قصة جميلة بنت بسيطه فلاحه

رواية جميلة الجزء الأول للكاتبة الشيماء محمد الفصل الثالث والعشرون

علاء: انتي ايه اللي بتقوليه ده ؟
نسمه: بقول اللي ابوك وابن عمك قالوه .. انت حرامي ؟
علاء: لا طبعا .. اللي هما بيتكلموا فيه ده بيزنس وحوارت قديمه انتي مالكيش فيها
نسمه: اي شيء يخصك قديم جديد يبقي ليا فيا
علاء: بس مش في الامور دي
نسمه: ايه هو انا مراتك بشغل جزئي ولا ايه ؟ فهمني.

علاء: لا يا نسمه ده موضوع ما يخصكيش .. علاقتي بوليد ومشاكلها ما تخصكيش
نسمه: خلاص يبقي انا اسفه انا مش هروح معاك البيت
علاء: انتي بتلوي دراعي ولا ايه ؟
نسمه: لا يا علاء بس انا مش هقدر اطمن اعيش مع راجل ممكن يسرق ابن عمه الفكره نفسها مرفوضه ..
علاء: انا مش هسرق ابن عمي انا بس باخد حقي
نسمه: انا عمري ما امنت بمبدأ الغايه تبرر الوسيله ده ابد .. السرقه ملهاش مسميات تانيه بس هستغرب ليه قبل كده كان عندك مبررات للاغتصاب فعادي انك تبرر للسرقه.

علاء: انتي كده بتظلميني وبتخلطي الامور ببعض .. انا عمري ما فكرت اغتصبك
نسمه: امال ايه ؟ انا عديت الموضوع لاني بحبك بس الظاهر اني كنت غلطانه كنت بقنع نفسي ان انت انسان كويس وضعفت في لحظه بسبب حبك ليا لكن كمان تسرق ومين اقرب الناس ليك ! فده لأ وألف لأ لحد هنا ولأ يا علاء مش هعيش مع راجل عنده استعداد يدخل بيتي مليم واحد حرام.

علاء: ده مش حرام ده حقي فاهمه حقي
شرحلها وجهه نظره وشرحلها كل المشاكل اللي حصلت ووجهه نظر ابوه وكلام وليد نفسه وهيا ساكته تماما لحد ما هو كمان خلص وسكت
علاء: هاه ؟ يبقي حقي ولا لأ ؟
نسمه: لا مش حقك .. انت سبق وقولتلي انك عشت عمرك بره وراجع من كام سنه صح ؟ وخالد كمان لسه راجع قريب صح ؟
علاء: ايوه صح بس ده ايه علاقته ؟

نسمه: ده هو ده الاساس .. انتو سافرتو ومشيتو وعشتوا حياتكم وابو وليد هو اللي فضل راعي الشركه بغض النظر هو فعلا جدك سابها مديونه او سابها كويسه بس اللي استلمها هو ابو وليد .. هو اللي اشتغل وهو اللي كبرها ومن بعده مسكها ابنه وكمل مشوار ابوه جايين انتو دلوقتي بعد ما بقت مجموعه كبيره وليها اسمها ووضعها تفتكروا ان ليكم حق ! لا طبعا والف لأ مش حقكم ..

ده غير كمان لو فعلا سابها مديونه وده المنطقي لانه لو سابها ناجحه مكنش عمك وابوك سابوها وسافروا لكن العقل بيقول انهم لقوها صفقه خسرانه فسافروا وسابوها لاخوهم ولما لقوها نجحت رجعوا فبالتالي المفروض تحمد ربنا ان ابن عمك عنده اصل ورضي يشغلكم ويعتبركم اخواته انت وخالد
علاء: انتي بتقولي ايه ؟

نسمه: بقول ان وليد طلع جدع وراجل وشغلكم ومسككم كلكم مناصب كبيره واعتبركم شركاء معاه واحد غيره كان قالكم بره مالكوش مليم احمر واخرتها ايه بتحاولوا تشاركوه في ملكه وملك ابوه وعايزين تسرقوه ده انتو ايه ؟
علاء: انتي مراتي المفروض تكوني في صفي .. مش في صف وليد.

نسمة: انا لا في صفك ولا صف وليد انا مع الحق .. الحق بيقول ان الشركه لوليد وتحمدوا ربنا انكم شغالين فيها
علاء: لا طبعا كلامك غلط والمفروض ان التلاته يكونوا واحد وبالتالي انا وخالد و وليد واحد برضه
نسمه: يعني اللي يشتغل زي اللي ما يشتغلش ؟ ده في انهي شرع ولا انهي منطق ده ؟ ان الكل يتساوي ؟ لو انت مكانه كنت هتديهم ؟ كنت حتي هترضي تشغلهم ؟ حط نفسك مكانه الاول قبل ما تتكلم.

علاء: بقولك ايه انا ليا حق وهاخده .. بالذوق بالعافيه هاخده من وليد فهمتي ؟
نسمه: للاسف فهمت يا علاء
علاء: يالا بقي علي البيت
نسمه: انا اسفه بس مش هقدر اروح معاك
علاء: انتي بتعملي كده ليه ؟ علشان وليد ؟ مهتمه بيه كده ليه ؟ خايفه عليه كده ليه ؟ ( وفجأه وكأنه استوعب حاجه ) اوعي تكوني ... بتحبيه ؟
نسمه اتفاجئت: نعم ؟ بحبه ؟ انت الظاهر اتجننت.

علاء: من زمان وانتي بتهتمي برأيه وبمنظرك قدامه وبتاخدي كلامه ثقه والنهارده زعلتي جدا انه وجهلك كلمه معناه ايه ده كله؟ غير انه حب واهتمام بس انا اللي غبي ومش واخد بالي ؟ ده حتي هو بيقولك النهارده انه امله وظنه خاب فيكي قصده انك اتجوزتيني صح ؟
نسمه: انت مش طبيعي .. لا انت غبي .. انا بحبك انت يا غبي وليد مجرد حد محترم الواحد غصب عنه بيحترمه وزعلي علشانك انت مش علشانه .. زعلانه لاني شايفه جوزي انسان مستعد يسرق او ياخد حق مش حقه .. زعلي عليك انت .. انت وبس لكن الانسان الغبي ممكن يغير في الحقايق ويشوف علي مزاجه.

اطلع بره يا علاء وماتجيش هنا تاني الا اذا كنت مستعد تتغير وتعيش انسان نظيف وما يبصش علي اللي في ايد غيره ارجوك علاء خليني اثق فيك .. خليني اعيش مطمنه مع جوزي ... اطلع بره ارجوك
وهو خارج وقفته وابتسم بس ابتسامته اختفت بسؤالها
نسمه: انت ليك يد فعلا في اللي حصل لوليد ؟
علاء بصلها بعنف: لأ مش للدرجه دي يا نسمه
نسمه: ليه مش للدرجه دي انت مش لسه بتقول بالذوق او العافيه ماهي دي العافيه؟
علاء: انا معنديش رد ليكي.

خرج علاء وهيا قعدت مكانها تعيط ودخلتلها صفاء: قولتيله ؟
نسمه: لا طبعا مقولتلوش .. ازاي اقوله ؟ بيفكر بطريقه غريبه وعايز يسرق وليد ده مش بعيد يكون بيفكر يخلص منه انتي متخيله ؟
صفاء: طيب كنتي قولتيله انك حامل وده هيخليه يعيد حساباته كلها ويفكر من جديد
نسمه: لا طبعا .. ممكن يضحك عليا بكلمتين .. مش هقوله ومش هعرفه غير لما احسه فعلا عايز يتغير.

علاء خرج من عندها وهو عايز يرتكب جنايه واتصل بخالد واتقابلوا سهروا مع بعض ..وكل واحد بيتكلم في مواله والتاني مش سامعه خااالص
ندي فضلت تفكر في كلام اخوها واخيرا وصلت ان لو خالد فعلا له يد في اللي حصل لوليد فأكيد اخوها مش هينكر ده لمجرد انهم يتصالحوا لان ساعتها اقل شيء هيخاف عليها منه . يبقي فعلا وليد عنده حق وهيا ظلمت خالد ولازم تعوضه عن هجرها ليه بالشكل ده ..

لبست اشيك فستان عندها وطلبت عشا وشغلت موسيقي وحطت شموع وانتظرت خالد يرجع .. ساعه وراها ساعه والانتظار طال
اتصلت بيه بس تليفونه مغلق .. الوقت اتأخر وبدئت تقلق لانه ما بيتأخرش كده ابدا ..
حاولت تتصل بعلاء بس هو كمان ما بيردش وكلمت نسمه بس عرفت منها ان علاء مش معاها .. اخيرا اتصلت بوليد
وليد: ندوش حبيبي خير ؟ مش عوايدك تكلميني اخر الليل ؟
ندي: لا عادي بس بطمن عليك انت وجميله ؟

وليد: احنا كويسين .. ندي في ايه مالك ؟ قولي علي طول
ندي: مفيش بس خالد اتأخر قوي وتليفونه مقفول وهو مش عوايده يتأخر حتي اتصلت بعلاء مردش ونسمه قالت ان علاء مش معاها بس
وليد: كل ده وبس ؟ لفيتي علي الكل وانا اخر واحد فكرتي تكلميه ؟
ندي: علشان بس انت تعبان مش اكتر ومرضيتش اقلقك
وليد: هعديها كده .. بس تاني مره انا اول حد تفكري تكلميه سامعه ؟
ندي: حاضر.

وليد: اديني نصايه كده هعرفلك هما فين .. وربنا يستر
ندي بقلق: يستر ازاي قصدك ايه ؟
وليد: قصدي انك تكوني اتأخرتي قوي يا ندي من امتي وانا بقولك انه مالوش دخل ؟ احساس الظلم وعدم الثقه وحش يا ندي يالا ما علينا مش وقته شويه وهكلمك
قام يلبس وجميله جنبه: طيب لازم تنزل بنفسك ؟ ابعت اكرم
وليد: حبيبي دي اول مره ندي تطلب مني حاجه مش هبعت اكرم فيها
جميله: بس انا خايفه عليك.

وليد باسها: خليكي انتي بس مستنياني وماتناميش هنكمل كلامنا لما ارجع باذن الله اوك ؟
جميله ابتسمت: ما تتأخرش
نزل وليد وطبعا اكرم اول ما شافه خارج راحله: علي فين يا باشا هنروح فين ؟
وليد وقف وابتسم: هنروح ؟
أكرم: أكيد مش هتخرج لوحدك في وقت زي ده
وليد: ماشي يالا مش هجادلك لاني مش هخلص منك
بعد شويه وليد: بس اقف هنا
اكرم باستغراب: هنا ؟ هنقف هنا ؟

وليد: اه ايه مالك ؟
اكرم: لا ابدا براحتك بس هو حضرتك متخانق مع جميله هانم ؟
وليد ضحك: ليه ؟
اكرم: مش عوايدك تسهر في اماكن زي دي
وليد: مش جاي اسهر يا فصيح واطمن مش متخانق مع جميله يالا
نزلوا بس اكرم لسه مستغرب: طيب جايين هنا ليه دلوقتي ؟
وليد بيدور علي حد: هتعرف حالا .. دور معايا بس
اكرم بيبص حواليه: علي مين ؟

وساعتها لمح علاء وخالد: تقصد دول ؟
وليد: ايوه دول تعال
كانوا بيشربوا وبيرقصوا وسكرانين علي اخرهم واول ما شافوه هيصوا جامد والبنات اتلفت حواليهم
علاء: الباشا الكبير وووووصل .. واحلي تحيه لوليد بيه
وليد: انتو هنا ؟ لازم تكونوا هنا
خالد: والان حان موعدكم مع درس في القيم والاخلاق لفضيله الشيخ وليد نصار اووووووه
وليد: يالا قوموا من هنا
علاء: عارف انت سبب ازمتي في الحياه
وليد: انت اللي سبب ازمه نفسك قوم.

وليد بص حواليه يشوف اكرم فين بس ملقاهوش واستغرب راح فين وسابه ولحظه ولقاه جاي ووراه اتنين رجاله ضخمه
وليد: انت فين ومين دول ؟
اكرم: رجاله الامن اللي هنا معرفه ما تقلقش هيساعدونا ناخد الاتنين دول
وليد: انا مش عارف انا كنت عايش من غيرك ازاي ؟ هاتهم
الاتنين سحبوا علاء وخالد وحطوهم في العربيه لوليد واتحركوا علي بيت علاء الاول
علاء: ليه هنا ؟ نسمه مش هنا ؟ بفضلك انت طفشت ؟ الهانم بتحبك انت اكتر مني.

وليد: نسمه ما بتحبنيش اطلع نام والصبح نشوف قصتك ايه ؟ اكرم معلش طلعه
اكرم طلعه لحد ما حطه في سريره: المفروض تحمد ربنا ان عندك ابن عم زي وليد
علاء: ههههههه انت كمان بتحبه .. ازمه وليد
اكرم: لو حاولت تفكر صح هتلاقي نفسك انت كمان بتحبه بس المشكله في الافكار الغبيه اللي ماليه دماغك
وليد تحت مع خالد: انت ليه مش مع مراتك ؟ ليه سهران كده ؟

خالد: مراتي ؟ وهيا فين مراتي ؟ انا ما اتجوزتش اصلا .. دي اشاعه
وليد: ندي بتحبك وانت عارف ده كويس
خالد زعق: ندي بتحبك انت اكتر
وليد: هو ايه حكايتكم النهارده انتو الاتنين ؟ كل واحد يقولي مراته بتحبني انا اكتر ! مش يمكن تكونوا انتو الاغبيه كل واحد فيكم مراته بتحبه بس هو غبي وعايز اي شماعه يعلق عليها اخطاؤه فملقيتوش غيري صح ؟
وليد وصل خالد البيت واكرم سنده ودخله وندي قابلتهم
ندي: هو ماله يا وليد ؟

وليد: مالوش بس شرب زياده اكرم معلش طلعه لفوق
ندي طلعت معاه وحطوه في السرير: متشكره جدا يا اكرم علي تعبك معانا ووقفتك مع وليد
اكرم: لا ياهانم ما تقوليش كده تصبحي علي خير
نزل ووراه ندي ووليد وقفها: اطلعي انتي لجوزك يالا سلام
ندي: وليد ربنا ما يحرمني منك ابدا
وليد: ولا منك .. ابقي طمنيني عليكي.

في العربيه
اكرم: خالد بيه هيندم الصبح جدا لما يعرف هو فاته ايه ؟
وليد: اشمعني ؟ فاته ايه ؟
اكرم: لا اصل الهانم كانت مجهزه عشا وشموع وورد .. يعني اعتقد كان احتفال بشيء
وليد: انت اللحظه اللي دخلت فيها مسحت الاوضه كلها ؟
اكرم: لا مش كده ابدا بس شغلي عودني اني اكون دقيق الملاحظه ولماح لادق التفاصيل فاكيد هشوف ترابيزه سفره واكله الاوضه وهشوف الشمع والورد ولا ايه؟

وليد: ماشي يا اكرم هعديهالك بس بعد كده مش عايزك تكون لماح قوي وخصوصا في اوض النوم
اكرم: حاضر يا افندم واسف لو كان ده تطفل مني
وليد: لا عادي بس بنبهك مش اكتر .. اوض النوم دي اماكن حساسه ومعني اني اوافق انك تدخل اوضه نومي فده ثقه عمياء فيك فاهم ؟
اكرم: فاهم يا افندم.

وليد: روحنا بقي يالا الليله كانت طويله
ندي مع خالد قاعده جنبه ومره واحده خالد زق ايدها بعيد
خالد: ابعدي عني
قالها ونام وهيا خافت فعلا تكون خسرته ..
اخيرا النهار طلع والكل صحي.

علاء مستغرب مين حطه في السرير وشويه وبدأ يفتكر وليد واكرم واستغرب ليه اهتم يوصله ؟ هل فعلا حب ؟ هل هو فعلا زي ما نسمه قالت بيعتبرهم اخواته ؟ هل هما مالهمش حقوق ؟ حاسس انه متلخبط مش عارف يفكر ؟
خالد صحي وبص كانت ندي نايمه جنبه وهيا قاعده وكأنها كانت خايفه عليه .. بص حواليه شاف اثار الليله اللي ضيعها وللحظه ندم بس بعدها حس بغيظ ماليه منها..

قام مره واحده وهيا صحيت: انت كويس ؟
خالد: وانتي يفرق معاكي ؟
ندي: اكيد .. قلقت عليك امبارح لما اتأخرت
خالد: اه وعلشان كده بعتيلي اخوكي يجيبني من افايا صح ؟
ندي: مش كده لأ بس قلقت عليك.

خالد: وفري قلقك ده .. ولعلمك امبارح سهرت وشربت وقضيت الليله مع بنات كتير بتنقل بينهم وعملت كل اللي نفسي فيه وكل اللي انت حرماني منه عملته معاهم فوفري قلقك ده لان امبارح كانت ليله حلوه انتي واخوكي بوظتوها ( راح ضرب التربيزه برجله ووقع اللي عليها ) ووفري رومنسياتك دي معدتش عايزها
سابها ودخل الحمام وهيا فضلت تعيط ومره واحده وقفت وقررت ونفذت.

خالد خرج من الحمام وملقهاش موجوده وعرف انه ممكن يكون خسرها واحاسيس جواه متلخبطه .. هو صح ولا غلط ؟ ليه جرحها كده ؟ كانت هتبدأ معاه من جديد.. بس لأ كان لازم تثق فيه مش لما اخوها اللي يقولها ؟ لا هو صح وهيا اللي غلط ..

وليد صحي من النوم ومراته جابت فطار فطروا مع بعض في اوضه النوم وشويه وسمع صوت ندي ومامته وحس ان في قلق فخرج يشوف في ايه وندي اول ما شافته جريت عليه وعيطت في حضنه وهو مستغرب مالها ..
نبيله: مالها يا وليد ايه اللي حصل ؟
وليد دخلها اوضتها: مفيش يا ست الكل هاتيلها حاجه تشربها بس وما تقلقيش .. سيبونا لوحدنا شويه
ندي: خاني يا وليد
وليد: مين ده اللي خانك ؟ خالد ؟

ندي: ايوه
وليد: ومين قالك الاكتشاف الفظيع ده ؟
ندي: هو قالي بنفسه
وليد اتنهد: هو قالك وانتي زي الهبله صدقتي ؟ خانك امتي وفين وازاي ؟
ندي: معرفش بس هو قالي انه كان مع بنات وانه .. يعني خاني
وليد حضن اخته: حبيبتي كان لازم تفهمي ان ده مجرد غيظ منك او رد فعل مش اكتر .. هو في حد بيحب يخون حبيبه لمجرد انهم اتخانقوا او اختلفوا .. بعدين انا جبتهم من نايتكلب كانوا سهرانين مجبتوش من شقه .. هيخونك فين ؟

ندي: معرفش بس هو قالي كده ؟
وليد: ندي انتي غلطانه من الاول .. غلطتي في حقه كتير
ندي: واديني اهو حاولت اصالحه.

وليد: بعد ايه ؟ هو وصل لاخره .. حبيبتي لما الواحد بيحب بجد بيكون جرحه مضاعف .. يعني هو بقاله قد ايه يقنع فيكي ؟ وانتي رفضتي تسمعيه او تصدقيه فهو مجروح منك .. كان لازم تفضلي في بيتك وكان لازم تسمعيه وتحتويه وكان لازم تكوني واثقه تماما انه مايعملهاش لكن كده انتي اثبتيله لتاني مره ان معندكيش ثقه فيه وان كلمه تجيبك وكلمه توديكي .. ندي فين حبك ؟

ندي: انا بحبه
وليد: اوعي يكون حبك زي حب ميس .. حب تملك مش اكتر
ندي بنرفزه: انا مش زي ميس
وليد: ولا زي جميله
ندي: ليه جميله بتعمل ايه زياده ؟
وليد: جميله في شهر العسل دخلتلي ميس عندي علشان نتصالح علشان ما نزعلش انا وميس مع بعض ! مش هقولك اكتر من كده
ندي: ده غباء مش حب .. ادخل لجوزي واحده ده منتهي الغباء كمان.

وليد: ده منتهي الحب يا ندي انك تسعدي واحد حتي لو علي حساب سعادتك انتي .. ده قمه الحب .. انك بتحبيه اكتر من نفسك وان اهم شيء عندك هو سعادته وبس ..
ندي: وانت قابلت حبها ده بايه ؟ انها زوجه في السر وابسط حقوقها مش مديهالها .. ده حتي ابنها هتاخده تنسبه لغيرها ؟ لا سوري مش عايزه الحب ده
وليد اتنرفز منها: انتي مش عارفه انتي بتتكلمي في ايه ؟ وظروفي غير ظروفك تماما وبعدين انتي مدخلاني في النص بينكم ليه ؟ فكري بعقلك قبل ما تخسري ولا تبقي ميس تانيه بعد اذنك.

خرج وسابها متنرفز لان كلامها مس وتر حساس عنده وسؤاله بيرن: انت قابلت حبها بإيه ؟
دخل يغير هدومه ولحظه والباب خبط ودخلت ندي
ندي: انا اسفه يا وليد مش قصدي اضايقك ابدا .. حقك عليا
وليد: لا عادي المهم حاولي تصلحي امورك
ندي: لا بجد ما تزعلش مني والله ما اقصد .. انا عارفه ان ظروفك انت وجميله متلخبطه وعارفه انه غصب عنك فمعلش طلعت نزفزتي عليك انت
وليد: قولتلك عادي خلاص
ندي: طيب ممكن توصلني بيتي ؟

وليد: اوصلك عادي بس ظهوري مش هيكون في مصلحتك لان ساعتها خالد هيعند وهيقول انك رجعتي علشان انا قلتلك ترجعي فالاحسن تروحي لوحدك
ندي: بس انا عايزاه يعرف اني رجعت علشان انت رجعتني .. عايزه يحس بالفرق بينكم
وليد: مش وقته يا ندي .. الاول اتصالحوا والباقي بعدين
ندي: انت شايف كده ؟
وليد: ايوه شايف كده
راحت للبيت بس ملقتش خالد وعرفت انه راح الشركه وراحت هيا كمان للشركه ...

وهناك دورت عليه معرفتش بيه فراحت لاخوها ويدوب قعدت الباب خبط ودخلت نسمه: اسفه اجي لحضرتك وقت تاني
وليد: لا ادخلي يا نسمه تعالي
سلموا علي بعض هيا وندي وقعدت وطلعت ورقه عطتها لوليد
وليد: ايه دي ؟
نسمه: استقالتي
وليد: شايف انها استقالة بس ليه ؟

نسمه: عادي بقي .. بس مش هقدر استمر هنا
وليد: علشان كلامي معاكي امبارح ؟ انا كنت لسه هعتذرلك علي اسلوبي لاني فعلا زودتها بس كنت متنرفز وانتي جيتي في الطريق مش اكتر
نسمه: لا لا الموضوع ما يخصكش وعارفه ان كلامك مجرد نرفزه مش اكتر
وليد: طيب امال ليه بقي الاستقاله ؟
نسمه: ده موضوع خاص بس بعيد عنك ده بخصوص علاء.

وليد: تسمحيلي اتدخل ! علاء محتاجك جنبه وبعدين لازم تهدي وتاخدي المواضيع بتفهم اكتر من كده .. انا مش عارف انتو مالكم ؟ اغبيه ليه كده ؟
الاتنين بصوا لبعض ندي ونسمه وبصوله
وليد: ايوه الكلام ليكم انتو الاتنين ..انتو متجوزين اتنين مختلفين اتربوا علي نمط معين بأفكار معينه .. جايين انتو الاتنين في يوم وليله عايزين تغيروا تربيه سنين ؟ ازاي طيب ؟ وجودكم في حياتهم احسن شيء حصلهم لو اتخليتوا عنهم هيضيع الامل .. هينتهي ..

بس لازم يكون نفسكم طويل وبراحه وواحده واحده مهواش كن فيكون .. نسمه علاء محتاجك هو بدأ يتغير فعلا .. بدأ يفكر .. بدأ يحس ووقف علي اول الطريق خليكي بقي ماسكه ايده مش تسيبها وتقوليله انت مش عارف تمشي ؟ هو فعلا مش عارف يمشي ومحتاجك خطوه خطوه تاخدي بإيده .. وانتي كمان يا ندي ..

خالد بيعشقك ومن واحنا عيال مش النهارده ولا امبارح ده سنين واخيرا بقيتي في بيته بس اتفاجئ انك بعدتي اكتر واكتر ده بالعكس انتي ضاعفتي عذابه مليون مره لانك بقيتي في بيته وبين ايديه ومع ذلك حرمتي نفسك عليه .. ده عذاب ايه ده ؟ انتو الاتنين غلط .. اتمسكوا بحبكم وصلحوا اموركم قبل ما انتو كمان تندموا ..
الباب اتفتح ودخل علاء واول ما شاف نسمه: اه لمهم انت حواليك واملي دماغهم ضدنا صح ؟ مش ده اللي بتعمله ؟

وقبل ما حد يرد كان خالد كمان دخل واول ما شاف ندي
خالد: اه فعلا لازم تكوني هنا ؟ هتكوني فين يعني ؟ لازم تقدمي تقرير لاخوكي ؟ مش قلتلك انها بتحبك اكتر ؟
وليد:...

رواية جميلة الجزء الأول للكاتبة الشيماء محمد الفصل الرابع والعشرون

الباب اتفتح ودخل علاء واول ما شاف نسمه: اه لمهم انت حواليك واملي دماغهم ضدنا صح ؟ مش ده اللي بتعمله ؟
وقبل ما حد يرد كان خالد كمان دخل واول ما شاف ندي
خالد: اه فعلا لازم تكوني هنا ؟ هتكوني فين يعني ؟ لازم تقدمي تقرير لاخوكي ؟ مش قلتلك انها بتحبك اكتر ؟
وليد بص للبنات: هنا بقي ينطبق المثل اللي بيقول خيرا تعمل (شاور علي علاء وخالد وبصلهم ) شرا تلقي
علاء: خير ؟ لما تقلب مراتي عليا يبقي خير ؟

نسمه: وتقولي افضل جنبه وهو هيتغير ! ده عمره ما هيتغير ابدا ده مواليد برج الثور
علاء: نسمه !
نسمه: بلا نسمه بلا زفت .. انا اسفه يا وليد بس بالمنظر ده انا مش هقدر اكمل .. عرفت بقي انا ليه مقدمه استقالتي !
علاء: استقالتلك ؟ انتي هتستقيلي ؟ ليه ؟
وليد: ليه ؟ علشان ما تشوفش وشك .. علشان الغباء والتخلف اللي مالي دماغك ده .. لا وجاي تلومني انا ! وانت يا سي خالد هاه اتكلم عايز تلومني علي ايه ؟ علي التخلف اللي انت قلته لمراتك الصبح ؟

خالد: قالتلك ؟ كل حاجه لازم تبلغهالك
وليد: لما واحده جوزها يقولها انه خانها ايوه لازم تروح لاهلها وتقولهم .. انت بتفكر ازاي سيادتك ؟
علاء بص لخالد: انت خونتها ؟ امتي ؟ احنا طول الليل مع بعض
وليد بص لندي وكأنه بيقولها صدقتيني !
خالد: يا عم اسكت انت التاني .. اكيد مخنتهاش.

علاء: امال بتقولها كده ليه ؟ ده انت هتموت عليها تقوم تقولها كده ؟ انت اهبل يالا
خالد: حوش الذكاء اللي بينقط منك .. وان مكنتش مراتك سيبالك البيت انت التاني ! خليك في حالك
وليد راح عندهم ودخلهم وقفل الباب وراهم: اتنيلوا اقعدوا اما نشوف اخرتها ايه معاكم
نسمه جت تقف علشان تمشي ) وليد اقعدي انتي التانيه مفيش استقالات هقبلها ..كل واحد قعد جنب مراته ووليد قعد قصادهم ..مبدئيا كده انتو الاتنين لازم تكونوا واثقين تماما اني عمري ما هقلب مراتتاكم ضدكم.

نسمه: قبل ما تدخل كان بيقنعني اديلك فرصه تانيه وارجع البيت ( بصت لخالد ) حتي ندي كان بيقولها انها غلطانه من الاول وانتو جايين تتهموه
وليد: ما علينا من الاتهام دلوقتي .. اللي يهم حاليا ان كل واحد يخرج من هنا حبيبه في ايده .. ومش هتخرجوا من هنا غير لما تتصافوا جميعا ..
نسمه: انا الخلافات اللي بيني وبين علاء ما ينفعش نتكلم فيها هنا
وليد: هنا اللي هو قدامي صح ؟

علاء: لا عادي .. سيادتها معترضه علشان حقنا اللي عايزين ناخده منك
وليد: طيب مش هنتكلم في النقطه دي حاليا .. بس يا نسمه ده خلاف بيني وبينه علي ميراث او علي شغل انتي ايه دخلك ؟ ليه حطيتيه بينكم !
نسمه باستغراب: لانه مش حقه .. ده كده حرام
وليد: وانتي تعرفي منين انه مش حقه ؟ ( الكل بصله باستغراب) بتبصولي كده ليه ؟
ندي: انت ايه اللي بتقوله ده ؟ طبعا مش حقه
وليد: اهدي انتي دلوقتي انا بكلمها هيا ..

نسمه: انا قلتله وجهه نظري .. سواء جدكم ساب الشركه مديونه او شغاله فوالدك اللي فضل وتابعها وابهاتهم سافروا ولما الشركه كبرت وبقي ليها وضعها رجعوا يبقي فين حقهم ده وباي وجهه حق اصلا بيتكلموا ؟
وليد: ماشي انا معاكي بس كل ده ايه دخله بعلاقتك معاه كزوجه ؟ كسند ؟ كشريك ؟ كاتنين وقفوا قصاد بعض واتفقتوا تقفوا مع بعض العمر كله علي الحلوه وعلي المره ! فين واجبك كزوجه واقفه في ظهر جوزها بغض النظر هو صح ولا غلط !

الكل بصله بطريقه مختلفه مش عارفين يفسروها
وليد: الزوجه بتساند جوزها في اي وقت .. ولو هو غلط بتقف معاه بس واحده واحده بتوضحله وجهه نظرها .. مش تسيبله البيت يا نسمه ؟ او اسوأ من كده وتهجره ( بص لندي )
المصيبه انكم كلكم بتحبوا بعض وجوازاتكم عن حب مش عادي فين الحب ده ؟ ( بص لعلاء وخالد ) وانتو الاتنين ايه مش عارفين تطمنوا مراتتاكم وتضموهم ؟ انت يا سي خالد رايح تقول لمراتك انك خنتها متوقع منها ايه ؟ تقولك وماله حبيبي المهم رجعت ؟ كنت مستني منها ايه ؟

خالد: كان المفروض تكون واثقه اني ما اعملهاش .. لازم تثق فيا
وليد: معاك ان الثقه مهمه بس سؤال بسيط عملت ايه انت علشان تبني الثقه دي .. الثقه شيء بيتبني بصعوبه وبياخد وقت كبير لكن للاسف بتتهد في لحظه او في كلمه زي ما انت عملت الصبح ..
خالد: انا مخنتهاش
وليد: بس قلتها ومعني انك قلتها انك ممكن تفكر فيها ومعني انك تفكر فيها يبقي ممكن تعملها ازاي بقي بعد كده تطلب منها تثق فيك !

علاء: طيب هو وزعلها لكن انا ما زعلتهاش في اي حاجه ؟
وليد: الثقه .. مشكلتكم انتو الاتنين هيا الثقه ..
علاء: ايه علاقه الثقه بينا ؟
وليد: ازاي بقي ؟ مراتك شيفاك من وجهه نظرها انك مستعد تعادي وتحارب ابن عمك علشان حبه فلوس زياده يبقي انت مالكش خير في اهلك اللي هما من دمك فازاي هتثق فيك تآمنك علي حياتها وعيالها فيما بعد ؟

علاء: دي مراتي
وليد: وانا ابن عمك وفي وقت من الاوقات كنا اقرب من الاخوات والنفوس اتغيرت وقربنا نكون اعداء فليه برضه النفوس ما تتغيرش ناحيتها وتبطل تحبها وتتحول لعدو .. ماهو عادي عندك فطالما انت اصلا شخص ممكن في اي وقت حد حبيبك يتحول لعدو هيا كمان ممكن تتحول لعدو
علاء: هيا عمرها ما هتتحول لعدو
وليد: ازاي بقي ما انا.

قاطعه بغيظ: انت ما اتحولتش لعدو .. ممكن اه بتضايق منك او احاول اغيظك او اخسرك في شغل لكن ما اتحولتش لعدو
علاء استغرب من كلامه ده ووليد ابتسم: امال انا يا ايه يا علاء؟
علاء: انت بتستغل الامور لصالحك
وليد: او بحاول اصفي كل النفوس اللي هنا مش انتو بس كلنا
خالد: انت بتتكلم في حاجات بقالها سنين.

وليد: حاجات زرعها اهالينا احنا ليه ماشيين في نفس سككهم احنا لينا عقليتنا الخاصه .. ليه سيبناهم يبعدونا عن بعض احنا كنا قوه مع بعض
علاء: علشان كنا زي بعض لكن دلوقتي الامور اتغيرت
وليد: مفيش حاجه اتغيرت اللي اتغير اتغير جوانا يا علاء .. المهم كل واحد فيكم ياخد مراته ويروح علي بيته وافضلوا مع بعض اتكلموا لحد ما تتصافوا وسيبوا الباقي للايام هيا كفيله بيه يالا اتكلوا
وفعلا كل واحد اخد مراته وروح وفضلوا مع بعض يتكلموا لحد ما يتصافوا مع بعض ..

كل واحد فضل مع مراته وبعدها كل واحد فيهم بعد ما مراته نامت فضل يفكر في كل حاجه ويقلب الامور في دماغه ويحاول يدور علي حاجه وحشه وليد عملها في حقهم بس للاسف مفيش ... اي شيء وحش او غلط كانوا هما اساسه ..
نسمه صحيت لقت علاء سرحان تماما فقربت منه: سهران ليه؟
علاء ابتسم: لا يا حبيبي عادي نامي انتي
نسمه: بتفكر في ايه كده ؟

علاء: عادي مش في حاجه معينه
نسمه: طيب اقلك حاجه تفكر فيها ؟
علاء: قولي
نسمه: فكر في ده ( مسكت ايده وحطتها علي بطنها )
علاء: مش فاهم ده ايه ده ؟ بطنك مالها ؟
نسمه همست في ودنه: جواها نونو عايز يقولك بابا
علاء اتجمد لحظات مش عارف يفكر .. مفاجأه عمره ما تخيل رد فعله هيكون ايه ؟ شيء عمره فعلا ما فكر فيه قبل كده
فضل كتير كده لدرجه ان نسمه قلقت عليه: علاء مالك ؟ علاء.

علاء: انتي قلتي ايه ؟ نونو ؟ بابا ؟ قصدك ايه ؟ تقصدي انك عايزه بيبي مثلا ؟ عايزه نخلف ؟
نسمه: ايه الغبا ده بقولك جواها نونو مش لسه عايزه .. انا حامل يا علاء
علاء مره واحده قام يتنطط وشالها معاه وهيا لسه ما استوعبتش جنانه ده
نسمه: والله مجنون
عند خالد هو وندي مع بعض واخيرا بدؤا شهر عسلهم المتأخر قوي
ندي: خالد
خالد: عيوني
ندي: اوعي في يوم تخلي وليد يقف بينا
خالد: يعني ايه ؟

ندي: يعني مش عيزاك انت وهو تتخانقوا او اضطر اني اخد صف حد فيكم خليكم ديما صف واحد ارجوك علشان خاطري اوعي تقف قصاده .. ايوه انا بحبك وبعشقك كمان بس بحبه هو كمان .. وليد كان اب قبل ما يكون اخ فاهم ؟ فارجوك ما تحطنيش في اي وضع اني اضطر اختار بينكم
خالد: ولو اتحطيتي هتختاري مين؟

ندي: مش هعرف اختار ساعتها هتدمر انا لان انتو الاتنين مكانه واحده قلبي وعقلي مش هقدر اختار بينكم ولو اخترت فدي نهايتي لاني لا اقدر اعيش من غيرك ولا اقدر اعيش من غيره فارجوك اوعي تدمرني يا خالد
خالد: وليه ما تطلبيش منه هو طلب زي ده ؟

ندي: لانه عمره ما سعي لاي مشاكل معاكم .. عمره .. ديما بيعتبركم اخواته .. عارف من اول ما فاق بعد المستشفي وهو يقولي ارجعي بيتك وجوزك مالوش دعوه باللي حصل .. كان واثق تماما انك ما تعملهاش
خالد: وليه ما سمعتيش كلامه ؟
ندي: خفت .. خفت يكون لك يد واكون انا خاينه .. خفت يكون حبي ليك عاميني .. فاسفه جيت عليك انت .. سامحني بس كان غصب عني.

خالد: تعالي نبدأ من جديد ونعتبر ان فرحنا كان النهارده
ندي: تعال بس اوعدني الاول ان وليد اخ ليك
خالد: اوعدك اني هحاول اشوفه كده
ندي: وانا راضيه ب هحاول دي دلوقتي ..
عند وليد
جميله: عملت ايه ؟

وليد: اتكلمنا وربنا يسهل بقي ويهدي الكل .. بس مش مقتنع قوي انهم ممكن فعلا يتغيروا
جميله: الحب بيحل امور كتيره
وليد: معاكي بس مش كل الامور .. العلاقات المعقده دي ما اعتقدش هتتحل بالحب يا جميله
جميله: طول عمركم بتتخانقوا وواقفين قصاد بعض والعداء مستمر فجرب الطريقه دي هتخسر ايه ؟ جرب تعاملهم كأخوات وصدقني هتصحي الحب اللي كان بينكم وانتو عيال والحب هيعرف طريقه بينكم وهيرجع
وليد: اديني اهو ماشي وري كلامك لما نشوف اخرتها ايه ؟ بس عارفه !
جميله: ايه ؟

وليد: علاء النهارده اول مره يقول انه عمره ما اعتبرني عدو علي الرغم من انه طول الوقت كان بيعتبرني عدو بس النهارده معرفش .. حسيته .. مش عارف افسرلك
جميله: حسيته فعلا بيحبك بس العداء ده حاجه ظاهريه لكن مش من جوه .. جوه يا وليد في قرابه دم ! حبيبي انتو اخوات بس الاخوه دي عليها شويه تراب كده عايز يتنفض .. نفض انت التراب ده وهيظهرلك الاصل
وليد بصلها كتير: هو انا ليه بحبك كده ؟

جميله ابتسمت: علشان انا بحبك اكتر
وليد: ما اعتقدش ..
قرب عليها وباسها بحب وهو قريب حس بحركه ابنه وكأنه بيعترض من جوه
وليد: وده ماله ده ؟
جميله: غيران .. عايزك تحبه هو كمان
وليد قرب من بطنها وباسها: بحبك انت كمان ولا تزعل
ايديه علي بطنها وحس بحركاته جامده
وليد: هو حركاته جامده كده ليه ؟ مكنتش بحسها قوي كده.

جميله: اولا لانه حاسس بيك وثانيا علشان كبر وبيقولك انا اهو موجود وجايلك يالا استعد
وليد سرح .. لازم فعلا يستعد .. لازم ينهي العداءات دي كلها .. مش عايز يورث العداء ده .. مش عايز يفضل خايف عليه طول الوقت .. لازم يتصرف
جميله: ممنوع السرحان وانت معايا مفهوم ؟
وليد ابتسم وباس ايديها: مقدرش اسرح وانتي معايا اصلا ..
اخدها في حضنه واسترخي بس عقله شعله من النشاط بيفكر ويخطط ويقرر ..
عند شريف
ميس: خير يا بابا
شريف: عايزك تسافري او تفضلي هنا عندي الفتره دي
ميس: ليه ؟

شريف: المفروض انك هتدخلي في التاسع او الثامن مش عارف بس المفروض بطنك تكبر ويبان عليكي الحمل
ميس: ما انا بلبس واسع اهو
شريف: ايوه بس مفكيش روح الحامل ولا تعبها ولا مشيتها حتي فالاحسن تختفي حاليا عن الانظار
ميس: حاضر بس بعد الحفله اللي وليد بيجهزلها
شريف: مش عارف ليه انا قلقان من الحفله دي .. تحسي فيها بغموض كتير وكأنه بيخطط لحاجه
ميس: هو حاليا غرقان في مشاكل علاء وخالد وخلافاتهم مع مراتتاهم ..

شريف: يالا ربنا يسترها
عند محي الكل متجمع حسين وعلاء وخالد
علاء: خير يا بابا مجمعنا ليه كده ؟
خالد: اه يا عمي خير
علاء: طبعا انت طالع من البيت علي عينك
خالد ضحك: اصلا كنت عايز اسافر بس ندي رفضت وقالتلي بعد الحفله
محي: الحفله ! وهو ده المهم ايه الحفله دي وليه وليد عاملها ومخطط فيها لايه ؟

علاء: عادي حفله بمناسبه سلامته ورجوعه للشغل ووقوفه علي رجليه ده كان هيموت فيها
حسين: اصلا مين اللي عمل فيه كده ؟ انت يا محي ؟
محي: لا طبعا مش انا .. صراحه انا شكيت في علاء
علاء: انا ؟ ليه شايفيني قتال قتله انا ؟ لا طبعا ماليش انا في البلطجه دي
محي: من امتي ؟ امال لما جبت بلطجيه سرقوا الشحنه كان ايه !
علاء: شحنه مش قتل بني ادم وابن عمي كمان
محي: ابن عمك ؟

علاء: ايوه ابن عمي .. ايه معترض ليه ؟
محي: ابن عمك ابن عمك انت حر خلونا في المهم .. عرفتوا ايه عن حمل ميس .. انا مش حاسس انها حامل .. ايه الجديد
خالد: مفيش جديد
علاء: فعلا
حسين: يعني ايه مفيش جديد .. خالد عرفت من ندي ايه عن حمل ميس .. المفروض ان انت اقرب حد فينا حاليا
خالد: معرفتش حاجه انت ناسي انها اصلا كانت زعلانه علي اخوها واللي حصله
محي: طيب واديكوا اتصالحتو اهو اعرفلنا اساس الحمل ده ايه ؟

افتكر ندي في حضنه بتترجاه ما يقفش قصاد وليد
محي: خالد
خالد: ايوه يا عمي
حسين: الحمل
خالد: انا اسف خرجوني بره القصه دي .. اللي بيني وبين مراتي هيفضل بينا انا مش هقدر اخسرها ووعدتها ما اقفش ضد وليد بعد اذنكم
حسين: انت يا ولد اقف هنا
خالد: انتو كان في مشاكل بينكم وبين اخوكم واختلفتم لكن انا ووليد مفيش بينا مشاكل وهو ابن عمي ومتجوز اخته وماشفتش منه حاجه وحشه صراحه فخرجوني بره قصتكم دي ..
محي: وحقك وميراثك ؟

خالد: انا عايش كويس قوي ولو الحق والميراث اللي بتتكلم عنه ده ثمنه ندي فمش عايزو بعد اذنكم
سابهم ومشي وعلاء قلبه بيدق بسرعه وبيفكر هل هو عنده الجرأه يعمل زي خالد كده ؟ هو مش عايز الدوامه دي هو عايش مبسوط كده وعنده ابن جاي في الطريق ..
محي: علاء انت يا علاء
علاء فاق: هاه نعم ؟ ايه ؟
محي: بقولك انت عايزك تجيبلي قرار الحمل ده .. انت علاقتك بميس كويسه ..
علاء: ايوه اعملها ايه يعني ! وبعدين انتو شاغلين نفسكم بالحمل ده ليه ؟ واحد ومراته حامل انتو مالكم ؟
محي: احنا مالنا ؟ ايه احنا مالنا دي ؟

علاء: شاغلين نفسكم ليه ؟ وبعدين خالد عنده حق
محي اتجنن: عنده حق في ايه ان شاء الله ؟
علاء: احنا عايشين كويس كده مش ناقصنا حاجه فليه المشاكل وليه العداء والخناق وبعدين وليد
محي قاطعه: وليد ماله ؟ مش وحش
علاء اتنرفز: ايوه مش وحش .. عمره ما كان وحش ..

محي: ده لسه من فتره بسيطه كان عايز يحبسك ساعة نسمه ولا نسيت ولا من يومين بس كان عايز يطردك من الشركه
علاء: ده بيزنس وبعدين انا فعلا اقترحت نستورد مضروب فلازم يشك وبعدين اعتذرلي وساعة نسمه انا كنت غلطان ووليد حقاني فأحنا زعلانين علشان هو حقاني؟

محي: انت جرالك ايه ؟ نسمه عملت فيك ايه ؟
علاء: خلتني اشوف كل حاجه بشكل تاني .. هتخليني أب ... بعد اذنكم
محي: شايف يا حسين العيال
حسين: وبعدين هنعمل ايه ؟
محي: هنتصرف احنا لوحدنا ده حقنا احنا ..
حسين: ولو العيال اتحدوا ووقفوا ضدنا ؟
محي: مش هيحصل هما اخرهم ينسحبوا لكن مش هتوصل انهم يقفوا ضدنا ابدا ..

اخيرا جه اليوم المنتظر والكل بيستعد للحفله ومحدش فاهم ايه اللي هيحصل فيها
نبيله: نفسي افهم انت ليه مهتم كده قوي بالحفله دي ؟
وليد: هتعرفي في الحفله ؟
ميس: ليه الغموض ده كله ؟
وليد: برضه هتعرفي في الحفله ؟
جميله نزلت وراحت عند وليد: وليد
وليد: ايه يا جميل ؟ عايزه حاجه ؟

جميله: عادل كلمني وعايزني اقضي معاه النهارده وبما انك النهارده مشغول في الحفله بتاعتك فقلت اروح انت ايه رأيك ؟
وليد باسها وضمها: ماشي يا قلبي روحي كده احسن علشان ما تفضليش لوحدك واكون مطمن عليكي اجهزي وأكرم هيوصلك لعنده
جميله طلعت وميس نفسها تولع فيها ببطنها اللي قدامها دي
ميس: نفسي اعرف بتحب فيها ايه ؟
وليد: كلها علي بعضها كده
وليد نادي علي اكرم علشان يوصل جميله وفعلا اخدها وسلمها لاخوها ورجع هو لوليد ..

الحفله بدئت والكل وصل للنادي اللي فيه الحفله والبنات كانوا ايات في الجمال .. نسمه وندي .. وميس حست انها عامله زي الشريره اللي في القصه .. مضطهده من الكل .. منبوذه .
الكل منتظر وصول وليد للحفله .. الكل متحمس .. واخيرا وليد ظهر بهاله غريبه واكرم ورجالته وراه وكان دخوله مهيب...

رواية جميلة الجزء الأول للكاتبة الشيماء محمد الفصل الخامس والعشرون

سلم علي والدته واخته وعيال عمه والكل بيسلم عليه ويهنيه علي صحته ورجوعه لشغله ووقفته علي رجليه من تاني ..
ميس واقفه جنب باباها وبتبص لوليد ورجعت بذكرياتها لقبل ما تظهر جميله في حياتهم .. ازاي وليد كان بيحبها ! ازاي كان في يوم ملكها هيا وبس ! ايه اللي وصلهم لكل ده ؟ هل هيا فعلا بتحبه مجرد حب تملك ولا هيا فعلا بتحبه ؟ ازاي جميله ببساطتها وجهلها قدرت تكسب كل القلوب في صفها ! هل بيحبوها لانها هتجيبلهم ولي العهد ولا هيا فعلا تتحب ! والسؤال الاهم من كل ده ازاي سمحت لوليد يفلت من ايديها ويبعد عنها بالشكل ده ؟

والاجابه كانت بسيطه وواضحه جدا قدامها، هيا محبتش وليد اصلا، كان زوج مناسب وواجهه اجتماعيه وبرستيج ومنظر قدام صاحباتها، يمكن علشان كده مزعلتش انها مخلفتش منه، او ما غارتش لما طلب يخلف من جميله بالطريقه الطبيعيه .. طيب ليه عملت كل ده ؟ لانه ملكها هيا وبس ولانه حب واحده اقل منها بكتير وهيا ما سمحتش انه يحب .. هيا اه سمحتله يتجوز ويخلف بمزاجها لكن ما سمحتلوش ابدا بالحب وعلشان كده يستاهل كل حاجه حصلت ...

جميله مع عماد اخوها بيقضوا يومهم مع بعض
عماد: بقولك ايه ما تيجي نخرج ؟
جميله: نروح فين بالليل ده ؟
عماد: يعني !
جميله: يعني ايه ؟ شكلك عايز تروح مكان معين ؟
عماد: بصراحه اه .. عايز اروح فرح واحد صاحبي هنا
جميله: طيب قوم البس وروح
عماد: لا انتي تعالي معايا.

جميله: اجي معاك فين بشكلي ده ! وبعدين صاحبك انت انا مالي وغير كده انا ما قلتش لوليد اني خارجه والاهم اني ماليش مزاج اصلا اخرج ما بالك اروح فرح !
عماد: كل اللي بتقوليه ده حجج فارغه .. ووليد ممكن نكلمه ونقوله وبس كده
فضل يقنع فيها وهيا رافضه حتي فكره الخروج نفسها
جميله: انا مش عارفه انت مصر كده ليه يا عماد ؟

عماد: يوووووه يا جميله .. مصر يا ستي علشان في حد مهم هيكون موجود وعايزك تشوفيه
جميله: حد ؟ حد كواحده مثلا ؟
عماد: ايوه حد كواحده عايز اعرفك عليها ممكن بقي ؟
جميله: طيب ما كنت تقول كده من الاول
عماد: اديني قلت ممكن بقي تقومي تجهزي علشان ما نتأخرش
جميله: حاضر يا سيدي بس هلبس ايه ؟

عماد: تعالي يا ستي
اخدها من ايدها علي اوضتها وفتح الدولاب وطلع فستان وعطاهولها
جميله: واااو .. مين جاب الفستان ده ؟
عماد: انا جبته من اول راتب قبضته ممكن تقبليه ؟
جميله: طبعا .. بس ازاي عرفت مقاسي ؟
عماد ابتسم: في حد ساعدني
جميله: تقصد وليد ؟
عماد: عندك غيره ؟

جميله فرحت جدا بالفستان وخصوصا لما عرفت انه ذوق وليد: اديني عشر دقايق وهكون جاهزه
لبست جميله الفستان ووقفت قدام المرايه وحست كأنها اميره في الفستان ده واتمنت لو وليد يشوفها فيه ! اتصلت بيه تستأذنه علي خروجها مع عماد
وليد: روحي حبيبي وغيري جو براحتك بس خلي بالك من نفسك
جميله: ماشي ..
وليد: مالك ؟ عايزه تقولي ايه ؟
جميله: كان نفسي تشوفني في الفستان ده .. فستان جميل قوي ما تخيلتش ان عادل يعرف يشتري حاجه زي دي ..الفستان تحفه يا وليد
وليد: كويس انه عجبك !

جميله: كان عندك شك انه ممكن ما يعجبنيش ؟ طيب ازاي؟
وليد: روح قلبي انتي .. المهم يالا اطلعي لاخوكي لاحسن يضايق ولا حاجه
جميله: حاضر بس هشوفك امتي ؟
وليد: هتشوفيني ما تقلقيش المهم ما تغيريش الفستان لحد ما اشوفك بيه
جميله: اكيد طبعا هستناك ما تتأخرش عليا
قفلت جميله وطلعت لاخوها اللي انبهر بجمالها وشياكتها
جميله: هاه ؟ حلو ولا ايه ؟

عماد: هو حلو بعقل ! ده تحفه يا بنتي عامله زي ما تكوني اميره هتاكلي الجو من الكل
جميله: ماشي يا بكاش يالا بينا
وليد في الحفله واقف مع اولاد عمه بيتكلموا ويهزروا
علاء: مش هتقولنا بقي الحفله دي سببها ايه ؟
ندي: هو قومانه بالسلامه مش كفايه لحضرتك ولا ايه ؟

علاء: لا اكيد كفايه بس احساسي بيقول ان في سبب اهم
صحفي جه من وراه: وليد بيه
وليد: خير يا ناصر
ناصر: مش هتفك بقي الغموض اللي مغلف الحفله دي ؟
وليد: اكيد اتقل بس شويه .. اتفضل اشرب حاجه واصبر
الصحفي انسحب وسابهم وهو رجع لاولاد عمه
نسمه: هو ينفع اتطفل واسألك ليه ميس بعيده عنك ؟ حاسه انكم بعيد قوي عن بعض ؟

وليد بص ناحيتها: عادي .. ما تشغليش بالك بينا
نسمه: وانت ليه شغلت بالك بينا ؟ لو متخانقين خلينا نصالحكم ولا ايه يا علاء ؟
علاء بص لميس كتير: عايز تتصالح عليها يا وليد ؟
نسمه ردت: اكيد طبعا هو حد بيحب الزعل ؟
وليد حس ان علاء عارف حاجه: سؤالك غريب يا علاء
علاء: لا عادي بس حاسس انكم مرتاحين في بعدكم ولا بيتهيألي ؟

وليد: لا مش بيتهيألك
نسمه: هو ده اللي ربنا قدرك عليه ؟ تقنعه انهم مرتاحين في بعدهم عن بعض !
وليد: سيبك انتي مننا .. الا قوليلي انتي شكلك متغير ليه ؟ فيكي حاجه متغيره مش عارف احددها
علاء ضمها: احلوت بس.

ندي: فعلا يا نسمه شكلك محلو زياده
وليد: شكلكم كده عندكم اخبار حلوه ! ما تشاركونا
علاء: اه فعلا .. احنا منتظرين نونو صغنن كده !
باركولهم كلهم وفضلوا مع بعض لحد ما وليد جاله تليفون فانسحب بعيد عنهم وبعدها اعلن للكل ان عنده اعلان مهم والكل سكت علشان يسمعه.

وليد: طبعا كلكم عايزين تعرفوا الغرض من الحفله دي صح !
الحفله النهارده كلها مفاجأت وليها اسباب كتيره الصراحه .. اول سبب هو ان انا مديون لعلاء ابن عمي باعتذار لاني من كام يوم اتخانقت معاه واتسرعت في حكمي عليه فأتمنى انه يقبل اعتذاري وبقوله ان انا ما اقدرش استغني عنه ابدا ولو يوم واحد هو او خالد .. ( علاء وخالد فرحوا جدا بكلامه ده ).

السبب التاني هو ان في شخصيه لازم اعرفكم عليها ( الكل بيبص حواليه وبيحاول يعرف مين الشخصيه دي وليد بص لاكرم وشاورله وأكرم اتحرك وفتح باب والكل عينه علي الباب يشوفوا مين هيدخل )
عماد واقف هو وجميله: احنا منتظرين ايه يا عماد ؟ ما ندخل
عماد: لحظه يا جميله
الباب اتفتح وهنا عماد: يالا يا جميله.

مسك ايدها وداخل بيها وبمجرد ما دخلوا جميله لمحت وليد وقفت وحاولت تسحب ايدها من ايد اخوها او تجري بس اخوها منعها: انت اتجننت جايبني هنا ؟
عماد: ما تخافيش تعالي
وليد: جميله تعالي .. تعالي حبيبي
ميس كانت هتتجن ومش عارفه تعمل ايه في اللحظه دي لان ده اخر شيء ممكن تتوقعه .. علاء بصلها كتير قوي مش مصدق
وليد: تعالي ( راح ناحيتها مسك ايدها واخدها ووقفها جنبه وحط ايده حواليها بتملك وفخر.

وليد: اعرفكم بجميله .. مراتي ( الكل بيتكلم ودوشه وشوشره بس سكتوا اول ما وليد اتكلم ) مراتي علي سنه الله ورسوله مراتي شرعا وقانونا وعقلا وبكل الطرق الممكنه ومش بس مراتي دي معشوقتي وحبي الاول والاخير ( حط ايده علي بطنها ) وام ابني زي ما انتو اكيد ملاحظين .. ( سكت شويه يسمح فيها للناس تستوعب وهنا لاحظ ان ميس هتمشي ).

ميس رايحه فين ؟ استني الحفله لسه في اولها وانتي بالذات ما ينفعش تمشي ابدا ده الحفله علي شرفك .. استني
ميس وقفت مكانها وابوها جنبها بيتمني لو يقدر ينهي المهذله دي ويعمل اي حاجه ..
وليد: طبعا اكيد كلكم مستغربين ( بص لعلاء ) اه هيا يا علاء اكيد دلوقتي عرفت انا ليه كنت غيران عليها ..
علاء ضحك: طيب ما قولتش ليه ؟

وليد: ما انا قلتلك ساعتها انها ملكيه خاصه ولا نسيت ؟ المهم علشان الغموض ده ينتهي اسمحولي احكيلكم حكايه صغيره الاول وهقولكم ازاي اتجوزت جميلتي ..في يوم راجع من شغلي لقيت والدتي ومراتي مجتمعين ومنتظريني وواخدين قرار ان انا لازم اتجوز علشان اخلف لان لازم يكون في وريث والقصه الحمضانه دي .. طبعا انا كنت بحب مراتي ورافض الفكره دي تماما وقفلت معاهم الموضوع ده..

بعدها بفتره رجعت البيت لقيتهم جايبين بنت صغيره فلاحه بسيطه وقالولي لازم تتجوزها .. صراحه ساعتها اتنرفزت جدا وقررت اني فعلا هتجوزها عندا فيهم وخصوصا عندا في ميس انها ازاي توافق ان جوزها يتجوز غيرها وبالفعل اتجوزتها .. اتجوزتها واللي محدش عمل حسابه ابدا ان انا ممكن اقع في حب الانسانه البسيطه دي..

طبعا مراتي اللي هيا ميس اتجننت ازاي احب غيرها وحاولت بكل الطرق انها تعذب جميله وتعاملها بطرق غير ادميه وما اخدتش بالها ابدا انها كل ما بتعمل حاجه ضدها كانت هيا اللي بتنزل من نظري وجميله بتعلي ومكانتها بتعلي وبتتوغل في قلبي اكتر واكتر .. جميله دخلت بيتي ودخلت قلبي والكل حبها واكتشفت اني عمري ما حبيت غيرها وان انا كنت عايش وهم الحب .. عشت معاها حاجات كتيره..

جميله هيا عشق عمري .. بس علي الرغم من كل ده كنت بحافظ علي ميس وبراعي مشاعرها لكن هيا مقدرتش ده وبدئت تظهر علي حقيقتها البشعه اللي انا مكنتش واخد بالي منها وكنت اعمي عنها واكتشفت ان انا كنت مجرد ملكيه خاصه ليها اتجننت لما غيرها شاركها فيها.. خططت تخلص منها كذا مره .. خططت تخطفها ولما فشلت كل خططها قررت انها لازم تنتقم..

تعالوا نسيبنا من ميس حاليا ونتكلم عن الحادثه اللي اتعرضتلها من فتره .. الكل بيقول ان الحادثه كانت بغرض السرقه وفعلا انا اول ما العربيه وقفت ساعتها تخيلت انهم حراميه وخفت علي ميس بس اتفاجئت ان العيال دي جايه لهدف واحد بس وهو انها تهجم عليا .. مكنوش عايزين يسرقوا .. ما بصوش لميس ما التفتوش لاي شيء .. فغرضهم ايه طالما مش السرقه ؟ يقتلوني ؟ لأ كان ممكن يقتلوني ببساطه ..

فهنا اكتشفت ان غرضهم هو الانتقام وبس .. كنوع من انواع التأديب .. بس ياتري لمصلحه مين ؟ وده كان السؤال اللي هيجنني ! وبفضل الله ثم أكرم اللي قدر يوصل للعيال دول ومنها وصلنا للي شغلهم .. أكرم
هنا اكرم دخل العيال متربطين وكمان دخل الدمنهوري ورماه تحت رجلين وليد .. ميس هنا حاولت تمشي بس اتفاجئت برجاله وليد واقفين منعوها تتحرك
وليد قرب من الدمنهوري: تسمح تقول تاني مين اللي طلب منك تعمل اللي عملته ؟

الدمنهوري: مرات حضرتك هيا اللي جت وطلبت مني ده
ميس زعقت: ده كداب .. انت هتصدق النصاب ده !
وليد: ومين قالك يا ميس انه يقصدك ؟ مش يمكن يقصد جميله ؟ ولا انتي عارفه ان جميله ما تعملهاش وانتي بس اللي ممكن تعمليها ؟
ميس: اكيد تقصدني .. هيا مش معشوقتك زي ما بتقول ! وعايز تطلعني انا اللي وحشه !
وليد: اطلعك وحشه ! ما علينا .. دمنهوري مراتي بتقول عليك كداب وبعدين ؟

الدمنهوري: عندي الدليل يا باشا وعطيته لاكرم باشا
اكرم هنا راح وشغل سي دي وفيه اتفاق ميس مع الدمنهوري وهيا بتطلب منه يأدب وليد
الكل اتفرج لحد ما أكرم قفله
وليد: طبعا الدمنهوري لحسن الحظ بيعمل حساب اللحظه دي .. بيهتم انه يكون معاه دليل ضد اللي بيطلب منه اي شغل هاه ؟ لسه كداب ؟
ميس: انت عايز ايه دلوقتي ؟ اه انا اللي عملتها ويا ريتني كنت خلتهم يخلصوا عليك خالص انت وجميلتك دي !

وليد: ودي كانت غلطتك يا ميس .. ودلوقتي اقولك تقدري تمشي من الحفله لان وجودك مش مرغوب فيه بس قبل ما تمشي .. إنتي طالق باي باي يا ... يا قلبي
جت تمشي بس اتفاجئت بالبوليس واقف من وري ومنتظر واول ما اتحركت راحولها
ميس: ايه ده ؟ انتو عايزين ايه ؟
الضابط: حضرتك مقبوض عليكي
ميس: بتهمه ايه ؟

الضابط: شروع في قتل وليد نصار
ميس بصت لوليد اللي شاورلها: هتوحشيني باي .. خدوها من هنا
البوليس اخدها ومشي وشريف مذهول من اللي بيحصل
وليد: روح وري بنتك هتحتاجك اليومين الجايين دول
شريف مشي وري بنته
وليد: دلوقتي بقي نقدر نبدأ حفلتنا ( بص لجميله ومد ايده ) تسمحيلي يا جميلتي بالرقصه دي ؟ أكرم خليهم يشغلولنا اي مزيكا .. اتصرف.

المزيكا اشتغلت وهو اخد جميله في حضنه وبدأ يرقص معاها
جميله: انا مش مصدقه اللي انت عملته ده ؟
وليد: اتأخرت قوي لحد ما عملته
جميله: ليه كل ده ؟
وليد: لان ما ينفعش ام ابني وحبيبتي تفضل في السر .. كان لازم قبل ما ابني يجي احفظ حق مامته والا مش هقدر احط عيني في عينه .. كان لازم اجيب حق حبيبتي .. انتي احق الناس تشاركيني فرحي قدام الكل ..

جميله: بس مش بالطريقه دي .. وميس ؟
وليد: اخدت جزاتها ولا انتي راضيه باللي عملته ؟
جميله: لأ بس
وليد: ما بسش ارقصي بقي وانتي ساكته هو انا مش علمتك ازاي ترقصي معايا !
وليد بيرقص معاها وبص لعلاء وخالد وشاورلهم يشاركوه وفعلا كل واحد سحب مراته وراحوا جنبه لحد ما الرقصه خلصت ووقفوا كلهم مع بعض .. ندي باست جميله وخالدبصلها باستغراب: انتي كنتي عارفه ؟ ومقولتيليش ؟

ندي: مكنش سري علشان اشاركك فيه
وليد: خلاص من هنا ورايح مفيش اسرار تانيه
علاء: بقي كانت مراتك ! شفتي بقي يا نسمه انه كان عندي حق لما قلتلك ان الوضع كان غريب
نسمه: قصدك لما قلت انها جميله الجميلات ؟
وليد: وقعت في شر اعمالك رد بقي عليها
علاء: نسمتي حبيبتي.

نسمه: هسامحك بس لان عندك حق هيا فعلا جميله الجميلات
ضحكوا وهزروا وقاطعهم محي وحسين
محي: بقي دي اللي هتجيب ولي العهد !؟ الخدامه ؟
وليد: مراتي يا عمي وخلي بالك وانت بتتكلم عنها .. جميله مليون خط احمر
حسين: اهدوا .. مبروك علي جوازك منها يا وليد
وليد: الله يبارك فيك يا عمي.

نبيله هنا اتدخلت هيا كمان: جميله تعالي ارتاحي بقي حبيبتي
وليد: لا يا امي جميله هتفضل هنا معايا سيبيها لو تعبت هترتاح ما تقلقيش
نبيله: براحتكم .. محي، حسين .. سيبوا الشباب يتبسطوا وتعالوا احنا نتكلم مع الضيوف
محي: نقولهم ايه ؟ ازاي ابنك حبس مراته وازاي جاب واحده واعلنها مراته ؟

وليد: ايوه بالظبط كده يا عمي .. وياريت حضرتك تتقبل اللي حصل بسرعه
محي: اتقبله ؟ انك انت وقبلك ابوك كوشتوا علي الشركه ودلوقتي ضحكت علي العيال دي بكلمتين ! واعتذار سخيف
وليد: والله انا ما ضحكتش علي حد واهم قدامك اسألهم
محي: ايه يا علاء ! فجأه كده بقي وليد حبيبك ؟ نسيت كل حاجه ! نسيت اللي فات
علاء: لا ما نسيتش بس تعبت من الخلافات وكفايه بقي انا عندي مراتي واللي في بطنها بالدنيا معدتش عايز عداء مع اي حد
محي: وابنك لما يجي يقولك فين حقي ؟ ولما يقارن نفسه بابن وليد باشا هتبقي تقوله ايه ؟

ندي: جري ايه يا عمي هو حضرتك كنت فرحان بالعداء بينهم ودلوقتي لما اتصافوا جاي تشعللها ؟
محي: اتصافوا ولا اضحك عليهم حددي ؟
ندي هترد بس وليد اتدخل: اللي انتو بتعملوه ده ولا وقته ولا مكانه فأرجوك النهارده بنحتفل
محي: بجوازك ؟
وليد: بإعلان جوازي
محي: ماشي يا وليد احتفل.

كملوا احتفالهم وكانت سهره جميله بكل المقاييس واخيرا الكل مروح بيته .. وليد جنبه جميله ماسك ايديها وأكرم سايق وجنبه واحد من البودي جارد ووراهم عربيه بودي جارد ..
وليد: ما تتخيليش انا فرحان قد ايه ؟
جميله: وليد
وليد: عارف حبيبي اكيد انتي كمان فرحانه
جميله: ولييييد
وليد: ايه مالك في ايه ؟
جميله: انا تعبانه
وليد: دقايق وهنكون في البيت ارتاحي يا قمر
جميله: لا يا وليد مش التعب ده بقولك تعبااانه
وليد اتعدل وبصلها: تعبانه ازاي يعني مش فاهم ؟

جميله: انا هولد الليله
أكرم أخد فرامل وبصلهم ووليد مش مستوعب: انتي لسه ما دخلتيش في التاسع اصلا ولا دخلتي ايه مش فاهم ؟
جميله: اخر اسبوع في الثامن .. المهم اني تعبانه
وليد: طيب نطلع علي المستشفي .. أكرم
أكرم: حاضر دقايق وهنكون هناك.

وفعلا خلال دقايق كانوا في المستشفي وبعد ما الدكتوره كشفت عليها اكدت ان دي فعلا ولاده .. وليد كان متوتر جدا .. نبيله اتصلت بيه علشان تأخيره فبلغها وهيا اتحركت تروحله وكذلك ندي وحتي علاء ومراته والكل اتجمع منتظر ..
وليد مع جميله ماسك ايديها ودخل معاها لحد ما ابنه شرف الدنيا وكله انتهي .. شال ابنه وكان احساس مختلف تماما بس في خوف جواه .. خوف علي ابنه من الطمع .. كلهم متجمعين.

نبيله: اوعو كلكم كده بعيد وروني حفيدي اللي طال انتظاري ليه ؟ تعال يا قلبي انت شوفتو شبهي ازاي
الكل ضحك و وليد حضن مامته
ندي: هاتيه يا ماما بالله عليكي عايزه اشيله
نبيله: امشي يا بت من هنا روحي هاتيلك واحد ده بتاعي
ندي: ماما بقي
اخيرا نبيله تنازلت وعطته لندي اللي باسته كتير وبعدها عطته لجوزها: شفت يا خالد جميل قد ايه !

وكمان نسمه وعلاء اخدوه
علاء: نسمه انا كده شايله صح ؟
نسمه: اه يا حبيبي ما تقلقش .. تعال نتعلم في ابنهم ..
وليد: نعم منك ليها .. بكره يشرف ابنكم اتعلموا فيه .. هات يا ابني الواد
علاء: هتسميه ايه ؟
وليد: لسه مش عارف .. هاه جميلتي هنسميه ايه ؟
جميله: مش عارفه .. سميه انت
نبيله: ايه رأيك يا وليد في اسم فهد ؟

وليد: فهد ؟ فهد ! ممكن
ندي: اه جميل فهد
نبيله: اوعو بقي كلكم وهاتولي الكتكوت ده ..
وليد: طيب انا مش هشيله ولا ايه ؟ ايه يا ماما
نبيله: ما انت شيلته هيا حكايه ولا ايه ! روح هات غيره
وليد: اجيب غيره ! ايه يا حجه نبيله غيره ايه دلوقتي
دخلت الممرضه: بعد اذنكم هاتوا البيبي علشان يرتاح في سريره كده اعتقد كلكم شوفتوه
نبيله: خليه معايا.

الممرضه: لا مش هينفع يا افندم اصلا غلط عليه حاليا لازم يكون في اوضته المعقمه مع باقي المواليد ده علشان خاطر صحته يا افندم
نبيله: طيب هتجيبيه تاني امتي ؟
الممرضه: هبقي اجيبه علشان يرضع ما تقلقيش حضرتك
الكل بعدها سابهم علشان يرتاحوا وروحوا وفضل وليد مع جميله
وليد: حمدالله علي سلامتك يا عمري
جميله: الله يسلمك حبيبي.

فضلوا مع بعض يتكلموا بهمس وهيا نايمه علي صدره وشويه وجاله تليفون وكان شريف
شريف: انا يا وليد تحبس بنتي ؟ مراتك ؟ كل ده ليه يعني ؟علشان جميلتك ؟
وليد: لا مش علشانها يا شريف بيه بس بنتك اللي زودتها قوي
شريف: غارت
وليد: غارت لدرجه انها تقتلني ؟

شريف: مكنش قصدها وانت عارف ده كويس
وليد: امال ايه قصدها ؟ تأدبني ؟ ولو سوري يا شريف بيه انا ما بتنازلش عن حقي وبعدين مش وليد نصار اللي واحده هتأدبه
شريف: وليد دي بنتي
وليد: اللي غلط يتحاسب ويتحمل نتيجه غلطه .. سيبها تتحمل ولو مره نتيجه اعمالها بعد اذنك
قفل وبص لجميله: بتبصيلي كده ليه انتي كمان ؟
جميله: علشان ما ينفعش تحبس مراتك دي كده قلة اصل وانت حبيبي مش قليل الأصل
وليد: انتي هتجننيني ؟ قلة اصل يا جميله ؟ بعد كل اللي عملته فينا وتقوليلي قلة اصل.

جميله: انت ليه بتعاملها بأخلاقها ! عاملها بأخلاقك انت
وليد: لان هيا ما ينفعش معاها غير كده
جميله: لا يا حبيبي مش انت اللي تحبس واحده مش انت .. وبعدين احنا بننهي العداءات اللي موجوده مش بنخلق اعداء جديده
وليد: شريف انا اقدر اقفله كويس قوي ده انا كمان ممكن الغيه نهائي
جميله: انت سامع نفسك يا وليد ! انت مش كده ارجوك علشان خاطري وخاطر ابننا الغي اي عداء وحاول كمان تتصرف مع عمك محي بالذات لا أنا ولا انت هنتحمل حاجه تحصل لابننا ولا ايه ؟ فكر فيه.

وليد سكت ومردش عليها ..
جميله خرجت من المستشفي وندي ونسمه تقريبا ما بيسيبوهاش وعلاء وخالد مع وليد ..
وليد قابل شريف ومعاه محاميه الخاص
شريف: ايه جاي تشمت اني مش عارف اخرج بنتي من السجن ؟
وليد: دي مش أخلاقي يا شريف بيه بالعكس انا جاي اخرجهالك
شريف انتبه: بجد هتخرجها ؟

وليد: بشرط
شريف:: اللي انت عايزو ؟
وليد: تتنازل عن نصيبك في المجموعه !
شريف: نعم !
وليد كمل: هشتريه منك بسعره المناسب
شريف: لا طبعا مش هبيع
وليد وقف: خلاص خليك بس هاخده منك باي طريقه الموضوع مجرد وقت ابقي سلملي علي ميس وبلغني اخبارها في سجن النسا بعد اذنك
شريف: استني بس.

وليد: انت عارفني ما بجادلش وما بغيرش كلامي يا تتنازل يا بنتك هتتحبس مفيش حل تالت
اخيرا شريف وافق واتنازل عن نصيبه لوليد وراح خرج ميس
في يوم السبوع اتجمعت العيله وبس واحتفلوا ونوعا ما بدأ الامن يستتب في العيله وبدأ اولاد العم تجمعهم قرابتهم ومراتاتهم قربوهم من بعض جدا ..

بعد كام سنه
وليد ابنه معاه وعلاء مراته خلفت بنت سمتها سالي وخالد خلف ولد اسمه وليد علي اسم خاله ..
محي وحسين مازالوا بيخططوا بس في السر ومنتظرين فرصه مناسبه ..

علاء مراته نسمه حامل تاني وخالد كمان اما جميله فمشغوله بكليتها اللي في اخر سنه فيها وقربت تتخرج منها وعايشه بحب وسعاده مع جوزها وابنها ..
وليد كان بيعمل عقد اجهزه جديده بس محي قرر انه يتدخل ويلغي العقد مع الشركه من وري وليد ويستبدله باجهزه مضروبه ويوقع وليد وطبعا بما ان كل حاجه باسم وليد محدش هيشك فيه هو خالص .. هو امن نفسه هو وحسين وجه الدور علي وليد يقع بشركته ..

استلموا الاجهزه المضروبه واتوزعت علي المستشفيات وكان اغلبها حضانات واجهزه لغرف العمليات ..
نسمه جه معاد ولادتها وتعبت جدا ودخلت العمليات تولد والكل منتظرها .. جوزها و وليد وخالد وكل العيله منتظره ..
طلعت الدكتوره لعلاء وقالتله انها مضطره تولد نسمه قيصري وطبعا علاء وافق لان المهم عنده نسمته ...
خرجت الدكتوره بعد فتره طويله وملامح الحزن علي وشها والكل بصلها منتظر
علاء: في ايه ؟ مراتي فين ؟

الدكتوره: انا اسفه جدا بس مراتك كان عندها نزيف جامد مقدرناش نسيطر عليه وحاليا هيا دخلت في غيبوبه فجهزوا نفسكم
علاء واقف جامد ومنطقش
محي: طيب والبيبي ؟
الدكتوره: هو دخل الحضانه .. الساعات اللي جايه حرجه .. بس املنا في ربنا كبير بعد اذنكم
الكل وقف جنب علاء وبيواسيه وهو حاله صمت غريبه مسيطره عليه ..

اخدوا يومين بالمستشفي وفي اليوم الثالث علاء بلغوه ان مراته وابنه الاتنين اتوفوا وكانت صدمه للكل
علاء بدأ يطلع من صمته بحاله من الجنون والخناق مع الكل وعايز يقتل الدكتوره وكانت حاله هرج ومرج وادخل الامن واتدخل وليد وخالد علشان يقدروا يسيطروا عليه
واخيرا مدير المستشفي اتدخل.

علاء: مراتي كانت كويسه انا هقفلكم المستشفي دي انتو قتلتوها .. انا هقفل المستشفي سامع هقفلها
المدير: والله لو في حد غلطان واتسبب في موت مراتك فده حضراتكم ومش هيا بس في كذا حاله
وليد: تقصد ايه ان ده بسببنا ؟

المدير: اقصد ان الاجهزه اللي شركتكم جابتها كلها مضروبه والحضانات كمان وده اللي قتل مرات حضرته .. في وقت العمليه مهم جدا الاكسجين يفضل مستمر علشان المخ يفضل مستمر وبما ان الاجهزه مضروبه فالاكسجين ما وصلش لمخها وده اللي دخلها في غيبوبه وقتلها ونفس الوضع لابنه .. الحضانات بايظه ما بتقمش بدورها .. انتو اللي قتلتوهم والمستشفي هيا اللي هترفع علي شركتكم قضيه وانا اللي هقفل شركتكم
المدير سابهم ومشي والكل بص لوليد لان الصفقه دي بتاعته هو.

وليد: ما تبصوليش انا استحاله اشتغل في اجهزه مضروبه وانتو عارفين ده كويس
طبعا الدنيا اتوترت ومحي فضل مع ابنه يقنعه ان وليد قتله مراته وابنه علشان ما يسمحش يكون في شريك مع ابنه فهد ..
وليد الدنيا كلها اتلخبطت معاه ومقدرش يوصل لمين اللي لغي العقد مع شركته وعمل العقد الجديد
واترفعت قضيه علي الشركه من المستشفي وطبعا وليد سحب كل الاجهزه المضروبه من المستشفيات قبل ما تحصل كوارث كتير..

حيره وغموض .. كل حاجه عملها هو بنفسه والشركه بلغته انهم وصلهم ايميل بإلغاء الصفقه ولما طلبوا تأكيد اتأكد عليهم معني كده ان اللي عمل ده يقدر يدخل مكتب وليد وله صلاحيات في الشركه .. وده مالوش غير معني واحد ان حد من اعمامه او اولادهم عملها بس يا تري مين ! وليد كلف مخبر سري وكان ( اسمه جمال ولقبه جيمي ) يعرفله كل اللي يقدر عليه من الشركه بره وبعدها قرر وليد يسافر بنفسه يشوف ايه اللي حصل بالظبط

جميله: ارجوك يا وليد ما تسافرش .. خلي اي حد تاني يسافر
وليد: لازم انا بنفسي يا جميله ده سمعه الشركه ومستقبلها كله متوقف علي ده ..
جميله: بلاش انا مش مطمنه ارجوك
وليد ضمها: المكتوب مكتوب يا جميله .. خلي عندك ثقه في ربنا
خلي بالك من نفسك ومن فهد .. وبعدين مش هتأخر
جميله: طيب خد اكرم والبودي جارد معاك.

وليد: جميله البودي جارد في فتره كنت محتاجهم بس دلوقتي خلاص وبعدين هيعملولي ايه بره ! حتي لو في خطر هيكون هنا مش بره اللي خاني موجود هنا ما تقلقيش
هنا ابنهم دخل: بابي
وليد شاله: روح قلب بابي
فهد: انت هتوصلني المدرسه صح .. بكره اول يوم وهكون كجي١ صح بابي
وليد: صح يا قلب بابي بس اسف جدا يا فهد مامي هتوصلك لان بابي مسافر في شغل مهم جدا
فهد: بس انا كنت عايزك انت.

وليد: اسف حبيبي لازم اسافر اعذرني فهد
وليد برضه سافر وساب جميلته وابنه اللي زعلان من ابوه انه ما وصلوش زي ما وعده ...
وليد حاول يعرف اي حاجه من الشركه بس موصلش لاي شيء مجرد ايميل وري ايميل اتبعتوا لغوا الصفقه وبالليل جاله تليفون من جيمي اللي كلمه و نزل يقابله
وليد: ايه اللي مخلينا نتقابل في السر كده وبالوقت ده
جيمي: حضرتك عايز تعرف مين اللي لغي العقد مع الشركه وانا هقولك.

وليد: اتفضل قول
جيمي: اتفضل شوف بنفسك الايميل
وليد: وده افهم منه ايه ؟ كل اللي مكتوب فيه اني بلغي الصفقه وبس فاعمل ايه بيه !
جيمي: حضرتك ركز بس وشوف هنا ..
وليد: مش فاهم
جيمي بدأ يشغله برامج علي اللاب ويشرحله اكتر.

جيمي: كل مكتب بيكون له رقم حتي لو اتفتح نفس الايميل .. وبالتالي بمجرد ما تعرف ازاي المكاتب مترقمه هتعرف اتبعت من انهي مكتب وساعتها ..
وليد: هعرف مين اللي بعته ! طيب اعرف ازاي ترقيم المكاتب
جيمي: الكمبيوتر هو اللي هيعرف .. انا مشغل برنامج هيوصلنا للترقيم ده اصبر بس دقايق وهيقولنا
وبالفعل في خلال ربع ساعه من الانتظار البرنامج وصل للترقيم وفك الشفره وساعتها وليد واقف مش مصدق
وليد: عمي محي ده مكتبه !

جيمي: يبقي عمك اللي عملها بس ليه ..
وليد مش مصدق ابدا: وليه يلغيه هو مش هيستفاد شيء وبعدين هو وابنه اكتر حد خسر
جيمي: انا معرفش ليه انا اللي اعرفه قلته لحضرتك
هنا نور عربيه نور في وشهم .. كذا عربيه مش واحده ونزل اشخاص كتيره منها ووليد حط ايده علي عنيه بيحاول يشوف مين اللي نزل لحد ما قربوا منه واكتشف انهم عيلته مش اكتر.

وليد: انتو هنا ليه ؟ عمي محي سمعت ان حضرتك اللي لغيت عقد الشركه
محي: انا ؟ وانا الغيه ليه ؟ يهمني في ايه علشان الغيه ؟
علاء: انت اللي لغيته وتمثيلك للقيم والمباديء معدش لايق عليك
وليد: انا مالغيتش حاجه ابوك اللي لغاه
علاء: ابويا مش هيقتل حفيده فاهم
وليد: لا للاسف يا علاء ابوك فعلا اللي قتل ابنك.

علاء للحظه اتردد بس محي اتكلم: ايه دلوقتي عايز ابني يقتلني ولا ايه ؟ عايز تخلص مننا كلنا وتوقعنا في بعض .. انا قتلت ابنه وهو يقتلني وبكده تخلص مننا احنا الاتنين صح ؟
وليد: انا ماليش في التخطيطات دي وانتو عارفين ده كويس .. خالد اتكلم انت كنت معايا في الصفقه دي
خالد: انا فعلا كنت معاك لحد ما اتفقنا بعد كده انت لغيتها
وليد زعق: انا ما لغتش صفقات.

جيمي: فعلا الايميل اللي اتبعت كان من مكتب محي وده اتأكدنا منه حالا وممكن حضراتكم تشوفوا الايميل اتبعت منين
هنا محي طلع مسدس وقبل ما حد يستوعب كان ضرب رصاصه في دماغ جيمي ونزل في الارض وسط دهشه وليد اللي عمره ما تخيل انها توصل للقتل كده رفع دماغه وبصلهم علاء طلع مسدس: خلص الكلام يا وليد واكتفيت منك
وليد رجع خطوه لوري: علاء اعقل.

علاء: كفايه عقل ما كنت عاقل وايه التمن ؟ خسرت مراتي وابني .. وانت السبب
يدوب وليد هيرد بس علاء كان ضرب رصاصه في صدره ووسط حاله من الذهول وليد وقع علي الارض بينزف وكلهم وقفوا فوقه
محي: واخيرا خلصنا منك .. يالا بينا قبل ما البوليس يوصل
مشيوا فاضل علاء و خالد وعلاء وطي عليه ووليد بينزف جامد قرب منه
علاء: اخيرا اخدت اللي تستاهلو.

وليد نطق بالعافيه ومد ايده مسك علاء من هدومه: جميله وفهد مالهمش ذنب
علاء شد ايد وليد وزقها: وابني ونسمه مكنلهمش ذنب وبعدين انا هجمعك بيهم
علاء وقف ووجه مسدسه في وش وليد وهيضرب بس خالد مسك ايده وعلاء بصله: ايه ؟ هكمل عليه ولا عايزو يقوم ويرجعلنا يودينا كلنا في داهيه
خالد: سيبلي انا الشرف ده
علاء بعد وسابهم وخالد وطي علي وليد حط حاجه في جيبه
خالد: ده ضمان انك ما ترجعش تاني ..
وقف وعنيهم متعلقه ببعض
وليد: ندي ؟

خالد: ماتقلقش عليها بعدين انت عارف اني بحبها .. باي باي وليد
خالد ضرب رصاصه كمان ومشي حصل عيلته لان سارينات البوليس قربت
علاء: خلصت عليه ؟
خالد: ما تقلقش
مشيوا كلهم وسابوه بينزف في الارض .. وليد حط ايده في جيبه وطلع اللي خالد حطه كانت فلاشه صغيره مفهمش اي دي
كان بينهج والدم بيخرج من صدره حتي من بوقه ودعي دعاء صامت لربنا يحميله ابنه ومراته .. وقفل عنيه ونفسه هدي شويه شويه...