قصة جميلة بنت بسيطه فلاحه

رواية جميلة الجزء الأول للكاتبة الشيماء محمد الفصل الرابع عشر

نسمه بدئت تفوق فامها جريت عليها ورنت الجرس للممرضه اللي في ثواني جتلهم واتصلت بالدكتور علشان يجيلهم
والكل بيبصلها وهيا فتحت عنيها
صفاء: حبيبتي يا بنتي طمنيني عليكي .. قولي اي حاجه
الدكتور: انسه نسمه اتكلمي
نسمه بتبص لكل واحد شويه لحد ما شافت علاء واقف علي الباب وعنيها ركزت عليه جامد ووليد بصله باتهام.

نسمه: انت ... اطلع بره انا مش عايزه اشوفك هنا
علاء: ارجوكي اسمعيني يا نسمه
نسمه زعقت: اطلع بره
غمضت عنيها من الالم فوليد قام وطلع ابن عمه بره
علاء: انت بتخرجني ليه ؟ انا لازم اتكلم معاها
وليد: انا مش بس هخرجك لا ده انا هعمل كتير قوي ... اتفضل من هنا وما تضايقهاش تاني
علاء: انت مش فاهم حاجه يا وليد.

وليد: ومش عايز افهم منك اتفضل من هنا بدال ما اخلي الامن يطلعوك بره المستشفي خالص وادعي ربنا انها ما تعملش محضر في حقك
علاء: انا ما يهمنيش المحضر انت فاهم ؟ ما يهمنيش انا بس هيا اللي تهمني
وليد: اهتمامك غريب يا اخي اتفضل بقي من هنا دلوقتي
وليد ساب علاء وخبط ودخل لنسمه اللي الدكتور كان بيحاول يستفسر منها اللي حصل
نسمه: ارجوك سيبني دلوقتي.

الدكتور خرج ووليد وقف علي الباب
وليد: باشمهندسه نسمه .. عارف انك تعبانه بس هقولك حاجه واحده اللي يريحك واللي انتي عيزاه هعملهولك ...
نسمه: قصدك ايه ؟ لو ليا حق عند ابن عمك هتجيبهولي ؟
وليد: ده بالظبط اللي اقصده
صفاء: يابنتي وليد بيه واقف معانا من ساعة ما جيتي هنا وبيقول اللي يريحنا هنعمله وكان عايز الدكتوره تكشف عليكي بس انا قلتله لما تفوقي وتحددي هتعملي ايه ؟

نسمه: دكتوره ايه اللي تكشف عليا وليه ؟
وليد: ست الكل انا بره وبلغيني هتعملوا ايه
خرج وليد وسابهم وطلع كان علاء لسه بره
وليد: انت لسه هنا ؟
علاء: ومش همشي غير لما اتكلم معاها
وليد: وهيا ما اعتقدش هتبص في وشك تاني
علاء: ده شيء ما يخصكش انت
شويه ومامت نسمه خرجت
وليد: خير ؟ قررت عايزه ايه ؟

صفاء: عايزه استاذ علاء يدخلها
علاء داخل بس وليد مسكه: قسما بالله ان ضايقتها ...
علاء: ما تتدخلش في اللي مالكش فيه يا وليد
خبط ودخل وقف جنب السرير وهو مستني حرف منها ...

ندي وصلت الشركه وهناك خالد قابلها
خالد: صباح الخير يا جميله الشركه
ندي: اهلا خالد بقولك ما اطمنتش علي نسمه اخبارها ايه ؟
خالد: تلاقيها كويسه ..
ندي: انا مش عارفه علاء عملها ايه هواتجنن ولا ايه ؟

خالد: هيكون عملها ايه يعني ؟ وبعدين هيا ايه اللي وداها شقته ؟ ولا تجر رجله وبعدها تندم وتعيط .. تلاقيها طمعانه في قرشين
ندي: نعم ؟ هو ده اللي ربنا قدرك عليه ؟ ده اسهل شيء بتعملوه هنا انكم تطلعوا البنت غلطانه في كل شيء ومسؤوله عن كل شيء ! غلطانه انها وثقت في بني ادم المفروض انه كبير في الشركه وله وضعه .. غلطانه انها راحت معاه الشقه لان ده مالوش غير معني واحد في تفكيركم .. انا مش عارفه تفكيركم هيفضل محدود كده لامتي ! وللاسف مهما الواحد يتعلم بيفضل نفس الغباء والتخلف ده فيه.

خالد: ايه حلمك عليا شويه .. مش حكايه تخلف ولا غباء يا ندي بس دي تقاليد مجتمع .. عمرها ما هتتغير ... البنت طالما راحت ودخلت شقه راجل غريب فتفكيرنا هيكون ديما كده حتي لو كانت داخله تصلي ..
ندي: لا طبعا ده غلط
خالد: في مقوله بتقول اجتنبوا مواقع الشبهات
ندي: وهيا ايه الشبهه في دي ؟
خالد: ندي حبيبي .. هيا رايحه شقته ليه ؟ مهندسه عندها شغلها وخلصته ياتروح ياتيجي الشركه ايه اللي يوديها شقه علاء ؟

ندي: هو موصلها وبعدين مش قال عدي يغير هدومه علشان اتبهدلت .. المفروض تلومه هو
خالد: طيب تمام معاكي .. راح يغير هدومه ما استنتوش ليه في العربيه ؟ طلعت معاه ليه؟
ندي: لاي سبب طلعت ولا احنا كلاب وبنريل علي اي حاجه؟
خالد: ماشي معاكي للاخر .. ايه اللي دخلها اوضه نومه ؟

ندي: وسيادتك مين قالك انها دخلت اوضه نومه ؟ كنت معاهم
خالد: لا روحت الشقه جبت لعلاء حاجه واثار الدم بتاعها كان في اوضه النوم .. اتخبطت في كوميدينو اوضه النوم
ندي: وليه ما تقولش انه هو دخلها غصب عنها مثلا وهيا بتجري منه وقعت ؟
خالد: ندي .. انا تعبت .. ما اعرفش .. حقك عليا يا ستي .. بس هنا تفكير الناس كلها كده
ندي: يعني انا لما روحت معاك شقتك علشان الملف وقعدنا شربنا عصير في شقتك ده كان تفكيرك ! فكرت اني رايحه معاك علشان كده ؟

خالد بخوف: لا .. لا طبعا .. انتي غير
ندي: غير في ايه ؟ مش ده تفكير مجتمعنا!
خالد: لا ده وضع مختلف
ندي: مش مختلف ابدا
خالد: لا مختلف اولا انتي بنت عمي مش مجرد موظفه هنا .. وبعدين انا وانتي مختلفين .. انتي ... انتي بنت عمي
ندي: انت بتقول اي كلام والسلام وهو ده بالظبط كان تفكيرك .. بعد اذنك يا خالد
خارجه وهو وراها.

خالد: يا ندي اوقفي والله ما فكرت كده ابدا
ندي: لو سمحت يا خالد
خالد: ندي .. اوقفي
مسكها وقفها غصب عنها وبصتله وكانوا قريبين من بعض جدا
خالد: انتي مختلفه عن الكون كله .. انتي غير اي واحده افهمي
ندي: مش فاهمه .. انا زيي زي اي واحده .. مختلفه في ايه انا ؟ مجرد واحده
خالد: لا مش مجرد واحده لا عمرك كنتي ولا عمرك هتكوني مجرد واحده
ندي: ليه ؟ ايه الفرق ؟ مختلفه في ايه؟

خالد: انتي
ندي: انا ايه يا خالد ؟
خالد: انتي حبيبتي .
ندي بصتله وهيا مش مستوعبه هو قال ايه ؟
ندي: انا ايه ؟ حبيبتك ؟ من امتي ؟
خالد: من ساعة ما وعيت علي الدنيا دي وانتي يدوب عيله .. من واحنا عيال وانا بحبك .. انا مش عارف انتي ازاي مااخدتيش بالك من حبي وخوفي .. علشان كده بقولك انتي مختلفه.

ندي سحبت نفسها وبتبعد
خالد: ما تهربيش مني ردي عليا .. انا اتكلمت ونطقت معدش ينفع نتجاهل الكلام ده
ندي: انا لازم اروح لوليد ونسمه المستشفي بعد اذنك
جريت من قدامه واول ما ركبت عربيتها اتنفست .. وابتسمت
ندي: يااااه اخيرا يا خالد نطقتها... اخيرا اتكلمت ... اخيرا
راحت المستشفي لاخوها تطمن علي الوضع.

علاء دخل عند نسمه وهيا بصتله كتير قوي والاتنين ساكتين لحد ما اخيرا نطقت
نسمه: ماما بتقولي المفروض اخلي دكتوره تكشف عليا
علاء: دكتوره ايه ؟ اللي انتي محتاجاه هنفذه
نسمه: يعني انت شايف اني محتاجه اكشف؟
علاء: مش فاهم يا نسمه لو تعبانه اجيبلك الدكاتره اللي تشاوري عليهم
نسمه: انت عامل نفسك مش فاهم يعني ؟

علاء: انا فعلا مش فاهم انتي عايزه تقولي ايه يا نسمه ؟
نسمه: اوكي افهمك .. دكتوره تحدد اذا كنت بنت ولا لأ ؟ اعتقد كده فهمت ؟
علاء بصدمه: انتي متخيله ان انا ؟ انتي اتجننتي ؟
نسمه: مش ده اللي كنت عايزو سيادتك ؟
علاء: كنت عايز اقرب منك اه بس انا مش حيوان لدرجه اني الاقيكي مغمي عليكي ومتعوره وبتنزفي واغتصبك الاول ؟

نسمه: اه هيا تفرق معاك تغتصبني وانا صاحيه او مغمي عليا ؟ معلش ما اخدتش بالي ان في فرق في انواع الاغتصاب ؟
علاء: اغتصاب ايه اللي بتتكلمي عنه ؟ انا عمري ما كنت هغتصبك يا نسمه ؟ عمري
نسمه: امال فهمني كنت هتعمل ايه يا علاء ؟
علاء: كنت عايز اقرب منك مش اكتر
نسمه: حتي القرب لو غصب عني يبقي اغتصاب.

علاء: انا اسف سامحيني يا نسمه
نسمه: انا اللي اسفه لاني مش هسامحك ودلوقتي اتفضل عايزه ارتاح
علاء: طيب اسمعيني
نسمه: اتفضل من هنا
علاء: يا نسمه
نسمه: انت اهو من تاني بتفرض نفسك عليا ارجوك سيبني دلوقتي
علاء خرج وامها دخلت ووليد استاذن امها انه يدخل هو وندي اخته اللي وصلت
دخلوا واطمنوا عليها
وليد: هاه يا نسمه قبل ما اروح الشركه عايزه تعملي ايه ؟

نسمه: انا متشكره جدا لوقفتكم معايا
وليد: انا مش بقولك كده علشان تشكريني .. محتاجه ايه تعمليه ؟
نسمه: مش محتاجه لحاجه .. متشكره جدا لحضرتك
وليد: علاء لو ضايقك قوليلي يا نسمه
نسمه: اللي قاله الباشمهندس علاء هو اللي حصل فعلا.. انا وقعت ودماغي اتخبطت
وليد: اهممم طيب .. علي العموم براحتك .. ست الكل في اي وقت تحتاجي حاجه كلميني ولو غيرت رأيها برضه كلميني.

ندي: نسمه احنا كلنا جنبك .. معاكي فوني في اي وقت كلميني .. اوكي
نسمه: متشكره ليكم جدا
صفاء: متشكره جدا ليكم ولوقفتكم معانا
ندي: ما تقوليش كده يا طنط وبعدين نسمه صاحبتي قوي ويمكن اكتر كمان
نسمه ابتسمت بتعب: اكيد طبعا
سابوها ومشيوا وامها قعدت جنبها
صفاء: ممكن بقي تفهميني ايه اللي حصل بالظبط ؟ وايه اللي وداكي شقه علاء ؟

نسمه عيطت جامد في حضن مامتها
صفاء: بتعيطي ليه ؟ لو حصل حاجه قولي دلوقتي وانتي شفتي بنفسك وليد باشا هيقف جنبك وهيساعدنا فقولي من دلوقتي عملك ايه
نسمه هديت شويه: معملش حاجه يا ماما
صفاء: ولما معملش بتعيطي ليه ؟
نسمه: لاني كنت فكراه ... كنت فكراه بيحبني بجد مش مجرد واحده عايز يقرب منها
صفاء: ويمكن يكون فعلا بيحبك انتي مشفتيش خوفه وقلقه عليكي ؟

نسمه: لا يا ماما .. اللي يحب حد يحافظ عليه وما يحاولش ابدا يفرض نفسه عليه بالشكل ده ابدا
صفاء: انتي ايه اللي حصل بالظبط وليه رحتي شقته ؟ مرواحك نفسه كان غلط
نسمه: كنت متخيلاه متفتح وهيفرق
صفاء: مفيش شاب في الدنيا مهما علي تفكيره متفتح .. مهما بيتعلموا ومهما يتثقفوا بيفضل برضه نظرته للبنت محدوده .. واي حد هتكلميه هيقول اول كلمه ايه اللي وداها شقته ؟ كانت متخيله ايه ؟

نسمه: خلصنا شغل وهدومه اتبهدلت وطلب مني نعدي يغير علشان عنده اجتماع وكان منتهي التفتح والذوق
صفاء: ماشي رحتي معاه .. ليه ما اسنتيهوش في العربيه ؟ ليه طلعتي شقته ؟ ليه يا نسمه انتي اعقل من كده
نسمه: تخيلت انه بيحبني .. تخيلت حاجات كتير الا انه يفرض نفسه عليا كده
صفاء: فرض نفسه ازاي ؟ وازاي اتعورتي ؟

نسمه: ماما ارجوكي .. انا كويسه ممكن نتكلم بعدين ..
صفاء بشك: انتي متأكده انك كويسه ؟ انتي اغمي عليكي عنده انتي عارفه بقي هو عمل ايه بعدها ؟
نسمه: علاء مش واحد شوارعي علشان يكون مغمي عليا وهو يفكر كده .. ماما ارجوكي انا محتاجه ارتاح.

*في الشركه *
محي دخل لوليد: اللي انت عملته ده غير مقبول بالمره .. انت عايز تلبس ابني اي مصيبه والسلام ؟
وليد: انا برضه ! انا اللي كنت هموت واحده في شقتي واغتصبها ؟
محي: شوف برضه هيقولي اغتصاب ؟
وليد: امال عايزني اقول ايه ؟ هاه ؟ تسميه ايه اللي حصل ؟

محي: هيا راحت ورجعت في كلامها ! اوعايزه تجر رجله ! او عايز تبينله انها شريفه وتعمل حبتين ! او او او مليون او ممكن اقولها
وليد:او كانت فكراه بني ادم يعتمد عليه وهو طلع كلب واطي
محي: انا مش هسمحلك يا وليد
محي قرب جامد ومسك وليد من هدومه وهنا دخل حسين علي صوتهم وجري بسرعه يفصل بينهم.

حسين: وبعدين الامور ما تتحلش كده .. صوتكم عالي والشركه كلها سمعاكم بره
محي: ماهو ده اللي هو عايزو .. يبان انه حامي حقوق المظلومين صح ؟
وليد: انا مش هرد عليك يا عمي لان المفروض بدل ما بتتخانق معايا تروح تتخانق مع ابنك وتروح توضحله هو ايه الصح وايه الغلط
محي: انت بقي عارف الصح من الغلط ؟ زيك زي ابوك .. ابوك اخدها مخضره وانت وراه ..عامل فيها كبير وانت لولا ورثت الشركه عن ابوك كان زمانك دلوقتي صايع ما تسواش ..

وليد: لحد هنا وأقف .. انتو بتتكلموا كتير وانا بسكت بمزاجي .. ابويا لما ورث الشركه كان عليها ديون ومفلسه وانت وعمي حسين شلتوا ايديكم وسافرتوا بره ولا نسيتو ؟ وهو سدد ديونها ووقفها من تاني علي رجلها وانا لما استلمتها منه خلتها بدال ماهي شركه واحده بقت مجموعه عالميه ومحدش فيكم يقدر ينكر ده .. انتو المفروض اصلا تحمدوا ربنا ان ليكم اسهم فيها ولولا ان ابويا كان راجل كويس مكنش عطي لواحد فيكم سهم وزي ما هربتوا من ديونها يبقي مالكوش حق في مكسبها ودلوقتي جاي تقولي انها حق ليكم ؟ انهي حق ؟ وفي اي شرع ؟ انتو مالكوش اي حق هنا نهائي وانا لو سايبكم فمزاجي مش اكتر.

محي:انت كده تعديت حدودك يا وليد
وليد: انا عارف حدودي كويس قوي يا .. يا عمي
شريف دخل: ايه اللي بيحصل هنا ؟
حسين: مفيش ..يالا يا محي من هنا يالا
حسين شده وخرج ووليد قعد علي مكتبه وشريف قعد قصاده
شريف: وبعدين ؟ احنا قلنا نهدي اللعب مش نشعلل الحرب ودلوقتي
وليد: يعني المفروض اعمل ايه ؟ اشوفهم بيغلطوا واسكت ؟

شريف: تجنب عداءهم يا وليد .. يعني مين نسمه دي اللي بتعاديهم علشانها؟ حته موظفه ارميلها قرشين هتسكت
وليد بصله باستغراب: نفس المنطق .. الانسان عندكم بيتباع ويتشري .. ما بتتكلموش غير بالفلوس
شريف: وهو ايه اللي بيتكلم تاني غير الفلوس ؟ هاه ؟ معاك قرش تسوي قرش .. ده قانون المجتمع حاليا
وليد: قانون غلط وعمري ابدا ما همشي بيه
شريف: يبقي عمرك ما هتفوز في الحرب دي وهما هينتصروا
وليد: مش هغير مبادئي حتي لو هتهزم
شريف: ما علينا المهم هتسافر امتي ؟

وليد وكأنه افتكر: يومين بس المفروض جميله تمشي النهارده .. انا ماشي محتاج حاجه مني ؟
شريف اتضايق: يعني مش فاهم لازمتها ايه جميله تسافر معاك ؟ ماتسافر انت وميس غيروا جو واتصالحوا
وليد: نتصالح ؟ ما اعتقدش .. المهم حضرتك محتاج حاجه مني ؟
شريف: لا متشكر اتفضل
خرج وليد علشان يشوف جميله قبل ما تسافر.

وشريف: تستاهل كل اللي هيعملوه فيك يا وليد .. مش شريف المحلاوي اللي تلعب ببنته وتجبلها عيله فلاحه وتقول الروس اتساوت !
وليد راح لجميله ولحقها قبل ما تسافر واول ما دخل البيت نادي عليها
جميله طلعتله بسرعه: رجعت بدري خير ؟
وليد: خير بس كنت عايز الحقك قبل ما تسافري
جميله: السواق اصلا بره وكنت خارجه
وليد وسعلها: خلاص روحي
جميله وقفت قدامه: هو انا اقدر اصلا اسيبك هنا واروح !

وليد ابتسم: طيب تعالي اوضتنا
طالع بيها ونبيله شافته: خير يا وليد في حاجه راجع بدري ؟
وليد: خير يا امي ما تشغليش بالك انتي عايزه مني حاجه ؟
نبيله ابتسمت: لا متشكره بس مش المفروض انها هتسافر ؟
وليد: هتسافر يا امي هتسافر
دخلوا اوضتهم وهيا اول ما بصتله مانطقش اي حرف بس كل جوارحه ومشاعره هيا اللي اتكلمت بداله...

وهما مع بعض
جميله: مش هتقولي في ايه مالك بقي ؟
وليد: ماليش .. بس علشان هتوحشيني
جميله: ماشي .. بس انا بسأل علي اللي مضايقك .. مهموم من ايه ؟
وليد:عرفتي منين اني مهموم؟
جميله: علشان انا خلاص حفظتك وفهمتك وبقيت بعرف بنظره واحده لعنيك انت مبسوط ولا مهموم ولا فرحان .. قولي مالك
وليد: اتخانقت مع اعمامي جامد واول مره اقولهم اللي قلته ده
جميله: اللي هو ايه ؟

وليد حكالها اللي حصل كله
جميله: انت كده بتزود العداوه يا حبيبي .. كنت حاولت تتعامل مع علاء بهدوء وتسمع منه مش يمكن يكون بيحبها !
وليد: وهو اللي يحب حد يحاول يغتصبه ؟
جميله: مش دي تربيته ! ياخد ما يديش ! هو عمل اللي متعود عليه ! مش يمكن يا وليد الحب يغيره
وليد: ياريت يا جميله ياريت .. المهم يالا علشان تسافري ويومين بس وهبعتلك
جميله: يومين بحالهم من غيرك ؟

وليد: هنعمل ايه ؟ بس اوعدك اني هعوضهم لما نسافر انا وانتي !
جميله سافرت لاخوها عماد وعمها والكل رحب بيها جامد لانها بقت مصدر سعادتهم كلهم
عمها فتحي: يا اهلا بيكي يا جميله .. قوليلي يا بنتي مبسوطه ؟ ولا انا ظلمتك بالجوازه دي ؟
جميله ابتسمت: لا يا عمي مبسوطه جدا كمان .. وليد بيه ابن حلال قوي وطيب وراجل
عم فتحي: يعني مش زعلانه مني ؟

جميله: لا يا عمي ابدا
عم فتحي: ولا زعلانه اني قعدتك من الكليه ؟ والله يا بنتي لو قادر علي مصاريفها مكنت خرجتك ابدا منها
جميله: عارفه يا عمي عارفه .. المهم عماد يتعلم هو راجل ومطلوب منه يفتح بيت .. اهو هيخلص معهده السنادي هو اهم مني .. هو الراجل يا عمي
عماد اخوها دخل ووشه في الارض وعمهم سابهم ومشي
جميله: ارفع راسك وما تحطش وشك في الارض ابدا.

عماد: انا الكبير يا جميله .. انا المفروض اصرف عليكي مش انتي .. انا اللي كان المفروض يسيب كليته مش انتي .. انا الراجل
جميله: طيب انت الراجل وانت الكبير بس تعال نحسبها بالعقل .. لو انت سيبت كليتك هتشتغل ايه ؟ فواعلي ؟ فلاح ؟ أُجري ؟ سواق ؟
عماد: ايوه وماله ؟ لا عيب ولا حرام.

جميله: ماشي يا حبيبي معاك بس انت اهو هتتخرج وتشتغل بشهادتك تشتغل في محل نظارات او تفتح محل كمان وساعتها نبقي انا وانت كسبنا ولا ايه
عماد: شهادتي ؟ ده انا معهد بصريات يا جميله مش الامله يعني
جميله: اهو شهاده وبعدين كذا واحد من البلد بيسافروا بره .. سافر انت كمان ..
عماد: وانتي ؟

جميله: انا متجوزه راجل يتقال بالدهب .. حنيه الدنيا كلها فيه
عماد: حنيه ؟ هو انتي كنتي تعرفيه اصلا ؟ ده مجرد جوازه وخلاص .. قال واحد غني عايز يتجوز واحده بنت بلد علشان تخلي بالها من امه ! هو ده جواز اصلا ! قوليلي بجد انتي مبسوطه وياه ولا بتقولي اي كلام علشان اسكت!
جميله ابتسمت وحمدت ربها ان اخوها معرفش حاجه عن الاتفاق وسبب الجواز الاصلي
جميله: عماد .. مش هقول غيرحاجه واحده انا مبسوطه جدا مع جوزي .. جدا فوق ما تتخيل
عماد: ناقص تقوليلي بتحبوا بعض ؟

جميله: وليه لأ ؟
عماد ابتسم: يعني هو بيحبك ؟
جميله شاورت بدماغها واتكسفت
عماد: ربنا يسعدكم يارب
جميله: يارب علي فكره انت هتكون خال قريب انت اول حد يعرف
عماد فرح جدا وقضي اليوم مع اخته...
تاني يوم جميله صحيت علي دوشه جامده وطلعت تشوف في ايه والكل بيبصلها ويتهامس ويتكلم وهيا مش فاهمه في ايه ؟
واخيرا شافت السبب وصدمتها كانت لا توصف .. صدمه غير متوقعه...

رواية جميلة الجزء الأول للكاتبة الشيماء محمد الفصل الخامس عشر

جميله صحيت علي دوشه جامده وطلعت تشوف في ايه والكل بيبصلها ويتهامس ويتكلم وهيا مش فاهمه في ايه ؟
واخيرا شافت السبب وصدمتها كانت لا توصف .. صدمه غير متوقعه لانها شافت وليد قدامها مع عمها واخوها والكل حواليه واول ما لمحها بصلها بحب وابتسملها واعتذر من اللي حواليه وراحلها
جميله: انت هنا ولا انا بيتهيألي ولسه نايمه وبحلم ؟

وليد: انا اهو قدامك مقدرتش ابعد
جميله: وميس واعما...
قاطعها وليد: مش عايز اسمع عن اي مشاكل المهم ان انا هنا معاكي ولا عايزاني امشي ؟
جميله: لاطبعا انت بتقول ايه !
اتعرف وليد علي اخو جميله عماد وفضل معاهم اتغدوا الكل مع بعض وبعدها قعدوا
وليد: طبعا حضرتك يا عم فتحي اكيد مستغرب انا هنا ليه وجاي ليه ؟

عم فتحي: يا خبر يا سعادة البيه حضرتك تنور .. دي البلد كلها تنور
عماد قاعد متحفز وساكت
وليد: متشكر جدا لحضرتك .. بس انا كان لازم اجي، كان لازم اتعرف علي اخو مراتي واهلها واشوفهم ويشوفوني ( ابتسم ) والاهم كان لازم اشوفها هيا لانها وحشتني في الليله اللي بعدتها عني.

عماد ابتسم لانه عرف ان فعلا وليد بيحب اخته مش هيا بتقول كلام وخلاص
عم فتحي: مش هقول لحضرتك غير يا اهلا بيك في بيتنا الصغير
وليد: كبير بناسه يا عمي .. المهم نتكلم في المهم بس بعد اذنك يا ريت لو انا وانت نفضل لوحدنا
بص للي حواليه وكلهم قاموا وسابوهم لوحدهم
عم فتحي: ادينا لوحدنا اتفضل يا ابني خير ؟

وليد: مش عايزك تفهمني غلط في اللي هقوله
عم فتحي: يا ابني اتكلم علي طول
وليد: طبعا انا عارف ان حمل جميله واخواها تقيل عليك
عم فتحي حب يتكلم بس وليد سكته
وليد: سيبني اكمل اذا سمحت .. جميله حاليا مراتي ومسؤوله مني وانا اولي بيها وبأخواها من اي حد تاني .. انا عرفت منها ان حضرتك عندك قيراط أرض بتزرعه وبتسترزق بيه صح كده ؟

عم فتحي: الحمد لله ..
وليد: طيب اتفضل ( طلع ورق وعطاهوله )
عم فتحي: ايه ده ؟
وليد: انا اشتريت الارض اللي حوالين القيراط بتاعك وكتبتهم باسم حضرتك .. دلوقتي ارضك بقت خمس فدادين مش قيراط واحد
عم فتحي وقف: حضرتك عايز تصرف عليا ؟
وليد: اقعد اذا سمحت .. اسمعني للاخر .. حضرتك بتصرف علي جميله واخوها يا سيدي اعتبر دي مصاريف اخوها لاني صراحه مش هقدر اخده بيتي
عم فتحي: وانا مطلبتش من حضرتك مصاريفهم
وليد: وانا مش هستني حضرتك تطلب .. اذا سمحت بلاش الحزازيه دي ..

عم فتحي: طيب اكتبهم باسم جميله و اخوها؟
وليد: لا معلش انا حابب انهم يكونوا باسم حضرتك ..عمي اذا سمحت بقي ..اعتبرهم هديه مني ليك .. انت ما تعرفش جميله عملت ايه في حياتي
عم فتحي: يا سيدي ربنا يسعدكم بس
وليد: ما بسش العقد اتكتب واتمضي واتوثق خلاص يعني كلامك ده كله مالوش اي فايده اتفضل بقي
فضل معاه يتناقش لحد ما سكت وبعدها جميله دخلت هيا واخوها وعمها سابهم لوحدهم ووليد فضل يرغي مع عماد وجميله كتير وقرب منهم وبعدها عماد انسحب.

وهو قعد مع جميله لوحدهم وطلبت تعرف كان عايز عمها في ايه فبلغها باللي حصل
جميله: ده كتير يا وليد
وليد: عمك مش ملزم بيكم يا جميله دي مسؤوليتي انا .. انا ملزم بيكي وباخوكي .. ومش عايز كلمه تانيه اذا سمحتي
جميله: حاضر مش هتكلم بس برضه ده كتير
وليد: لا مش كتير وبعدين ده اللي قدمته لعمك اما اخوكي فاتفضلي
طلع اوراق عطاهالها وهيا قلبت فيهم
جميله: ايه دول ؟

وليد: ده لاخوكي انا فتحتله وديعه باسمه في البنك يفتحها في الوقت اللي يعجبه وممكن من فوايدها يعيش بيها كويس يعني ما تقلقيش مش هيحتاج لحد .. طبعا انتي كمان عملتلك كده
جميله عيطت: انت بتعمل كده ليه ؟ انا مش عايزه منك فلوس
وليد مسح دموعها وضمها لصدره: عارف كويس جدا انك مش محتاجه لفلوس بس معلش خديني علي قد عقلي .. لازم أ أمن مستقبلك انتي واخوكي علشان لو جرالي حاجه.

حطت ايدها علي بوقه منعته يكمل: علشان خاطري بلاش الكلام ده .. انا مش عايزه فلوسك ابدا .. فلوس الكون كله ما تعوضنيش عن ضفرك انت فاهم ؟
وليد: حبيبتي فاهم وعارف بس ارجوكي ريحيني عايز اكون مطمن عليكم مش اكتر .. مش عايزك في اي وقت تكوني تحت رحمه حد .. اي حد مهما كان ..
جميله: مش عايزه يا وليد ارجوك
وليد: ارجوكي انتي افهمي ..جميله احنا متجوزين بعقد عرفي والعرفي مش معترف بيه في المحاكم
جميله: محاكم ايه بس ؟ انت بتفكر ازاي؟

وليد: لو جرالي حاجه وما تقاطعينيش .. العقد ده ما يديكيش اي حقوق فاهمه ؟ ولولا اني حاليا خايف عليكي ان حد يعرف بجوازنا كنت اخدتك علي اقرب مأذون واتجوزتك من تاني .. فاذا سمحتي سيبني اكون متطمن عليكي .. راحه نفسيه يا ستي ليا مش اكتر .. مستكتره عليا راحتي ؟
جميله عيطت في حضنه كتير: انا خايفه من بكره قوي يا وليد .. خايفه عليك قوي
وليد: حبيبتي مش هيحصل غير اللي ربنا كاتبه ولا ايه ؟ عمرنا كله مكتوب
جميله:ونعم بالله .. بس يارب ما تبعدنا عن بعض ابدا.

وليد: يارب نفضل لبعض ديما .. ربنا يحفظك انتي وابننا اللي جواكي يارب .. ودلوقتي مش هتفرجيني علي بلدكم ولا هنفضل هنا ! مع اني مش ممانع ابدا نفضل هنا
جميله ابتسمت: لا تعال عماد عايز يعرفك باصحابه علشان الناس تعرف اني متجوزه بجد لان كان في رغي كتير فاستحمله
وليد:استحمله ! يا حبيبتي اي حاجه من ريحتك بحبها عندك شك في كده ولا ايه !

وليد خرج مع عماد وهيا قعدت في بيت عمها وسرحت في اللي فات
فلاش باك ...
جميله: خير يا عمي .. عايز حاجه !
عم فتحي: اقعدي يا جميله يا بنتي
جميله: اهو قعدت
عم فتحي: شوفي يا بنتي في عريس جايلك بس مش من اهل البلد ..

جميله: عريس ! ومش من اهل البلد ! طيب يا عمي اللي تشوفه
عم فتحي: العريس متجوز يا بنتي .. بصي هما ناس كبرات قوي قوي في مصر والراجل محتاج واحده تخلي بالها من امه وتراعيها
جميله: عايز خدامه يعني يا عمي
عم فتحي: لا مش حكايه خدامه .. ده ثواب واجر عند ربنا كبير .. بعدين يا بنتي محدش عارف بكره مخبي ايه ! مش يمكن امه تحبك وهو كمان وتكوني انتي الكل في الكل ! فكري يا جميله بعقلك .. هتعيشي في مصر في فيلا طول بعرض .. شوفي فكري وردي عليا .. امه هتيجي بكره وشوفيها وقرري.

تاني يوم نبيله راحت واستقبلوها وطلبت تقعد مع جميله لوحدهم
نبيله: عمك حكالك علي سبب مجيي هنا ؟
جميله وشها في الارض: ايوه يا هانم
نبيله: طيب علشان الصوره تكون واضحه معاكي كلها .. وليد ابني مراته مش بتخلف وانا نفسي يكون عندي حفيد
جميله: اه .. حضرتك علشان كده عايزاه يتجوزني .. طيب ليه مش حد بمستواه وتليق بيه ؟

نبيله: انا جيالك بالكلام اهو .. انا محتاجه واحده تخلف وتمشي
جميله باستغراب: يعني ايه ؟ مش فاهمه ؟
نبيله حكتلها علي كل التفاصيل وجميله ساكته تماما
نبيله: فكري بعقلك انتي صغيره وجميله جدا ومليون راجل يتمنوكي .. حتي لو كنتي مطلقه والاهم عيلتك واخوكي .. عمك هيترفع لفوق وهتضمني اخوكي يكمل تعليمه وانتي بعدها مش هتحتاجي لاي حد ابدا لا انتي ولا اخوكي ولا عيلتك ... فكري بعقلك يا جميله وقرري بس ياريت محدش يعرف بالاتفاق ده .. وزي ما عمك قالك قدام الكل مجرد زوج عايز زوجه تانيه تراعي مامته .. فكري وردي عليا ياريت بسرعه ...

فاقت من ذكرياتها علي دخول اخوها وجوزها وابتسمت لانها ما تخيلتش ابدا انها هتقع في غرام وليد وان وليد كمان هيحبها...
قضي وليد اليوم كله معاهم واخر الليل روح بيته
ميس: كنت فين كده النهار كله ؟
وليد: مع انه ما يخصكيش بس هجاوبك .. كنت عند جميله
ميس: عندها فين ؟
وليد: في بلدهم
ميس: انت رحتلها البلد ؟ للدرجه دي يا وليد ؟

وليد: اه للدرجه دي يا ميس .. رحت اتعرف علي اخوها واهلها .. ودلوقتي بعد اذنك انا تعبان وعايز انام تصبحي علي خير
سابها وطلع اوضه جميله وهيا قعدت مكانها مش قادره تتنفس من كتر الغيظ اللي هيا فيه ونفسها تضرب نفسها وكل اللي شاروا عليها انها توافق علي جوازه .. لازم تنتقم لكرامتها المهدوره ..
في الشغل تاني يوم والكل مجتمع
محي: انت هتسافر قد ايه ؟

وليد: والله مش عارف يا عمي ممكن شهر اتنين لسه مش مقرر .. انا محتاج اجازه اريح فيها شويه
محسن: شهر اتنين ؟ للدرجه دي هتطول ؟
وليد: اه محتاج اقضي شهر عسل
كلهم بصوله باستغراب
وليد: ايه هو مش من حق الواحد يقضي شهر عسل تاني مع مراته ولا ايه ؟ هنغير جو انا وميس
ميس مسكت ايده وابتسموا الاتنين
ميس: من زمان قوي ما اخدناش اجازات مش من حقنا ؟

محي: لا طبعا براحتكم
وليد ملاحظ استغرابهم ونظرات شك في عنيهم
وليد: علاء لو هتعبك ممكن تيجي توصلنا المطار بالليل متأخر ؟
علاء: اه وماله بس انت عندك سواق فليه انا ! طبعا ده مجرد سؤال مش اكتر
وليد: السواق اجازه معلش
طبعا السواق هيروح لجميله يجيبها من بلدهم للمطار
علاء: وماله يا ابن عمي طيارتكم امتي بالظبط !
وليد: الساعه ٣ الفجر .. صح نسمه اخبارها ايه؟

علاء: وبتسألني انا ليه ؟
وليد: يعني لانك طول الوقت في المستشفي
علاء: هيا طلعت من المستشفي النهارده الصبح والبركه في سيادتك هيا ما بتكلمنيش
وليد: انا ؟ انا يا علاء ؟ انا اللي رحت قلتلك خليك غبي ومتخلف معاها
علاء: انا لا غبي ولا متخلف
وليد: انت تجسيد للغباء يا علاء .. انسانه جميله وناجحه وفيها مليون ميزه حلوه بدال ما تعاملها باحترام وتكسبها بتقل معاها وخلتها مش طايقه تبص في وشك
علاء: وليه ما يكونش من كلام سيادتك الوحش عني قدامها
وليد: انا ما اتكلمتش وحش عنك انا بس حذرتها
علاء: وتفرق ايه ؟

وليد: تفرق كتير بس طبعا بما انك غبي فمش هتفهم
الاتنين هيتخانقوا بس شريف ومحي وحسين اتدخلوا وفضوهم عن بعض
وليد: هتيجي توصلني ولا اشوف غيرك ؟
علاء بغيظ: لا طبعا هاجي
وليد عارف انه هيجي لمجرد يتأكد هما فعلا هيسافروا مع بعض ولا لأ !

بالليل وصلهم لحد المطار واستني لحد ما دخلوا جوه ووليد تعمد انه يمسكه التذاكر وكأنه مشغول بتليفون جاله ولمحه بيشوف مسافرين فين وفي طياره واحده ولا لأ !
دخلوا وختموا جوازتهم ودخلوا ساحه الانتظار وهناك جميله قاعده ووليد تعمد يقعد جنبها
وليد: في اي مشاكل قابلتك ؟
جميله: لا مفيش الراجل اللي بعتهولي خلصلي كل الاجراءات ووصلني لحد هنا
وليد: طيب كويس .. علي الطياره هنكون براحتنا محتاجه اي حاجه ؟

جميله: لا سلامتك
ميس هتولع جنبهم ونفسها لو تقتل جميله فوقفت
وليد: رايحه فين ؟
ميس: هجيب حاجه اشربها عندك مانع ؟
وليد: لامعنديش اتفضلي
اخيرا طلعوا الطياره وهناك كان فيه ناحيه فيها كرسين جنب بعض وناحيه تانيه كرسي واحد والتلاته ليهم
وليد: بما انك يا ميس ما بتحبيش الزنقه والحر فاتفضلي اقعدي في الكرسي ده براحتك.

ميس بغيظ: شكرا
وهو دخل جميله وقعد جنبها وربطلها الحزام وحس انها متوتره
وليد: مالك في ايه ؟
جميله: مفيش بس بتشاهد
وليد ضحك: متخافيش حبيبي، هيا اول مره بس وبعدها هتتعودي
جميله: اتعود ليه ؟
وليد: علشان كل شويه هاخدك في شهر عسل جديد.

جميله ابتسمت وبصت للارض بكسوف والطياره بدئت تتحرك وهيا كانت هتموت من الخوف وماسكه ايد وليد جامد جدا وهو ضاممها لصدره بحب ظاهرجدا وميس جنبهم بتتمني ان الطياره تقع علي الاقل تخلص منهم حتي لو هيا كمان هتموت فيها ..

طول الطريق ووليد مهتم جدا بجميله سواء بأكلها او شربها او حتي لما طلبت تروح الحمام راح معاها دخلها وعرفها مكان كل حاجه
جميله: المكان ضيق قوي .. هو ممكن الباب يتقفل عليا
وليد: لا يا حبيبتي الباب اهو كده تفتحيه وكده تقفليه
جميله: طيب اوعي تمشي وتسيبيني
وليد: ماتخافيش انا هفضل واقف هنا.

دخلت وهو استناها لحد ما خرجت وقعدها مكانها و اخيرا وصلوا الفندق بتاعهم وهناك حجز اوضتين جنب بعض واحده باسم جميله لوحدها وواحده باسمه هو ومراته ميس وطلعوا لاوضهم وبعد ما العامل مشي وليد وقف
ميس: رايح فين ؟ وواخد شنطتك ليه ؟
وليد: رايح لمراتي ولا نسيتي اتفاقنا ؟
ميس: وانا يا وليد ؟

وليد: اعملي ما بدالك احنا في باريس .. روحي اعملي شوبنج .. مش دي متعتك ! انطلقي يا روحي الفيزا بتاعتك مفتوحه اشتري ما بدالك باي
خرج وسابها وهيا نارها بتزيد اكتر واكتر ومستغربه فعلا الشوبنج متعتها وكل ما بتيجي هنا معاه بيتخانقوا لانه بيكون عايزها معاه وهيا عايزه تنطلق لوحدها ليه دلوقتي مش عايزه تنطلق ؟ ليه عايزاه هو وبس ؟ ماهو كان في ايدها ليه فرطت فيه ؟ ولمين ؟ لشغاله عندها ؟

ميس: انا اسيبك بمزاجي يا وليد لكن انت تسيبني لأ والف لأ ! انا عندي اكون ارملتك ارحم مليون مره ان يكون لي ضره بالشكل ده !
وليد خبط وجميله بخوف سألت مين واول ما رد عليها فتحت بسرعه ورمت نفسها في حضنه
وليد: مالك حبيبي خايفه ليه ؟
جميله: مش عارفه بس خفت لوحدي هنا
وليد: ما تخافيش انا مش هسيبك ابدا .. تعالي بقي نبدأ شهر عسلنا اللي اتأخر ده.

وليد فضل مع جميله كتير مش عارف قد ايه ؟ يوم ؟ اتنين ؟تلاته ؟ مش عارف الاوقات ايه ؟ صبح ولا ليل ؟ كل علاقتهم بالعالم تتلخص في حاجتين الصلاه وبيعرفوا مواعيدها من الموبيل و الاكل وبيطلبوه من بره
الباب خبط ووليد فتح وكانت ميس
وليد: خير يا ميس ؟
ميس: ايه هتكلم وانا علي الباب كده !

وليد بص لجوه كانت جميله لبست روب ففتح لميس تدخل ودخلت بصت حواليها وبصت لجميله اللي اختلف شكلها كتير واتمنت لو في اللحظه دي تجري عليها وتخنقها .. وندمت انها قصتلها شعرها لان شكله كده احلي مليون مره .. شكلها بقي استايل جدا بشعرها القصير ومكياجها الخفيف اللي اتعلمت ازاي تتقنه ! شعرها الطويل كان مخلي شكلها فلاحه فعلا لكن كده بقت برنسيس .. فضلت تتنفس بصوت عالي من خنقتها فاقت علي صوت وليد
وليد: ميس ! خير !

ميس بصتله: خير بس حبيت اطمن عليكم ! عايشين ! ميتين ! ايه فينكم ! حد يكون في باريس وما يخرجش من الاوضه !
وليد: احنا الحمد لله زي ما شيفانا كويسين جدا، اما الخروج فاكيد هنخرج الاجازه طويله
ميس: يعني بتعملوا ايه الوقت ده كله هنا في الاوضه !
وليد ابتسم: المشكله يا ميس ان احنا اهتمامتنا مختلفه عنك .. احنا مع بعض ولا اكتر ولا اقل ! عايزين نكون مع بعض فبالتالي قاعدين مع بعض وبس ..
ميس باستغراب: انتو في باريس !

وليد: المكان حلاوته بتتقاس بالصحبه اللي معاك مش بالمكان نفسه .. علي العموم يا ميس احنا كويسين ما تشغليش بالك انتي بينا وزي ما قلتلك انطلقي براحتك
ميس سابتهم وخرجت ومش عارفه تعمل ايه فاتصلت بابوها وحكتله الوضع وهيا بتعيط من القهر والغيظ
ميس: بابا انا لازم اقتلها ! فاهم لازم ! وبعد ما اقتلها واعرف وليد ان انا اللي قتلتها اقتله هو كمان .

شريف: اهدي حبيبتي اهدي وكل اللي انتي عيزاه هيتم بس الاول تجيبلنا ولي العهد بسلامه ويتكتب باسمك انتي ووليد والباقي كله سهل يا عمري انتي .. ساعتها يا ستي هخليكي تقتليها بايدك وهو لو اعمامه ما خلصوش منه هخلصك انا منه .. انا عندي كام ميس هاه يا قلب ابوكي !

عند جميله
جميله: هو انا ينفع اطلب منك طلب وما تقليش لأ
وليد: انتي تشاوري بس
جميله: طيب اوعدني انك هتوافق
وليد: لو بمقدرتي مش هتأخر
جميله: بمقدرتك بس اوعدني
وليد: حاضر يا ستي اوعدك اني هوافق
جميله: روح الليله قضيها مع ميس
وليد: نعم ! هو ده طلبك ! لا طبعا
جميله: انت وعدتني.

وليد: انتي رخمه جدا علي فكره وبعدين مين قالك ان ده شيء بمقدرتي هاه ؟ انا مش قادر ابص في وشها بعد كل اللي عملته معاكي فازاي بقي اروح واقضي معاها ليله كمان ؟
جميله: علشان خاطري انا
وليد: خاطرك علي عيني بس لأ
جميله: وحياتي عندك يا وليد .. دي مراتك حبيبي ومن كام سنه وما تنكرش انك كنت عايش معاها ومبسوط
وليد: مكنتش مبسوط .. كنت متخيل اني عايش بس اكتشفت اني كنت انسان آلي بينفذ المطلوب وخلاص .. كنت عايش وهم فقت منه واكتشفت ان حياتي بدئت يوم ما انتي دخلتيها.

جميله: عمري انت كله بس برضه يا وليد هيا مراتك وعلي ذمتك وليها حقوق عليك .. ده حتي كده يبقي حرام عليك .. وبعدين هيا هنا وحيده من غير حد حرام نسيبها كده .. ارجوك علشان خاطري .. ليله واحده ..خليك حقاني يا وليد
فضلت تقنع فيه لحد ما وافق وراحلها وخبط عليها وفتحتله واتفاجئ بمنظرها ولحظه ندم سيطرت عليه
ميس باستغراب: وليد ؟

رواية جميلة الجزء الأول للكاتبة الشيماء محمد الفصل السادس عشر

راح اوضه ميس يطمن عليها واول مافتحتله اتفاجئ بمنظرها لانها كانت دبلانه جدا واثار الدموع والعياط واضح عليها
وليد: في ايه مالك ؟ انتي تعبانه ولا حاجه ؟
ميس: وهو انا اهمك اصلا ؟
وليد: لا طبعا بس بسأل من باب الذوق وانك هنا مسؤوله مني ؟

ميس: اه .. طيب انا كويسه ما تشغلش بالك
دخلت ميس وهو دخل وراها وقفل وراه الباب وهيا بصتله باستغراب: انت عايز حاجه ولا ايه ؟
وليد: ما قولتلك جاي اطمن عليكي في ايه ؟ عايزاني امشي سلام؟
يدوب هيمشي بس جريت مسكته من دراعه وشدته ووقفت قصاده: خليك طبعا خليك انت ما تعرفش انت واحشني قد ايه؟
وليد نزل ايديها بعيد عنه وراح قعد علي الكنبه وحط رجل علي رجل وارتخي في قعدته
وليد: انا جاي اطمن عليكي مش اكتر فما تفهميش ده غلط
ميس: مش مهم المهم انك هنا .. اطلب عشا نتعشا ؟

وليد: لا انا اكلت مع جميله قبل ما اجي عايزه تطلبي لنفسك اطلبي
ميس: كل معايا تاني ؟
وليد: قلت لأ
ميس: طيب نشرب ايه ؟
وليد: ميس! وبعدين ! اللي في دماغك مش هيحصل فريحي نفسك
ميس: انا مراتك يا وليد
وليد: كنتي ... كنتي مراتي
ميس: ودلوقتي ؟

وليد: دلوقتي انتي وافقتي ترجعيلي بشكل صوري ومراتي هيا جميله وبس .. لتاني مره بتختاري الفلوس بتختاري وخلاص من غيرما تفكري .. قبل كده اخترتي اني اتجوز وندمتي ودلوقتي وافقتي ترجعيلي بشكل صوري واتنازلتي عن كل حقوقك وبرضه جايه تندمي
ميس: انا اصلا مش قادره استوعب عملالك ايه هيا ! كل ده ليه ؟ فيها ايه جميله بتحبهاعلشانه ؟

وليد: ده شيء ما يخصكيش
ميس: لا يخصني .. هيا اخدتك مني
وليد: هيا اللي اخدتني ولا انتي اللي قدمتيني ليها وهيا ملكتني بطيبتها وحنيتها وحبها .. ليكي حق ما تفهميش لان اللي عندها ده شيء يتحس وانتي ليكي الماده وبس مالكيش في الاحاسيس ..المهم بما انك كويسه وتمام استاذنك انا بقي تصبحي علي خير لو احتاجتي حاجه كلميني
قام وقف وهيا وقفت قصاده.

ميس: انا عايزه جوزي خليك معايا الليله ارجوك يا وليد انا محتاجاك خليك هنا
زق ايديها بعيد عنه بلا اهتمام وقالها بكل برود
وليد: جوزك ! سبق واتنازلتي عنه واتنازلتي عن حقك كزوجه ورضيتي بالصوره قدام الناس .. هيا دي الصوره بعد اذنك
سابها وراح لجميله اللي استغربت دخوله
جميله: احنا مش اتفقنا هتقضي الليله هناك معاها.

وليد اتنرفز علي جميله لدرجه انها اول ما لمسته مسكها جامد من دراعها: انا طلقت ميس وردتها بس علشان الصوره الاجتماعيه واعتبارات ملهاش اهميه عندي فبطلي انتي تتدخلي في اللي مالكيش فيه ويا ستي لو انتي مخنوقه مني هنا هسيبلك الاوضه كلها سلام
يدوب هيخرج بس وقفت في وشه ومهما يحاول يخرج الي انها منعاه: اوعي تخرج من هنا وانت زعلان.. انت عارف كويس ان ده مش قصدي
وليد: يبقي بطلي بقي.

جميله: انا بس مش عايزاك تكون ظالم مش اكتر
وليد باستغراب: انا ظالم ؟ انا يا جميله ؟واللي هيا عملته ده كله تسميه ايه ! ( شدها من شعرها ) وده لما قصتهولك كان ايه ؟ وتحكمها واهانتها ليكي المستمره ده كان ايه ؟ جايه دلوقتي تقوليلي ان انا ظالم .. ابعدي يا جميله عن وشي
حاولت تتكلم بس سابلها الاوضه وخرج بره سهر كتير.

عند ندي
خالد: وبعدين معاكي يا ندي ؟ انتي بتتجاهليني ليه ؟
ندي: انا مش بتجاهلك يا خالد احنا اهو مع بعض في الشغل كل يوم
خالد: انتي متجاهله اللي قلتهولك
ندي: اللي هو ايه ؟
خالد: اني بحبك .. اعتبرتي نفسك ولا كأنك سمعتي حاجه
ندي: المفروض اعمل ايه يعني ؟

خالد: تردي عليا تقولي بتحبيني ؟ ترفضي حبي ؟ تقولي بتكرهيني ؟ المهم اي رد بدال الحيره دي ؟
ندي سابت اللي في ايديها وبصتله
ندي: ولو انا معنديش رد ؟
خالد: يعني ايه معندكيش رد ؟ ماهو يا بتحبيني يا ما بتحبينيش؟
ندي: لا طبعا مش بالسهوله دي
خالد: طيب فين الصعوبه ؟
ندي: الصعوبه في الاختلافات والخلافات اللي بينا ..

خالد: اختلافات ايه وخلافات ايه ؟
ندي: اختلافات في الثقافات
خالد: اوعي يكون علشان بسمه ؟
ندي: ايوه طبعا علشانها نظرتك للبنت محدوده وبينت ان افقك ضيق وانك مازلت الراجل الرجعي
خالد: ندي انا مش رجعي ابدا بس هيا ملهاش اي تفسير تاني وملهاش دعوه ولا بالتحرر ولا الرجعيه .. واحده رايحه بيت شاب بدون سبب ملهاش اي معني تاني وما تقوليليش انتي جيتي معايا لان ساعتها الوضع كان مختلف تماما وكان في سبب وحتي لو مفيش سبب ده بيت عمك تروحيه الوقت اللي يعجبك فلأ دي مش زي دي ابدا.

ندي: ماشي مش هتكلم عن بسمه طيب والخلافات اللي بينا
خالد: خلافات ايه ؟ احنا مش بينا اي خلافات
ندي: الخلافات اللي بينكم كلكم وبين اخويا ولا انت ناسي ان وليد اخويا ؟
خالد بارتباك: احنا مفيش بينا خلافات
ندي: طيب بما اننا هنبتديها كذب يبقي بعد اذنك ما اعطلكش
قامت تمشي بس مسك ايدها وقفها
خالد: مش كدب بس فعلا انا ووليد مفيش بينا خلافات.

ندي: في حرب بينكم في كل حاجه سواء انت وعمي حسين او علاء وعمي محي
خالد: اوكي يا ندي ما تخلطيش الاوراق ببعض
ندي: ده اخويا يا خالد
خالد: وابن عمي وانتي بنت عمي
ندي: يعني ايه مش فاهمه ؟
خالد: يعني اه في اختلافات بينا بس ده شغل بيزنس مالوش علاقه بقرابتنا او بمحبتنا لبعض
ندي: يعني ايه ؟انت مش بتفكر في اذيه وليد ؟

خالد: نأذيه ازاي يا بنتي ده ابن عمي وزي اخويا .. كل خلافاتنا في البيزنس وبس
ندي: يعني ايه بيزنس وبس ؟ يعني ممكن تكون بتفكر تاخده منه الشركه او تخلوه يقع في اي مصيبه وتقولي خلافات في البيزنس وبس ؟ يعني مثلا تدبروله سرقه كبيره زي اللي حصلت ممكن بسببها يفلس وتقولي دي مجرد خلافات بيزنس ؟
خالد: ندي انتي بتفترضي
ندي: مش ده الواقع وده اللي بيحصل ؟

خالد: لا طبعا احنا ملناش علاقه بالسرقه دي ابدا
ندي: امال مين اللي دبر السرقه دي ؟
خالد: معرفش يا ندي .. ندي انا بحبك وانتي عارفه ده كويس
ندي: وانا بحب اخويا وهيفضل في النص بينا
خالد: اخوكي ده ابن عمي يا ندي .. انتي بتفكري ازاي؟
ندي: خلاص سيب المجموعه يا خالد وانا اوافق اتجوزك
خالد: نعم ؟ اسيب المجموعه ؟ انتي اتجننتي؟
ندي: يبقي ده ردك بعد اذنك
خالد: ندي استني .. ندي .. ندي ...

في الاجتماع الكل قاعد والاجتماع شغال بس مفيش حد مركز نهائي كل واحد سرحان في افكاره الخاصه ومره واحده علاء وقف وبيعتذر
محي: رايح فين حضرتك ؟
علاء: معلش تعبان شويه ومش قادر اقعد بعد اذنكم
سابهم وخرج من الشركه كلها وراح علي بيت نسمه خبط وصفاء فتحتله
صفاء: اهلا يا ابني
علاء: اهلا بحضرتك ممكن اشوف نسمه
صفاء: هيا مش هتوافق تشوفك وانت عارف ده كويس.

علاء: انا لازم اتكلم معاها ارجوكي ساعديني .. لازم اتكلم ولازم تسمعني
صفاء: يعني اعمل ايه انا ؟
علاء: سيبيني ادخل عندها ارجوكي ولو اتنرفزت جامد او اي حاجه حصلت همشي بس ارجوكي اديني فرصه
صفاء اترددت بس فتحت الباب: بس لو طلبت منك تمشي امشي علي طول
علاء: حاضر اكيد
دخل علاء عندها واول ما شافته: انت ازاي تدخل هنا اتفضل اخرج بره.

علاء: والدتك عطتني فرصه ادخلك ارجوكي انتي كمان اديني فرصه واسمعيني بس مره ارجوكي ! انا مش وحش للدرجه دي يا نسمه وانتي اكيد عارفه كده .. ارجوكي
نسمه: ايه اللي ممكن تقوله يغير حقيقه اللي عملته ! حقيقه انك حاولت تغتصبني
علاء: لا لا لا يا نسمه عمري ما فكرت في ده ابدا
نسمه: امال فكرت في ايه ؟ لما ضربتني ووقعتني بالمنظر ده ؟

علاء: كنت متخلف .. مجنون.. غبي.. اي مسمي ..كنت عايزك .. عارف ان ده مش مبرر بس ارجوكي فكري بطريقتي
نسمه: افكر ازاي بطريقتك ؟ اقول اه يا عيني معلش كان نفسه فيا وانا اللي غلطانه اني مقدمتلوش نفسي علي طبق من دهب !

علاء: من غير تريقه نسمه .. انا من يوم ما شفتك وانا بحاول ديما اقرب منك واكيد لاحظتي ده .. سألتيني ليه مش بسيبك وقلتلك انه مش عدم ثقه .. ده كان حبا في قربك انتي .. عايزك علي طول قدامي .. عايزك معايا باستمرار .. مش عايزك تبعدي عني ابدا .. بخترع مليون حجه وحجه علشان تفضلي قصاد عيني ..علشان اتكلم معاكي ..

ما تتخيليش اني بعد ما بسيبك بفضل قد ايه افكر في اي سبب علشان اكلمك في التليفون وافكر قد ايه في سبب علشان اشوفك بيه تاني يوم واكيد حسيتي ان في حاجات تافهه بصر اعملها معاكي او اخليكي تعمليها قدامي .. كل دي كانت اسباب علشان تفضلي قريبه مني
نسمه ساكته ومش عارفه ترد عليه: برضه كل ده ايه علاقته باللي حصل يومها ؟

علاء: كنت عايز اقرب منك خطوه .. كنت عايز اعبر عن مشاعري بس الطريقه خانتني او كنت فاكر اني بكده هتفهميني اني عايز اقرب اكتر منك وكنت متخيل انك هتبادليني نفس الشعور
نسمه: يعني ايه ؟ كنت مستني مني ايه ؟
علاء: تتفهميني .. تقربي مني
نسمه: بالشكل ده والطريقه دي لأ والف لأ كمان انا مش كده ومش ده القرب عندي
علاء: عارف ان مش ده القرب بس كنت عايزو
نسمه: ولمجرد انك عايز يبقي تاخد ؟

علاء: اسف بس اتعودت فعلا اللي عايزو باخدو
نسمه: ده للاشياء وانا مش شيء وقت ما تحتاجه تمد ايدك وتاخده
علاء: عارف يا نسمه عارف افهميني
نسمه: فهمتك .. كنت عايزني ومديت ايدك تاخدني
علاء: لا مش كده انتي ليه مصره تشوهي اللي حصل بالشكل ده
نسمه: اشوهه ! هو متشوه اصلا .. انت حاولت تغتصبني
علاء: برضه هتقول اغتصاب يا بنتي مش اغتصاب
نسمه: امال ايه ؟ تسميه انت ايه ؟

علاء زعق: اسميه حب
الاتنين اتفاجؤا بالتصريح المباشر ده ويمكن علاء اتفاجئ اكتر بكلامه واستغرب ازاي نطقها كده
نسمه: حب ؟ حب ايه ولمين ؟وهو ده الحب ؟
علاء: امال ايه هو الحب ؟ وما تتفلسفيش هو ده الحب .. عايزك علي طول قدامي .. عايز اشوفك باستمرار .. مش عايزك تبعدي عني .. كنت هموت من الخوف والقلق عليكي .. وليد هددني انه هيقف ضدي وهيخرجني من الشركه بس كل ده ما همنيش .. ما اهتمتش غير انك تقومي باي تمن واي شكل المهم تفوقي .. كل ده يبقي ايه لو مش حب قولي انتي !

نسمه: ولما انت بتحبني يبقي ليه الغصب ؟ ليه ما صارحتنيش؟
علاء: كنت هصارحك بس رفضك ليا جننيني وكمان لما قولتيلي ان وليد حذرك مني خليتيني خرجت عن شعوري واتجننت ومبقتش شايف قدامي فانا اسف حقك عليا .. انا فقدت السيطره علي نفسي بس مش عدم اهتمام بيكي او اغتصاب زي ما بتقولي لا يا نسمه ابدا .. انا بحبك يا نسمه اديني قولتها صريحه اهو .. بحبك
نسمه: وانا بخاف منك وفقدت ثقتي فيك والحب بدون ثقه ما ينفعش.

علاء: يبقي تديني فرصه ارجع ثقتك فيا
نسمه: في حاجات لما بتتكسر ما بتتصلحش
علاء: كل شيء في الدنيا بيتصلح .. طالما عايشين لسه يبقي نقدر نصلح ونبدأ من جديد
نسمه: ...
علاء: قولي اي حاجه
نسمه: معنديش حاجه اقولها
علاء: نسمه انتي كمان اكيد حبيتيني ..اكيد حسيتي بيا .. اكيد فهمتي تفكيري .. واكيد بادلتيني نفس مشاعري دي والا كنتي من زمان وقفتيني بس انتي كنتي متجاوبه معايا.

نسمه: انت عايز تقولي ان انا السبب اني وثقت فيك ؟
علاء: لأ طبعا بس عايز اقول انك اكيد حسيتي بيا وبحبي فبحلفك بالحب ده اديني فرصه اصلح غلطي ده جربي مش هتخسري شيء
نسمه: هخسر كتير يا علاء
علاء: اوعدك مش هتخسري ابدا جربي، اديني بس فرصه ولو غلطت او عملت اي شيء يضايقك يا ستي عاقبيني باللي يعجبك
نسمه: ممكن تسيبني لوحدي دلوقتي ؟

علاء: طيب ردي عليا الاول
نسمه: انت اهو من اولها مش بتسمع كلامي .. لازم تقدر مشاعري لازم تديني مساحه مش تمشيني علي حسب رغباتك انت .. انا دلوقتي محتاجه اكون لوحدي يبقي احترم رغبتي .. احترم مشاعري يا علاء
علاء: حاضر يا نسمه حاضر بس هاجي تاني
نسمه: ان شاء الله
سابها ومشي وهو بيفكر ازاي هيراضيها وبعد ما روح ابوه بيكلمه ويتناقش معاه في الشغل وهو مش مركز نهائي
محي: وبعدين معاك ؟ هفضل اكلم في نفسي كده كتير
علاء: سوري حضرتك قلت حاجه ؟

محي: انا بقالي ساعه بتكلم وجاي تقولي قولت حاجه ؟
علاء: انا عايز اتجوز
محي استغرب وبص لابنه: افندم ؟
علاء: عايز .. اتجوز
محي: شوف انا بكلمه في الشغل وهو بيقولي ايه ؟
علاء: سيبك من الشغل مش هيطير خلينا في المهم
محي: وهو ده مهم ؟ ماشي عايز تتجوز حاضر هجوزك خلص الموضوع نرجع للشغل.

علاء: عايز اتجوز نسمه
محي: نسمه مين ؟ البنت اياها ؟ وتطلع مين دي علشان تتجوزها !
علاء: تطلع واحده انا بحبها وده المهم
محي: وانت تعرف تحب يا علاء؟
علاء: اه تصدق بعرف .. انت هتيجي معايا اخطبها
محي: بعدين ربنا يسهل
علاء: لا مش بعدين بكره
محي: لا انت اتجننت علي الاخر انا رايح انام تصبح علي خير
قام وطالع علي اوضته
علاء: بكره هتروح معايا
محي من فوق: تصبح علي خير ..

اخر الليل وليد رجع كانت جميله نايمه او متنايمه واول ما لمس السرير قربت منه براحه وحاول يبعد بس منعته وحطت راسها علي صدره وفضلوا كتير ساكتين
جميله: ممكن ما تزعلش مني ! مش قصدي ازعلك ابدا انا ممكن يكون التعبير خاني او معرفتش اعبر عن اللي انا عايزه اقوله مش اكتر
وليد: ارجوكي يا جميله ما تتدخليش في علاقتي بميس .. دي علاقه بقت معقده وقايمه علي المصالح والمنفعه مش علاقه زوجين فما تخلطيش الامور ببعض ممكن ولا لأ ؟

جميله: براحتك انت حبيبي
النهار طلع ووليد قام دخل الحمام وهنا جميله افتكرت بالليل بعد ما وليد نزل ميس جاتلها تعيطلها وتقولها ان جوزها وحشها جدا وانها متقبلاها بس تساعدها ان وليد يسامحها
وطلبت منها ان اول ما وليد يصحي تنادي عليها .. جميله اترددت كتير بس في الاخر قررت تسيب القرار لوليد
كلمت ميس وقالتلها ان وليد صحي ولحظه وميس كانت بتخبط علي الباب وجميله فتحتلها
ميس: باب اوضتي مفتوح روحي اوضتي انتي
جميله: نعم ! ووليد !

ميس: ارجوكي يا جميله انا بس عايزه اتكلم معاه مش اكتر وهو مش مديني فرصه
جميله: طيب هغير هدومي
ميس: عقبال ما تغيري هيكون هو خرج انتي اصلا لابسه اسدالك والاوضه اهي في وشك ده يدوب متر روحي يالا
جميله اترددت بس ميس شدتها من ايدها ودخلتها اوضتها وهيا جريت عند وليد قبل ما يخرج بحيث تحاول مره تانيه ترجعه ليها
جميله خافت كتير من رد فعل وليد لما يتفاجئ بميس وفضلت رايحه جايه مش عارفه تعمل ايه ؟

ميس دخلت لوليد وحاولت تغريه بس اتفاجئت بصده وكرهه ليها لدرجه انه زقها بعيد وشد فوطه وخرج بره وهي مش عارفه تعمل ايه وهيا بتخسر معركه وري التانيه قدام جميله
وليد خرج ولبس بسرعه وراح علي اوضه ميس خبط بعنف
وليد: افتحي يا جميله.

جميله فتحت بسرعه ومن غير ولا كلمه شدها اخدها علي اوضتها واستني ميس تخرج وفعلا خرجت مبلوله ولابسه روبها وحاولت تبتسم علشان تخلي جميله تغير بس وليد معطهاش فرصه لانه شدها جامد من ايدها ووداها علي اوضتها وقفل الباب عليها ودخل اوضته ووقف قدام جميله ايديه في وسطه
وليد: ممكن افهم ايه ده ؟ ازاي تخرجي من اوضتك بدون اذني وازاي اصلا تدخليلي واحده عندي !

جميله: انا مدخلتهاش عندك
وليد زعق: امال عملتي ايه ؟
جميله اتنفضت بزعيقه: انا اسفه
وليد: ما تتأسفيش انا بسألك سؤال واضح خرجتي ازاي بره اوضتك وازاي ميس دخلت عندي ؟
جميله: هيا بس اترجتني تتكلم معاك وان انا اساعدها وقالتلي كل اللي اعمله اني اقولها اول ما تصحي وهيا بس هتتكلم واتفاجئت بيها لما دخلت اخدتني علي اوضتها وهيا دخلت
وليد: وليه ما منعتيهاش او ناديتي عليا انا بيني وبينك مترين ؟

جميله: انت قولتلي امبارح ما اتدخلش بينكم بترجع في كلامك ليه دلوقتي ! هيا عايزه تتكلم معاك وانا سيبتكم فين غلطي ؟ادخل ولا ما ادخلش ؟ اتكلم ولا اسكت ؟ انت جاي تلومني انا ؟
وليد حن اول ما جميله عيطت وراح وضمها جامد لحضنه
وليد: حبيبتي اهدي انا اسف ما تعيطيش انا بس اتنرفزت وطلعت نرفزتي عليكي بس لما ميس قالتلي انك انتي اللي دخلتيها اتجننت .. اتجننت مش اكتر
جميله: ليه ؟

وليد بصلها: لانك ساعتها هتكوني زيها .. هيا مصالحها بتتحكم فيها مش حبها ولا غيرتها فلو انتي فعلا دخلتيها عندي يبقي انتي زيها بالظبط
جميله: لا اوعي تقول كده انا لو بايدي اخدك من الكون كله ومستعده اعيش معاك في قمقم بعيد عن الكون كله بس انا خايفه عليك وعارفه ومقدره للمشاكل اللي انت فيها انا لو ساكته علي غيرتي من ميس فده خوفا عليك انت مش اكتر انا نفسي وحلمي ومني عيني تكون انت ملكي انا وبس
وليد ضمها قوي وحط راسه علي راسها.

وليد: وانا فعلا ملكك انتي وبس .. انتي اول حب ليا يا جميله ولعلمك ميس من قبل حتي ما اطلقها كانت عبء عليا .. عبء انا اخيرا خلصت منه فما تحاوليش ترجعيهولي تاني
جميله: وليد تعال نسيب الدنيا كلها ونختفي انا وانت وبس
وليد: يا ريت يا جميله فعلا يا ريت المهم انا هنزل نص ساعه كده اظبط شويه حاجات وانتي استنيني عقبال ما ارجع وما تكلميش ميس ولا تفتحي الباب ولا تردي علي تليفونات وانا لو عايزك هكلمك علي الموبيل ..

جميله: حاضر حبيبي ما تقلقش عليا
سابها ونزل وهناك ميس قاعده في اوضتها كلمت ابوها
شريف: خير مالك
ميس: انا قررت اخلص من جميله .. لازم اخلي وليد يبكي عليها
شريف: وبعدين يا ميس ! ما قلنا لما تخلف
ميس: وهيا لازم تخلف في حضن وليد يعني ! ما ينفعش تخلف من غيره ؟
شريف: قصدك ايه يا ميس ؟ دماغك فيها ايه ؟

ميس: بابا وليد لو استمر مع جميله مش هيتنازل عنها ابدا ولو السما انطبقت علي الارض مش هيكتب الولد باسمي واعتقد انه هيعلن عن جوازه منها وممكن يرميني انا بكل سهوله
شريف: وبعدين المفروض نعمل ايه ؟
ميس: انا فكرت كتير ووصلت لحل
شريف: اللي هو
ميس: وليد لو اتقتل قبل ما البيبي يتكتب باسمي هنخسر فبالتالي لازم نحميه لحد ما البيبي يوصل بالسلامه
شريف: ده وليد وبالنسبه لجميله ؟

ميس: جميله بقي لازم ناخدها من وليد وتفضل معانا احنا وبكده وليد يفضل تحت رحمتنا
شريف: انتي كده هتلعبي علي المكشوف يا ميس
وليد: بابا انا خلاص خسرت وليد وده اتأكدت منه النهارده وعرفت انه استحاله يرجع تاني فبالتالي لازم يبقي تحت رحمتنا
شريف: وبعدين نقتلها ! ولا ايه ؟
ميس: لا ياخدها بس في المقابل هيتنازلنا عن ابنه وشركته قصاد جميله
شريف: وانتي متخيله هيوافق ؟ وان رفض يا حلوه هتخسري انتي كل حاجه ؟

ميس: انا معدش عندي حاجه اخسرها نصيبي في الشركه ومحفوظ ووليد وخسرته لكن هو عنده كتير يخسره
لو وافق هيخسر شركته وحقه في ابنه وهيكسب جميله اللي ساعتها مش هتسامحه انه حرمها من ابنها وبكده هيخسرها هيا كمان وساعتها انا هشفي غليلي منه
شريف: ولو رفض ؟

ميس: لو رفض بقي هيخسر جميلته وابنها ويشبع بقي بشركته وساعتها برضه هشفي غليلي منه انت مش متخيل يا بابا هو بيحبها ازاي وانا بقولهالك اهو هو مش هيرفض ابدا ابدا
شريف: والله فعلا في كلتا الحالتين هو خسران .. طيب طلباتك.

ميس: عايزاك تشوفلي حد هنا يخطف جميله من وليد .. وليد هنا مش في مركز قوه وسهل جدا تتخطف هنا عن مصر لانه لما يرجع هيبقي صعب قوي علينا فدي فرصتنا
شريف: طيب اديني ساعه كده واشوف هعمل ايه ؟
قفلت ميس وهيا مبتسمه ابتسامه شريره وبتحلم باليوم اللي هتقف قصاد وليد وهتساومه علي جميلته ..

عند خالد
خالد بيفطر مع حسين وبيتكلموا عادي
خالد: بابا كنت عايز افاتحك في موضوع مهم
حسين: قول
خالد: انا .. يعني انت عارف اني راجع مصر استقر. و ...
حسين: خالد من غير مقدمات اتكلم علي طول
خالد: من غير مقدمات انا عايز اتجوز ندي
حسين بصله: ندي مين ؟

خالد: ندي بنت عمي .. ندي اخت وليد
حسين: هزارك دمه تقيل جدا بلاها
خالد: علي فكره انا مش بهزر انا بحب ندي من واحنا عيال صغيرين وعايز اتجوزها
حسين: انت عايز تتجوز ندي ؟ ندي اللي ابوها اخد حقي انا وعمك محي مننا ورمانا بره الشركه ؟ ندي اللي اخوها ماسك المجموعه كلها وعامل كبير علينا ؟ ندي دي ولا غيرها ؟ انطق.

خالد: دي كلها خلافات في البيزنس وما تهمنيش المهم اني بحبها وعايزها معايا
حسين: انت شكلك اتهبلت .. اسكت خالص يا خالد
خالد: لا مش هسكت يا بابا .. انا عايز اتجوزها
حسين: استغفر الله العظيم من الغباء علي الصبح .. طيب ماشي بالعقل كده .. هيا هتوافق ؟اخوها هيوافق ؟
خالد: هيا ايوه هتوافق ووليد مش هيعارض ابدا
حسين: طيب يا عم الثقه انت ولما ننفذ خطتنا وناخد كل حاجه من وليد موقفك هيكون ايه معاها ؟ فكرت في ده ؟

خالد: ايوه فكرت
حسين: ومخك العبقري الفذ قالك ايه ؟
خالد: قالي ان دي خلافات في الشركه ومهما نختلف بس دمنا واحد هنفضل ولاد عم وهتفضل انت عمهم مهما يحصل .. نختلف في الشغل اه لكن نخرج بره الشركه نسيب خلافاتنا جواها
حسين سكت لانه مش هيقدر يقول لابنه ان خطته تتضمن انهم يخلصوا من وليد تماما مش بس ياخدوا شركته.

حسين: الكلام اسهل من الفعل .. يوم ما تاخد قرش من وليد هتشوف النفوس هتتغير ازاي مش تقولي خلافات شغل .. انت مش فاهم اي حاجه .. بعد اذنك
خالد: بابا اذا سمحت
والدته دخلت عليهم
خالد: ماما قولي حاجه لبابا .. رافض ارتباطي بندي
والدته: ليه يا حسين ؟
محسن: هو قالك علي التخلف ده ؟ ووافقتيه؟

والدته: وهو يلاقي احسن منها فين ؟ حسب ونسب وبنت عمه ومال وجمال ! عايز ايه تاني ؟ هتلاقي احسن منها فين ؟
حسين: اخيرا عرفت مصدر الغباء فيه اتاريه وراثه .. بعد اذنكم
سابهم وخرج علي الشركه
والدته: ما تقلقش سيبه شويه يهدي ويقلب الموضوع في دماغه وهيوافق .. انا وراه لحد ما يوافق وبعدين وليد اصلا مسافر يعني قدامنا وقت نقنع ابوك فيه
خالد: ربنا ما يحرمني منك ابدا يا ست الكل.

في الشركه محي وحسين مع بعض
حسين: مالك كده مش علي بعضك ليه ؟
محي: علاء بيه عايز يتجوز
حسين: هو كمان ؟
محي: ليه مين تاني عايز يتجوز ؟
حسين: خالد بس تخيل بقي خالد عايز يتجوز مين ؟
محي: ندي طبعا وهو في غيرها
حسين: وانت عرفت منين ؟ هو قالك ؟

محي: وهي دي محتاجه قواله يا حسين .. الولد ليل نهار يلف وراها ومن زمان مش دلوقتي بس
حسين: طيب واعقله ازاي ؟
محي: تعقله ؟ وانت معترض ليه اصلا ؟
حسين: انت عايزني اوافق يتجوز اخت وليد ؟

محي: طبعا توافق .. ده انت تبقي غبي لو فكرت ترفض .. هتكسب حد جوه بيت وليد نفسه .. انت ازاي اصلا فكرت ترفض ؟ كل اللي حوالين وليد ولاءهم شديد ليه .. اخته هتكون جاسوستنا ومن غير ما تعرف .. ده غير ان لها نسبتها هيا كمان هتبقي من نصيب ابنك .. انت ازاي اصلا فكرت ترفض ؟ انا كتير بشك في ذكاءك يا اخويا .. علي الاقل ابنك ناصح بص لفوق واختار .. المصيبه في علاء
حسين: اه نسيت اسألك هو عايز يتجوز مين ؟

محي: البنت اللي اسمها نسمه ..
محسن: اللي كانت في المستشفي ؟
محي: ايوه هيا .. شفت بقي .. يبقي اختيار خالد ولا اختيار علاء ؟

عند ميس::

شريف اتصل بيها وبلغها انها تنزل تقابل الرجاله اللي بعتهم ليها
نزلت وراحت زي ما ابوها بلغها واتعرفت علي الراجل اللي هتقابله
( الحوار بالانجليزيه )
ميس: مستر توماس ؟
توماس: ايوه انا ! مستر شريف كلمني وقالي ان حضرتك عندك كل المعلومات اللي هحتاجها
ميس: ايوه عندي
عطته عنوان الفندق ورقم الحجره وصور لوليد ولجميله علي موبيلها
ميس: البنت هتخطفوها وخلي بالك انها حامل فمش عايزه البيبي يجراله اي حاجه انا يهمني البيبي جدا و وليد برضه محدش يأذيه
توماس: انا شغلي دقيق جدا فما ما تقلقيش حضرتك ابدا عايزانا ننفذ امتي ؟

ميس: النهارده .. دلوقتي لو ينفع
توماس: خلاص روحي حضرتك المكان اللي يريحك وسيبي علينا احنا الموضوع ده وبعد ما نخلص هبلغ حضرتك
ميس خرجت تتسوق منتظره مبسوطه فرحانه
اخر النهار راجعه علي الفندق وهيا داخله توماس كلمها
ميس: خلاص تم ؟ خطفت جميله ؟ هيا فين لازم اشوفها بعيني متكتفه ولازم اشوف وليد منهار عليها
توماس:...