أهلا  بكل الأمهات اللطيفات

اليوم بأحكي لكم عن احتياجت المواليد اول ثلاثة أشهر..

كثيير جاني سؤال خصوصا من المبتعثات ايش نحتاج وايش اخذتي معك للمستشفى وكيف النفاس بدون أهل وإلى اخره

فقررت اكتب الي جربته ونفعني.(من التجهيز للولاده للنفاس)

قبل كل شي مبروك مقدما وانبسطي بكل اللحظات ولا تشيلين همها بزياده لانها لحظات وتصير ذكرى مرت وانتهت..

أولا احتياجات المواليد:

بأكتفي فقط بالأساسيات اما الاشياء الي تعتبر ثانويه باستغني عنها لاني وقت ولادتي كنت على وشك نقل بيت فما اشتريت الا الضروري جدا..

الطفل يحتاج (أكل/نوم/نظافة/دفء) فقط.

١-الأكل/ اشتريت ١-حليب بودره و ٢-مجموعة رضاعات  مقاسين . واخذت للرضاعات منظف الي يكون طويل يدخل فيها..

٣-ومصاصة مركب عليها لعبه (المصاصة اخذت الي معها دميه لانه كان يطلع المصاصه العاديه وتطيح من فمه بينما الي فيها دميه تكون

مستلقيه على صدره ولو طلع المصاصه من فمه ماتطيح يقدر يرجع ياخذها بنفسه..عموما بعد الشهر الرابع معد حب ريان المصاصات الا نادرا جدا..

٤-اخذت مخدة الترضيع الي تساعدني اسند البيبي عليها عشان ماتتعب يدي وريحتني. ( وبعد كم شهر صرت اسند ريوني عليها وقت ماكان يتعلم الجلوس) هنا تحصلونها

واخذت كريم خاص احطه علي بعد الرضاعة مهم اول شهر. اهم شي يكون من النوع الي مايحتاج مسح بحيث يكون امن للبيبي بعد الاستخدام.. هذا الي استخدمته

٢-النوم/ سرير صغير  واسمه في امريكا bassinet.. اخذت واحد بكفرات بحيث انقله وين ما ابي ..ما اشتريت الكبير crib لانه يستخدم بعد الشهور الاولى وانا كنت بانقل..

.. مانحتاج اي نوع من المخدات للاطفال قالوا خطأ مخدات لأنها ممكن تخنق البيبي..

٣-النظافة

مهم جدا بانيو صغير مخصص للاطفال اخذت واحد يجي معه قطعة قماش تصلح له اول شهر تمسكه، اذا في احد يمسكه لك مايحتاج القطعه هذي.. وهذا هو

شامبو شعر وجسم وحفاضات اصغر مقاس و مسحات الحفاضات و بودرة وكريم لو جاه احمر من الحفاضة..

نحتاج فوط صغيرة مفيده في كل شي وكل المراحل..(المسحات الطبيه غالبا المستشفى يوفرونها بس اذا ماصار ممكن تشترين مجموعه عشان الحبل السري)

انا حطيت لي طاوله في الحمام وفوقها اسفنجة المخصصة للتغيير الحفاضات وحطيت جنبها سله فيها حفاضات ومسحات و كل شي متعلق بالنظافه

لان بعد الولاده بيكون صعب تروحين كل مكان تجيبين الاغراض وصعبه ع السرير لانه ممكن يوسخه،

بس الي مرتاحين لطريقة ثانيه عادي اهم شي الواحد يكوّن الجو المريح له ويحط في باله انه بيكون في حاله الانسان المريض بعد الولاده..

٤-الدفء/(الملابس)

مهم تكون ١٠٠٪ قطن ، ابعدي عن الملابس المزركشه والي اقمشتها تضايق وركزي على الراحة في هالمرحلة..

انصح تاخذون اغلب القطع الداخليه بيضا ساده وانصحكم بالابيض لان الاطفال بعض انواع الحفاضات ماتناسبهم

وبالتالي ممكن تطلع بعض الفضلات برا على الملابس وفيها لون مره قوي مايروح بسهوله فلو كان ابيض نسوي له بليتش ويروح اما باقي الالوان مانقدر

وحصلت لي رميت كم قطعه بعد ماكبر عليها لانd ما ابي احتفظ فيها وهي مبقعه..

وفي البدايه راح يلبس داخلي بس عشان مريح لك وله /ويكون مقاس ٠-٣ مو المقاس الاصغر لان الاصغر كلها كم اسبوع ويكبر عليها وبعض المواليد اصلا ماتقد لهم..

بس ممكن تاخذين موجموعه وحده من المقاس الصغير.. انا خذت قطعتين او ثلاث لبس حلو ومقاسه نيو بورن عشان انبسط فيه اول شهر..

المهم مقاس ٠-٣ يكون التركيز على الملابس الخفيفه العمليه حقت البيت..

-يحتاج قبعة وقفازات والقبعه لازم تكون طويله تغطي الاذن مثل حقت المستشفى.

-اخذت مهادات خفيفة وثقيلة عشان حسب الجو..

_____

انتهت اغراضه المنزلية باقي بس طبعا العربية والكار سيت ..

لاننا نسافر كثير اخذت شي اسمه (نظام السفر) مره مريح الكارسيت ممكن يتركب على العربية مباشرة ،

تكون ثلاث قطع ١-العربية ٢-الكارسيت ٣-حامل الكارسيت..

طبعا العربيه لها استخدامين ممكن نركب فيها مقعد الكارسيت بحيث مانشيل الطفل من السياره للعربيه، نشيل المقعد بكبره وهذا مره مريح مع المواليد ويكون ملموم في العربيه، مثل هالصورة :

واذا كبر على هالجلاسه، العربيه معها قطعه عاديه تكون مثل العربيات الطبيعيه للكبار.. بديت استخدمها لمن صار يجلس معد يبي ينسدح في الكار سيت فصرنا ننقله من الكارسيت للعربيه، احس الي ماجرب ماراح يفهم بس هذا اسمها اخذتها من امازون britax travel system

_______

هذي للبيبي ، اما لي انا / اخذت توب مررره مريح (شبيه بهذا) يكون مشبوكه فيه البرا بحيث مايحتاج تلبسين قطعتين

اخذتها من تارقت وموجوده في محلات الحوامل انصح بها جدا ، عشت عليها في اول ما ولدت وممكن ينلبس فوقها تيشيرت لو حابه تغيير عن الالوان..

اخذت لي عموما مجموعه ملابس وبجامات جديده تصلح للترضيع بس مو من قسم الحوامل لانها اشكالها مو حلوه اخذت شورتات عاديه و تيشيرتات فيها ازرار عشان الترضيع

(كان الجو حر هالفتره لو كان برد يفترض بجامات دافيه او الي يريحك) بس مره كانت نفسيتي تصير حلوه اذا تروشت ولبست جديد..

احتجت بعد دوائر قطنيه تحمي الملابس من الحليب المتسرب .. وتعرفون الاغراض الصحيه ماله داعي اتطرق لها المستشفى بيقولون لك كل شي تحتاجينه بعد الولاده..

هذا كله الاحتياجات العامه ..

__________

شنطة المستشفى

*بالنسبة للي يسألون ايش ناخذ في المستشفى معنا، اول شي اسألوا المستشفى ايش راح يوفرون

مثلا هل متوفره الحفاضات والمسحات وغيرها والا لازم تاخذين معك، المستشفى الي رحت له يوفر كل شي

بس اخذت لبسين احتياط ولبس واحد مرتب عشان اصوره ثاني يوم اذا طلعنا واخذت مهاد و بطانيه عشان مايبرد برا ،

والباقي اغراض لي انا طبعا الاشياء الصحيه كلها هم موفرينها انا بس اخذت مخدات اضافيه جدا مهم لان مخدات المستشفيات مو دايم حلوه ،

واخذت شرابات لوقت الولاده وشرابات بعد الولاده وشبشب بيت مايخرب لو توسخ من شي و قميصين مرتبات واخذت بجامه قصيره..

شي مهم ناخذ علبة مويه لانهم احيانا يجيبون في كاس مو حلو بالنسبه لي كل شوي اطلبهم مويه فاخذت مطارتي الخاصه..

اما للمرافق بتحتاجين تقولين له ياخذ لبس ثاني لو ابدا ماراح يفارقك واخذت علبة سناكات له عباره عن معمول وتمر وحلويات وشوكولاتات وكذا

لانه ممنوع علي اكل شي بس هو راح يجوع..واخذت كاميرا طبعا عشان نصور اللحظات المميزة وشاحن الجوال والايباد وسماعات لي عشان اسمع قرآن فتره انتظار الولادة..

(الدفتر كتبت فيه الاشياء الي ما اقدر ادخلها الشنطة من بدري لاني باحتاجها مثل الشواحن ماتدخل الا في اللحظة الأخيرة .. فكتبتها عشان ما انساها.

وهذي صورة غرفتي في المستشفى << خشيت جو مع الموضوع

_______

فترة النفاس

(انصحك توظفين احد يساعد) لكن اذا ماتوفر مساعده الا من زوجك مثل حالتي انصحك تسوين التالي،

من الناحية النفسية

حلو تهيئين الجو لك انه يكون سعيد وجميل لانه بعد الولاده ممكن يحصل اكتئاب خصوصا مع الوحده وبدون زيارات واول مولود (جالة المبتعثات).. بالنسبة لي غيرت ديكور دوره المياه

جبت فرشات جديده وشموع وحطيت رفوف فوق التويلت تساعد على الحصول على الاشياء بسهوله لأن هالفترة باحتاج علاجات واشياء تساعد على الشفاء بعد الولادة فحلو تكون قريبة..

و حطيت نباتات صناعيه في المكان وطاوله تغيير للبيبي ، وكانت دورة المياه فيها لمبات بيضا مره ما احبها فحطيت ابجوره عشان احس بالهدوء والجمال في المكان الي باقضي فيه وقت لابأس به لي وللبيبي ..

كل هالاشياء لدورة المياة ،، بالنسبه للغرفه نقلت بعض اشجار البيت لداخل الغرفه تعطيها شكل جديد وغيرت المفرش ونظفت الغرفه زين..

وباقي البيت صلحت مطبخي وحطيت فيه صور عشان اتذكر الايام الحلوه وانسى التعب (الموضوع في هالرابط)..

يعني باختصار شديد خلي محيطك شي يسعدك وشي مريح لنفسيتك

مو لازم تشترين جديد او تغيرين شي بس هذا الي أنا حبيت أسويه ، إذا فيه حركات ثانية تسعدك ولا تحتاج تكلفة خير وبركة..

من ناحية الأكل

طبعا كثير نعتمد على المطاعم الصحيه مثل ان اند اوت / تشيبوتلي/ مطاعم عربية،

لكن قبل الولاده سويت لي كم شي وفرزنتهم مثل شوربة العدس وبعض الاكلات الي تكون صعبه التحضير لكن باشتهيها..((تمنيت اني فرزنت كميات اكبر))

واعتمدنا كثير على الوجبات الي ماتحتاج شغل مجرد تدخل الفرن مثل الدجاج و كرات اللحم الجاهزة وغيرها من قسم الفريزر بس اهم شي تكون اورقانك وصحيه..

واعتمدت بعد على الخضار اشترينا كثير من الاشياء الي ماتحتاج تقطيع يعني بس يغسلها زوجي ويجيبها مثل بيبي جزر وبيبي فلفل رومي والطماطم الصغار والخس وهكذا..

وحطيت كرتون زبادي صغار في الثلاجة واشتريت كورنفليكس من النوع المساعد على الهضم عشان نتفادى اي مشاكل هضمية هالفتره..

 واحتجت يكون جنب السرير علبه سناكات او وجبات خفيفة حطيت فيها معمول و علبه تمر وسناك بار عباره عن فايبر وبروتين ومكسرات جدا جميل وتسد الجوع في نص الليل او بين الوجبات..

وطبعا علبه المويه جنبي مليانه طوال الوقت.. بالنسبه لي كنت اصحى نص الليل اكل واصحى الفجر اكل واذا صحى زوجي الساعه ٨ تقريبا يصلح فطور يحتوي على بيض لانه مفيد لهالفتره..

وطبعا لاتنسين فيتاميناتك .. الأكل جددددددا مهم فلا تتساهلين في الموضوع وتهملين نفسك لانه خصوصا اذا كنت بترضعين بتفقدين كثير من طاقتك وتحتاجين تعويض عن الي يروح..

~~~~~~~~

نصائح متفرقة

١-النوم ممكن اول شهرين مايتعدا ٣ ساعات يوميا في الليل فانصح تنامين اذا نام البيبي اي وقت لو تقدرين..

٢-لا تنتظرين حياتك ترجع زي اول من بدايه ولادتك، تخيلي انك متبرعه لهالانسان الجديد بكم شهر من حياتك مخصصه له فقط عشان تعلمينه على هالدنيا،

لازم تحطين فبالك انه يستحق هالتعب وانه كم شهر لا شيء بالنسبه لطفل مولود..

٣-كل انسان يختلف عن غيره وكل مولود غير الثاني فلاتسمعين نصائح من غير طبيبتك او طبيبة طفلك خصوصا اذا كانت تجارب ماتستند على دراسات..

٤-استمتعي بالشهور هذي وتخيلي انها اجازه مع هديتك الي ربي عطاك..

٥-تأكدي ان كل شهر بيكون أحسن من الي قبله بإذن الله حتى لو قالوا لك كل ماكبر زادت المشاكل والتعب لا تسمعين لهم لان الي يقول كذا نسى الي مر فيه..

٦-ارتاحي ولا تلومين نفسك او تجهدينها في اي شي غير هالطفل..

٧-لاتنسين تدعين لك ولطفلك وعائلتك وقت الولادة..

٨-وقت الرضاعه الطبيعية حاولي اول الايام تكتشفين اريح طريقه بحيث يدينك تكون حره ماتشد البيبي لان بعد الولاده اليدين والعضلات مره تعبانه

فانصح ترضعين طفلك وانت مستلقيه على جنب او اي وضعيه تناسبك وفتره الترضيع اقري على طفلك المعوذات وبعدين

استمتعي بوقتك على الجوال او تفرجي شي جميل اعتبري وقت الترضيع وقت الراحه مو وقت الشغل..

(النصائح هذي اشياء تعلمتها من التجربه وكل شخص تجربته تختلف ومع التجربه كل وحده بتكون صورتها الخاصه عن كل شي)

….

وبسس هذا كل الي نحتاجه ان شاء الله ما أكون نسيت شي..

 اتمنى فادكم الموضوع لو شي بسيط والله يسهل على الجميع..

أحبكم.