قصة جميلة بنت بسيطه فلاحه

رواية جميلة الجزء الأول للكاتبة الشيماء محمد الفصل السابع عشر

ميس: خلاص تم ؟ خطفت جميله ؟ هيا فين لازم اشوفها بعيني متكتفه ولازم اشوف وليد منهار عليها
توماس: انا رجالتي منتظرنهم من بدري مش موجودين
ميس: يعني ايه مش موجودين ؟ انا سيباهم في اوضتهم
توماس: اصلا الاوضه فاضيه ومفيهاش حد نهائي ومفيش حد نازل فيها اصلا
ميس: يبقي انت دخلت اوضه غلط دول ما بيخرجوش اصلا
توماس: الاوضه رقم (-) وفي الدور التاني
ميس: مظبوط .

توماس: طيب الاوضه دي فاضيه
ميس: استني هدخل اشوف واكلمك تاني
دخلت ميس الفندق وراحت علي الاستقبال
ميس: مستر وليد نصار فين ؟ في اوضته ؟
الموظف: لا هو خرج اعتقد
ميس افتكرت ان وليد نازل في اوضتها هيا
ميس: سوري انا اقصد مدام جميله عبد المؤمن هيا مصريه وصاحبتي وحابه اطمن عليها مش اكتر
الموظف: لحظه ... هيا سابت الفندق الصبح
ميس: ايه سابت الفندق ؟ راحت فين ؟

الموظف: انا معرفش حضرتك نزلت وقفلت الحساب
ميس بنرفزه: هيا ما بتعرفش تتكلم ولاانجليزي ولا فرنساوي فازاي دفعت حسابها ؟
الموظف: اعتقد ان مستر وليد جوز حضرتك هو اللي اتولي مهمه الترجمه ليها وساعدها .. اي خدمه تانيه
ميس مشيت هتولع ومش عارفه تعمل ايه فكلمت توماس
ميس: وليد اخدها ومشي .. اقلب باريس كلها عليهم .. شوف سافروا فين ؟ انت لازم توصلهم باي طريقه واي تمن !
توماس: حاضر واول ما اوصل لحاجه هبلغ حضرتك.

جميله: حبيبي يا وليد
نامت علي كتفه وهو سايق وهو ابتسم بحب
وليد: مبسوطه جميلتي ؟
جميله: فوق ما تتخيل .. عمري ما تخيلت ابدا انه في يوم جوزي يخطفني من الدنيا كلها ونختفي انا وهو وبس
وليد: احلامك اوامر جميلتي .. عايزه تختفي من الدنيا كلها نختفي وماله ..
جميله: طيب ممكن ميس تضايق او تتخض او تبلغ عيلتك ؟
وليد: ما قولتلك ما تعمليش حساب ميس
جميله: ولو كلمت والدتك وقالتلها اننااختفينا ؟

وليد: انا سايبلها جواب ما تقلقيش عامل حساب كل حاجه .. الاجازه دي يا جميله ليكي انتي وبس .. كل اللي تتمنيه هعملهولك مهما يكون يا قلبي
جميله: طيب هنروح فين ؟ لازم يكون المكان فيه ميه ؟
وليد: المكان اللي هنروحه بيت معزول عن الكون كله في وسط خضره وفيه بركه ميه .. ميتها اصفي من اي شيء شفتيه قبل كده .. المكان خيالي يا جميله
جميله: رحته قبل كده ؟

وليد: لا بس شفته علي النت وعجبني وفكرت اشتريه ولما احب اهرب اجي هنا محدش يعرف بيه نهائي .. مش بقولك هنختفي
جميله ابتسمت بحب وريحت راسها علي كتف وليد وغمضت عنيها بحب ووليد باس راسها وضمها بايده جامد
ميس طلعت اوضتها بترمي شنطتها ولمحت ورقه علي المرايه ملزوقه فقرتها
( انا اخدت جميله واختفيت ما تدوريش علينا وزي ما قلتلك انتي براحتك اول ما هرجع هبلغك
وليد ).

قطعتها مليون حته وكلمت بابها وبلغته باللي حصل وطمنها ان توماس هيقدر يوصلهم
وليد وصل بجميله ونزلوا البيت اللي كان تحفه من تحف الزمن .. بيت اجمل من الخيال .. شالها ودخل بيها البيت
وليد: جميلتي واميرتي اتمني بيتك المتواضع يعجبك
جميله: انا مش قادره اصدق الجمال ده .. انا ممكن اموت اصلا من الفرحه
وليد: بعد الشر عليكي .. تعالي نبدأ شهر عسلنا بجد ؟
جميله: يالا
وبدؤا فعلا شهر عسل اجمل من الخيال كله لعب وضحك وحب.

عند خالد
خالد: وبعدين يا ندي ؟
ندي: وبعدين معاك انت يا خالد ؟ الكره في ملعبك دلوقتي مش فاهمه انت مستني مني ايه ؟ اثبتلي انك مش ضد اخويا وساعتها هنتجوز علي طول بدون حتي تفكير
خالد: وانا مش ضده افهمي بقي
ندي: يبقي تسيب المجموعه
خالد: اسيب شغلي ؟ ده كلام يا ندي !
ندي: اه سيبه وتعال لو تحب نسافر بره تاني ونشتغل انا وانت ونأسس حياتنا لوحدنا
خالد: وعش العصفوره يكفينا ونبني طوبه طوبه صح ؟

ندي: بتتريق ! براحتك
خالد: ماهو انتي بتقولي كلام مش منطقي بالمره .. عايزاني اتخلي عن حقي في الشركه واتنازل عنه واروح اشقي واشتغل وعمرنا يضيع شقي
ندي: حقك في الشركه ؟ اي حق اللي بتتكلم عنه ده ؟ انت مالكش حاجه اصلا في الشركه لا انت ولا علاء ولا عمي حسين ولا عم محي
خالد: نفس منطق وليد .. الشركه دي بتاعت جدي اللي هو جدك يبقي المفروض لما يموت تتورث لاولاده التلاته لكن ابوكي كوش عليها لوحده وبعدها جاي يمن علي اخواته بكام سهم هو ده شرع ربنا !

ندي: ده اللي انت فاهمه من ابوك صح ؟ تقدر تقولي لما جدي مات كان فين ابوك ؟ وكان فين عم محي ؟هاه رد !
خالد: ابويا كان في ايطاليا بياخد الدكتوراه هناك وكنا مستقرين هناك وعم محي اعتقد كان في الخليج
ندي: تمام واما ابوهم مات مارجعوش لميراثهم ليه ؟ ليه كل واحد فيهم فضل في حياته ؟
خالد: لانهم ما تخيلوش ان اخوهم هياكل حقهم لما يرجعوا
ندي: انت مصر تتجاهل الحقايق يا خالد .. خلاص الكلام مالوش لازمه اصلا طالما انت مقتنع باللي في دماغك اتفضل شوف وراك ايه
خالد: طيب قوليلي الاول حقايق ايه اللي متجاهلها عرفيني انتي.

ندي: ان جدك لما مات كان مديون ومكنش فيه مجموعه اصلا كانت مجرد شركه صغيره وعليها الاف ديون وابويا ساعتها كلم اخواته الاتنين وطلب منهم يرجعوا او يساعدوه يفك الديون دي والاتنين رفضوا .. قالوله مالهمش دعوه وان كل واحد له حياته مش هيسيبها علشان خاطره .. قالوله يعمل ما بداله هما متنازلين عن حقهم ومش عايزين حاجه في مقابل مايطلبش منهم اي مساعده ماديه وساعتها ابويا شقي وتعب وباع كل حاجه يقدر يبعها علشان يسدد ديون ابوه حتي دهب ماما باعه وشقي وسهر وتعب لحد ما قدر يقف علي رجليه وقدر يوقف الشركه من تاني يبقي كده ده نصيب مين ؟وسلمها لوليد وبما انه ذكي ومتعلم اكتر من بابا خلاها بدال الشركه الواحده بقت مجموعه ولما كبرت واحلوت رجع عمك محي بسرعه وقال نصيبي فين دي شركه ابويا ورجع ابوك وقال نفس الكلام ..

الاتنين اتنازلوا عنها وهيا بتغرق واول ما وقفت رجعوا جري يبقي ده شرع مين ؟ رد يا خالد ! روح اسأل ابوك لما ليه حق وليه ورث مجاش ليه يراعيه ؟ ليه ساب اخوه لوحده سنين طويله وجاي دلوقتي يفتكر انه له حق وابقي تعال قولي رد عليك بايه ؟
خالد: ده اللي ابوكي قالهولك
ندي: ده اللي شفته بعيني .. لسه فاكره ابويا ورجعته اخر النهار شقيان ومهدود وابتسامته في وشي وكأن مفيش اي شيء كنت فين انت ؟ سافرت مع ابوك وسبتني.

خالد: مكنش قراري اني افضل فما تلومنيش
ندي: ودلوقتي القرار بقي في ايدك بس برضه بتسيبني
خالد: انتي اللي بتبعدينا عن بعض بشرطك الغريب ده
ندي: انا بخيرك يا انا يا الشركه وللاسف انت بتختار الشركه .
خالد: طيب ما تختاريني انتي.

ندي: لا يا خالد انا بختار اخويا .. اخويا اللي عمره ما حسسني في لحظه ان ابويا مات وكان هو الاب والاخ والصديق والحبيب ليا .. فهختاره هو علي طول .. رأيي مش هغيره يا خالد واتفضل بقي من هنا علشان عندي شغل
خالد خرج بره وهو مش عارف يعمل ايه ؟ ويتصرف ازاي ؟ راح عند علاء
علاء: يا ساتر يا رب مالك ؟
خالد: مالي يعني هو انا عندي غيرها يحرق دمي
علاء ضحك: لسه متمسكه بشرطها الغبي ده ؟

خالد: ايوه ومقتنعه بكلام اخوها ان ابهاتنا ملهمش حق في الشركه وانهم اتنازلوا عن حقهم لما كانت عليها ديون
علاء: اه القصه دي ! سمعتها قبل كده من وليد نفسه
خالد: طيب وايه ؟ مش يمكن فعلا يكون صح ؟
علاء: ولااا انت تحب ندي علي عيني وعلي راسي لكن تلعب في دماغك وتقلبلك الحقايق فلأ والف لأ مفهوم ؟ انا مش هتنازل عن نصيبي في المجموعه مهما يحصل .. انت بقي بتحبها انا هكون اكتر من سعيد وانا باخد نصيبك ليا مفهوم ؟

خالد: ما علينا انا اصلا مش عارف افكر المهم نسمتك اخبارها ايه ؟ هيا رجعت الشغل صح لمحتها هنا كذا مره
علاء: اه رجعت
خالد: ومالك بتقولها كده ليه وكأنك مش مبسوط برجوعها ؟
علاء: علشان سيادتها بتتنطط عليا وبتتشرط .. لا هروح وحدي . لا ملكش دعوه بيا، لا ما تتكلمش معايا، لا ما تدخلش في شيء يخصني والف لأ ولأ لما خنقتني
خالد: طيب ما تسيبها ايه اللي جابرك ؟
علاء: طيب ما تسيب ندي ايه اللي جابرك ؟

خالد: ندي انا بحبها
علاء: يعني هو انت بس اللي بتحب واحنا اولاد ستين في سبعين ولا ايه ؟
خالد: اصل انت يا علاء ما تعرفش تحب
علاء: ليه بقي ان شاء الله ؟ ناقص ايد ولا ناقص رجل ؟
خالد: لا وانت الصادق ناقص قلب
علاء: ههههه هههه خفه
الباب خبط ودخلت نسمه.

نسمه: حضرتك مش فاضي اسفه اجي لحضرتك وقت تاني بعد اذنك
علاء وقف بسرعه: لا فاضي تعالي خالد ماشي .. يالا يا خالد امشي
خالد ضحك وهمس: بتبيع وقتي ماشي هعديهالك ولا تحب الزق وامشيهالك
علاء بابتسامه زقه وكأنه بيوصله للباب: امشي يا حيلتها من هنا بدال ما ارتكب فيك جنايه ( علي صوته ) هنتظر منك تليفون
خرجه وقفل الباب ويدوب بص لنسمه وابتسم فالباب اتفتح وخالد بص بغلاسه: اكلمك امتي ؟

علاء بابتسامه غيظ وهو رايحله: اي وقت ؟
قفل الباب ويدوب لف فخالد فتحه تاني: هتروح معايا مشوار الليل ؟
علاء: هروح سلام
قفل الباب وخالد فتحه تاني: طيب اجهز علي ٩
علاء: حاضر
قفل الباب بس خالد واقف: بعربيتك ولا بعربيتي ؟
علاء مسكه من دراعه وخرج بره وقفل الباب وراه
علاء: اقسم بالله يا خالد...

خالد بيضحك: خلاص خلاص مش هغلس تاني ادخلها
علاء: والله
خالد: خلاص مش هغلس ادخل
دخل علاء وابتسم لنسمه اللي باصه للارض
نسمه: خلصت كلامك مع ابن عمك ؟
علاء: هو كان بيستظرف بس شويه
نسمه: لاحظت .. المهم نتكلم في الشغل
قعد وهيا قعدت قصاده وبتتكلم في الشغل وهو باصصلها ومش مركز في ولا حرف هيا بتقوله
نسمه: وبعدين ؟ ... علاء
علاء فاق: هاه ؟

نسمه: بقولك وبعدين ؟
علاء: ايوه بعدين في ايه ؟
نسمه: في عدم تركيزك ده ؟
علاء: طيب اعملك ايه مش بإيدي .. نسمه بعدين دي عندك انتي
نسمه: علي فكره انا بتكلم عن الشغل
علاء: وانا بتكلم عننا
نسمه: مفيش عننا دي ..
علاء: وافقي وهيبقي في
نسمه: انا اسفه المهم انا هروح استلم شحنه الاجهزه
علاء: تمام نروح مع بعض
نسمه: لا سوري هروح لوحدي
علاء: انا هاجي معاكي
نسمه: وانا بقولك هروح لوحدي بعد اذنك.

قامت ماشيه واول ما وصلت للباب وفتحته اتفاجئت بيه بيتقفل تاني وعلاء ايده عليه فبصتله وكان قريب قوي منها وحست انها مهدده
نسمه: وبعدين ؟
علاء: تتجوزيني ؟
نسمه اتصدمت وبصتله وتاه منها الكلام فضلوا كتير باصين لبعض وساكتين ولا هو بيتكلم ولا هيا بترد
علاء: انا سألت سؤال
نسمه: انا ورايا شغل بعد اذنك
جت تفتح الباب بس هو وقف وسند عليه
علاء: تتجوزيني ! ردي عليا
نسمه: انت بتقول ايه ؟ انت مركز وواعي للي بتقوله ؟

علاء: ايوه مركز وايوه واعي وايوه عايز اتجوزك قولتي ايه ؟
نسمه: عايز تتجوزني ليه ؟ لمجرد اني رفضتك ؟ كبرياءك اتهز
علاء: رفض ايه وكبرياء ايه بس يا نسمه ؟ يا بنتي انا بحبك .. فاهمه ؟ بحبك
نسمه: انت عندك استعداد تتجوزني ؟ هتتجوزني ازاي بقي في السر ولا بعقد ولا هتخليني الاول اسيب الشركه ولا ايه بالظبط مش فاهمه
علاء: انتي ليه بتفكري فيا كده !

نسمه: علشان انت من طبقه مختلفه تماما عني .. ايوه انا مهندسه وواخده دكتوراه بره بس حاليا عايشه انا ووالدتي من راتبي ابويا خسر فلوسه في البورصه ومات فيها فانا من عامه الشعب دلوقتي
علاء: وانا ايه ؟ هاه ؟ انا ليا يدوب كام سهم وشغال هنا الفرق بينا مش كتير
نسمه: علاء ارجوك انا ورايا شغل .. والدك كمان مش هيوافق بعد اذنك.

يدوب هتخرج فراح ماسك ايدها وهيا استغربت وحاولت تشد ايدها منه بس هو مصمم وماشي بيها وايدها في ايده والكل بيبصلهم ومهما تتكلم مش بيسيب ايدها وكل الموظفين وقفوا وبيتهامسوا فوقف مره واحده
علاء: في ايه مالكم بتبصولنا كده ليا ؟ ايه اول مره تشوفوا واحد بيحب واحده ولا ايه ؟ كل واحد يخليه في شغله
الكل ابتسم واللي بيتكلم واللي بيضحك وعلاء ما سبهاش من ايده وكمل طريقه لحد ما وصل مكتب ابوه فتحه كان هو وحسين ومعاهم خالد كمان ودخل وهيا في ايده محرجه جدا ووشها جايب مليون لون
محي: في ايه مالكم ؟

نسمه بهمس: سيب ايدي بقي
علاء: لأ
محي: في ايه يا علاء؟
علاء: في اني بحب الباشمهندسه نسمه وعايز اتجوزها وعايزين انا وانت نروحلها البيت النهارده نطلب ايدها من والدتها
نسمه حاله ذهول مسيطره عليها وساكته تماما ومحي معرفش يرد وخالد مبتسم ومبسوط وحسين بيتفرج
علاء: بابا .. نروح الساعه كام ؟
محي: نروح فين ؟

علاء: نطلب ايديها
محي: شوف الوقت اللي يناسبك
علاء ابتسم: شكرا ليكي .. يالا بينا
شدها وخرج ورجع علي مكتبه ولسه ايدها في ايده بس المره دي ساكته تماما لحد ما دخل مكتبه وقفل الباب ساب ايدها وبصلها
علاء: اجي الساعه كام ؟
نسمه مذهوله
علاء: نسمه .. نسمه
نسمه: هاه
علاء: اجي الساعه كام ؟
نسمه: تيجي فين ؟
علاء: اجي بيتكم
نسمه: تعمل ايه ؟

علاء: اطلب ايدك
نسمه: انت مجنون علي فكره والله مجنون
اتجرأ وحط ايديه ومسك وشها: انتي مش عايزه تصدقي اني بحبك اعمل ايه ؟ معدتش قادر اصبر اكتر من كده يا نسمه .. بحبك .. فاهمه ؟ ب ح ب ك
نسمه بصاله: مش هتجرحني تاني !
علاء: ابدا
حطت ايديها علي ايديه اللي ماسكه وشها
نسمه: بتحبني بجد
علاء: مش معقول تكوني لسه مش حاسه بيا .. انا هموت من الحب.

نسمه: بعد الشر عليك
علاء: ليه بعد الشر؟ هو انا اهمك اصلا ! لو اهمك مكنتيش رضيتيلي بالعذاب ده كله
نسمه: اعمل ايه خايفه منك
علاء: ممكن بقي تبطلي خوف وتسمحيلنا نعيش بقي
اتجرأ ومد ايديه يضمها بس بتخوف وترقب يا تري هتمنعه وهيا قلبها بيدق مش عارفه تمنعه ولا تدفن نفسها في حضنه !

قلبها بيدق بس مش اسرع من قلبه .. غمضت عنيها وحطت راسها علي كتفه وهو اتجرأ وواحده واحده حط ايديه حواليه ولما استكانت بين ايديه معرفش يسيطر علي اعصابه فمره واحده شالها وضمها بعنف لصدره وكأنه بينتقم من بعدها عنه طول الفتره اللي فاتت
ايديها حواليه: علاء ارجوك
علاء بصوت مهزوز: ارجوكي انتي ارحميني
اخيرا بعدت عن حضنه براحه مع انه مكنش عايز يسيبها بس براحه بعدت وهو براحه سابها بس عنيهم متعلقه ببعض
علاء: النهارده هاجي !

شاورت بدماغها اه
علاء: هنتجوز صح ؟
ابتسمت له: هنتجوز
واخيرا سابها تطلع من مكتبه والفرحه مش سايعاها ابدا وفعلا اخد ابوه وخطبها ولبسها دبلته في ايديها
خالد وندي ما بيتكلموش نهائي وخالد مش قادر ولا يبعد عنها ولا يبعد عن الشركه.

عند وليد
وليد: جميله فات شهرين حبيبتي واحنا هنا
جميله: بجد .. خلينا هنا علي طول
وليد ضمها بحب وهيا نايمه علي صدره علي مرجيحه بتهزهم هما الاتنين
وليد: بجد ! عايزه نفضل هنا علي طول ؟
جميله: اه يا ريت يا وليد .. مستعده اعيش معاك هنا علي طول
وليد: يا ريت بس ندي وامي .. وخصوصا ندي علي الاقل اطمن عليها .. نرجع نظبط امورنا ونختفي تاني ايه رأيك ؟

جميله: براحتك يا حبيبي انا بس بقول اللي بتمناه لكن عارفه اننا لازم نرجع لاهلنا وللواقع
وليد: هنيجي تاني هنا بس حاليا لازم نرجع للعالم اللي انفصلنا عنه
جميله: هو ممكن تكون ميس بتدور علينا ؟
وليد: ممكن بس مش هتعرف توصلنا ابدا ما تقلقيش
جميله: انا مش قلقانه انها توصلنا انا قلقانه عليها هيا
وليد اتعدل شويه وبصلها: نفسي تبطلي الطيبه الزياده عن اللزوم دي .. هيا لو طالت تقتلك هتقتلك وانتي قلقانه عليها ؟ هيجرالها ايه يعني ؟

جميله: كل انسان بيفكر بطبيعته ..
وليد: لا لازم تعاملي كل انسان بطبيعته هو مش بطبيعتك انتي
جميله: يعني لو كلب جه عضني اروح اعضه انا كمان ؟ ما ينفعش ده .. ادفع بالتي هيا احسن ..
وليد: الكلام ده للناس اللي بتقدر وتفهم وتعرف ربنا لكن في ناس مفيش منهم رجا اصلا
جميله: حبيبي
وليد قاطعها: كفايه كلام عن ميس اخدت اكتر من حقها .. قومي نجهز علشان نرجع يالا !

جميله: يالا حبيبي
اخيرا رجعوا الاتنين الفندق و وليد ساب جميله علشان يروح لميس وخبط علي بابها وهيا فتحت واول ما شافته اتجننت
ميس: انت ؟
وليد: اه انا
ميس: جيت امتي ؟
وليد: من كام ساعه
ميس: كام ساعه ؟ ويدوب فكرت تيجي تعرفني ؟

وليد: عقبال ما ارتحت شويه من الطريق وجميله ارتاحت انتي عارفه انها حامل والحمل تعبها .. هيا حاليا في الرابع زي ما انتي عارفه
ميس: اه المهم ادخل
وليد دخل: انا جاي اقولك اننا رجعنا واننا هنسافر خلاص نرجع مصر
ميس: امتي ؟
وليد: بكره بعده بالكتير
ميس ابتسمت: اوك وجميله هتسافر معانا ولا بعدنا ؟
وليد بص في الساعه: لا جميله هتسافر خلال كام ساعه هتمشي في طياره الساعه ٧
ميس بخضه: ايه ؟ ليه ؟

وليد: وانتي مالك اتخضيتي ليه ؟ اكيد مش هسيبها هنا لوحدها فلازم اطمن عليها قبل ما نمشي
ميس: اهمم طيب هتروح توديها المطار امتي ؟
وليد: وانتي شاغله بالك ليه ؟
ميس: عايزه اجي معاك ! زهقت من القعده لوحدي والعيشه لوحدي بقالي شهرين لوحدي
وليد: اول مره تزهقي لوحدك .. كنتي ديما تقولي نفسك في اجازه تقضيها لوحدك اديكي اهو لوحدك فازاي زهقتي ؟

ميس: متخيلتش ابدا اني هزهق من غيرك .. الظاهر اني بحبك
وليد ضحك: دلوقتي عرفتي انك الظااااهر بتحبيني .. ما علينا انا هتحرك خلال ساعتين عايزه تيجي خليكي جاهزه
قبل ما يخرج: اكيد هكون جاهزه
وليد رجع لجميلته: جهزتي شنطك وحاجتك ؟
جميله: كله جاهز
وليد: ميس عايزه تيجي معانا المطار
جميله: اشمعني ؟

وليد: مش عارف يمكن عايزه تتأكد انك فعلا هتسافري ! الله اعلم
جميله: طيب انت عندك مشكله انها تيجي ؟
وليد: لا هيا حره عادي المهم سيبك من ميس هتوحشيني اليومين دول
جميله: انت اكتر .. اوعي تتأخر عليا
وليد: يومين بالظبط وهاجي ان شاء الله
جميله: تيجي بالسلامه حبيبي.

ميس اول ما وليد خرج تليفونها رن فردت كان توماس
توماس: مستر وليد رجع الفندق
ميس: عرفت وشفته .. الظاهر انك سمعه علي الفاضي
توماس: هو كان حريص جدا ان محدش يلاقيه .. ما استعملش اي تليفون .. ما استخدمش اي فيزا خاصه بيه .. فبالتالي صعب حد يلاقيه .. كل الاماكن اللي باسمه هنا او في الاماكن اللي حوالينا بعت فيها رجالتي ومحدش لقاه .. هو قالك كان فين ؟
ميس: لا طبعا مقالش
توماس: طيب تحبي نخطفها الليله ؟

ميس: هيا هتسافر خلال ساعتين اصلا وليد هيوصلها
توماس: وانتو ؟ يعني مستر وليد هيروح معاها ؟
ميس: لأ وليد هيفضل هنا
توماس: طيب يبقي هتكون لوحدها في مصر سهل جدا حد يخطفها في المطار ..
ميس: فعلا فكره طيب سلام الحق ابلغ بابا
ميس اتصلت بابوها بلغته كل الاخبار.

شريف: خلاص تمام ما تقلقيش .. وكده احسن انها تتخطف هنا بحيث وليد هيشك في اعمامه علي طول ومش هيشك فيكي لانك معاه وبكده ما نضطرش نكشف نفسنا دلوقتي غير بعد ما هيا تولد
ميس: تمام هتيجي علي طياره الساعه ٧ شوف بقي انت هتوصل القاهره امتي ؟
شريف: خلاص تمام سيبي الموضوع عليا
ميس قفلت مبسوطه واطمنت ان ابوها هيعرف يتصرف واطمنت اكتر ان وليد هنا معاها
وليد اخد جميله ونازلين وميس معاهم علي المطار ودخل معاها وزن الشنط بتاعتها والمفروض انها تكمل لوحدها من هنا
ميس: يالا بقي يا شاطره اشوفك في مصر
جميله: ترجعوا بالسلامه.

ميس بعدت خطوه ووليد مع جميله ضمها كتير في حضنه ومش عايز يسيبها
وليد: خلي بالك من نفسك .. اول ما توصلي كلميني .. فاكره كل حاجه قلتهالك
جميله بهمس علشان ميس ما تسمعش: فاكره خلاص ما تقلقش عليا
وليد: وهقلق علي مين لو مش عليكي ! خلي بالك من نفسك ومن ده ..
حط ايده علي بطنها بحب والغيره دبت في قلب ميس لانها اول مره تشوف جوزها كده .. ضعيف .. رومانسي .. بيحب ..

وليد باس جميله اللي اتحرجت جدا وحاولت تبعد بس وليد رفض
وضمها جامد قوي ليه ومش عايز يسيبها تبعد
جت مضيفه قربت واتكلمت مع وليد بالعربي
المضيفه: لازم نتحرك دلوقتي يدوب
وليد: تمام .. هتوصليها لحد الطياره صح ؟
المضيفه: ايوه ما تقلقش ابدا حضرتك ابدا
وليد: انا متشكر جدا ليكي. .. خلي بالك منها
جميله: لا اله الا الله .. استودعتك الله الذي لا تضيع ودائعه.

وليد: محمدا رسول الله وانا كمان استودعتك الله الذي لا تضيع ودائعه
جميله ابتسمت ومشيت ووليد بيبص عليها لحد ما اختفت تماما وبرضه واقف
ميس: هاه مش خلاص مشيت ولا وصله الرومانسيه دي مش هتخلص ؟ يالا نمشي
وليد: لما الطياره تقلع يمكن تتأخر ولا حاجه تحصل
ميس: يوووه يا وليد
وليد: محدش طلب منك تيجي
ميس قعدت علي اقرب ترابيزه وهو واقف باصص للقزاز مستني.

ميس بتفكر .. مستنيه اللحظه اللي تعرف فيها انها اتخطفت يا وليد .. انا اكتر واحده هفرح فيك .. بقي دي تفضلها عني .. انا تبطل تحبني علشان دي ! ماشي يا وليد ان ما ذليتك ما ابقاش انا ميس
وليد اخيرا شاف الطياره بتتحرك وحس ان قلبه بيتحرك معاها كان نفسه يكون جنبها يمسك ايدها علشان ما تخافش.

جميله في الطياره وخايفه ومسكت جامد في الايد وافتكرت ايد وليد اللي كانت مسكاها وهما جايين مع بعض .. خافت انها ما تشفوش تاني او ان اي حد يبعدهم عن بعض .. خوف من المجهول ملي قلبها
اخيرا روحوا الاتنين وقعدوا في الفندق مع بعض اتعشوا وبالليل ميس قربت من وليد
وليد: تحبي اسيبلك الاوضه واخرج
ميس: ليه بتقول كده ؟

وليد: ماهو انتي هتفضلي تعملي حركاتك دي وتصدعيني بكلامك هروح اخد اوضه لوحدي لحد ما نسافر
ميس: انت بتعمل كده ليه فيا ؟ انا مراتك يا وليد مراتك مش واحده من الشارع
وليد: مراتي ! امممم مش هنخلص احنا من القصه دي ! ميس مش هنعيده كل شويه .. اقولك تصبحي علي خير ولا اسيب الاوضه ؟ اختاري
ميس ما ردتش بس طفت النور وعطته ظهرها ونامت
القلق والخوف مسيطر عليه ومستني وصول جميله المفروض ان دلوقتي طيارتها وصلت
ميس: صباح الخير .. مش هننزل نفطر ؟

وليد: انزلي انتي انا عايز اطمن علي جميله الاول وتليفونها لسه مقفول المفروض انها وصلت
ميس عطته ظهرها وابتسمت وقلبها بيدق بفرحه
جميله نزلت من الطياره وخرجت واستلمت شنطها وطالعه بخوف وليد قالها ان في حد هينتظرها .. بتتلفت يمين وشمال بخوف لانها مش شايفه اي حد تعرفه نهائي
ومره واحده حد من وراها مسكها جامد وبعنف وهيا صرخت بصوتها كله...

رواية جميلة الجزء الأول للكاتبة الشيماء محمد الفصل الثامن عشر

جميله نزلت من الطياره وخرجت واستلمت شنطها وطالعه بخوف وليد قالها ان في حد هينتظرها .. بتتلفت يمين وشمال بخوف لانها مش شايفه اي حد تعرفه نهائي
ومره واحده حد من وراها مسكها جامد وبعنف وهيا صرخت بصوتها كله...
عماد: بس في ايه اهدي مالك ؟

جميله: عماد ! خضتني .. قلبي كان هيقف
عماد: اسف بس انتي واخده في وشك وماشيه وانا بنادي ومش سمعاني فوقفتك .. حقك عليا .. بس ليه خايفه كده ؟
جميله: الظاهر اتعديت من قلق وليد وخوفه عليا .. المهم يالا !
عماد: يالا بينا .. العربيه بره مستنيانا
خرجوا الاتنين وركبوا العربيه ..

عند ميس::
راحت لوليد بسرعه وهيا هتتجنن ودخلت عنده كان بيتكلم في الفون بتاعه وبيضحك .. بصلها وتجاهلها
وليد: ماشي حبيبتي المهم حمدالله علي سلامتك ويارب تكوني مبسوطه بمفاجئتي ليكي
جميله: انا طايره من الفرحه مش بس مبسوطه .. هتيجي امتي بقي ؟
وليد: بكره طيارتنا باذن الله يا قمر ما تقلقيش مش هتأخر عليكي المهم خلي بالك من نفسك ..
ميس واقفه وعنيها بتطلع شرار لحد ما وليد قفل وبصلها
وليد: افندم.

ميس: هيا جميله فين ؟ وما تكدبش لانها مكنتش علي الطياره اللي رايحه القاهره !
وليد وقف: ومين قالك انها رايحه القاهره ؟ انا قلتلك ؟ ولا انتي افترضتي انها رايحه مطار القاهره !
ميس تنحت: نعم ! امال نزلت مطار ايه ؟
وليد: مطار اسكندريه .. عندك مانع ؟
ميس سكتت: اشمعني مطار اسكندريه يعني !
وليد: كان نفسها تشوف بحر اسكندريه
ميس: حضرتك بتتريق ؟

وليد قرب منها ومسك دقنها ورفعلها وشها قصاده
وليد: اوعي تتخيلي للحظه اني ممكن اسمح لحد يلمس شعره واحده منها.. او تفتكريني عيل ابن امبارح وممكن تضحكي عليه او تخططي من وراه.. عيب عليكي ده انا وليد نصار.. وبعدين يعني خليكي ذكيه شويه خططتي وخطتك فشلت ما تجيش تجري عليا وتقوليلي هيا فين وليه مكنتش علي الطياره ؟
ميس بتوتر: انا مخططتش لحاجه !

وليد وهو بيضيق عينيه وببصلها بتركيز:امال بتسألي عليها ليه وعرفتي منين انها مكنتش علي طياره القاهره ! الا اذا كنتي باعتالها حد ينتظرها والله اعلم عايزه تعملي ايه !
ميس بحدة: انت بتشك فيا ! بتشك فيا يا وليد ؟
وليد: انتي بتجبريني .. تصرفاتك كلها بتجبرني .. عينتي حد يدور عليا ليه ؟ في ناس كانوا بيستفسروا عليا في كل الاماكن اللي بروحها ليه ؟ في ناس جم هنا الفندق يسألوا عليا ليه ؟

ميس: انا معرفش انت بتتكلم عن ايه ؟
وليد: انتي شكلك بتنسي اني موصلتش لمكانتي دي بسهوله وما استاهلهاش لو عيله زيك هتلعب عليا .. ده انا اعمامي وعيالهم بقالهم سنين ورايا يتمنوا يوقعوني فاكيد مش هقع علي ايدك انتي يا ميس .. انا ليا عيون في كل مكان .. وفي كل بلد ..

ميس: كل ده ليه ؟ علشان سألت هيا فين ؟ فعلا خيرا تعمل ؟ انا كل الحكايه اني حاولت اعمل حاجه كويسه يمكن اعرف اصلح علاقتي بيك وترجع تعاملني كزوجه من تاني .. كلمت بابا وقولتله يروح بنفسه ينتظرها في المطار ويوصلها البيت وانا اعملهالك مفاجأه ولما مفاجئتي باظت وبابا اتلطع في المطار فاتضايقت لان فرصتي معاك ضاعت مش اكتر.

عيطت علشان تعرف تكمل تمثليتها عليه
وليد: ماشي يا ميس .. هعمل عبيط وهصدقك وهقولك شكرا ليكي من قلبي علي اهتمامك بحبيبتي .. تمام كده !
ميس: وليد انا بحبك .. بحبك بجد
وليد: الحب مش مجرد كلمه بتتقال يا ميس .. الحب بيكون فعل اكتر من كلام ..
ميس بنرفزه: ليه بتصدقها من جميله لما بتقولها ؟

وليد: مع ان مفيش اي وجه مقارنه بينكم بس هجاوبك بمثال بسيط .. عارفه جميله لما كنت في الاول اتخانق معاكي علشان ما تقسيش عليها كانت تترجاني ما اتدخلش وانا فسرت ده انها فاهمه اني لما بتدخل انتي بتعندي عليا فبتقسي زياده لحد ما عرفت منها هيا ليه مش عيزاني اتدخل .. عارفه كان ليه ؟ مكنش علشان انتي بتقسي زياده اواي حاجه من الكلام ده .. كان علشان خايفه عليا اني اتضايق لما انتي تتخانقي معاياعلشان انتي مراتي وحبيبتي فمش عايزانا نزعل من بعض .. مش عايزاني ازعل معاكي .. شفتي الحب ! الحب في جميله انها راضيه تكون خدامه في بيتي قدام الناس..

الحب عند جميله انها راضيه تدخلك انتي عندي زي ما قلتي وتخرج هيا من اوضتها علشان يمكن انا وانتي نتصالح او نتكلم .. الحب عند جميله جريها عليا اول ماادخل او لقمه تحطها في بوقي او كوبايه ميه تناولهالي او صحيانها لاخر الليل لو انا اتأخرت او قعدتها علي سجاده صلاتها تدعيلي وانا بره .. الحب عند جميله اكبر من اني اعبر عنه بكلام يا ميس .. فلما هيا تقولي بحبك لازم انا اقولها شبيك لبيك انا بين ايديكي .. ودلوقتي بعد اذنك ورايا مشوار ..

سابها وخرج وهيا كلمت ابوها
ميس: الاستاذ كان حاجزلها علي مطار اسكندريه .. بابا انت لازم تخلص منها .. انا ولا عايزاها ولا عايزه البيبي ده .. اقتلها هيا باللي في بطنها
شريف: تفكيرك كده غلط.

ميس بعصبية: كفايا ارجوك .. تفكيري كان غلط لما سمعت كلامك من الاول ..انا كان المفروض سمعت كلام وليد واتبنيت عيل او قفلت السكه دي خالص بدال ما انا حاليا بقيت بره اللعبه ولعلمك لو جميله ولدت وليد مش هيسمح لحد يلمس شعره منها .. فقدامك بكره بس تخلص فيه من جميله لانه لو رجع محدش هيقدر يقربلها وهو موجود
شريف: حاضر .. هيا فين دلوقتي ؟
ميس: يا في الفيلا يا في بيت عمها ملهاش مكان تاني ..

بالليل راحت لوليد وقعدت جنبه
وليد: عايزه حاجه ؟
ميس: تعال نتعشي مع بعض .. ارجوك .. انا من ساعت ما جيت هنا ما قعدتش مع حد ارجوك ما تقلش لأ
وليد سكت شويه: اجهزي ويالا .. هغير هدومي تكوني انتي جهزتي
ميس قامت تجري بفرحه وللحظه وليد حس انها بتخطط لحاجه وعايز يعرف ايه هيا وليه الاهتمام ده بجميله ؟
ميس تفننت في لبسها ومكياجها وخرجت ملكه جمال بس وليد شافها عاديه وافتكر جميله اللي فعلا بتبهره بجمالها ورقتها
وليد: بقالي كتير ما شفتكيش كده.

ميس: انت بقالك كتير بعيد
وليد: لا انتي ما بتعمليش كده الا في الحفلات الكبيره والمناسبات
ميس: ودي مناسبه كبيره بالنسبالي .. ( ابتسمت بحب) انك تتعشي معايا دي حاجه كبيره
وليد غروره كراجل ابتسم وحس فعلا انهابتخطط لحاجه او مبقاش احساس لأ ده بقي شبه يقين ..
بعد ما اتعشوا استأذنت ودخلت الحمام وهناك كلمت توماس
ميس: فين اللي طلبته منك جهزته ؟
توماس: جهزته ..

ميس: وليد ممكن يعرف او ياخد باله ؟
توماس: لا المخدر اللي حطيناه مالوش اي طعم والجرسون اللي تبعناه عارف هيعمل ايه بالظبط
ميس: انا مش عيزاه يتخدر ويغمي عليه
توماس: فاهم انتي عيزاه فايق بس مش في وعيه .. مش متحكم في قرارته او انفعالاته .. المخدر ده هيعمل زي اشد انواع الوسيكي هيسكره تماما ومش هيعرف اي شيء ..
ميس: تمام ...

اتعشوا مع بعض و وليد بيشرب العصير وحست انه بدأ يتكلم ويضحك ويهزر شويه شويه ..وهيا فضلت طول الوقت تتكلم في الحاجه اللي عارفه ان وليد مهتم بيها او بيحبها .. هزرت .. ضحكت .. ورته هو ناقصه ايه مع جميله .. هو برضه في يوم من الايام اعجب بيها وهيا لازم تلعب علي الوتر ده .. لازم تخليه يقارن بينهم .. لازم تخليه يشوف ايجابياتها مش بس سلبياتها .. بس ما تعرفش ان المقارنه مش في صالحها ابدا .. جميله ملكته تماما
ميس: ينفع اتجرأ واطلب منك رقصه سلو !

وليد ضحك: اه ينفع تعالي ..
رقصوا مع بعض وهيا ماشيه علي نفس الوتيره ..
اخيرا بدأ يفقد السيطره علي نفسه وبدأ صوته يعلي ويسكر تماما وهيا خافت ان حد يتدخل لانه مش بيشرب
ميس: يالا نطلع وليد
وليد: نطلع فين ده يدوب السهره بدأت
ميس: حبيبي يالا
زقها بعيد: قلت لأ مش هطلع معاكي انتي امشي من هنا
ميس: ولا لجميله ؟
وليد: جميله ؟ هيا فين ؟

ميس: فوق منتظراك يالا
طلع معاها وهيا مسنداه واي حد بيشوفه بيفتكره شارب وسكران وهو بيضحك وخلاص لحد ما وصلوا ودخلوا
وهيا سابته وغيرت وطلعتله
وليد: يييييه انتي تاني ؟ امال فين جميلتي ؟
ميس: الظاهر انك مش في وعيك، انا جميله حبيبي
وليد: لا جميله احلي منك بكتير جميله شعرها قصير
ميس: شششش انا .. جميلتك.

بدأت تقلعه هدومه وهو شويه يعترض وشويه يسكت
طلعت موبيلها وقعدت بين ايديه: تعال نتصور
بدأت تقرب منه وتبوسه وتتصور معاه سيلفي كتير
وليد زقها بعيد: يوووووه بس زهقت ابعدي
ميس: مش عايز صور ليك مع جميلتك ؟
وليد: لا مش عايز ...تعرفي ان ميس دي غبيه قوي
ميس اتضايقت: ليه غبيه ؟ علشان بتحبك ؟

وليد: هيا ما بتحبنيش .. هيا بتحب المركز .. الفلووووس .. الامتلاك وبس
ميس: وغبيه ليه ؟
وليد ضحك جامد: علشان متخلفه قصت شعر جميله وهيا اصلا عارفه اني بعشق الشعر القصير وياما طلبت منها تقص شعرها مش تبقي غبيه
ميس افتكرت فعلا انه كتير قالها تقص شعرها
ميس: طب ليه مقولتش لجميله تقصه
وليد: علشان طويل قوي واكيد بتحبه ومحبتش ازعلها هو انتي مين ؟

ميس طفت النور وهمست: انا حبيبتك جميله .. انا جميلتك
اخيرا سابته ينام والصبح فاق وفتح عنيه استغرب للحظه هو فين وبص حواليه وحس بحد نايم علي صدره فابتسم وحط ايده علي شعرها ومسكه بس اتفاجئ انه طويل في ايده دي مش جميلته ابدا .. اتنفض بعيد عن السرير وده صحي ميس
ميس: ايه حبيبي مالك ؟

وليد بيبص حواليه وشد اقرب هدوم لبسها
وليد: انا جيت هنا ازاي ؟ انتي عملتي ايه ؟
ميس بخبث: انت اللي عملت مش انا .. يااااه قد ايه كنت واحشني
وليد قرب ومسكها من رقبتها وبيخنقها
وليد: انا عمري ما المسك ابدا لو في وعيي فازاي جيت هنا ؟
ميس وهي مش قادرة تتنفس: انت بتخنقني وليد ؟
وليد بزعيق: واقتلك كمان انطقي .. انا جيت معاكي ازاي ؟

ميس: سيبني الاول
وليد سابها من ايده: انطقي .. انا ما شربتش فبالتالي ما سكرتش لكن حاسس بصداع وكأني شارب للصبح فقولي ازاي عملتي ده
ميس: شربتك .. خلاص ارتحت
وليد: شربتيني ؟ ازاي ؟
ميس: اتفقت مع الجرسون يحطلك ويسكي مع العصير والميه وكل حاجه بتشربها .. حتي الاكل كان فيه
وليد فضل رايح جاي هيتجنن مش عارف يفكر ووقف وبصلها
وليد: اي جرسون ؟ انهو واسمه ايه ؟

ميس: مش هقولك انت هتأذيه .. هو عطف عليا وصعبت عليه، انا عملت ايه غلط ؟ عايزه جوزي يقرب مني .. ايه ارتكبت جريمه ؟ هاه ؟ لو حد غلطان يبقي انت مش انا
وليد: بس اخرسي خالص يا ميس .. مجرد اخرسي .. دلوقتي بقيت جوزك ؟ دلوقتي لما ضعت منك ! انتي بس نار الغيره حرقاكي مش اكتر .. هتتجنني ان عيله فلاحه ملكت قلبي وعقلي صح ؟ده بس اللي مجننك ..

سابها ودخل الحمام وقف تحت الدش وهيا قامت تبص عليه ولقته مسك الشاور وبدأ يغسل جسمه وكأنه مشمئز من نفسه
رجعت بغيظ اكتر .. ايوه ضحكت عليه بس كيانه كله لجميله
وليد خرج من الحمام كانت منتظراه وبصاله ومركزه معاه قوي.

ميس: ندمت سيادتك وقمت تغسل نفسك مني ومن اثري ! للدرجه دي ؟ انا مراتك علي فكره اللي حصل لا حرام ولا غلط
وليد اتعدل: انتي عايزه ايه دلوقتي مني ؟ انا مش بحبك وقسما بالله لولا اتفاقي مع ابوكي واحترامي له كنت رميت عليك يمين الطلاق دلوقتي حالا
ميس: ليه كل ده انا عملت ايه ؟

وليد بأشمئزاز: لاااا انتي اكيد مش طبيعيه .. انتي ما بتحسيش ولا ايه ؟اوكي بما انك عايزاها صريحه حاضر اقولهالك صريحه .. انا بطلت احبك .. بطلت احبك . انا حاليا بحب جميله وبس .. بعتبرها هيا مراتي وبس فهمتي.. ده اللي عندي عاجبك علي كده اهلا وسهلا مش عاجبك انا هديكي حريتك في لحظه بس انتي اطلبيها ! اعتقد كده كل الامور بقت واضحه ! بعد اذنك ..
ميس فضلت كتير قاعده مكانها وساكته ومش عارفه تعمل ايه !

اخيرا جه معاد طيارتهم ..
قبل ما يطلعوا الطياره ميس كلمت شريف وبعدت شويه عن وليد
ميس: عملت ايه ؟ احنا هنطلع الطياره بعد شويه ؟
شريف: ملهاش اي اثر .. ولا في الفيلا ولا في بيت عمها ولا عند اي حد في البلد ولا اي حد من قرايبهم ولا من بعيد ولا من قريب .. ملهاش اثر
ميس: يعني ايه ملهاش اثر ! مفيش حد بيختفي !
شريف: وليد خفاها .. حاولي تعرفي منه هيا فين !

ميس: هو اصلا شاكك فيا لوحده .. مش هقدر بس هحاول
رجعت جنب وليد سرحانه وهو ساكت لحد ما طلعوا الطياره وشويه وبدئت تتكلم معاه
ميس: هو انا لو قلتلك موافقه تعاملني كزوجه وتديني حقوقي تأديه واجب هتقولي ايه ؟
وليد: مش هقول لان ده الطبيعي بتاعك .. اكيد ابوكي قالك وافقي علشان الشركه والمجموعه و و و و هعاملك كزوجه بس علي الورق مالكيش حقوق ولا حتي تأديه واجب فاهمه ولا لأ ؟

ميس: ولو قلتلك لأ محدش كلمني ولا انا موافقه علشان كده
وليد: امال موافقه ليه ؟
ميس: علشان عندي امل ترجع تحبني من تاني وانا هعيش علي الامل ده
وليد: انتي حره بس ما انصحكيش .. ايه رأيك لو نكون اصحاب بيزنس .. احنا بينا شراكه فخلينا اصحاب !
ميس: مش عايزه صحوبيتك .. انا عايزه حبك
وليد: وده مستحيل تحصلي عليه بس انتي غاويه تعب انتي حره ..

ميس: خلاص هحاول نكون اصحاب
وليد: لحظه ..في فرق يا ميس بين الصاحب وبين صاحب بيزنس ما تخلطيش الامور ببعض احنا مجرد اصحاب بيزنس
فضلوا يتكلموا كتير عن الشغل والبيزنس
ميس: الا قولي يا وليد هيا جميله فين دلوقتي ؟ في الفيلا منتظرانا ولا في بيت عمها وهتروح تجيبها ؟
وليد: يهمك في ايه تعرفي ؟

ميس:عادي فضول
وليد: ماشي هقولك .. هيا في بيت عمها وهبعت حد يجيبها
ميس بتلقائيه ندمت عليها: لا مش عند عمها
وليد رفع حاجبه باستغراب: مش عند عمها ! اممممم ! عايز اسمع بقي ردك ايه المره دي .. ليه دورتي عليها عند عمها ؟ ليه مهتميه تعرفي هيا فين ؟ فكري في كدبه جديده
ميس فعلا بتفكر تقول ايه: مش كدبه ولا حاجه.. هقولك الحقيقه
وليد: قولي
ميس: غرت منها وفكرت اقلدها
وليد باستغراب: تقلديها ؟ تقلديها في ايه ؟

ميس: اني اجيبهالك البيت لو هيا مش فيه بحيث لما ترجع تتفاجئ بيها في انتظارك وبكده تفرح .. مش بقولك بقلدها !
وليد ما اقتنعش ابدا باجابتها وعرف ان خوفه علي جميله كان في محله ومش لازم ابدا يثق في اي حد ..
وليد: اممم بتقلديها .. ماشي ..
اخيرا وصلوا وكان شريف في انتظارهم وخرجوا لحد ما وصلوا للعربيه .. وليد ركب ميس جنب ابوها
ميس: مش هتركب ولا ايه ؟ انت رايح فين ؟

وليد: رايح اجيب جميله الاول
شريف: طيب ما تركب ترتاح وانا ابعت اجيبهالك بس انت قولي هيا فين بالظبط ؟
وليد كان شاكك ان شريف بيفكر مع بنته ولا هيا بتفكر لوحدها بس سؤاله ده بطريقته دي حسسته ان هو كمان عنده فضول يعرف هيا فين وهو مخبيها فين ؟
وليد: متشكر يا عمي علي اهتمامك بس اكيد بنتك وحشتك وعندكم كلام كتير عايزين تقولوه لبعض فاتفضلوا انتو.

وليد بعد وهما اتحركوا وفضل واقف كتير منتظرهم لحد ما اختفوا خالص بعربيتهم .. هنا هو شاور لعربيه واقفه بعيد قربت منه لحد ما وقفت جنبه نزلت منها جميله اللي جريت عليه وشالها وحضنها جامد وكأنها غايبه من سنين مش يومين ..
عماد حمحم فوليد بصله: سوري بس فعلا هيا وحشتني
عماد: حمدالله علي سلامتك .. يالا نروح !

وليد: لا معلش امشي انت وانا هاخد تاكسي وهروح علي البيت لان اكيد هما منتظرين بره علشان يمشوا ورايا ويشوفوني رايح فين ! امشي انت يا عماد ومتشكر جدا علي كل اللي عملته
عماد: انت اللي بتشكرني ! طيب تيجي ازاي ! وبعدين دي اختي .. ما تشكرنيش ابدا
وليد: يارب يخليكم لبعض وما تتحرموش من بعض ابدا
جميله: ولا منك ابدا.

وليد: طيب احنا لازم نمشي يا عماد ونسيبك .. انت روح لوحدك
عماد: انا هركن العربيه في الجراج بتاع العماره عند الشقه وهسافر علي البلد
وليد: عربيه ايه اللي تركنها ؟ يا ابني دي عربيتك انت .. استعملها مش تقولي هركنها .. والشقه كمان بتاعتكم عيش انت فيها
عماد: لا معلش .. خلي الشقه مستخبيه محدش يعرف بيها يمكن نحتاجها تاني وبعدين انا ورايا المعهد بتاعي فلازم ارجع البلد
وليد: دي بقي مقدرش اتكلم فيها بس علي العموم دي شقتكم في اي وقت تروحوها.

وليد اخد جميله وركبوا تاكسي وهو ماشي لمح عربيه شريف فعلا منتظره وده اكدله شكوكه كلها .. هو وبنته بيخططوا لحاجه لجميله ولازم يكون حريص جدا ..
اتصل بميس
وليد: خير يا ميس واقفين ليه انتي وابوكي علي جنب ؟ عربيتكم عطلانه ولاحاجه ؟
ميس اتفاجئت: لا لا بس بابا جاله تليفون مهم ومطلوب يركز فيه لانه بيتكلم مع عميل فركن يرد عليه
وليد: اممم ماشي انا قلت بس اطمن .. علي العموم انا هسبقك علي الفيلا
ميس: وجميله ؟ مش هتروحلها ؟

وليد: لو ركزتي شويه كنتي هتشوفيها في حضني وعلي كتفي . جميله معايا في التاكسي يا ميس .. ما تشغليش بالك
قفل التليفون وهيا حدفت موبيلها بعيد
شريف: ايه قالك ايه ؟
ميس بغل: سيادته شافنا والهانم معاه اصلا .. كانت منتظراه
شريف: معقوله ! انا تخيلت ان هو اللي هيروحلها مش هيا ابدا اللي تيجيلو ابدا
ميس: بابا وليد تقريبا شك فينا وبيلعب بينا
شريف: قولتلك بدري قوي نلعب دلوقتي بس ما سمعتيش كلامي..

عند وليد وجميله
جميله:ينفع اسألك سؤال ؟
وليد: طبعا اسألي علي طول
جميله: هو ليه انت غيرت حجزي من القاهره للاسكندريه ! وليه اصريت ان انا اجيلك المطار مش انت اللي تجيلي ؟
وليد ابتسم: شك .. وشكي كان في محله
جميله: شكيت في ايه ؟

وليد: شكي بدأ اول ما رجعنا من السفر لما الموظف بتاع الاستقبال استغرب ان انا مشيت وسيبت مراتي وقالي ان في كذا حد شكلهم مريب سألوا عليا وعليكي .. ومحدش يعرف بوجودك هنا غيرها هيا وابوها فلازم يكون اللي سأل تبعهم وبعد كده عملت شويه تحريات وعرفت ان في حد كان بيدور عليا في كل مكان وهنا شكي زاد او اصبح يقين بالذات لما طلبت تروح معايا المطار حسيت انها مهتمه زياده عن اللزوم انها تعرف تفاصيل سفرك وبعد ما سبتها سألت موظف الاستقبال وجرجرته في الكلام وعرفت انها اتصلت بمكتب الحجز علشان تعرف تفاصيل رحلتك وده خلاني اغير تذكرتك وبرضه قلت زياده تأكيد ما تروحيش ولا الفيلا ولا بيت عمك وتختفي طول ما انا مش موجود ..

جميله: يعني انت في يوم جهزت الشقه بالشكل ده ؟
وليد: ليه معايا مصباح علاء الدين !
جميله: مش انت اهو اللي قلت غيرت خطتك في اخر لحظه
وليد: ايوه ماشي بس الشقه دي كنت عاملهالك مفاجأه وواخدها من اكتر من تلات شهور وبجهز فيها كل اللي عملته حاليا اني كلمت عماد وقلتله ياخدك عليها وتفضلوا فيها لحد ما ارجع انا

ميس وشريف رجعوا هما كمان وقعد الكل مع بعض
وليد فكر يقولها علي اللي حصل بينه وبين ميس بس تراجع
نبيله وندي وميس وشريف وطبعا وليد
شريف: بكره هتروحوا الشركه صح !
وليد: ان شاء الله
شريف: طيب بكره هتعلنوا خبر الحمل ولا ايه ؟

وليد سكت كتير لانه مش عايز يرفض من دلوقتي لازم يكسب وقت يأمن فيه جميله الاول .. بس في نفس الوقت مش عايز يستمر في لعبتهم كتير
شريف: ايه سكت ليه يا وليد ؟
وليد: وماله يا شريف بيه ! نعلن بكره خبر الحمل
اتفقوا علي اللي هيتقال وكل واحد طلع اوضته وشريف مشي
ميس شافت جميله وافقه لوحدها فراحتلها
ميس: امال وليد فين ؟ مش معاكي ليه ؟ ولا زهق بسرعه منك ؟

جميله: عنده شغل بيخلصه في المكتب وبعدين سي وليد عمره ابدا ما يزهق مني
جت تمشي بس ميس وقفتها: امال الصور دي ايه ؟ دي اتصورناها بعد ما سافرتي
ورتها الصور اللي اتصورتها مع وليد وهو سكران وجميله معلقتش نهائي
ميس: ايه مش هتقولي حاجه ؟

جميله ابتسمت: انتي مراته فين المشكله ؟ بعد اذنك
ميس اتجننت من لا مبالاتها واستنت وليد قبل ما يدخل اوضته
ميس: ما تيجي اوضتك يا وليد
وليد: انا داخل اوضتي فعلا
ميس: لا اقصد هنا تعال ( لمحت جميله فاتحه الباب بس وليد مديها ظهره ) تعال واوعدك مش هحاول اغريك زي امبارح
وليد: تغريني ؟ هو انتي اغريتيني امبارح ؟

ميس بتدلع: امال اللي عملته امبارح معايا كان ايه ؟ حب ولا وحشاك ؟
وليد بتلقائيه او احساسه خلاه يبص وراه شاف جميله اللي ابتسمت في وشه وبص تاني لميس اللي مبتسمه: تصبحوا علي خير
سابتهم ودخلت مبسوطه لانها منتظره خناقهم
وليد دخل هو و جميله ومستنيها تتكلم او تتخانق معاه
وليد: ايه مش هتقولي حاجه ؟

جميله: انت عايزني اقول حاجه ؟
وليد: ايوه قولي اي حاجه ! انتي سمعتي ميس صح ؟
جميله: مش بس سمعتها
وليد: امال ايه ؟ عادي ؟
جميله:مش عادي
وليد: طيب ايه ما تتكلمي ! اتخانقي ! غيري عليا ..

جميله: انت عايزني اتكلم اقول ايه هاه؟ اقولك ليه لمست مراتك .. مراااتك يا وليد .. مراتك من سنين وليها حقوق ما ينفعش انا انكرها ابدا .. مجرد انه ما ينفعش
وليد: مين قال اني لمستها ؟ مجرد كلمه هيا قالتها ؟
جميله: امال عملت ايه ؟
وليد: انتي ليه الاول بتتكلمي بيقين قوي كده ؟
جميله: لان ميس ورتني صوركم مع بعض
وليد: صور ؟ صور ايه ؟ انا ما اتصورتش معاها
بدأ يفتكر لمحات زي ضباب وهيا بتصوره
جميله: انا شفت الصور يا وليد.

وليد: طيب اتخانقي معايا ! كسري الدنيا وثوري عليا
جميله: وهو انا ما ينفعش اتضايق واسكت ولا لازم اكسر الدنيا واتخانق معاك وصوتي يعلي علشان يبان اني مضايقه !
وليد: لا مش لازم بس علي الاقل اتكلمي معايا
جميله: انا اسفه انا مش عايزه اتكلم معاك ..
وليد: يعني ايه مش عايزه تتكلمي معايا ؟

جميله: يعني مش عايزه اتكلم .. تصبح علي خير
جت تروح للسرير بس وقفها: انا لسه مخلصتش كلامي
جميله: اتفضل خلص
وليد: افهم من كده ان سكوتك ده زعل مني ! هو ده اسلوبك
جميله بضيق: انا مش زعلانه .. دي مراتك وده حقك خلص الكلام كده المهم تكون مبسوط
وليد ابتسم: لا مش مبسوط .. كان تقضيه واجب مش اكتر.

جميله شدت نفسها وبعدت عنه: تقضية واجب او غيره انت حر مش عايزه اعرف
وليد قرب منها وضمها وهيا بضهرها: حبيبي صدقيني .. هيا دخلتلي من سكه انها مراتي وعلي ذمتي وان ده حقها و و و ومع كلامك انتي كمان فعملت كده بس دي الحكايه
جميله فكت ايديه من حواليها: طيب وانا معترضتش اصلا
وليد: ولما انتي مش معترضه بتبعدي ليه عني ؟

جميله: مخنوقه
وليد: مني ؟
جميله بكدب واضح: لا من الحمل .. مضايقه ومخنوقه وتعبانه وعايزه انام ينفع ولا لسه مخلصتش كلامك !
وليد: روحي نامي بس قبل ما تنامي انا كنت بشتغلك انا مقربتش منها تقضيه واجب ولا غيره
جميله: امال ايه ؟
وليد: خدرتني .. رشت جرسون وخلته حطلي خمره في العصير والاكل .. يعني لما لمستها مكنتش في وعيي واعتقد اني كنت فاكرها انتي مش هيا فممكن بقي تسامحيني ؟

جميله: للدرجه دي ممكن ميس تعمل ؟
وليد: واكتر .. المهم سيبك منها .. لسه زعلانه مني ؟
جميله: وانا من امتي بعرف ازعل منك ؟
اخدها في حضنه اللي اشتاقلها في اليومين اللي فاتوا ..

الصبح نزلوا واستعدوا للشركه وميس مرقباهم وعايزه تشوف اثر اللي عملته ومستنيه جميله تكشر في وش وليد او اي حاجه تتغير في معاملتها ليه بس للاسف مفيش
وهما ماشين وليد باس جميله وهيا ابتسمت بحب
في العربيه
ميس: اخبارك ايه ؟
وليد: اخباري ! كويس اشمعني ! كنتي متخيله ايه !
ميس: متخيله ايه في ايه بالظبط ؟ تقصد ايه ؟

وليد: ما بلاش تعملي عبيطه علشان مش لايق عليكي .. ورتيها الصور واتعمدتي تخليها تسمعك امبارح بس نسيتي لما حكيتلك عن جميله وحبها .. ما قلتلك جميله حبها مختلف ..
سكتت طول الطريق واخيرا وصلوا الشركه والكل كان منتظرهم
كل الموظفين منتظرين استقبالهم والكل بيسلم عليهم
محي - حسين - علاء- خالد والكل موجود.

محي: يالا الكل سلم عليهم ياريت بقي كل واحد علي مكتبه يالا
وليد: لا يا عمي لحظه انا عندي خبر عايز اعلنه انا وميس
محي: خير قول.
وليد: خير اكيد .. الخبر اللي عايز اقوله ( ميس مسكت ايده ) ميس وانا منتظرين ولي العهد الصغنن
الكل ساكت وكأنهم مش فاهمين او مش مستوعبين
وليد بص لاعمامه: ميس حامل...

رواية جميلة الجزء الأول للكاتبة الشيماء محمد الفصل التاسع عشر

وليد: خير اكيد .. الخبر اللي عايز اقوله ( ميس مسكت ايده ) ميس وانا منتظرين ولي العهد الصغنن
الكل ساكت وكأنهم مش فاهمين او مش مستوعبين
وليد بص لاعمامه: ميس حامل
محي: حامل ؟ يعني ايه حامل ؟
وليد: هيا ليها معاني يا عمي ؟حامل وبس . ايه مفيش مبروك ؟

الكل بارك وراح علي مكتبه وفضل وليد واعمامه
وليد: مالك يا عمي ! كأنك اتصدمت
محي: ازاي حامل وهيا ما بتخلفش ولا انت ناوي تتبني ؟
وليد: والله لو ناوي اتبني مش هقول ان مراتي حامل ولا ايه ؟ مراتي حامل يا عمي
محي: ايوه حامل ازاي ؟

وليد: مع ان اسئلتك غريبه بس هجاوبك .. سمعنا عن دكتور كبير بره وسافرناله وعملنا طفل انابيب والحمد لله نجح .. ولما ثبت الحمل رجعنا .. امال حضرتك كنت متخيل اننا مسافرين الفتره دي كلها ليه ؟
محي: انت قلت اجازه
وليد:وهيا فعلا اجازه من الشغل ولا ايه ؟ هو حضرتك متضايق من حاجه يا عمي ولا خبر الحمل ضايقك ؟

حسين اتدخل: لا وهيتضايق من ايه مبروك يا وليد . مبروك يا ميس . وحمد الله علي سلامتكم
الكل باركله بابتسامات مصطنعه ومشيوا يتخانقوا
محي: الحمل ده فيه إنه ولازم نكتشفها وبسرعه
علاء: انا مش داخل دماغي اصلا انها حامل
حسين: امال هيألفوا حاجه زي دي ليه ؟
محي: بعد السنين دي كلها فجأه تسافر وترجع حامل ؟

حسين: الطب اتقدم بره ليه لأ
محي: انت معانا ولا معاه ؟ بتبررله
حسين: مش حكايه ببررله بس هو مش هيألف حاجه زي دي
علاء: مش هيألف اه بس لازم يكون فيه سر وري الحمل ده ولازم نكشفه .. خالد اخبارك ايه مع ندي ؟
خالد: اشمعني ؟ متخيل انها هتكشفلي سر اخوها !
علاء: ليه لأ ؟

خالد: لا يا اخويا ارتاح هيا اصلا مختاره اخوها وانا لأ
محي: انت لازم تقرب منها يا خالد .. كزوج هتفتحلك قلبها انت لازم تاخد خطوه جديه
حسين: انت بتقول ايه يا محي ؟
محي: بقول اللي لازم يحصل خالد لازم يتجوز ندي وبسرعه
خالد: من غير ما تتخانقوا هيا رافضه
علاء: هيا مش رافضه
خالد: اه حاطه شرط متخلف
محي: شرطها ايه ؟

خالد: اسيب المجموعه ونبعد انا وهيا
محي: وانت معترض ليه ما تسيب المجموعه
حسيجن: لا انت اكيد اتجننت يا محي
محي: يسيب المجموعه دلوقتي ولما تبقي بتاعتنا يرجعلها معزز مكرم فكروا لقدام
خالد سرح منهم وفكر في كلام عمه

وليد رجع هو وميس واول حاجه سأل عن جميلته وعرف انها في الجنينه وراحلها وميس بتراقب من بعيد
وليد: بتعملي ايه ؟
جميله: بسقي الورد
وليد: في جنايني مسؤول عنه انتي مش لازم تتعبي نفسك
شدها لحضنه: حبيبي ده الورد بتاعي انا وانت ولازم اراعيه بنفسي وبعدين انا مش بتعب نفسي ما تقلقش ابنك بامان
وليد: وانتي متخيله اني قلقان عليه هو ! انتي اهم من اي حاجه يا جميله عندي .. انتي وكل شيء يجي بعدك
جميلة: ربنا يخليك ليا .. عملت ايه النهارده واعمامك تقبلوا الخبر ازاي ؟

وليد: اتصدموا جدا واعتقد انهم مش هيسكتوا ابدا ولا هيرتاحوا
ميس بتراقب من بعيد والنار بتزيد جواها والحقد
كل يوم بيعدي وليد خوفه وقلقه علي جميله بيزيد فحول بيته لقلعه محصنه وعين امن كتير وكل ده خوفا علي جميلته وامه اصرت انه هو كمان يمشي ومعاه بودي جارد ومع اصرار جميلته وافق وفعلا هو كمان بيتحرك ببودي جارد.

في الشركه
خالد: لامتي ؟
ندي: امتي دي عندك انت
بيتكلموا وصوتهم بقي عالي في وقت دخول وليد وساعتها خالد انسحب بسرعه ووليد دخل وقعد مع اخته
ندي: خير وليد في حاجه ؟
وليد: هو ما ينفعش اجي الا لو في حاجه ؟
ندي: لا طبعا، بس اقصد يعني محتاج حاجه للشغل ؟
وليد:لا كنت بس عايز ادردش معاكي شويه واشوف اخبارك ايه ؟

ندي: انا كويسه
وليد:مش باين عليكي انك كويسه ! مجننه خالد ليه ؟
ندي: انا مش مجنناه .
وليد: امال ؟ هتوافقي عليه امتي ؟
ندي بصتله بسرعه وباستغراب انه عارف ومعرفتش تنطق
وليد: مستغربه ليه ؟ كنتي متخيله اني مش عارف ؟
ندي: مين قالك ؟

وليد: مش محتاج حد يقولي .. خالد بيحبك من واحنا عيال وده شيء واضح جدا وبقاله فتره بيحوم حواليكي وانتي مصدراله الوش الخشب .. كفايه بقي عليه
ندي: انا معملتوش حاجه انا بس طلبت منه طلب وهو رافض .. هو مش عايز يقرب مني
وليد: في فرق بين الطلب وبين الشرط ولوي الدراع .. انا كراجل مش هقبل لوي دراع من اي حد مهما يكون
ندي: يعني جميله لو طلبت منك طلب هترفضه ؟ وارجوك خليك حقاني واتكلم كحبيب مش كراجل وبس.

وليد:جميله لو طلبت روحي مش هتأخر ( لسه هتتكلم بس قاطعها) لكن لو اتشرطت عليا مش هقبل فهمتي ؟ في فرق بين الطلب وانك تتشرطي
ندي: انا اسفه بس انا مش شايفه فرق بين الاتنين
وليد: اوضحلك .. جميله مثلا لو حسيت انها عايزاني اسيب الدنيا دي كلها واسافر معاها بلدهم وحسيت ان ده هيسعدها هنفذهولها لكن لو جت هيا وقالتلي يا تسيب شغلك يا تسيبني هقولها اتفضلي والقلب داعيلك فهمتي الفرق ؟ الحبيب بيكون مستعد يقدم روحه فما ينفعش الطرف التاني يستغل ده .. سيبك بقي من كل ده وقوليلي ليه الشرط الغريب اللي انتي حطاه ده ؟

ندي: خايفه
وليد: من ايه ؟ خالد بيحبك وعمره ما يفكر ابدا يأذيكي
ندي: عارفه ده .. انا مش خايفه علي نفسي منه
وليد: امال خايفه علي ايه ؟
ندي: عليك انت .. خايفه يكون مشترك معاهم وبيخطط ضدك ساعتها هعمل ايه ؟هتصرف ازاي ؟

وليد: انتي مجنونه ولا هبله انتي رفضاه علشاني ؟ انتي للدرجه دي شايفاني ضعيف قدامك
ندي:مش حكايه ضعف
وليد: امال ايه ؟ اعمامك بقالهم سنين ضدي ومقدروش يعملوا حاجه وبعدين دي كلها خلافات في الشغل ملهاش دعوه بعلاقتنا كأهل .. ما ترفضيش خالد علشان سبب اهبل زي ده خرجيني بره حساباتك وعيشي حياتك مع الانسان اللي بتحبيه وبطلي تضيع وقت
ندي: وانت ؟ والمجموعه ؟

وليد: اوعي تفكري زي امك وتحسبيها زيها ! ندي المجموعه دي اخر اهتماماتي ولو هختار بينها وبين حياتي الخاصه هختار حياتي .. يا بنتي عيشي حياتك ملعون ابو المجموعه اللي مفرقه الكل دي .. وعلشان اطمنك خالد مش زي علاء مثلا خالد مختلف وبيحبك وحطي مليون خط تحت بيحبك دي وبعدين حتي لو بيخططوا لحاجه انا كفيل بيها ما تقلقيش عليا
ندي: ربنا يسهل .. (قام يمشي ) هو خالد كلمك ؟

وليد ابتسم: خالد كلم طوب الارض مش انا بس حني عليه وكفايه كده
سابها ومشي وهيا محتاره قلقانه وخايفه واخر النهار راحت لخالد مكتبه دخلت من غير تخبيط وكان هو و علاء مع بعض وبدون اي مقدمات اتكلمت
ندي: انا موافقه يا خالد ( لسه هيتكلم ) بس قسما بالله يوم ما اعرف انك بتخطط لاي شيء ضد وليد هيكون اخر ما بينا
خالد: اتفقنا .. نقول مبروك بقي ؟

علاء: ماهي قالتلك موافقه مستني ايه بقي ؟
عملوا خطوبه علي الضيق مقتصره للعيله وبس في الفيلا و وليد اصر ان جميله تروح لاخواتها قبل الحفله علشان ما تظهرش لانه مش هيتقبل اي حد يضايقها بحرف والمفروض انها شغاله
علاء: الا فين البت الشغاله اللي كانت هنا ؟ مش شايفها يعني ؟

وليد اتنرفز ويدوب هينطق بس نبيله سبقته
مشيت يا علاء راحت بلدهم .. تقريبا كده جالها عريس ولا معرفش ايه فعمها جه واخدها
علاء: اممم خساره كانت زي القمر
وليد بيسيطر علي اعصابه بالعافيه بس ساكت لانه عارف ان علاء بيستفزه مش اكتر وحب يردله القلم
وليد: للدرجه دي كانت عجباك ؟ ده انت حتي لسه خاطب جديد ولا نسمه مش ماليه عنيك ؟ ايه يا نسمه مقصره معاه ليه ؟

علاء بص لنسمه بخوف وعرف ان لعبته اتقلبت ضده لان نسمه بصتله بنظره خيبة امل وبصت لوليد وابتسمت
نسمه: الظاهر انها كانت جميلة قوي
وليد: اكيد مش اجمل منك يا نسمه انا بس بهزر مع علاء هو بيحبك كتير ولا ايه يا علاء ؟
نظرته لعلاء كانت بتقوله يا تخرس وتلم نفسك يا انا هلمك ..
علاء: اكيد طبعا نسمه عارفه مكانتها ايه في قلبي ولا ايه حبيبتي !

نسمه ابتسمت بس ابتسامه صفرا وسكتت وشويه وانسحبت وعلاء وراها
ميس: ردتله القلم بسرعه للدرجه دي ؟
وليد: عايزه ايه يا ميس ؟ اسيب واحد يتغزل في مراتي ؟
ميس: محدش يعرف انها مراتك.

وليد: بس انا عارف ومش هقبل مهما يحصل ( كانت هتولع سيجاره بس وليد شدها منها بسرعه ) وانتي خلي بالك لانك المفروض حامل ولا نسيتي ؟ بعد اذنك
ميس: براحتك يا وليد بس صدقني هتندم
علاء بيحاول يصالح نسمه وهيا مصره تروح واخيرا راح يوصلها
علاء: يا ستي والله ما في حاجه بس كنت بضايق وليد مش اكتر
نسمه: وايه اللي يضايقه لما تتغزل في شغاله عنده ؟

علاء: ده موضوع قديم ..
نسمه: ايه هو فهمني ؟ وليه عايز ديما تضايقه ده ابن عمك
علاء: احنا كده بنتناقر كتير .. عادي يعني
نسمه: وايه حكايه البنت دي ؟
حكالها الحكايه باختصار شديد جدا
نسمه: انت شكيت ان وليد نصار صاحب اكبر مجموعه في الشرق الاوسط علي علاقه بشغاله عنده ؟ علي الرغم من انك ذكي كمهندس الا انك ساعات كتيره بتكون متخلف.

علاء: ماشي يا ستي مقبوله منك خلاص فكيها بقي .. والله بس كنت بغيظه بس متخيلتش انه هيقلبها عليا
نسمه: احسن تستاهل
اتحدد معاد الفرح والكل بيجهزله وقرروا يعملوا الفرحين مع بعض علاء وخالد .. جميله وصلت للشهر السادس ووليد خوفه بيزيد كل يوم عن التاني ..
ميس كانت سرحانه وكانت مع علاء اللي بيتكلم وهيا مش مركزه نهائي معاه
علاء: ايه وصلتي لفين ؟ ركزي بقي معايا ..

ميس: الا قولي يا علاء ما تعرفش عيال بلطجيه ؟
علاء: نعم ؟ بلطجيه ؟ اشمعني ؟ عايزه تبلطجي علي مين ؟ ده حتي الستات وهما حوامل بيكونوا كيوت
ميس: من غير تريقه ولا اسئله تعرف ولا لأ ؟
علاء: حاضر عايزه تبلطجي علي مين ؟
ميس: واحد قل ادبه معايا وعايزه اربيه علشان يحرم يعملها
علاء: شاوري عليه وانا اعملك اللازم معاه
ميس: لا معلش عايزه اعملها بنفسي هتساعدني ولا اشوف غيرك ؟

علاء: طيب بس اشمعني انا؟ مقولتيش ليه لابوكي او لوليد ؟
ميس: علشان الاتنين هيقولولي زيك كده مين هو ويرغوا كتير وانا عايزه اادبه بنفسي وقدام عيني هتساعدني ولا لأ ؟
علاء: حاضر هساعدك اديني نصايه كده وهبعتلك رقم حد
وفعلا بعتلها رقم وكلمت الناس وقابلتهم .. قابلت راجل في شركه امن واسمه عادل الدمنهوري
ميس: فهمت انا عايزه ايه ولا ايه ؟

عادل: اكيد يا هانم احنا لينا اسم وسمعه في السوق ولازم نحافظ عليه وهو البني ادم ايه غير سمعه ما تقلقيش خالص ولو عايزه نجيبلك اجله شاوري
ميس: لأ اجله لأ .. بس يتأدب عيزاه بعد ما تخلصوا منه يبقي شبح راجل ما ينفعش لاي واحده فاهمني ؟ عايزاك تهده وتهينه
عادل: للدرجه دي حضرتك بتعزيه قوي ؟ بس لا مؤاخذه يعني هو مش جوزك برضك ؟
ميس: اه جوزي بس هاني ولازم اردله الاهانه وارد القلم اتنين فهمت علشان كده بقولك اوعي يموت ..

عادل: عيوني
ميس: وشرط مهم اوعي حد يعرف باتفاقنا ولا حتي علاء بيه ؟ ولو حد عرف هسلمك تسليم اهالي لكلاب جوزي وهما هيقوموا معاك بالواجب وزياده !
عادل: من غير تهديد يا هانم احنا في كارنا ده اهم حاجه فيه الامانه والثقه وزبايني كتير ومبحبش اخسر حد .. وبعدين دي اسرار زباين وانا يهمني رضا زبايني وتحت امرك في اي خناقه او سرقه او قتل حتي انا خدامك..

ميس: لا متشكره نخلص دي ولا تعرفني ولا اعرفك ولو اتكشفت اوعي
قاطعها: عيب يا هانم .. وبعدين رجالتي اللي بتنفذ ورجالتي ما يعرفوش حضرتك ولا ايه ؟ ما تقلقيش حضرتك بس بلغيني بالوقت المناسب وانا جاهز
ميس: ماشي خليك ديما جاهز في اي وقت هكلمك وخلي بالك هو ما بيتحركش من غير البودي جارد بتوعه
عادل: مش هما اتنين بس اللي معاه ما تقلقيش منهم وعلي رأي المثل الكتره تغلب الشجاعه بلغيني بس بالمعاد واحنا نقوم بالواجب.

فضلت ميس مستنيه الوقت المناسب ومش لقياه لان وليد ما بيتحركش كتير ورجالته ديما حواليه
اخيرا يوم الفرح والكل بيجهز ووليد مع جميله
وليد: كان نفسي تكوني معايا النهارده .. حتي ندي كانت عيزاكي موجوده
جميله: معلش الظروف بقي المهم ربنا يتمملها علي خير .. بس خلي بالك بقي
وليد: اخلي بالي من ايه ؟
جميله: احسن حد من البنات تفتكرك عريس بالبدله دي !

وليد ابتسم: ولو واحده قربت اعملها ايه ؟
جميله: قولها محجوز خلاص العبي بعيد
وليد: بس كده ! ياااااه يا جميله ما تتخيليش قد ايه نفسي اخدك معايا وادخل القاعه وايدك في ايدي واقول للكل انك مراتي انتي وبس واني بعشقك انتي وبس
جميله: انا فعلا مراتك وحبيبتك وسواء الناس عرفت او لأ دي حقيقه مش هتتغير .. يالا بقي علشان ما تتأخرش.

نزل وهيا معاه واستني ميس تنزل ونبيله نزلت وهيا كمان اتمنت لو جميله هيا اللي معاهم واخيرا ميس نزلت واول ما وليد شافها
وليد: انتي بتهزري صح ؟ ده الفستان اللي هتروحي بيه ؟
ميس: اه ماله ؟ انا جبته مخصوص من باريس
وليد: طيب اقولها ايه دي ؟ امي اتكلمي انتي
نبيله: حبيبتي الفستان ضيق قوي
ميس: ودي فيها ايه ؟ من امتي بتتكلم عن لبسي ؟

وليد: انا بجد مش هرد عليكي
ميس: ماتردش بس ده الفستان اللي عاجبني واللي هلبسه
نبيله: مش هينفع خالص يا ميس
ميس: ليه ؟
وليد زعق: لان المفروض ان سيادتك حامل في الشهر الخامس وده مش جسم واحده حامل اصلا فهمتي ولا لسه ؟ ولا نلغي القصه دي نهائي واخد جميله معايا ونكشف كل الورق !

ميس اتنرفزت: وانت جاي دلوقتي تقول رأيك في الفستان ؟ دلوقتي يا وليد ؟
وليد: ما تخيلتش انك غبيه بالشكل ده وبعدين انا كل يوم تقريبا افكرك بقصه الحمل دي سواء انا او ابوكي اعملك ايه تاني ؟
ميس: خلاص مش رايحه خالص
وليد: والله تريحي علي الاقل ترحميني من التمثيل قدام الناس.

نبيله: استهدوا بالله ميس اتفضلي شوفي فستان غير ده يكون واسع واكيد عندك جديد كتير .. وليد انت اسبق وروح لندي علشان ما تكونش لوحدها وانا هجيب ميس واجي
وليد اتحرك وهو خارج بلغ رجالته يخلوا بالهم كويس من البيت ويفتحوا عنيهم جامد وراح لندي
ندي: فين ماما ؟
وليد: جايه ورايا ما تقلقيش المهم انتي حلوه قوي كده ليه !

فضل معاها لحد ما استقرت في الكوشه مع عريسها وميس كانت وصلت مع نبيله والكل اندمج في الفرح وبيرقص ويهيص
نبيله: قوم ارقص مع ميس حتي مره علي الاقل
وليد: مش عايز
نبيله: معلش علشان خاطري قوم
قام ورقص معاها وهيا في حضنه: وحشتني
وليد: انا برقص معاكي لمجرد المنظر العام فما تتخيليش حوار في دماغك
ميس: عارفه بس ده ما يمنعش انك وحشتني .. وليد بجد وحشتني قوي .. فاكر فرحنا انا وانت ؟

وليد: اه فاكره وفاكر كويس قوي انك كنتي مهتميه بشكلك وفستانك واصحابك اكتر من اي حاجه تانيه .. عمال افتكر كل حياتنا مع بعض وكل النقط بتتحط علي الحروف وبقيت شايفك واضحه قوي ومستغرب انا ازاي اتجوزتك اصلا في يوم من الايام ؟ ايه اللي عاجبني فيكي ؟ وللاسف مش لاقي اجابه نهائي .. الرقصه خلصت بعد اذنك
نبيله اخر الليل علية اتصلت بيها وبلغتها ان جميله تعبانه ومش عارفه تعمل ايه ؟

نبيله: وليد حبيبي انا همشي وانت خليك مع اختك ماشي !
وليد: تمشي ؟ ليه في ايه حصل ؟
نبيله: مفيش حبيبي تعبانه بس شويه وخلاص الفرح في اخره
وليد: امي في ايه ؟ جميله مالها ؟
نبيله: ملهاش يا وليد
وليد طلع موبيله واتصل بجميله وردت عليها واول ما نطقت عرف انها تعبانه
وليد: انا جايلك دلوقتي ؟

نبيله: استني هنا .. رايح فين ؟
وليد: لمراتي ؟
نبيله: واختك ؟ اللي ملهاش حد غيرك هتسيبها تمشي لوحدها ؟
وليد: وجميله ؟
نبيله: انا هروحلها وبعدين طبيعي في الحمل الواحده بتتعب فده تعب عادي هروح وهاخدها للدكتوره بتاعتها لمجرد اطمنك مش اكتر وهفضل معاك بالتليفون وانت خليك هنا
ميس سمعت وقربت منهم: ايه هتمشي ولا ايه ؟ هتسيب ندي وتروح لجميلتك ؟

وليد سكت شويه: لا مش همشي بس يا امي
قاطعته: ما توصنيش عليها ولا علي حفيدي
ميس اتغاظت من الاتنين اللي مش عاملين لها اي حساب
وليد خرج مع نبيله لبره وميس معاهم ونادي علي البودي جارد بتوعه اكرم و سمير: روحوا مع والدتي وما تفارقوهاش نهائي
اكرم: وحضرتك ؟

وليد: انا الليله في امان علاء وفرحه النهارده ومش هيخطط لاي شيء تاني روحوا انتو الاتنين مع امي وخلوا بالكم كويس منها
ودي كانت فرصه ميس اللي علي طول اتصلت بعادل وبلغته ان الليله فرصته لان وليد مش معاه حد من البودي جارد بتوعه
فضل وليد كل شويه يكلم مامته لحد ما وصلت البيت واخدت جميله وكشفت عليها وساعتها بس هدي شويه واتنفس.

واخيرا مروح هو وميس وشويه وكوتشات العربيه فرقعت وبسرعه سيطر علي العربيه ووقفها ونزل يشوف فيه ايه واستغرب لما لقي الكوتشات الاتنين القدام متبهدلين ولقي لوح خشب مليان مسامير داخل فيهم وعرف ان حد عمل ده .. وقف وبص حواليه وهنا ظهرت رجاله عادل .. كانوا خمسه ومعاهم عصيان وبيقربوا بتوعد لوليد اللي بص لميس في العربيه وللحظه قلق عليها بس شاف في عنيها للحظه نظره شماته وانتصار ..

دور علي موبيله بس كان جوه العربيه مش معاه
قربوا منه جامد: عايزين ايه ؟ اللي انتو عايزينه اطلبوا بهدوء ؟
واحد: مش عايزين اي حاجه ؟ عايزين كل خير
وضحكوا كلهم وبدون اي مقدمات اتفتحت ابواب جهنم علي وليد وبدؤا الخمسه يضربوا فيه بالعصيان وحاول يقاوم بس للاسف كانوا اقوي واعنف وعندهم هدف واحد وبس بينفذوه ..

وقع في الارض وهما مستمرين ضرب فيه واخيرا ميس خرجت من العربيه ووقفت تتفرج وحست انه يستاهل كل ده لمجرد انه فضل عليها اللي اقل منها ..
ضربوه كتير جدا وبعدها واحد فيهم طلع مطواه وعمل لوليد خط طويل بطول وشه كله
هنا ميس اتدخلت: كفايه كده انا طلبت البوليس وهيقبض عليكم حالا
الرجاله وقفوا وانسحبوا بسرعه ووليد بينزف جامد وهيا وقفت فوقه وهنا وليد فتح عنيه الغرقانه دم وبصلها وهيا كمان بصتله وبعدها قربت وبدئت تصرخ وهو غاب عن الدنيا ..