاجه مخبيها .. انت مخبي ايه ؟
وليد بصلها: انا مش مخبي حاجه ... بس انتي مش قادره تفرقي بين احترام مشاعرك و تخبيه حاجه في فرق
ميس: احترام مشاعري ؟ هو فين احترامك ده ؟ لما اكون مسافره يومين وانت ترجع من الشغل تدخل لخدامتي الاول قبل ما تجيلي يبقي فين احترامي ده ؟

وليد بكل هدوء: علشان انتي كنتي نايمه وهيا كانت بتستقبلني .. اتعلمي منها ازاي تستقبلي جوزك
هنا ميس وقفت بانفجار: انا اتعلم من الفلاحه دي ؟ انت جري لعقلك ايه ؟
وليد: الفلاحه دي بتعرف ازاي تعامل جوزها وتراضيه
ميس: قول تخدمه ... مكنتش متخيله انك راجل رجعي ومتخلف كده والزوجه عندك خدامه ؟

وليد: ايوه انا متخلف ورجعي وعايز مراتي تخدمني .. عايزها تستقبلني علي الباب .. عايزها تعملي اكلي بايديها وتأكلني .. عايزها تجهزلي حمامي وتجهزلي هدومي .. عايزها وانا تعبان تفضل جنبي .. عايزها لما ادخل عليها تتعدل وتقابلني .. عايزها تشوف انا بحب ايه وتنفذه .. عايزها تكون هيا كل شيء .. عايز اكون انا محور حياتها ومنتهي امانيها .. عايز اكون انا رقم واحد في حياتها ومفيش اي شيء مهما يكون قبلي .. ولا فلوس ولا جاه ولا شغل ولا شركه ولا اهل ولا اصحاب ولا اي شيء ..مفيش حد قبلي ولا حد بعدي .. انا مش عايز مجرد واحده بقعد معاها في السرير نص ساعه وخلاص...

فهمتي ولا لسه ؟ هي دي الزوجه .. يا تري بقي انتي بتعملي ايه من كل ده ؟ استني افكر ... ولا حاجه ( قام ومشي خطوتين ورجع تاني ) لا افتكرت بتعملي حاجه واحده النص ساعه اللي في السرير ... بعد اذنك

سابلهم البيت وخرج متنرفز وهيا كانت عايزه تكسر كل حاجه وفعلا بدئت تكسر في الاطباق اللي علي التربيزه ومهما نبيله او ندي يوقفوها الا انهم مش قادرين عليها فسابوها
ميس: كله منك انتي ؟ انتي فضلتي تقنعيني اوافق يتجوز ؟ انا مش عارفه انا ازاي سمعت كلامك ؟ انتي مجرد حمي عايزه ابنها يخلف باي تمن ! كنت متخلفه لما افتكرت انك بتحبيني...

نبيله: انا لو مش بحبك كنت جوزته من كام سنه فاتت واحده بمستواه لكن انا بقيت عليكي
ميس: ما انتي اهو جوزتيه ...
نبيله: جوزته اه .. بس اوعي تعلقي تقصيرك في حق جوزك عليا .. او حتي علي جميله ..
ميس: دلوقتي بقيت انا مقصره في حقه ؟ انتي كمان بتقولي كده ؟

نبيله: ايوه مقصره .. عمرك ما شفتك بتتنازلي وتقدميله اي حاجه .. عمرك ما دخلتي مثلا المطبخ تعمليله حاجه بيحبها ... عمرك ما تفنتني تعمليله اي حاجه .. عمره ما تعب مثلا وفضلتي جنبه .. شغلك ونفسك واصحابك اهم منه مليون مره ... وبعدين بتلوميه دلوقتي هو؟ ليه ؟ انتي وافقتي يتجوز علشان يخلف علشان الولد يورث كل حاجه وانتي مامته وبالتالي هتفضل الشركه تحت امرك .. فمتجيش دلوقتي تصرخي وتتجنني وتلوميني انا..

ميس: ماشي يا حماتي مش هلومك .. انا غلطت وانا هصلح غلطي .. انا هخرج جميله بطريقتي من البيت واياك حد يقف في وشي
سابتهم هيا كمان ومشيت وراحت عند ابوها تحكيله اللي حصل
شريف: غلطانه .. غلطانه .. غلطانه
ميس: تاني ؟ هتقولي اكسب حماتي تاني ؟
شريف: حماتك عندها حق .. وجوزك كمان عنده حق
ميس: انت بتقول ايه ؟

شريف: بقول انك بتلعبي غلط .. الراجل مهما كبر وعلي لفوق الا ان تفكيره واحد .. هو في الاول كان عادي مش فارق معاه لكن دلوقتي انتي اتحطيتي في مقارنه تقدري تكسبيها بسهوله لكن انتي بتخسريها بغباءك ... فجأه اتحولتي لانسانه غيوره متهوره غبيه نكديه شريره .. انتي مش عارفه تكسبي جوزك وتضميه في حضنك بالعكس انتي بتبعديه ..

ميس: انا مش هدخل في منافسه مع الغبيه دي .. انا هزيحها من طريقي
شريف: يا بنتي اسمعي كلامي .. وليد بيحبك فكريه بالحب ده
ميس: لا طبعا هو هيرجع زاحف علي رجليه
شريف: هتخسريه اسمعيني
ميس: مش هسمعك تاني .. انت حطتني في الوضع ده مش هسمع لحد تاني بعد اذنك
روحت وشويه ووليد كمان روح دخل اوضته بصمت وهيا عطته ظهرها وهو كمان وناموا ...

الصبح بيفطروا في صمت مسيطر علي الكل
وليد: جميله .. هاتيلي القهوه
جميله جابت القهوه وهيا بتصبها شعرها اتفك ولانه ناعم وطويل اتفرد كله علي وليد .. علي كتفه ووشه وهو ابتسم وشاله من علي وشه بعيد
ابتسامته ما تخطتش اللحظه بس ميس شافتها
ميس: لمي شعرك ده ... وبعدين مش كنتي بتلبسي طرحه ولا قلعتيها ؟

جميله بارتباك: لا مقلعتهاش بس مفيش رجاله هنا وعم سعيد اجازته النهارده
ميس: فقلت اقعد بشعري وافرده كمان ؟ شعرك لو شوفته تاني مش هيحصلك كويس
وليد بهدوء لجميله: اقعدي بالوضع اللي يعجبك طالما مفيش رجاله في البيت .. عايزه تفكيه ؟ تغطيه ؟ تلميه براحتك .. روحي يالا
جميله مشيت وهو شرب قهوته بمنتهي الهدوء
ميس: انت بتعاندني ليه ؟

وليد: انتي اللي بتصغري نفسك قوي وبتهتمي بتفاهات .. انا رايح علي الشركه .. اللي هيجي معايا يقوم
هو قام وندي: انا جايه معاك
بصت لميس: مش هتيجي ؟
ميس: اسبقوني .. ورايا مشوار قبل الشركه
خرجوا الاتنين علي الشركه ونبيله كمان خرجت راحت النادي وفضل جميله تحت رحمه ميس اللي قامت علي المطبخ .. علية كانت قاعده بتفطر هيا وجميله
علية: عايزه حاجه يا هانم ؟

ميس: اه عايزه
راحت لجميله وشدتها من دراعها: انا هوريكي ازاي تفردي شعرك كده .. هاتي مقص يا علية خليني اادبها
علية: يا هانم اهدي بس
حاولت تدخل بينهم بس ميس زقتها وقعتها
جميله: والله ما قصدت افرده ارجوكي يا هانم مش هقلع الطرحه تاني بس الله يخليكي..

ميس: بجد ... لا ده كان زمان دلوقتي مش هسيبك .. وشعرك هريحك منه خالص
بتجرجرها وتطلعها اوضتها وجميله بتحاول تشد نفسها منها بس مش قادره
ميس: وريني بقي يا وليد هتعمل ايه ؟ هقدملك شعرها النهارده هديه
وصلت اوضتها وجابت مقص وبدئت تقص شعرها وسط عياط جميله ...