- السلام عليكم.
= سلام و رحمة الله.
- انا يا عمي إسمي محمد، عندي 25 سنة، و شغال مُحاسِب ف شركة.
= حلو، معاك شهادة إيه؟
- لا إله إلا الله، بقولك انا مُحاسِب.
= ايوا يعني معاك ايه؟
- تجارة يا حاج، تجارة.
= دبلون يعني؟
- لا يا حاج، كلية.
= حلو، ندخل بقى ف الموضوع، و نشوف انت ليك ايه و علينا ايه..
- عليكوا ايه يا حاج، انتوا معلكوش حاجة، العريس بيتكَفَّل بكل شيء، و ده ف الشرع و الدين كدة، بالبلدي يعني العريس بياخد البنت بشنطة هدومها.
= مين يابني اللي قال لك كدة؟ يابني دي أصول، انت بيبقى عليك حاجات و انا عليا حاجات، مفيش حاجة إسمها تاخدها بشنطة هدومها.
- انا بكلم حضرتك ف الصح.
= طيب ماشي خلينا نتكلم ف الصح..، انت هيبقى عليك الأجهزة الكهربائية و أوضة النوم و الصالون، و إحنا علينا المطبخ و الحمام، بس البانيو عليك.
- لا ما هو أصل انا مش موضب غير أوضة النوم بس، الشقة فرشها مش كامل، بس إن شاء الله نكمله أنا و هي ع خير.
= يعني ايه فرشها مش كامل؟ يعني انت عايز بنتي تدخل من غير فرش، و الناس تاكل وشنا؟!
- ما إن شاء الله هنفرشها انا و هي ع مهلنا.
= طب نتكلم ف الدهب، بص انا بنتي لازم لها 80 جرام دهب، هي مش أقل من بنت خالها.
- 80 جرام؟!! كتير يا حاج، و هنعمل بيهم ايه؟ مالوش لازمة التبزير ده.
= هو ايه اللي تبزير، يعني انا مثلًا بغلّي عليك؟ دنا مراعي حالتك، و إنك معندكش عفش، عايزني كمان اتنازل لك عن الدهب؟
- يا حاج انا ماقلتش تتنازل، بس مش كدة، اللي انت بتقول عليه ده يدخل له ف أكتر من 70 ألف جنيه، و ده حرام، يعني إحنا مش هنعمل حاجة بالدهب ده.
= الدهب بيبقى له عوزة بعد كدة، بيبقى فلوس مركونة.
- طب ما إحنا ممكن نحط فلوس ف البنك و خلاص، و بعدين انا مش ف مقدرتي أجيب اللي انت بتقول عليه ده..، و بعدين الرسول قال خاتم من فضة، أو من حديد. يعني مش شرط دهب.
= هو ايه يابني اللي حديد و نحاس ده، انت عايز الناس تاكل وشنا و يقولوا إن بنتي دخلت بخاتِم حديد؟
- ناس مين ياحاج، انت بتديها ليا ولا للناس؟ مايتحرقوا الناس.
= كُل اللي يعجبك و إلبس اللي يعجب الناس يابني.
- فرضنا إن الناس مابيعجبهاش العجب، أعمل ايه؟ يا حاج راعيني، أنا جاي و طالب إيد بنتك ع سُنِّة الله و رسوله، مش ع سن سُنِّة و تقاليد الناس.. !
= يابني دي أصول، لازم الكل يحكي و يتحاكى بفرحكم و الدي جي و المعازيم اللي هيرجعوا بيوتهم فرحانين.
- دي جي !! يا حاج إيه لازمة الدي جي و الفرح ده كمان؟
= هو انا كل ما أقول لك حاجة تقولي لازمتها ايه؟!!
- ما هو أصل مش منطقي لما أدفع أكتر من 10 آلاف او 15 ألف لواحد يجي يشغل لنا أغاني، عشان ف الآخر الناس تيجي ترقُص و تهيَّص و يمشوا، ده بِدعة، و ربنا و الرسول ما قالوش كدة، إحنا فعلًا بقينا ماشيين ع سُنِّة و تقاليد الناس.
= انت شكلك كدة يابني مش جاي تتجوز.
- انا جاي اتجوز بنتك ليا، عشان أستقر ف حياتي و ابني أسرة، مش عشان أمشي اتفشخر بيها قدام الناس، و أقول شوفوا مراتي اللي ماشية بنص كيلو دهب أهي.
= و لما انت كل ما اقولك حاجة تقولي حرام و قال الله و قال الرسول، أمال جاي و معاك ايه تتجوز بيه؟
- انت هتدي بنتك لراجل يعرف يصونها، و يحافظ عليها، ميبهدلهاش معاه، يبقى عادل ف بيته، يقدر يحكم ما بين أهله و مراته بحق الله من غير ما يزعَّل حد.. انت بتدي بنتك لراجل شغال و بيعرف يجيب القرش الحلال كويس، انت بتدي بنتك لراجل محترم و علاقته بربه و أهله ممتازة..، سبت انت كل ده و مسكت ف الفرح و الدهب، و كل البِدَع دي، و حطيت كلام الناس فوق دماغك.
= بقول لك ايه يابني، لو جاي هنا عشان تتجوز بالكلمتين دول، و تقولي مفيش دهب و مفيش مش عارف ايه، يبقى الباب يفوِّت جمل، انا معنديش بنات للجواز.
- ربنا يهديك، و تمشي ع سُنِّة الله و رسوله، و تخلي كلام الناس و رأيهم ف الأرض ولا يفرق معاك..
*تمت*
.